Read kirikeni Izikịẹl 20 Bible Online

Izikịẹl 20 - kirikeni bible

Izikịẹl 20

¹Sọnọmẹ karama kụra mị ḅie ḅụ, sọnọ karama akalụ mị ḅie ḅụ, oyi karama ene mị ḅụ, wa desin ḅie sime sịkịḅụ. Izrẹl ama mị ḅie tọn-a tịḅịnịapụ ị̀ damaḅomẹ, ḅo Nyanaḅọ Ḅe ḅietọnye nwọ gbela nemi gose, ini ị̀ tọrọkọ ḅụ kpọnjị simemẹ.

²Nyanaḅọ Ḅe ọkwẹịn ị̀ pịrịmẹ.

³“Tomoniḅọ tọkụ,” ọ̀ nwọ ḅẹmẹ, “ḍuko mịna tomonima pịrị na Kụrọmamgba Nyana Tamụnọ Ḅe nwọ ḅẹaḅẹ: Ó ḅo ị̀ ḅietọnye nwọ gbela nemi-ẹ ḅomẹ, ọkọ pakaka? Ị̀rị̀ anị ḍumogbaso Tamụnọ-ẹ nwọḅẹ sịkị goyegoye, à ḅi ẹkẹ ó ye se ị̀ gbela. Ị̀rị̀, Kụrọmamgba Nyana Tamụnọ Ḅe à ḍukosam.

⁴“Tomoniḅọ tọkụ, ị́ ḅụ karakarama se ḅẹrẹkọn inia ḅara sima ḅe? Ngwanị ọkọ mịẹ. Inia ḍapụma mịẹ ḅụgbẹịnkaye ma se inia ḅiekoroma.

⁵À ḍukoarịye nwọ ḍuko ini pịrị. Àrị Izrẹlapụma sẹlẹ sịkị, à ye ḅereni ini pịrịmẹ. Àrị ị̀ ḅụ se ini ḍiemẹ Ijipt ama mị ḅie se ḍuko ini pịrịmẹ na: Ị̀rị̀ anị ómine Nyana Tamụnọ Ḅe-ẹ.

⁶Anịsịkị mị à ḅereni ini pịrịye-ẹ Ijipt ama mị ḅie ini ọkịpakụmaḅo pịkịna ini se mun à sẹlẹ ini pịrị ama mị laḅịa, iḅiḅara sime pịkịna lọkọlọkọ kiri, iḅitẹịn amakiri.

⁷Àrị ini ḅẹmẹ na ini inia ḅụngụngụ ma oru ma se gbin wokuma ini ḅẹlẹma nyana pịrịayema, se ini Ijipt apụ iruo-a oru ma se iniaḅụ ịlọlịmama, anịatịḅị Ị̀rị̀ anị Nyanaḅọ inia Tamụnọ Ḅe-ẹ.

⁸Ọkụma ini ị̀ ḍikisima pịkịna ị̀ ḅịpị poki ḍụkụkẹ. Ini inia ḅụngụngụ ma oru ma se wokumakẹ, pịkịna Ijipt apụma oru ma ḅụ ḅarasin ḍụkụkẹ. À ḅụkarakaramamẹ mịẹso sịkị Ijipt ama mị ḅie ini ị̀ya opu ịganị mị nwọ nemi.

⁹Ọkụma àrị ọkọse anị mịẹ ẹkẹ, mịẹse ḅụgerere ḅo ị̀ya ẹrẹ mị la ẹka gose, anịatịḅị ini na anga apụma ogboku ḅụ à ḍukopakụmasam na àrị ini pamun paka soḅịa, Ijipt ama mị ḅie.

¹⁰“À kọkọma Ijipt ama mị ḅie ini ọkịpakụmaḅo onwun ele ḅie nwọ lamẹ.

¹¹Àrị à tọn ayema na ị̀ya olokoma na se ini ḍiemẹ, ḍumo se àrị kokoḅọ goyegoye mamgba pịrịḅịaye mị.

¹²Ịnyọ Sara Ene mị koko mị à se ọḅọkụ nwọ mịẹmẹ inina-ị̀rị̀-na ogboku ḅụ, se inia ḅiekoroma na Ị̀rị̀, Nyanaḅọ Ḅe-ẹ, ini mịẹfịafịamamẹ.

¹³Ọkụma onwun ele mị ḅie sọnị ini ị̀ ḅịpị poki ḍụkụkẹ. Ini ị̀ya olokoma kanmẹ pịkị à tọn ayema sịkịmẹ anị ḍumo ọkịḅo àrị koko apụma pịrịye mị. Ini gbọtụma Ịnyọ Sara Ene mị se papaye mịẹmẹ. Àrị ị̀ya ịganị mị se inia ọgọnọ gbana ḍọkịmẹ onwun ele ḅie pịkịna ini ḅaafama ḍọkịmẹ.

¹⁴Ọkụma àrị ọkọ se anị mịẹkẹ, mịẹso sịkị ọkọmịẹ mị ḅụgerere ọkịḅo ị̀ya ẹrẹ mị pịrị ẹka ọkụ àrị Ijipt ama ḅie ini ọkịpakụmaḅo ọkụ nemi amama ogboku ḅụ.

¹⁵Anịgose à ye ḅerenimẹ onwun ele ḅie na à ḅarị ini se mun à ḅereni ini pịrịsa ama mị la ẹkẹ, anị yela pịkịna lọkọlọkọ kiri pịkịna iḅi amakiri mị ḅie.

¹⁶Ọkọsimeye à nwọ karịfịmẹ anịatịḅị ini à tọn ayema sịkịmẹ, ị̀ya olokoma kan, pịkịna Ịnyọ Sara Ene mị se papaye mịẹmẹ—inia oru ma tẹkẹ mị inia ḅụḅẹlẹtẹịnmẹ.

¹⁷“Anịẹḅẹ sọnị àrị ini ḍikitịḅịfoinmẹ. À tọnpẹlẹmẹ na à ḅarị ini ḅaafama ẹkẹ, onwun ele mị ḅie.

¹⁸Anịnakaraka, àrị inia ḅieḅụ asẹmẹnị awọma ḅeri jinemẹ na: Ọ́mịna ḍapụma chụa olokoma ọ́ nwọ kokoma; inia ḅụọ ọ́ nwọ ḍukonwẹngịma, ọ́ pịkịna oru tẹkẹma.

¹⁹Ị̀rị̀ anị ómine Nyana Tamụnọ Ḅe-ẹ. Ómine à tọn ayema na ị̀ya olokoma na koko.

²⁰Ịnyọ Sara Ene mị se fịafịa ene nwọ mịẹ, mịẹse anị ị̀rị̀na-ómine-na ogboku ọḅọkụ elekima nwọsọ, anị se ọ́mịna ḅiekoroma na Ị̀rị̀ anị ọ́mịna Tamụnọ Ḅe-ẹ.

²¹“Ọkụma anị ḅụọ mị sọnị ị̀ ḅịpịpoki ḍụkụkẹ. Ini à tọn ayema kansinmẹ pịkịna ị̀ya olokoma kokokẹ, ḍumo ọkịḅo anị koko apụ nwọ pịrịye ma. Ini Ịnyọ Sara Ene mị kokokẹ. Àrị ị̀ya ịganị mị ḅe kụrọ se ḅo onwun ele inia ọgọnọ ḅụgbana ḍọkịmẹ se ini ḅaafamaḅịa gose.

²²Ọkụma àrị ọkọ se anị mịẹkẹ, mịẹso sịkị ọkọmịẹ mị ḅụgerere ọkịḅo ị̀ya ẹrẹ mị pịrị ẹka ọkụ àrị Ijipt ama ḅie ini ọkịpakụmaḅo ọkụ nemi amama ogboku ḅụ.

²³Anịẹrẹchị à jịn ye ḅereni ini pịrịmẹ onwun ele ḅie. À karịfịmẹ na àrị ini kangalagalamaḅịa sẹkiri mgba ḅieḅụ.

²⁴Àrị ọkọ mịẹmẹ anịatịḅị ini à tọn ayema sịkịmẹ pịkịna ị̀ya olokoma kokokẹ, pịkịna Ịnyọ Sara Ene mị se yechịnkẹ, inia ḍapụ tẹkẹarị oru ma anị ini sọnị tẹkẹtẹkẹarịye-ẹ.

²⁵“Anịsịkị à ḅo iḅika oloko na iḅika tọn aye na ḍumo se ini pịrị ẹkaye nwọse ini pịrịmẹ.

²⁶À mịẹmẹ ini iniaḅụ sima inia ḍiepịrịayema ḅụ, à pịkịna mịẹmẹ ini inia tatarị owuapụ awọma se agbamịẹ. Mịn anị se fomuḅara se ini pịrị pịkịna se ini ḍie na Ị̀rị̀ anị Nyanaḅọ Ḅe-ẹ.

²⁷“Mịọkụ anịẹrẹchị, tomoniḅọ tọkụ, ḍuko Izrẹlapụma pịrị, Ị̀rị̀, Kụrọmamgba Nyana Tamụnọ Ḅe ḍukose ini pịrịayema. Mịn anị inia ḍapụma sọnị se ị̀ wọlọ ọkụ-ẹ ini kuḅie-se-gbana na iḅikaḅụ.

²⁸Àrị ini ọkịḅo à ḅereni ini pịrị ama mị lamẹ. Ini gele-a kirima na ịwọ ịnyanya ḅụḅein ejema na ọrị sịkị ini agbamịẹ arịmgba pịrịmẹ. Ini ị̀ ịganịmamẹ inia agbama na ini se ḅo agbamịẹ iru ma na gose.

²⁹Àrị ini gbelamẹ: Ó mun-arị agbamịẹ-a nyọma àrị che fie-ao? Anịsịkị ngịsị ini nwọse anịanga ma chịnmẹ ‘Gele-a Nyọ Ma.’

³⁰Mịọkụ ḍuko Izrẹlapụma pịrị Ị̀rị̀ Kụrọmamgba Nyana Tamụnọ Ḅe à ḍukoarịaye: Cheye gose ọ́mịna ḍapụma mịẹ-a sima ọ́ nwọ mịẹ pịkịna ini tẹkẹ ḅarase kara oruma tẹkẹ-ao?

³¹Mịmgba sọnị ini mịẹ agbama na ḍiepịrịayema na anị ómine sọnị mịẹarịye-ẹ pịkịna gbọrị oru tẹkẹma na se ọ́mịna ḅụ pụlama, ọ́mịna awọma se agbamịẹ fịnị ḅie. Anịsịkị ómine Izrẹlapụma ḅo ị̀ gbelaḅẹ nde ị̀ ḅie tọnye! Ị̀rị̀ Kụrọmamgba Nyana Tamụnọ Ḅe, Ị̀rị̀ anị ḍumo Tamụnọ Ḅe-ẹ, à ḅi-ẹkẹ ọ́ gbọrịye sọ se ị̀ gbela.

³²Ómine ó kuḅie ḅụ kọnpẹlẹsam na ísí-a sẹma simeọkụ ọ́ nwọ simeḅịa, anị ísí-a amama ḅieḅụ anga apụma simeọkụ pịkịna eje na ḍụparị na tịḅịtu nwọ pịrịpịrị apụma. Ọkụma ngịsị anị ọkọsime ẹkẹ.

³³“Ị̀rị̀ anị Kụrọmamgba Nyana pịkịna ḍumogbaso Tamụnọ Ḅe-ẹ, àrị ó ḅeri jineaḅẹ na ị̀ya ịganị ḅụ à kụrọḅara se ómine ḍikiḍikiḅịa ị̀ya kụrọ ḅụ.

³⁴Àrị ị̀ya kụrọ na ị̀ya ịganị na se ó ḍieḅịa, àrị ómine ọkịḅo kpokponimaḅịa jịn-a sẹma ḅie, àrị ọ́ galagalama mun sime-a nyọma ḅụ.

³⁵Àrị ómine ọkị ‘Sẹ Ma Ḅe Onwun Ele’ ḅie nwọ munḅịa, anịanga mị à ḅẹrẹkọn ọ́mịna ḅarasimaḅịaye-ẹ.

³⁶À ḅẹrẹkọn ọ́mịna ḅarasimaḅịa, à ḅẹrẹkọn ọ́mịna ḍapụma ḅarasinma ọkụ Saịnaị Onwun ele ḅie,” mị Kụrọmamgba Nyana Tamụnọ Ḅe ḍuko ọkụ-ẹ.

³⁷“À kụrọḅara se ómine na anga se ómine ị̀ya ọḅọkụ mị kokoḅịa.

³⁸Ọ́mịna ḅie tịḅịḅiekụrọ apụma na siye mịẹ apụma na àrị ini ọfịn sinḅịa. Mịọkụ ini anga amama ḅie sọnị àrị ini depakụmaḅịa, à pịkị ḅereni ẹkẹ ini so Izrẹl ama mị mun. Anịsịkị mị ó nemiḅịaye na Ị̀rị̀ anị Nyanaḅọ Ḅe-ẹ.”

³⁹Kụrọmamgba Nyana Tamụnọ Ḅe nwọḅẹmẹ, “Ómine Izrẹlapụ mamgba ómine ọ́ ḅụḅẹlẹ ḅara mịẹ! Ó mun se ómine ḅarase kara oru ma tẹkẹ! Ọkụma àrị ó ḅerijine-aḅẹ na anịeso ómine ị̀ pokiḅịa, se ọ́ ḅarị ị̀ya fịafịa ẹrẹ mị simama agbamịẹ oru pịrịḅụ.

⁴⁰Fịafịa pịkịna gele Izrẹl tụndụ mị ọgọnọ ḅụ anị ómine Izrẹlapụ mamgba ị̀ tẹkẹḅịaye-ẹ. Anị ị̀ ḅieḅẹlẹmaḅịa ọ́mịna agbama ọkị, ọ́mịna iḅitẹịn ḍiepịrịayema na pịkịna fịafịa ḍiepịrịayema na.

⁴¹Àrị Ómine ọkịpakụmaḅo sịkị ọ́ galagala sime amama ḅie ḅụ, ọ́mịna dọkịma agbama à nwọ ọkịḅịa, jịn-a sẹma ọrịḅịa na à fịafịamẹ.

⁴²Àrị ómine ọkị Izrẹl ama mị ḅie ḅo sịkị, à ḅereni ọ́mịna opu ḍapụma pịrị ama mị, anịsịkị ó nemiḅịa na Ị̀rị̀ anị Nyanaḅọ Ḅe-ẹ.

⁴³Anịsịkị ḅụ ọ́ mịẹ ḅọrọsa ḅụgbẹịnkaye mamgba ọ́ nwọse ḅiekoromaḅịa, na ómine ọ́ ḅụ pụlama ọkụ na. Ọ́ mịẹsa ḅụgbẹịnkaye ma ngịsị ọ́ ḅụḅẹlẹ ẹkẹ.

⁴⁴Àrị osi se ị̀ ḅụ pịrịḅịa sịkị ómine Izrẹlapụma nemiḅịa na Ị̀rị̀ anị Nyanaḅọ Ḅe-ẹ, anịatịḅị ọ́mịna sitịḅị sime ọkụ à nwọse ómine na anga ẹkẹ.” Kụrọmamgba Nyana Tamụnọ Ḅe ò ḍukosam.

⁴⁵Nyanaḅọ Ḅe nwọse ị̀ ḅẹmẹ.

⁴⁶“Tomoniḅọ tọkụ,” ọ̀ nwọ ḅẹmẹ, “chuku ọrụ nwọ ḍiki. Si ọkwẹịn kọn chuku daọrụ mị pịrị, ịkịankoro chuku ọrụ piri mị pịrị.

⁴⁷Ḍuko chuku ọrụ piri mị pịrị na Kụrọmamgba Nyana Tamụnọ Ḅe ḍukoarịye ma anị nwọ naa: Ḍiki à fịnị pakụmaḅo, anị ị́ ḅie sime eje mamgba dọkịmasinḅịa, ịwọ pịkịna samịna ejema sọnị. Ine fịnị mị binmaḅịaye ofori-ẹ. Anị wasamaḅịa chuku ọrụḅụ ọkịmun ọgọnọju la, se tomoni mamgba fịnị mị ḅe ọfịrị mị ḅe ḅụọyị nwọ nyanaḅịa.

⁴⁸Inimgba ọrịḅịa na Ị̀rị̀ Nyanaḅọ Ḅe chụa fịnị mị ine anị binmaḅịaḅọ ofori-ẹ.”

⁴⁹Ọkụma à ḅerenikẹ, à nwọḅẹmẹ, “Kụrọmamgba Nyana Tamụnọ, ị̀ mịẹse àrị ọkọsimeye nwọ mịẹma! Nwenimgba mbụrụmbụrụaḅẹ na kaḅo ḅụ anị àrị ị̀ya ọkwẹịn nwọ kọnkọnye-ẹ.”