Read kirikeni Izikịẹl 26 Bible Online

Izikịẹl 26 - kirikeni bible

Izikịẹl 26

¹Ini kụrọḅara se wa desin oyigbọrị kụra fịnjị karama kụra mị ḅie, akalụ mị ḅe tatarị ene ḅụ, Nyanaḅọ Ḅe ori ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “mị anị Taya opuama apụma gose ḅieḅẹlẹ se eke-paịn arịye-ẹ. Ini oloku aḅẹ, na ‘Jerusalẹm mị anị kanfasam! Anịa tuḅokọn kụrọ mị fasam! Anị ḅarị ngịsị mine na piki-a ẹkẹ!’

³“Mị anị mịọkụ Ị̀rị̀, Kụrọmamgba Nyana Tamụnọ Ḅe ḍukoarịye-ẹ: Ị̀rị̀ ị́rị́ na tarakaḅọ-ẹ, Taya opuama. À tọn-a opu sẹ ọkịḅo owu se ị́ pakaḅịa, se tọrụogbo ambura ma ḅo ọkụ anị ini ḅoḅịa ọkụ-ẹ.

⁴Ini ị́ya opuama mị onu ma kangbinḅịa, se ini pịkị anịa sokopi warịma kan saraḅịa. Anịsịkị à fọn mamgba ọfịn sinḅịa, se papa ḍụparị ngẹrị anị kọnḅịaye-ẹ.

⁵Injiḅaapụ anịnyọ ọgọnọ ḅụ inia ịgbọ ma ịrụọḅịa, anị tọrụ ogbo chịẹ sime nyọ ḅụ. Ị̀rị̀, Kụrọmamgba Nyana Tamụnọ Ḅe, à ḍukosam. Sẹ ma àrị Taya mị ḅie ye ọfọịnḅịa.

⁶Se inia okola-agiji ma ini nwọse inia kpoinkpoin kiri sẹ amama ḅie anga apụ na ḅaafamaḅịa. Anịsịkị mị Taya mị anị nemiḅịaye-ẹ na Ị̀rị̀ anị Nyanaḅọ Ḅe-ẹ.”

⁷Kụrọmamgba Nyana Tamụnọ Ḅe nwọ ḅẹmẹ, “amanyanapụ mamgba ḅụ kụrọtẹịn opu amanyanaḅọ ḅe à nwọ ọkịḅo aḅẹ—Nebukadneza Babilọn Amanyanaḅọ ḅe—ori owuse Taya mị pakaḅịa. Ọgọnọ ọrụḅụ, ḅaka owuni-ogbo ọ̀ nwọse ḅoḅịa, asụn na, owuni kporokporo na pịkị asụn ọgọnọ owuni na.

⁸Kpoinkpoin kiri sẹ amama ḅie anga apụma, owusọ ḅụ ini fịḅịa. Taraka apụma, ini owuni ḅọịḅịa kiri sokuḅịa, ini aḅaịn se kụrọ nyọ nama agbọ ḅara se iniaḅụ kikimaḅịa, ini kụrọ onu namaḅịa, agbọ ḅara nwọse ọ́ da, se ini ómine na bịamaḅịa.

⁹Ini ọ́mịna onu ma kanḅịa, alagba nwọse àrị tẹịn gbinḅịa, se ini nangwọ nangwọ ikulele se ọ́mịna sokopi warịma kangbinḅịa.

¹⁰Inia asụnma ḅe mangị ḅụọ ḅụ pakaḅo soḅuno ọkụ sime fọn ma àrị ọ́ gbẹịnḅịa. Inia ikulele arụ ma na, kporokporoma na jine nwẹngịarị asụnma ḅe nyọ fiema ḅara mị ọ́mịna onu ma jikeḅịa, àrị ọ́mịna kansa opuama mị ḅe onu-a ḅọkọ ma ḅieḅọrọ àrị sịkị.

¹¹Inia asụn owunima ọ́mịna ateli ma ḅie ini ḅeinḅịa, se ini inia okola-agiji ma se ọ́mịna tomonima ḅaama munḅịa. Ọ́mịna opu ịbama ini àrị suma kiri gbinḅịa.

¹²Ómine na tarakapụma ini ọ́mịna ngọma na, ó se tuḅokọn arịaye ma na, anị ini se inia ḅụ ḍikiḍikiḅịaye-ẹ. Ini ọ́mịna onu ma kangbinḅịa se ọ́mịna iḅia warịma kansaraḅịa. Ini ḍụparịma na, chịnma na, ḍụparị pẹkẹrẹ mamgba na se mun tọrụ ḅie wokumaḅịa.

¹³À mịẹḅịa ó chuchu nime mamgba ḅo kulumaḅịa, à mịẹḅịa ọ́mịna nime chu ọbọ ma àrị yawụḅịa.

¹⁴Injiḅaapụ ine inia ịgbọ ma ịrụọḅịa ḍụparị kẹngẹ mị à konmaḅịaye-ẹ. Opuama mị ngịsị ini ḅarị kpoto anị nama ẹkẹ. Ị̀rị̀ Kụrọmamgba Nyana Tamụnọ Ḅe à ḍukosam.”

¹⁵Kụrọmamgba Nyana Tamụnọ Ḅe mịn mị ḍuko Taya opuama mị pịrịaḅẹ: “Ọmụ ị́ ḅara siḅịa sịkị, tọrụ aka ḅụ anga apụma inia ḅalafaḅịa anị ini ḅaa se fịarị apụma oloku se owuarị ḅara mị ḅụ.

¹⁶Tọrụ dọkụ dọkụ opu-a sẹma ḅe amanyanapụ mamgba inia emine ma ọgọnọ ini koroḅịa. Ini inia opu-a ḅụchụayema na gẹnịgẹnị ḅiriaye ma na sinkoroma se ḅụgẹrẹgẹrẹḅụ papa kiri ọgọnọ kpọnjị simeḅịa. Paka ị́ pịrịḅịaye mị inia ḅalafama so ọkụma, ḅụgeregere ḅụ ini ineda dachịẹ ẹkẹ.

¹⁷Ini mị ḍụẹịn ḍipi nime mị chu ị́ pịrịḅịa: Opuma ẹrẹso opuama mị ini anị kangbinsam! Anịa onwoin arụ ma ini àrị ọfịnsinsam tọrụ ogboku. Mị opuama mị nyanapụ ma anị tọrụ ma ḅie ḅẹrẹtọntọnye-ẹ Ini pịkị tọrụ aka anga apụ mamgba ḅalafamafamamẹ.

¹⁸Mịọkụ, anị ḅịkị ene mị ḅụ, Chọ mamgba ḅụgeregere aḅẹ, Ama mị ḅara wẹrịma kanḅara mị anị inia tomonima ḅụgbiripumamẹ.”

¹⁹Kụrọmamgba Nyana Tamụnọ Ḅe nwọ ḅẹmẹ: “Kansa opuamama kpọngọlọ ma sime ọkụ anị à seni ị́ mịẹḅịa ọkụ-ẹ, anị nweni ḅarị ngịsị anga ẹka nyọ. Abaji ḅie mengi à nwọse gbitipuma ị́ gbẹịn kiri pịrịḅịa.

²⁰Àrị ị́ se fịḅọrọsapụ tomonikiri chukuju sẹịnḅịa, ị́ mun olomu sịkị ḅie fịḅọrọsapụ ma ḅụ sọḅịa. Àrị ị́ mịẹḅịa, ị́ anị kuluma nyanaka sisa kirichuku tomonikiri ḅie sime gbasoḅịa, se ị́ fịsa apụma na ogbo apụ sọḅịa. Anị mị mịẹḅịa, nweni ḅarị ị́ ḅie anga ẹkẹ, ị́ pịkị ḅarị ḍumo apụma ḅie ị́ya kiri mị nyana ẹkẹ.

²¹Àrị ị́ se ḅalafama elekima mịẹḅịa anị pịkị ị́ya kuluma mị-ẹ. Tomoni pa ị́ ḍọkịḅịa, ọkụma ngịsị ini ị́ ọrị ẹkẹ.” Kụrọmamgba Nyana Tamụnọ ḅe ori ọkwẹịnsam.