Read kirikeni Izikịẹl 12 Bible Online

Izikịẹl 12 - kirikeni bible

Izikịẹl 12

¹Nyanaḅọ Ḅe ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “tịḅịḅiekụrọ apụ ogboku ị́ anga waraḅẹ. Ini tọrụmgbọlụ nyanamẹ, ọkụma gbọrịye sọnị ini ọrịkẹ, ini ḅeri nyanamẹ, ọkụma gbọrịye sọnị ini naakẹ, anịatịḅị ini anị tịḅịḅiekụrọ apụ-ẹ.

³“Mịọkụ, tomoniḅọ tọkụ, so mun jịn ama ḅie ịnyasọ ḅịaḅọ ḅara nwọse ye koḅiri, enema gbẹịnka simeogbo; ye nweni mamgba ị́ ọrị na ị́ya ama ị́ nwọ koroma so jịn anga mun aḅẹ. Sosi ini ị́ mịẹarịye mị kaịnḅoḅịa inia tịḅịḅiekụrọmẹ nwọḅẹ sọnị.

⁴Enekaka ḅụ ị́ se pakasoḅịaye ma koḅiri, mịẹsosịkị ini ị́ ọrịḅịa ḅara; pịkị mịẹ na sasoḅiri ḅụ ị́ so jịn anga mun-arị ọkụ ini nwọ ọrị.

⁵Ini nwọ ị́ ḍikiarị sịkị, ị́ya warị agbagba ḅụ gbọrị anga nwọ kanfinji se anịa ḅie ị́ koḅiriaye ma na toluḅọrọ.

⁶Ḍọkịḅo ọrị na ị́ nwọ ị́ koḅiriaye ma deki ị́ya aba gbana sịkị, ị́ tọrụmgbọlụma àrị gbẹịn waraḅẹ, se nwẹngị kanakana mị ḅie sọ se ye ini ị́ ọrị na ị́ mun-arị nyọ mị ị́ ọrịkẹ. Anịatịḅị ị́ mịẹye mị anị ḅerijineye sọ Izrẹlapụma pịrịḅịa.”

⁷Nyanaḅọ Ḅe ị̀ ḅẹ na mịẹ nwọḅẹye mị à mịẹmẹ. Anị ene à ye koḅirimẹ ini ama ḅie depakụmaḅọ yekoḅiri ọkụ, à pịkị anị sasoḅiri ḅụ ị́ ḅarama se warịagbagba soku tolumamẹ se kanakana ḅie nwẹngị pakamẹ. Ini ị́ ḍikiarịogbo, à koḅiriaye ma deki ị̀ya aba gbanase pakasomẹ.

⁸Ene ḅa dedeḅie Nyanaḅọ Ḅe ọkwẹịn ị̀ pịrịmẹ.

⁹“Tomoniḅọ tọkụ,” ọ̀ nwọ ḅẹmẹ, “mịọkụ ini tịḅịḅiekụrọ Izrẹlapụma mị cheye ị́ nwọ mịẹ-anọ nwọse ị́ gbelaḅịa sịkị,

¹⁰nwọse ini ḅẹ, mịn anị Ị̀rị̀, Kụrọmamgba Nyana Tamụnọ Ḅe ḍuko ọ́ pịrịarịye-ẹ. Mịn oku mị anị sime Jerusalẹm ḅie tịḅịda ḅọḅe na pịkị anịa ḅie anga apụ mamgba na pịrịmẹ.

¹¹Ḍuko ini pịrị na ị́ mịẹye mị anị tọrọkọju inia ḅụ pakaḅịaye-ẹ—ini kụrọḅara se ó desin se ó mun omoniapụ sọḅịa.

¹²Ọ́mịna ḅie sime tịḅịda ḅọḅe, ori ḅara na yekoḅiri se àrị deki oria aba gbana se kanakana ḅie ini warịagbagba ḅụ tolu ọ̀ pịrị nyọ mị ḅie ḅọrọ mangị pakaḅịa. Ò ye se ọ̀ tọrụmgbọlụma gbẹịnḅịa, mịẹse ò mun-arị anga ọ̀ nwọ ọrịẹka ḅara.

¹³Anịsịkị àrị ị̀ya ịgbọ mị finjima se ò kunḅịa; se àrị ò se Babilọn opuama mị munḅịa anị ọrịka ḅaraḅụ, anị nyọ ḅụ ò sime fịḅịa.

¹⁴Orina ḅẹrẹtọn àrị apụma na, ò tetema àrị apụma na, ò koruarị owunima na, àrị ini galagalama nyọ nyọ ḅụ wasamaḅịa, tomoni pịkị ini ḅaaḅịa ẹrẹchị ini ḍọkịḅịa.

¹⁵“Anịsịkị ini nemiḅịa na Ị̀rị̀ anị Nyanaḅọ Ḅe-ẹ, àrị ini galagalama jịn sẹma ḅie na pịkị sikima sẹma na wasamaḅịa sịkị.

¹⁶À mịẹḅịa ọmụ ḅie kala apụ ḍumoḅụ pakaḅoḅịa, pịkị ḅuruḅaa na obi na ḅie, mịẹso sịkị ini sime sẹma ḅie inia ḅụgbẹịnka mịẹmịẹaye ma ini nwọ ḍukopakụma se kaịnḅo nyana, na Ị̀rị̀ anị Nyanaḅọ Ḅe-ẹ.”

¹⁷Nyanaḅọ Ḅe ọkwẹịn ị̀ pịrịmẹ.

¹⁸“Tomoniḅọ tọkụ,” ọ̀ nwọ ḅẹmẹ, “ḅụgeregere ḅụ ye fị, pịkị ḅụgeregere na ḅalafa na ḅụ mengi ḅụ.

¹⁹Ḍuko tomonima pịrị na mị Kụrọmamgba Nyana Tamụnọ Ḅe ḍuko Jerusalẹm ama mị ḅie anga Izrẹlapụma pịrị oku-ẹ: Ḅụgeregere ḅụ ini yefịḅịa, ini pịkị ḅalafa na ḅụgeregere ḅụ na mengi ḅuḅịa. Inia ama mị anị papaḅụ sinḅịa, anịa ḅie ḅụ anga apụ kọn oloko kan ḍumoma gose.

²⁰Tomoni anga ḅeinma opuama mamgba ini àrị kan gbinḅịa, se sẹ mị ini anị se piri ele mịẹḅịa. Anịsịkị ini nemiḅịa na Ị̀rị̀ anị Nyanaḅọ Ḅe-ẹ.”

²¹Nyanaḅọ Ḅe ọkwẹịn ị̀ pịrịmẹ.

²²“Tomoniḅọ tọkụ,” ọ̀ nwọ ḅẹmẹ, “cheye gose Izrẹlapụma sịkịmamgba mị kaḅo nwọ kọnkọn: ‘Sịkịna sịkịna ḅụ ini ḍukoḍuko ọ́ pịrị na ọ́mịna ḅụ pakaḅịa nwọḅẹ ayema pakaka?’

²³Mịn Ị̀rị̀, Kụrọmamgba Nyana Tamụnọ Ḅe ḍuko ọ́ pịrịarịye-ẹ. Mịn kaḅo mị à mịẹse anị kulumaḅịa. Izrẹl ḅie ini ḅarị jịn sịkị seni anị kọn ẹkẹ ngịsị. Ọkụma ḍuko ini pịrị, sịkị mị ḅo lasam, ini ḍuko ini pịrịpịrị na iniaḅụ pakaḅịa nwọḅẹ ayema àrị ḅo kọkọma aye sọḅịa!

²⁴“Izrẹlapụma ḅie tẹmẹ anga ini ḍuko ini pịrịarịye ma ḅieḅụ iruoaye ḅarị paka ẹkẹ, anịkanịka nweni dairima ịkịan ḅarị kọn ẹkẹ.

²⁵Ị̀rị̀, Nyanaḅọ Ḅe ḅarana ọkwẹịn ini pịrịḅịa, à ḍukoye pịkị mịẹḅịa. Sịkị ḅarị ngịsị fa ẹkẹ. Ọ́mịna ḍumosịkị ḅụ, ómine tịḅịḅiekụrọ apụ, àrị ọ́mịna ḅeri jinejine na à mịẹḅịa nwọḅẹ ayema, à mịẹḅịa. Mịn anị Kụrọmamgba Nyana Tamụnọ Ḅe ḍuko ọkụ-ẹ.”

²⁶Nyanaḅọ Ḅe nwọse ị̀ ḅẹmẹ,

²⁷“Tomoniḅọ tọkụ, Izrẹlapụma ini nwọ ḅẹaḅẹ na tẹmẹ ḅụ ị́ ọrịaye ma na ị́ koroarị ịkịan ma na àrị sime ḅọlọsịkị laḅịa-ẹ.

²⁸Anịẹrẹchị ḍuko ini pịrị na, Ị̀rị̀ Kụrọmamgba Nyana Tamụnọ Ḅe, ḍukoaḅẹ: Sịkị ḅarị ngịsị fa ẹkẹ. À ḍukosaye ma àrị mịẹḅịa. Mịn anị Ị̀rị̀, Kụrọmamgba Nyana Tamụnọ Ḅe ḍuko ọkụ-ẹ!”