Read kirikeni Izikịẹl 28 Bible Online

Izikịẹl 28 - kirikeni bible

Izikịẹl 28

¹Nyanaḅọ Ḅe ori ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “Taya ḅie ḅẹrẹtọn àrị ḅọ ḅe, Ị̀rị̀ Kụrọmamgba Nyana Tamụnọ Ḅe ḍuko ọ̀ pịrịarịye mị nwọ ḍuko ọ̀ pịrị: Kpokoro opuaye mịẹḅụ, ị́ ḅereni ọkịmẹ na, ị́rị́ tamụnọ-ẹ. Ị́ nwọ ḅẹmẹ na oru sime ọkụ emine ọgọnọ ị́ sime waraḅẹ, ala mengi tọrụ ma pịkị ị́ kelemamẹ. Ị́ ineda ị́ ḅụ se oru ḅara wẹrịḅịa, ọkụma, ọkọka-o, ị́rị́ fịḅịa ḅọ-ẹ, ị́rị́ Tamụnọ kẹ.

³Ị́ koromamẹ na ị́rị́ ị́ yenemitẹịn Danịẹl ḅe nẹngịmẹ, na ngịsị ị́ tọrụkuḅu ḅọịḅịaye ofori-ẹ.

⁴Ị́ya yenemi mị na pịkị yeḍawọ kpaịnma mị na mịẹso sịkị ị́ ḅo goli na seleḅa na ngọ kọnḅọ nwọ sọmẹ.

⁵Nemi tuḅo kọn se sọaye sọsọ ḅoaḅẹ. Ị́ya ngọma àrị ị́ tịḅịḅie furama ọkụ ḍiki!

⁶“Mịọkụ mị, Ị̀rị̀ Kụrọmamgba Nyana Tamụnọ Ḅe à ḍukoarịye-ẹ: Tamụnọ yenemi ọkụ ị́ nwọse yenemimẹ ị́ nwọ koromamẹ gose,

⁷ḍikiḅụgerere nyana nweni pịrịpịrịka tarakapụ à nwọse ḅo owu se ị́ pakaḅịa. Yenemi ḅụ na mịẹkpaịnma ḅụ na ị́ nyanaḅo iḅiaye mamgba ini àrị kọsịmaḅịa.

⁸Ini ị́ ḅaaḅịa, se ị́ seni mengi mengi iḍupu ḅie ḍipiḅịa.

⁹Iniḅo ị́ ḅaaḅịa sịkị, ị́ pa pịkị ḅereni ọkịḅịa na ị́rị́ tamụnọ-ẹ nwọḅẹye mị? Ị́ ḅaaḅịa apụma ḅo tọrụna-tọrụna ị́rị́na ịrịaḅịa sịkị, ị́ fịḅịa ị́rị́ Tamụnọ kẹ.

¹⁰Tamụnọ nemika jịn sẹ apụma ḅara ḅie obiri fị ọkụ anị ị́ fịḅịa ọkụ-ẹ. Ị̀rị̀ Kụrọmamgba Nyana Tamụnọ Ḅe, kụrọ mị à pịrịsam.”

¹¹Nyanaḅọ Ḅe ọ̀ pịkị ọkwẹịn ị̀ pịrịmẹ.

¹²“Tomoniḅọ tọkụ,” ọ̀ nwọ ḅẹmẹ, “Taya amanyanaḅọ ḅe, ò koru-arị-si-fụḅara mị ngịrị anị pịrị. Ị̀rị̀ Kụrọmamgba Nyana Tamụnọ Ḅe ḍukoarịye mị ḍuko ọ̀ pịrị: Gbọrị sịkị ḅụ, ị́ya kpaịn ḅara mị gose ini ḅara tọkụma ị́ se jịn apụ ḍiemẹ. Ị́ya yenemi mị na ị́ya iḅi mị na gose!

¹³Idẹn ḅie ị́ angamẹ, Tamụnọ iḅi ozu mị ḅie, se kịrịkịrị iḅiaye ị́ nwọ ḅiriḅirimẹ: rubis na daịmọn na, tọpaz na, bẹril na kanelian na pịkị jaspa na; sapfaịya na ẹmẹrald na pịkị ganẹt na. Goli goli ḅiriaye ị́ nwọ nyanamẹ. Ini ị́ tẹmẹ ene mị ḅie ini àrị mịẹ ị́ pịrịmẹ.

¹⁴Anịju ḅụ gbọrị opu ḅalafama enjẹlḅọ à nwọse koroma ị́ ḍikiḍikimẹ. Ị̀ya fịafịa tụndụ ọgọnọ ị́ angamẹ, se gẹnịgẹnị nwananị-nwananị iḅiaye ḅie ị́ nwẹngịma ḅọrọḅọrọmẹ.

¹⁵Ị́ya mịẹmịẹye kpaịnmẹ ini ị́ tẹmẹ ene mị ḅie sakị ọkịmun, se ị́ ḅo si mịẹmẹ.

¹⁶Ye-fẹ-na-dẹrị-na ḅụ ị́ tọrụchịẹkẹ, se mịn mị ị́ se mun kụrọkụrọ mịẹmịẹaye na si na ḅie chumẹ. Anịẹrẹchị kụrọḅaraḅụ àrị ị́ ḅẹmẹ na ị̀ya fịafịa tụndụ mị ḅụ so, se ị́ ḍikiḍiki sime enjẹlḅọ ḅe, àrị gẹnịgẹnị nwananị nwananị iḅiaye ma ḅie ị́ desinmẹ.

¹⁷Ị́ iḅimẹ nwọḅẹye gose ị́ tịḅịḅie furama, se ị́ya ẹrẹso mị mịẹso sịkị ị́ ḅo oḅoriḅọ ḅara se yemịẹmẹ. Mịn mị gose à tọrụfụrụma ị́ suma kiri gbinmẹ se àrị ị́ wẹrịsomẹ ị́ se jịn amanyanapụ ḅerijine gose.

¹⁸Ye-dẹrị-na-fẹ-na ḅụ ị́ si mịẹmẹ gose, ị́ya tẹkẹ-a nyọma ị́ simasam. Anịẹrẹchị à fịnị se opuama mị ḅụ chụa se anị dọkịma kiri pịrịmẹ. Mịọkụ ị́-ọrị-apụ goyegoye, ọrịḅịa na ị́ iderimaḅo fọn sọsam.

¹⁹Ị́ sosam, ị́ gbọtụma sosam, se sẹsẹ ma ḅie ḅo ị́ nemiḅịa sẹma inia ḅalafaḅịa, nwọfa ị́ la siye mị ini laḅịa-ẹtuḅo.”

²⁰Nyanaḅọ Ḅe nwọse ị̀ ḅẹmẹ,

²¹“Tomoniḅọ tọkụ, Saịdọn opuama mị ḍuko sima.

²²Ḍuko anịju sime apụma pịrị, Ị̀rị̀ Kụrọmamgba Nyana Tamụnọ Ḅe, ini na gbolomaye ḅụ ḍukoye mị: Saịdọn, ị̀rị̀ ị́rị́ na tarakaḅọ-ẹ, tomoni ị̀ tokoniḅịa à se ị́ mịẹye mị gose. Ini nemiḅịa na Ị̀rị̀ anị Nyanaḅọ Ḅe-ẹ, à fịafịa ọkụ à nwọ ḍiepakụmaḅịa sịkị, anị fomuḅara se ị́ ḅie angapụma pịrị ḅụ.

²³Àrị obi se ị́ fịrịmaḅịa, se à pịkị mịẹḅịa ị́ya ateli ma ḅie tomoni pulo ideriḅịa. Angana angana ḅụ ini owu se ị́ pakaḅịa, ini pịkị ị́ya tomonima ḅaaḅịa, anịsịkị mị ị́ nemiḅịaye-ẹ na Ị̀rị̀ anị Nyanaḅọ Ḅe-ẹ.”

²⁴Nyanaḅọ Ḅe nwọ ḅẹmẹ, “Izrẹl mị kelema se anịse kpọtiarị sẹ mamgba, àrị ḅarị ngịsị ịga na nangị na sọ Izrẹl mị ḅụọyịmaḅịaye mịẹ ẹkẹ, se ini nemiḅịa na Ị̀rị̀ anị Kụrọmamgba Nyana Tamụnọ Ḅe-ẹ.”

²⁵Kụrọmamgba Nyanaḅọ Ḅe nwọ ḅẹmẹ, “Izrẹlapụma àrị ini ọkị pịkịmaḅoḅịa, àrị ini galagalama sẹịn sẹma ḅie, anịsịkị sẹ mamgba nemiḅịa na à fịafịamẹ. Izrẹlapụma inia ḅarakuḅu ama ḅie ini angaḅịa, à se ị̀ya fịrịnwẹngịḅọ Jekọb ḅe pịrị ama mị.

²⁶Dein ḅụ ini anịju angaḅịa. Ini warị nama pịkị ozu ḍipiḅịa. Inina-kpeki se ini se kpọtiye-mịẹ sẹ mamgba à fomuḅara se ini pịrịḅịa se Izrẹl mị gbọrịye sọ anịaḅụ fụkamaka ḅaraḅụ anị simeḅịa. Anịsịkị ini nemiḅịa na Ị̀rị̀ anị Nyanaḅọ inia Tamụnọ Ḅe-ẹ.”