Read kirikeni Izikịẹl 27 Bible Online

Izikịẹl 27 - kirikeni bible

Izikịẹl 27

¹Nyanaḅọ Ḅe nwọse ị̀ ḅẹmẹ,

²“Tomoniḅọ tọkụ, gbọrị ḍụẹịn ḍipi nime chu Taya mị pịrị,

³anị tọrụ aka ḅụ sime tọrụ mị ḅụ sime ama goyegoye na tuḅo kọnkọn apụma. Kụrọmamgba Nyana Tamụnọ Ḅe ḍukoarịye mị ḍuko anị pịrị: “Taya, ị́ya opu iḅi mị ị́ nwọse ḅụ bomamẹ.

⁴Ị́ya warị anị tọrụ mị-ẹ. Ị́ nama apụma iḅi onwoin arụ nama ḅara ini nwọse ị́ namamẹ;

⁵Hamọn Tụndụ ọgọnọ odo chịn ma ini nwọse fịrịnwẹngịmẹ Ini pịkị Lẹbanọn ḅie awụ chịn ma se sịkaka ma mịẹmẹ.

⁶Ini Bashan ḅie ḅụ kuru chịn ọkịḅo ọḅụdọkụ jụọịn ma karamẹ; Saịprọs ḅie ḅo chịn ini nwọse deki mị mịẹmẹ Se ini oḍu se anị oḅolomẹ.

⁷Ị́ya ịvala ma lọkọ ḅịtẹ ịvala-ẹ, Ijipt ḅie ini ḍoriḅo lọkọ ḅịtẹ, Sasaju nweni ineda ị́ nemiḅịa ḅara. Ini se ị́ gbẹịn ayema iḅitẹịn ḅịtẹ ini nwọse àrị mịẹmẹ, Saịprọs chọ mị ḅie ḅo pulo-pulo ḅịtẹ-ẹ.

⁸Ọḅụdọkụ jụọịn dọkụ apụma Saịdọn na Avad na opuamama ḅie ini ḅomẹ. Ị́ nyana ḅarafịrịnwẹngị-ḍin-apụ ma anị onwoin arụ dọkụ apụ ma-ẹ.

⁹Onwoin arụ ma ḅie akanị apụma Biblọs ḅie ḅụ ḅo iḅiọkụma ye ḍawọ ḍin sa apụ-ẹ Tọrụ ogbo sịkịmamgba dọkụ àrị onwoin arụ dọkụ-dọkụ apụ-ẹ Ómine na ọ́mịna yedẹrị-a warịma ḅie tuḅo kọnkọn apụ-ẹ.

¹⁰“Pesia na Lidia na, pịkịna Libya ḅie ḅo owuni anị ị́ya owunima ḅie omiye-ẹ. Ini inia agbọ ma na inia okpochu ma na nwọse ọ́mịna owuni-a warịma ḅie sụka koromamẹ. Ini anị boma ọkịḅo ọ́ pịrịpịrị apụ ma-ẹ.

¹¹Avad ḅie ḅo owunima ọ́mịna onu ma korumẹ, se Gemad ḅie ḅo owunima ọ́mịna sokopi warịma korumẹ. Ini inia agbọ ma se ọ́mịna onu ma ḅụ sụkamẹ. Ini anị ómine mịẹse ómine opuma iḅiarịye-ẹ.

¹²“Spen na ómine na, ó tuḅokọn gbolomamẹ. Ini seleḅa na ikulele na, kiri ḅie ḍụparị na, ẹlẹjị na se ọ́mịna ḅaka ngọma gbẹịnmẹ.

¹³Gris na Tubal na, Mẹshẹk na, ini ómine na tuḅokọnmẹ, se ọ́mịna ngọma ọ́ nwọse inia ḅara omoni na alapẹlẹka ngọma na ḍiamẹ.

¹⁴Ọ́mịna ngọma ọ́ nwọ dẹrị se fịrịnwẹngị asụn na, owuni asụn na, yepụra nama na nwọ fẹmẹ Bẹt Togama ḅie.

¹⁵Rodis apụma na ómine na, ó tuḅokọnmẹ, ini anị tọrụ aka ma ḅụ ḅaka ama nyana apụ-ẹ; oḍu na ịmọ na ini nwọse ọ́mịna ngọma na ḍinma tuḅokọnmẹ.

¹⁶Siria apụma ini ọ́mịna ngọma na, ọ́ nyanaḅo ayema na nwọ fẹmẹ. Se ini gẹnịgẹnị yela ḍụparị na pulo-pulo ḅịtẹ na, ini ḍori aye na, iḅi lọkọ ḅịtẹ na, mengi ḅie pakaḅo yelaye na pịkị pulo-pulo yela ḍụparị na ini nwọse ọ́mịna ngọma gose ómine gbẹịnmẹ.

¹⁷Juda na Izrẹl na; ịpịamgba na, ḅẹịn na, oliv pulo na, ye kụnụmaye na anị ini seni ọ́mịna ngọma gbẹịnye-ẹ.

¹⁸Damaskọs apụma ini ọ́mịna ngọma na, ọ́ tẹmẹ pakụmaḅo ayema na fẹmẹ, ini Hẹlbọn ḅie ḅo iru na pịkị Saha ḅie ḅo wulu na nwọse àrị gbẹịnmẹ. Ini ikulele na, ye kụnụmaye na nwọse ómine na tuḅokọnmẹ ọ́mịna ngọma gose.

²⁰Didan apụma iku-ḅụgbẹịn aye se ọ́mịna ngọma na ḍinma tuḅokọnmẹ.

²¹Arebia apụma na Kida tịḅịnịma na, anana awọ na anana na, oḅori na ini nwọse ọ́mịna ngọma ḍinma ómine na tuḅokọnmẹ.

²²Shiba na Reama na yela ḍụparị na goli na, ye kụnụma olo na se ọ́mịna ngọma gose ómine na tuḅokọnmẹ.

²³Heran na Kanẹ na Idẹn na Shiba na opuamama, Asua na Kilmad na opuamama inimgba ómine na tuḅokọnmẹ.

²⁴Yela ḅịtẹ, gẹnịgẹnị ḅịtẹ na, ye ḅirimaye na iḅi kiri iseaye na, iḅi-a ḍiki na ini nwọse ọ́ dẹrịmẹ.

²⁵Ọ́mịna ḅiriaye ma ḍụḅatẹịn onwoin arụ ma anị ini se àrị sẹịn soye-ẹ. “Ini se tọrụ ḅie opu ngọ sẹịn onwoin arụ Sime ọkụ anị ị́ sime ọkụ-ẹ.

²⁶Ị́ya ọḅụdọkụ-jụọịn dọkụ apụma ị́ ọkị tọrụogbo ḅo sịkị, Ịrụapakapaka nyọ ḅụ kụrọ fọrụ fieḅo ị́ ḅilemamẹ anga na kpekika ḅụ.

²⁷Ị́ya ngọ mamgba na, Onwoin arụ mị ḅie sime apụ mamgba na, Akakọn apụ mamgba na tuḅoni ma na, Owoin arụ mị ḅie sime owunima na yemamgba na— Arịmgba, arịmgba tọrụogbo famẹ Ị́ya arụ mị kan sịkị.

²⁸Onwoin arụ mị ḅie sime fa àrị apụma ḅe Oloku tịḅịḅie mị tọrụ akaḅụ mgba lamẹ.

²⁹“Ini onwoin arụ goyegoye ḍiki mangịmẹ, Arụ mị ḅie sime apụma ini oki tọrụ akaka ma munsam.

³⁰Inimgba ini siḅara se kururu ị́ pịrịmẹ, Onwun se inia tịḅị ọgọnọ sara, pịkịna fọn ḅie kpeleki aḅẹ.

³¹Ini inia tịḅị inime ma sẹịnsin ọ́ pịrịmẹ, Ini pịkịna okuru ḅiriaye seni iniaḅụma ḅirimamẹ. Inia kuḅie opuma simẹ ini owu àrị sịkị.

³²Ini ḍụẹịn ḍipi nime chu ọ́ pịrịmẹ: ‘Taya mị tụḅọ ineda anị sime ọkụ simeḅe, Taya mị mịọkụ anị ala mengi tọrụ mị ḅie yawụma omi?

³³Ị́ya tuḅonima tọrụ saḅa jịn sẹ mun sịkị, Sẹ goyegoye ḅiaye ma ị́ mịẹ ḅeinmamẹ. Amanyanapụ ngọ kọnmẹ Ị́ya ngọma ḅụ pakaḅo ala-ẹ.

³⁴Mịọkụ ala mengi ị́ ḅilemasam; Ị́ ḅile abaji mị kiri chuku ḅie munsam. Ị́ya ngọma na pịkị fịrịnwẹngị ị́ pịrị apụ mamgba na Ị́rị́ na ala mengi mị ḅie maịnfasam.’

³⁵“Tọrụ aka ḅụ angaḅọ goyegoye ḅụgbiripumẹ ị́ ḅụ pakaye mị gose. Inia amanyanapụma sọnị inia ḅalafamẹ, ḅalafa mị pịkị inia tọrụogbo ma ḅụ gịẹịnmẹ.

³⁶Ị́ sosam, ị́ sogbamasosam, tomonikiri mị ḅie tuḅoni mamgba inia ḅalafamẹ, inia ḅalafamẹ na ị́ laye mị ini sọnị ini laḅịa.”