Read kirikeni Izikịẹl 23 Bible Online

Izikịẹl 23 - kirikeni bible

Izikịẹl 23

²“Tomoniḅọ tọkụ,” ọ̀ nwọ ḅẹmẹ, “gbọrị sịkị ḅụ mama eremeni mịnapụ simemẹ.

³Ini bokaḅụ Ijipt ḅie anga sịkị ḅụ ini inia owuapụ nemika mị famamẹ, se iniḅo amanwẹngị ere nwọsọmẹ.

⁴Sẹnịḅọ ma ini nwọse á chịnmẹ Ohola (Sameria tọrụḍinmaḅụ) anịsịkị kalaḅọ ma ere anị Oholiba (Jerusalẹm tọrụḍinmaḅụ). Ị̀rị̀ ini mamapụ mamgba simemẹ se ini awọ yi ị̀ pịrịmẹ.

⁵Kọkọmaye ḅụ Ohola ma ị̀ya tomoniḅọ-ẹ nwọḅẹ sọnị á pa sẹfị ma tọrọkọmunmẹ anịtẹịn-anga Asiria ḅie árị na lekiria apụma.

⁶Ini anị yela ḅụchụaye ḅụ sime owuni-ẹ, yeḅụsọ pịkịna opukiri la opuapụ-ẹ; inimgba iḅi owuni tịḅịnị owuapụ-ẹ.

⁷Mịna opu apụ mamgba árị na sẹfị famamẹ, árịa amanwẹngị mị árị ọkịmun Asiria apụma oru ma tẹkẹmẹ.

⁸Ijipt ḅie árịa owuḅọ nemika mị á nwọ fama sịkị ngịsị á kọn sime sẹfị mị ḅụ á ye sin ḍụkụkẹ. Arịa bokaḅụ ngịsị á sẹfị mẹ se ini pịkị á se sẹfịḅọ mịẹmẹ.

⁹Mịn gose àrị á se árị opuma ḅẹlẹma Asiria apụma pịrịmẹ.

¹⁰Ini á se papaḅụ sinmẹ, árịa owuapụ awọma na eremeni awọma na nwọ kun ọkị, se agiji se á ḅaamẹ. Nyọ mamgba eremeni á se ḅẹrẹ ḍukomẹ.

¹¹“Nụmbụrarọ Oholiba ma mịn mị ọrịmẹ nwọḅẹ sọnị, árị pịkịna sẹfị ḅụ owoitẹịn nụmbụrarọ Ohola ma nẹngịmẹ.

¹²Árị sọnị Asiria yela ḅụchụaye chụa owunima ḅẹlẹmamẹ, inimgba opuma iḅi owuni tịḅịda owuapụ-ẹ.

¹³Àrị ọrịmẹ na arịmgba opu sẹfịḅọ-ẹ, na maịn-karama mịnaḅọ ma tatarị ḅọ ma sime si ọkụ anị á simeọkụ-ẹ.

¹⁴“Arịa amanwẹngị ḅie á gbunma sọmunmẹ. Babilọn ḅie ini kara iḅima se warị agbagba ma ḅụ koroma pulo-pulo agba se tan ayema á jine ọkịmẹ, ini arịa ḅirima ḅirima pịkịna arịa tịḅịma ọgọnọ ḅirimamẹ.

¹⁵

¹⁶Á mayema ọrị kirikiri, inia mịẹye á ḅụḅẹlẹmẹ se árị oku se Babilọn ḅie ini fịrịma ọkịmẹ.

¹⁷Babilọn apụma ini ḅomẹ se árị na sẹfịmẹ. Ini iḅi ḅara se árị na sẹmị fịḅo gbọrị eke lasịkị á ḅụ ịnyọ famẹ.

¹⁸Á ḅụ á nwọse sarakoroma ini pịrịmẹ ama ogbo ḅụ, mịẹse tomoni mamgba nemi na árị opu sẹfịḅọ-ẹ. Árị ị̀ pụkọtanmẹ nụmbụrarọ ma ị̀ pụkọtan ọkụ.

¹⁹Á ḅo amanwẹngịtẹịn ḅọrọsa sịkị nwọ nẹngịsam, árị iremeni ḅụ sime sịkị á kọnkọn gbọrị ḍumo mị anị á pa kọn arịye, anị Ijipt ḅie á sẹfị àrị sịkị mị.

²⁰Opuma sẹfị ḍin owuapụ mamgba árị na sẹfịmẹ anị opu-a nama na sẹfịfị apụma.”

²¹(Oholiba, iremeni tọkụ ḅaraḅụ Ijipt ḅie ị́ sime sẹfị ọkụ mị ị́ kpoto nwọ mịẹ ḍọkịmẹ, anịanga owuapụ ị́ya ndoma se ti pịkịna ị́ya owuapụ nemika mị fama nyọ mị.)

²²“Mịọkụ anịẹrẹchị, Oholiba, mị anị Ị̀rị̀, Kụrọmamgba Nyana Tamụnọ Ḅe ḍuko ị́ pịrịarịye-ẹ. Ị́rị́ na lekiriapụma ini ị́ ḅụ ịnyọ famasam, ọkụma à mịẹḅịa ini ḅarị ị́ tarị ẹkẹ, iniḅo ị́ gboriḅịa.

²³Babilọn apụ mamgba à nwọ ọkịḅoḅịa, Kaldia ḅie na Pẹkọd ḅie ḅụ na, Shụa ḅie ḅụ na, pịkịna Koa ḅie ḅụ owuapụma na, pịkịna Asiria apụ mamgba na. Ini opuma iḅi ḅịpị ḅẹrẹla asẹmẹnị ma na fịrịtịḅịnị ma na, yela fịrịtịḅịnị ma na pịkị kiri ọgọnọ owuni tịḅịnị mamgba àrị ini ọkịḅoḅịa.

²⁴Ọgọnọju ḅụ ini wẹrị owuse ị́ pakaḅịa, inia ḅaka owuni na kporokporoma na, pịkị owuniaye na. Ikulele agbọ na chu na iniaḅụ gbẹịn waraḅẹ, iniḅo ị́ gbẹịnmachịẹḅịa. Àrị ị́ ọkị ini pịrịḅịa se inia olokoma ḅụ ini ḅẹrẹkọn ị́ pịrịḅịa.

²⁵Ị̀ya ịganị ị́ya ọgọnọ omi-ẹ gose, à mịẹḅịa ini iḅiọkụ yese ị́ mịẹ. Ini ị́ ḅerima na ị́ nini na pẹlẹsinḅịa pịkịna ị́ya awọma ḅaa sinḅịa. Iin, ini ị́ya owuapụ awọma na eremeni awọma na nwọ ọkịmun ini dọkịmaḅaaḅịa.

²⁶Ini ị́ya ḅụchụayema sin se ị́ya pụkọchụaye ma sin ọkịḅịa.

²⁷Ị́ya owuapụ ḍọkị mị anịḅo kulumaḅịa, ị́ ḅarị Ijipt ḅie sakị ị́ kọn-a si-anwẹngịma kọn ẹkẹ. Ị́ ḅarị tọrụpịkị ini ḅarase kara oru ḍiki ẹkẹ, anịkanịka Ijipt se ḅiekoroma ẹkẹ.”

²⁸Mịn anị Kụrọmamgba Nyana Tamụnọ Ḅe ḍukoarịye-ẹ: “Àrị ị́ se ị́ taraka se wẹrịma apụ na ḅarị ị́ ḅụḅẹlẹkẹ nwọḅẹ apụma pịrịḅịa.

²⁹Ini taraka se ị́ wẹrịmamẹ gose, ị́ya ye goyegoye mamgba ini ọkịḅịa, ini ị́ se papaḅụ sin koromaḅịa, amanwẹngị eremeniḅọ papaḅụsin ọkụ. Ị́ya owuapụ ḍọkị na amanwẹngị na

³⁰anị mịn mị ọkịḅo ị́ pịrịye-ẹ. Ị́rị́ sẹma ḅe amanwẹngịḅọ-ẹ pịkị inia oru ma se ị́ ḅụ pụlamasam.

³¹Mbụrama ḅụọ ị́ nwọ ḍukoma nwẹngịmẹ, anịẹrẹchị anị gbọrị fomuḅara ọmọngọ mị ḅie mengi mị anị ị́ ḅuḅịaye-ẹ.”

³²Kụrọmamgba Nyana Tamụnọ Ḅe nwọḅẹmẹ, “Mbụrama ọmọngọ mị ḅie mengi mị anị ị́ ḅuḅịaye-ẹ; anị opuma ḍụḅa pịkịna gbunmẹ. Nweni mamgba ị́ ḍẹrị pịkịna ị́ okomboḅịa; ọmọngọ mị ḅeinsam.

³³Anị mịẹḅịa ị́ ḅarị yeḅụsọ ẹkẹ pịkị iru ị́ tọrụḅaaḅịa, ḅalafa ọmọngọ na fịfa na, mbụra Sameria ma árịa ọmọngọ mị.

³⁴Ị́ ḅu samịnamaḅịa, anịa akpakpa ma se ị́ya ndo ma pẹlẹḅịa. Ị̀rị̀, Kụrọmamgba Nyana Tamụnọ Ḅe à ḍukosam.”

³⁵Mịọkụ mị anị Kụrọmamgba Nyana Tamụnọ Ḅe ḍukoarịye-ẹ: “Ị́ se ḅieḅarama se ọḅụ pịkị ị̀ gbinye gose, ị́ya amanwẹngị na owuapụ ḍọkị na ḅe tọrụsiọrị ị́ nwọ ọrịḅịa.”

³⁶Nyanaḅọ Ḅe nwọse ị̀ ḅẹmẹ, “Tomoniḅọ tọkụ, ị́ ḅụkarakarama ḅẹrẹkọn Ohola ma na Oholiba ma na nwọ pịrịḅe? Ini mịẹ siayema se inia tọrụda.

³⁷Ini sẹfị pịkịna nweniḅasam—ḅarase kara oru ma na sẹfị anịsịkị ini ị̀rị̀ na yi awọma ḅaamẹ. Ini ị̀ya awọma se agbamịẹ ḅarase kara oru ma pịrịmẹ.

³⁸Anị mị ngẹrị ini nwọ mịẹkẹ. Ini ị̀ya Oputẹkẹwarị mị pụlamamẹ pịkịna Ịnyọ Sara Ene mị kanmẹ, anị à tọnkoromayema.

³⁹Ini ị̀ya awọma se agbamịẹ oruma pịrị ene mị anị ini ị̀ya Oputẹkẹwarị mị ḅie sọ se anị pụlamamẹ!

⁴⁰“Ini pịkịna oku se ḅọlọju ḅụ owuapụ fịrịmaḅomẹ. Mama eremeni mịnapụma mengi ḅiri se ye ḅirimẹ.

⁴¹Ini opuma iḅi ịkasịye ọgọnọ ḅụ simemẹ, inia tọrọkọ iḅiaye na insẹnsị na oliv pulo na ini nwọse ḅirima koroma dẹbụl omi-ẹ, anị à se ini pịrịayema.

⁴²Ye se yechịnka apụ ḅara ini nwọse owuapụma na nyọ fiemamẹ, anị onwun ele ḅie ḅo apụma. Ini ḅarachụaye nwọse eremeni ma chụamẹ pịkịna ḍikitọrụgbẹịn-a chu se inia tịḅị ma chiramẹ.

⁴³À nwọse ị̀ ḅụ ḅẹmẹ, ini sẹfị ḅụ kpọ saḅọ na sẹfịaḅẹ.

⁴⁴Ini pịkị sọsọ mịna sẹfị apụma damamunmunmẹ. Ini pịkịna sọ mịna sẹfị apụma, Ohola ma na Oholiba ma na damamunmẹ.

⁴⁵Karakara apụ, sẹfị ḅẹrẹ na ninikọn ḅẹrẹ na nwọ kọn inia ḅara simaḅịa, anịatịḅị ini sẹfịfịmẹ, tomoni pulo pịkị inia ḅarama ịlọlịmasam.”

⁴⁶Mị Kụrọmamgba Nyana Tamụnọ Ḅe ḍukoye-ẹ: “Mun siaye mịẹmịẹ apụ ogbo chịnḅo inia ḅalafama se ini ini furu.

⁴⁷Mịẹse siaye mịẹmịẹ apụ ogbo imgbele se ini gbin pịkịna okola-agiji owu nwọse ini paka, se inia awọma ḅaa pịkị inia warịma dọkịma.

⁴⁸Sẹ mị ḅie mgba, à simịẹmịẹaye dachịẹmaḅịa, anị mị anị se eremeniḅọ ḅeri goyegoye jine, na ini ḅarị sẹfị ma anị ini sẹfịfị ḅara mị.

⁴⁹Ọkụma ómine mama eremeni mịnapụ ma—à fomuḅara se ọ́ pịrịḅịa ọ́mịna simịẹmịẹaye ma na pịkị ọ́mịna oru tẹkẹ si mị na gose. Anịsịkị mị ó nemiḅịaye-ẹ na Ị̀rị̀ anị Kụrọmamgba Nyana Tamụnọ Ḅe-ẹ.”