Read kirikeni Izikịẹl 13 Bible Online

Izikịẹl 13 - kirikeni bible

Izikịẹl 13

¹Nyanaḅọ Ḅe nwọse ị̀ ḅẹmẹ.

²“Tomoniḅọ tọkụ,” ọ̀ nwọ ḅẹmẹ, “nwọ Izrẹl ḅie mịna ḅarakuḅu ịkịankoro àrị apụma, ḍuko ini pịrị na ini iruo apụ-ẹ. Ḍuko ini pịrị na ini Nyanaḅọ Ḅe ọkwẹịn mị poki.”

³Mịn Kụrọmamgba Nyana Tamụnọ Ḅe ḍukoye-ẹ: “Fa sime yenemika ịkịankoroapụma pịrị! Ini ngẹrị inia koroma ḅụ tẹmẹḅụ ọrịkaye nwọ ḍukoarị apụma.

⁴Izrẹlapụ, ọ́mịna ịkịankoroapụma ini yesọka so ọkụma, kanfamasa opuama ḅie anga pụnụ sime ọkụ anị ini sime ọkụ-ẹ.

⁵Onu agbagba ma ḅịkịsara nyọma ini korukẹ, ini pịkị ḅarị anị namakẹ, mịẹso sịkị Nyanaḅọ Ḅe oria ọmụ gbin ene mị ḅoḅịa sịkị, anị Izrẹl mị ḍụa ẹka ọkụ.

⁶Tẹmẹ ḅụ ini ọrịaye ma iruoaye-ẹ, ini pịkị koroma se ḍukoarịaye ma sọ papa aye-ẹ. Ini ḅẹmẹ na ị̀ya oku anị ini ḍukoarịye-ẹ, ọkụma àrị oku se ini fịrịmakẹ. Anịẹḅẹsọ, ini pa tọrụseḍikiaḅẹ na inia ọkwẹịn ma ḅo kọkọmaye sọḅịa.

⁷À ḍuko ini pịrịmẹ: Tẹmẹ ḅụ ómine ọrịaye ma iruoaye-ẹ, ọ́ pịkị koromase ḍukoarịaye ma sọ papa aye-ẹ. Ọ́ nwọ ḅẹmẹ na ọkwẹịn ma ị̀ya ọkwẹịn-ẹ, ọkụma àrị ọkwẹịn kọn ọ́ pịrịkẹ!”

⁸Anịẹrẹchị Kụrọmamgba Nyana Tamụnọ Ḅe nwọse ini ḅẹaḅẹ, “Ọ́mịna ọkwẹịn ma karakarakaye-ẹ, ọ́ pịkị tẹmẹ ḅụ ọrịaye ma sọ papa aye-ẹ, anị gose àrị ómine na tụḅụrụ aḅẹ.

⁹À fomuḅara se ọ́ pịrị-ẹmun-aḅẹ, ómine iruo ịkịankoro pịkị ọ́mịna koroma ma ḅụ pakakaye ḍuko se nweni ma dairima àrị apụma. Ị̀ya tomonima koḅiria se ḅẹrẹ ḍukoḅịa sịkị inia ḅie ó sime ẹkẹ; Izrẹl ḅie anga apụma ḅie ọ́mịna ẹrẹ ma sime ẹkẹ. Ọ́ ḅarị pịkịmaḅo ọ́mịna ama mị la-ẹkẹ. Anịsịkị mị ó nemiḅịaye-ẹ na Ị̀rị̀ anị Kụrọmamgba Nyana Tamụnọ Ḅe-ẹ.

¹⁰“Ịkịankoroapụma ini ị̀ya tomonima dairimamẹ, ini ḍuko ini pịrịmẹ na yemamgba dein waraḅẹ. Deinma ngịsị oforikaḅụ! Ị̀ya tomonima ịnyọ ḅụ oforika warị agbagba nwọ namamẹ, anịsịkị ịkịankoroapụma ḅo ḅịaḅịa agba se anị tanmẹ.

¹¹Ḍuko ịkịankoroapụma pịrị na inia warị agbagba ma àrị mun ḅịkị-ẹmuaḅẹ. À kụrọ ene fịrịma se àrị kangbinḅịa. Obi tụnụ ene-a mgbọlụ anịa ọgọnọ koroḅịa kụrọ fọrụ pịkị anị dapakaḅịa.

¹²Warị agbagba mị ḅịkịḅịa, anịsịkị tomoni pịkị ó gbelaḅịa na, ó se anị ọmbị ḅịaḅịa agba mị anị che sọye nwọ mịẹsa.”

¹³Mịọkụ mị Kụrọmamgba Nyana Tamụnọ Ḅe ḍukoye-ẹ: “Ị̀ya ịganị ḅụ à kụrọ fọrụ na irisi na pịkị obi tụnụ ene-a mgbọlụ na se sẹịn anị warị agbagba ma kansinḅịa.

¹⁴Ini ḅịaḅịa agba se tan warị agbagba ma à kangbinḅịa, àrị anị kọsịmaḅịa se anịa chuku sẹkẹ ḍụparịma se yeḅụsọkaye nwọ mịẹḅịa. Anị ḅịkị sịkị óminemgba anịnasọ fịfamaḅịa. Anịsịkị mị tomoniḅọ goyegoye nemiḅịaye-ẹ na Ị̀rị̀ anị Nyanaḅọ Ḅe-ẹ.

¹⁵“Warị agbagba mị na, ḅịaḅịa agba se anị ọmbị apụma na, ị̀ya kụrọ ịganị ini laḅịa. Anịsịkị à ḍuko ọ́ pịrịḅịa na, warị agbagba mị na, agba se anị ọmbị apụma na ini ḅarị sime ẹkẹ—

¹⁶anị dein oforika sịkịḅụ ḍuko Jerusalẹm apụma kuḅie kụrọma na dein omi-ẹ nwọḅẹ ịkịankoroapụma na!” Mịn Kụrọmamgba Nyana Tamụnọ Ḅe ḍuko ọkụ-ẹ.

¹⁷Nyanaḅọ Ḅe nwọ ḅẹmẹ, “Mịọkụ, tomoniḅọ tọkụ, eremeni ma ḅie ngẹrị mịna koroma se tọrọkọju pakaḅịaye ḍukoarị apụma ḍiki. Ini na tụḅụrụ ịkịankoro se nwọḅẹ

¹⁸mịn anị Kụrọmamgba Nyana Tamụnọ Ḅe ḍuko ọ́ pịrịarịye-ẹ: “Fa sime ómine eremeni ma pịrị! Ómine tọrụ ọbịrịma aye se ḅịtẹ mịẹ se ọrụḅọḅọ pịrị ini se inia ḅarama ḅụ kpọ, pịkị tọrụ ọbịrịma aye se tịḅị kpọ aye mịẹ se ini pịrị ini se inia tịḅị ma kpọ mẹ, mịẹso sịkị ini jịn apụ ḍumo ḅụ kụrọ nyana. Ó ḅi mẹ fị na ḍumo na kụrọ ọ́ nwọ nyana ị̀ya tomonima ḅụ, ó se ḅo sọye mịẹ ọ́mịnaḅụ pịrịḅịa ḅara.

¹⁹Ị̀ya tomonima ogboku ómine ị̀ simamẹ, ḅarakuḅu ḅeinka ịpịamgba kalaye na fịturu kalaye na gose. Fị gbẹịnka apụma ọ́ nwọ ḅaamẹ, anịsịkị ḍumo gbẹịnka apụma re ọ́ nwọ wẹrịsomẹ. Ómine iruo kọn ị̀ya tomonima pịrị se ini ọ́mịna iruo ọkwẹịnma ḅereni ọkịmẹ.”

²⁰Mịọkụ mị Kụrọmamgba Nyana Tamụnọ Ḅe ḍukoye-ẹ: “À taraka nyana se ó se ọ́mịna ḅarama ḅụ kpọ, se ḅẹrẹtọn fị na ḍumo na pịrịarịaye ma pịrịmẹ. Àrị àrị kansinḅịa ọ́mịna ḅarama ḅụ, se ómine àrị se ḅẹrẹtọn pịrịarị apụma inia ḅụ ma kaịnḅoḅịa se finsoḅịa feni finso ọkụ.

²¹Àrị ọ́mịna tịḅị kpọ ḅịtẹma kanị sinḅịa se ị̀ya tomoni, ọ́mịna kụrọ mị chukuḅie sime apụma gbọtụḅara mangịsoḅịa. Anịsịkị ó nemiḅịa na Ị̀rị̀ anị Nyanaḅọ Ḅe-ẹ.

²²“Ọ́mịna iruo ma, ọ́ nwọse karakaraye mịẹ apụma kuḅie ma lọkọmamẹ, anịẹḅẹsọ ma àrị iniaḅụ ḅarasinkẹ. Ó siye mịẹ apụma inia kuḅie kụrọmamẹ, na inia siamịẹmịẹaye ma ḅie ini vinpịkị se inia ḍumo ma ḍụaḅọrọma.

²³Anịẹrẹchị mịọkụ tẹmẹ ḅụ ómine ọrịaḅẹ nwọḅẹ iruo ayema na, ọ́ pịkị ngẹrị koroma ḍuko se nweni ma dairima ayema ọ́ ḅarị ọrị ẹkẹ. Àrị ị̀ya tomonima ḍụaḅọrọmaḅịa ọ́mịna kụrọ mị chukuḅie, mịẹso sịkị ó nemiḅịa na Ị̀rị̀ anị Nyanaḅọ Ḅe-ẹ.”