Read kirikeni Izikịẹl 21 Bible Online

Izikịẹl 21 - kirikeni bible

Izikịẹl 21

¹Nyanaḅọ Ḅe ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “Jerusalẹm mị ḍukosima. Tomonima tẹkẹtẹkẹ-a nyọma ḍukosima. Izrẹl ama mị ḅerijine

³na Ị̀rị̀, Nyanaḅọ Ḅe nwọ ḅẹmẹ na: Àrị ómine na tarakẹ. Àrị ị̀ya okola-agiji mị nwọ dekise ómine mgba ḅaa famaḅịa, iḅiapụ na siapụ na.

⁴Àrị ị̀ya okola-agiji mị se nwenimgba ḅaaḅịa chuku ọrụḅụ ọkịmun ọgọnọju la.

⁵Nwenimgba nemiḅịa na àrị ị̀ya okola-agiji mị wọrọsam àrị anị se chụa ẹkẹ.

⁶“Tomoniḅọ tọkụ, ị́ kuḅie kan aḅẹ nwọḅẹ ḅara se ḅiefie. Nwenimgba ị́ ọrịḅịa nyọ ḅụ sime ḅiefie.

⁷Ini nemikase ị́ gose ḅiefiearịye nwọse ị́ gbelamẹ ḅẹḅẹ, ḍuko ini pịrị na ḅoarị oku mị gose-ẹ. Anị ḅoḅịa sịkị ḅalafa inia kuḅie ḅeinḅịa, inia ḅarama oḅoku àrị ḅaaḅịa, ini ḅarị kuḅiekụrọ nyana ẹkẹ, inia ḅụọ ịkpụkụ geregereḅịa. Sịkị mị ḅosam; mị anị-ẹ.” Kụrọmamgba Nyana Tamụnọ Ḅe ò ḍukosam.

⁸Nyanaḅọ Ḅe nwọse ị̀ ḅẹmẹ,

⁹“Tomoniḅọ tọkụ, ịkịankoro. Ḍuko tomonima pịrị Ị̀rị̀, Nyanaḅọ Ḅe ḍukoarịye mị: Gbọrị okola-agiji, gbọrị okola-agiji nwọ farị se karakarama koromasam.

¹⁰Ini anị farịmẹ nweniḅaaḅịa gose, pulo se anị tanmẹ sowakam ma ḅịa ọkụ. Ḅieḅẹlẹ sime ẹkẹ, anịatịḅị ị̀ya tomonima ḅerijine ọkwẹịn na fomuḅara na goyegoye mamgba ini nwọ ḍikisimasam.

¹¹Okola agiji mị ini pulo se anị tansam, anị karakarama fịrị pịrị gose. Ini anị farị pịkịna pulo se anị tansam, se nweniḅaḅịaḅọ ḅarachụaḅịa gose.

¹²Opu ngịrị ḅiefie nwọ kọn, tomoniḅọ tọkụ; mị okola-agiji mị sime ị̀ya tomonima pịrịmẹ pịkịna Izrẹl ama ḅie tịḅịnị mamgba na pịrịmẹ. Ini ísí ị̀ya tomoni mamgba ḅụ sọ fịfaḅịa. Ị́ya ekpe ḅụrọ ḅalafa ḅụ!

¹³Àrị ị̀ya tomonima ḍaḍikiaḅẹ, ini vinpịkị ḍụkụka ọkụma, maye mamgba iniaḅụ mịẹḅịa.

¹⁴“Mịọkụ, tomoniḅọ tọkụ, ịkịankoro. Ị́ ḅarama farị, se okola-agiji mị sakị yesimaḅịa. Nweni ḅaaḅaa okola agiji-ẹ, nweni ḅalafama pịkịna nweni ḅaa okola agiji-ẹ.

¹⁵Anị mịẹse ị̀ya tomonima ḅarị kuḅiekụrọ ẹkẹ pịkịna ḅịkịḅịa. Àrị okola-agiji se inia opuamama ḅalafamaḅịa, anị sowakam ḅara se ḅịa pịkịna nweni ḅaaḅaaye mị.

¹⁶Amaḅara na ereḅara na nwọ pẹlẹ, ị́rị́ oḅu okola-agiji! Ị́ da pẹkẹrẹ goyegoye ye pẹlẹ.

¹⁷Ị̀rị̀ sọ ị̀ ḅarama farị ḅịa se ị̀ya ịganị mị ḅo ḅọrọḅịa. Ị̀rị̀, Nyanaḅọ Ḅe, à ḍukosam.”

¹⁸Nyanaḅọ Ḅe nwọse ị̀ ḅẹmẹ.

¹⁹“Tomoniḅọ tọkụ,” ọ̀ nwọ ḅẹmẹ, “mama ateli nwọ tọn Babilọn amanyanaḅọ ḅe oria okola-agiji na ḅọrọḅoḅịa ọkụ. Maịn mamgba gbọrị sẹ mị ḅie sakịḅịa. Elekima ḍụpọ nwọ pike ateli ma donia nyọ ḅụ.

²⁰Gbọrịye mun Amọn apụ opuama Raba mị laḅịa ateli se amanyanaḅọ ḅe ḍieḅịa anịsịkị ísíye mị mun Juda ama mị laḅịa ateli mị la, anị Jerusalẹm opuama owuniaye ama mị.

²¹Babilọn amanyanaḅọ ḅe mama ateli ma donia nyọ ḅụ chịẹḅịa elekima chịn mị pike sime nyọ ḅụ. Ọ̀ ḍẹịnma jikeḅịa se ò munḅịa nyọ nwọ nemiḅịa gose, ori oria oru ma gbelaḅịa ọ̀ pịkịna ini se agbamịẹsa nama paranga ma pekele ḍikiḅịa.

²²Mịọkụ! Oria amaḅara mị ḍẹịn mị ọlọḅịa ‘Jerusalẹm’! gịẹịnye mị. Anị ọ̀ ḅẹḅịa na ò mun ini se owu sọsọ nangwọ-iku-chịn nwọ karakarama se owuni eke mị paịn owuni-a chịnma se onu ḅọkọ ma ḅụ koroma, se àrị onwun saraḅịa, ini ḅọịnyọ nwọ sokuḅịa.

²³Izrẹlapụma ini mịn mị ḅereni ẹkẹ ini ḅara pụnụ pụnụ pịrịsa ayema gose. Ọkụma mị ịkịankoro mị inia sima se inia ḅiekoromaḅịa, pịkịna inia omoni ḅara ḅie sọ mị se inia ḅerijineḅịa.

²⁴Mị anị Ị̀rị̀ Kụrọmamgba Nyana Tamụnọ Ḅe ḍukoarịye-ẹ: Ọ́mịna sima àrị ḅụpakụmasam. Nweni mamgba ḅẹrẹ ọ́ ḅarasi ọkụ nwọ nemisam. Ómine ọ́mịna sima ḍiepakụmamẹ. Ḅẹrẹ ọ́ ḅarasisam, àrị ómine se ómine na tarakapụma pịrịḅịa.

²⁵“Ómine sitịḅịnyana pịkịna fịafịaka Izrẹl mị ḅie tịḅịdapụ ma, ọ́mịna kuluma tọrụsiọrị ene ḅoaḅẹ.

²⁶Ị̀rị̀, Kụrọmamgba Nyana Tamụnọ Ḅe ḍukosam. Ómine ọ́mịna chuma sin pịkịna kọngọ chụaye mị na. Gbọrịye sọnị ḅarị ọkọ sime ẹkẹ. Igwein apụma deki mun kụrọnị kiriḅụ koroma! Ḅẹrẹtọn apụma sinkoroma!

²⁷Sima, sima! Iin, opuama mị àrị anị simaḅịa. Ọkụma mịn mị mịẹ ẹkẹ ọkịmun à sẹlẹ se ḅo fomuḅara se ini pịrị nwọ ḅẹ ḅọ ḅe ḅoḅịa sịkị la. Ori mị à se pịrịḅịaye-ẹ.

²⁸“Tomoniḅọ tọkụ, ịkịankoro. Ị̀rị̀, Kụrọmamgba Nyana Tamụnọ Ḅe ḍuko Amọnaị apụma pịrị ayema ḍuko pakụma, anị Izrẹlapụma wọlọ apụma. Ḍuko ini pịrị na: Okola agiji ḅụkarakaramasam yesimaḅịa gose; Ini pulo se anị tansam nweni ḅaa gose, soalagba ḅịa ọkụ ḅịa.

²⁹Ị́ tẹmẹḅụ ọrịaye ma iruoaye-ẹ, ị́ koro ịkịan ma karakarayekẹ. Ọ́mịna tịḅịḅiekụrọmẹ, ọ́ pịkị iḅikẹ, ọ́mịna ene mị ḅoaḅẹ, ọ́mịna kuluma tọrụsiọrị ene mị. Okola agiji mị anị ọ́ kọngọ ḅụ koroḅịa.

³⁰“‘Okola-agiji mị dekichịẹma! Àrị ị́ tẹmẹ nyọ ḅụ anị à ḅẹrẹkọn ị́ pịrịḅịaye-ẹ.

³¹Ị̀ya ịganị mị ị́ ḅụ ọyịḅịa. Àrị anị finjiḅịa sịkị fịnị kọrị ọkụ. Àrị ị́ se si-a tomoni pịrịḅịa, yesima ḍin apụ.

³²Fịnị ḅie ị́ dọkịfaḅịa. Ị́ya pulo mị ị́ya ama ḅie ḅụ sarafaḅịa, gbọrịḅọ sọnị ḅarị ị́ se ḅiekoroma ẹkẹ.’” Nyanaḅọ Ḅe ò ḍukosam.