Read kirikeni Izikịẹl 19 Bible Online

Izikịẹl 19 - kirikeni bible

Izikịẹl 19

¹Nyanaḅọ Ḅe ị̀ ḅẹmẹ na à mị kururu nime mị chu se mama amanyanapụ awọma nwọ pịrị Izrẹl ama ḅie:

²Ị́ nyengima ịrọrọ chịrịḅa-ẹ! Tọrụ opuma kụrọ chịrịma ḅie anị árịa awọma á nwọ ḍikiḍikipakụmaḅoye-ẹ.

³Árịa awọma jịn-a nama kun ọkụ à nwọse àrị ḍiepakụmaḅomẹ, àrị ḅo tomoni pẹị apụ nwọ sọmẹ.

⁴Jịn-asẹ ḅo anị naa se ḍẹịn tu se ò kunmẹ oluluḅie. Ini ikoli ḅụ ò dekiso Ijipt nwọ mun mẹ.

⁵Á korumẹ ọkịmun á ḅarị tọrụse ḍikiye nyanakẹ. Á ḅo jịn owutọkụ nwọ yi mẹ, ọ̀ sẹnịḅo ḅalafama chịrịḅa nwọ sọmẹ.

⁶Ò ḅo owutọkụ nwọ lasịkị, ori ísí-a chịrịḅama na timẹ. Ori sọnị ḅo nama ḅaa ọkụ nwọ ḍawọ se ḅo tomoniḅọ pẹịḅọ nwọ sọmẹ.

⁷Tọn-a nyọ na ama na ọ̀ nwọ kanmẹ. Ama ma ḅie sime apụma inia ḅalafamẹ ori oloku sịkị goyegoye.

⁸Se sẹma koḅiria se ḅo ori na owusọmẹ; nweni tọn-a nyọ ḅụ ḅomẹ. Ini inia nama kun ịgbọ ma finjimamẹ se inia ḍẹịn ma ḅie ò kunmẹ.

⁹Ini ò se ịkata ḅie chụamẹ se ò dekiso Babilọn amanyanaḅọ ḅe damamunmẹ. Ini nweni se koroma ò ḍikiḍikimẹ, mịẹse tomoni ḅarị oria oloku mị naa ẹka ọkụ Izrẹl chịngịma ọgọnọ.

¹⁰Ọ́mịna nyengima mengi aka ḅụ ḍipi tụmgbakị elelenda irumịẹ chịn à nwọ kịkẹmẹ. Anịatịḅị ḅaka mengi sime nyọ gose, irumịẹ chịn mị anị ḅaka ịnyanya na chịnmgbọlụ na nwọ chụamẹ.

¹¹Anịa ịkpangị kụrọ pịkịna sẹnịḅo amanyana warị amgbara nwọ sọmẹ. Iru mịẹ chịn mị anị sẹnị mun soḅuno mị lamẹ; tomoni mamgba anị ḅaka ịnyanya chụa ọkụ na anịa gele na nwọ ọrịmẹ.

¹²Ọkụma ịganị ḅara anị bura sinmẹ ikunoma na se anị se kiri ḅie gbinkoromamẹ. Ịrụapakapaka nyọ da fọrụ mị anịa chịnmgbọlụma samịnamamẹ. Arịa ịkpangị mamgba anyịsam, arịmgba pịkịna fịnị ḅie sọ dọkịmẹ.

¹³Mịọkụ ini anị se eleogbo ḅụ ḍipisam, samịna pịkịna mengi ngịsị ofori nyọ ḅụ.

¹⁴Iru mịẹ chịn mị ḅiri ḅụ fịnị pakamẹ; fịnị mị anịa ịkpangị ma na chịnmgbọlụma na dọkịmasinmẹ. Ịkpangị ma ḅarị ngịsị kụrọ ẹkẹ, anị ḅarị amanyanaḅọ amgbara nwọ sọ ẹkẹ. Mịn kururu nime-ẹ; ini ḅarị ḅarị anị chumẹ.