Read kirikeni Izikịẹl 17 Bible Online

Izikịẹl 17 - kirikeni bible

Izikịẹl 17

¹Nyanaḅọ Ḅe nwọse ị̀ ḅẹmẹ.

²“Tomoniḅọ tọkụ,” ọ̀ nwọ ḅẹmẹ, “kaḅo kọn Izrẹlapụma pịrị

³mịẹse ini nemi na Ị̀rị̀ anị Kụrọmamgba Nyana Tamụnọ Ḅe mị à ḍuko ini pịrịarịye-ẹ: Gbọrị opu igo omi-ẹ, iḅi pịkọ na pamba na ọ̀ nwọ finjima saramẹ. Ò fin Lẹbanọn Tụndụ ma ọgọnọ mun se awụ eje ḅịpịokolo nwọ anyịmamẹ,

⁴ori anị deki se yedẹrị ama nwọ mun fẹḅịa apụ tọrọkọ koromamẹ.

⁵Ori ịwọ chịn nwọ ọkịḅo Izrẹl ama ḅie ḍipimẹ iḅi kiri ḅụ, mengi sịkịmamgba sime se anị mịẹ sẹnịmaḅịa nyọ.

⁶Chịn mị sẹnị se geleka ḅụ ḅarama finji tụmgbakị irumịẹ chịn nwọ sọmẹ. Ịkpangị sẹnị ọgọnọju igo ḅe damamunmẹ, ikunoma kiri ḅie sọmunmẹ. Ịnyanya ma na ịkpangị ma na irumịẹ chịn mị gbẹịnmẹ.

⁷“Jịn opu igo omi-ẹ opu pamba na ịnyọ na imgbe na nyanamẹ. Iru mịẹ chịn mị anịa ikunoma chụa ọ̀ damamunmẹ pịkịna anịa pamba ma na, koromamẹ na ori iḅi mengi se anị pịrịtẹịn ini anị se ḍipi anga ḅụ mengi mị nẹngịḅịa.

⁸Ọkụma irumịẹ chịn mị ini anị se iḅi kiri ḅụ ḍipi ḅọrọsam, mengi iḅiọkụ sime se mịẹso sịkị anị iḅiọkụma sẹnị se ịnyanya na chịnmgbọlụ na chụa se iḅi irumịẹ chịn sọḅịa gose.

⁹“Anịẹrẹchị Ị̀rị̀, Kụrọmamgba Nyana Tamụnọ Ḅe nwọ gbela aḅẹ: Mịn irumịẹ chịn mị anị ḍumo se sẹnị ḅe? Tatarị igo ḅe ori irumịẹ chịn eje mị ḅe ikuno ḅụ anị burasin ẹka, chịnmgbọlụma pọkọsin, ịkpangị ma anyịma sin, se àrị samịna ma ẹka? Anị kụrọ ịnyọ nwọ ḅi ẹkẹ anịkanịka opu sẹ nwọ ḅi ẹkẹ anị buragbin.

¹⁰Iin, ini anị ḍipimẹ, ọkụma anị ine ḍumo se sẹnị ḅe? Anị samịna ẹka ọgọnọ fọrụ mị fie anị laḅịa sịkị? Anị samịna ẹka anị sime sẹnị anga ḅụ?”

¹¹Nyanaḅọ Ḅe nwọse ị̀ ḅẹmẹ.

¹²“Mịna tịḅịḅie kụrọ apụma gbela mị kaḅo mị ini kaịnḅo. Ḍuko ini pịrị na Babilọn amanyanaḅọ ḅe Jerusalẹm ḅomẹ se inia amanyanaḅọ ḅe na oria ḅẹrẹkọn apụma na deki Babilọn ḅie mun mẹ.

¹³Ori amanyanaḅọ ḅe furo ḅie gbọrị furo na ọḅọkụ fịmẹ na ini omonisọ ọ̀ pịrịḅịa. Yela apụma ọ̀ nwọ ọkị se oria fịrịnwẹngịapụ nwọ mịẹmẹ

¹⁴mịẹso sịkị ama mị ḅarị sẹnịḅo mịnaḅụ nyana ẹka gose pịkịna ọḅọkụ mị simegbasoḅịa ọkụ.

¹⁵Ọkụma Juda amanyanaḅọ ḅe sitịḅị chụamẹ, ori oku se Ijipt fịrịmamẹ na ori asụn na opu owuni na nwọse ọ̀ fịrịma. Anị ḅịrị ọ̀ pịrịḅe? Ori ine anị na sọ ḅe? Ori ine ọḅọkụ mị kan se fomuḅara ọ̀ la ẹka ọkụ ofori-ẹ!

¹⁶“Ị̀rị̀ nwọ ḍumogbaso Tamụnọ ḅaraḅụ,” anị Kụrọmamgba Nyana Tamụnọ Ḅe ḍuko ọkụ-ẹ, “ḅe amanyanaḅọ ḅe Babilọn ama ḅie ò sime fịḅịa anịatịḅị oria ọḅọkụ mị nwọ kanmẹ, pịkịna ò se emine mị ọgọnọ koroma Babilọn amanyanaḅọ ḅe na ori na nyana ḅịpịogbosọ mị na.

¹⁷Ijipt kụrọ owunima sọnị ini ineda Babilọn na owusọ ẹkẹ ḅarachụa ọ̀ pịrịḅụ, ini inia ḅọị-a nyọma soku se tọn apụ ḅaaḅịa sịkị.

¹⁸Ori oria ọḅọkụ mị na ḅịpịogbosọ mị na kanmẹ. Maye mamgba ọ̀ nwọ mịẹmẹ, ọ̀ mangị soḅịa ọkụ ofori-ẹ.”

¹⁹Kụrọmamgba Nyana Tamụnọ Ḅe nwọ ḅẹmẹ, “À ḍumo warasịkị, ị̀ya ẹrẹ ḅụ ọ̀ fị ọḅọkụ mị kan gose à fomuḅara se ọ̀ pịrịḅịa.

²⁰Namatẹịnḅọ ịgbọ à nwọse ò kunḅịa. Àrị ò se Babilọn mun se ḅụfụka se ọ̀ pịrịḅịa anịatịḅị ori ị̀ ḅụḅụ ḅereni nyanakẹ.

²¹Oria iḅitẹịn owunima ini fịḅịa owu mị ḅie, owu ḅie pakaḅoḅịa apụma ini galagalaḅịa. Anịsịkị ó nemiḅịa na Ị̀rị̀, Nyanaḅọ Ḅe ḍukosam.”

²²Mịn anị Kụrọmamgba Nyana Tamụnọ Ḅe ḅẹ ọkụ-ẹ: “Awụ nangwọ eje mị ḅịpị okolo à nwọ ọkịḅịa pịkịna ịwọma paka àrị chịn ḅịpị okolo nwọ anyịmaḅịa; àrị anị se gele tụndụ ọgọnọ ḍipiḅịa,

²³Izrẹl nangwọtẹịn tụndụ ọgọnọ. Anị ịkpangị chụa pịkịna chịnmgbọlụ chụaḅịa ḅo iḅi awụ eje nwọ sọḅịa. Tọn-a feni anịa ọgọnọ ḅụ anga pịkịna ḅọị nyọ nwọ nyanaḅịa.

²⁴Ama mị ḅie sime eje mamgba nemiḅịa na Ị̀rị̀ ma anị Nyanaḅọ Ḅe-ẹ. À gele ejema pẹlẹkoromamẹ pịkịna gbolu ejema mịẹ àrị nangwọmẹ. Ḍumo ḅụ sime eje à nwọ samịnamamẹ pịkịna ḍumo se samịna eje pịrịmẹ. Ị̀rị̀, Nyanaḅọ Ḅe ḍukosam. À ḍukosa yemị à mịẹḅịa.”