Read kirikeni Izikịẹl 30 Bible Online

Izikịẹl 30 - kirikeni bible

Izikịẹl 30

¹Nyanaḅọ Ḅe ọ̀ pịkị ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, ịkịankoro se Ị̀rị̀, Kụrọmamgba Nyanaḅọ Ḅe ḍukoarịye mị ḍukopakụma. Ị́ oloku ma ọkwẹịn ma ḍukopakụmaḅịa: Ḅalafama gbọrị ene ḅoaḅẹ!

³Ene mị anị kpekisam, Nyanaḅọ Ḅe fịrịnwẹngịḅịa ene mị, Soḅuno na ḅụfụka na se sẹma pịrịḅịa ene mị.

⁴Ijipt ḅie ọmụ koroḅịa Opu kururu pịkị Sudan ḅie simeḅịa. Tọn apụ ini nwọ ḅaaḅịa Ijipt mị ḅie; Sẹ mị ini anị ọfọịnḅịa Se anị gbọtụma kpọtụna sara simeḅịa.

⁵“Anị ọmụ mị anị pịkị ini Itiopia ḅie na, Libya ḅie na, Lidia ḅie na, Arabịa ḅie na pịkị Kọb ḅie na ini ọkọ owunima ḅaaḅịa, pịkị ị̀ya tomonima ḅie apụ na.”

⁶Nyanaḅọ Ḅe nwọ ḅẹmẹ, “Ọgọnọju Migdọl mị ḅụ ọkịmun chukuju Aswan mị la, owusọ Ijipt mị pịrịarịapụ mamgba ini ini ḅaafamaḅịa owu ḅie. Ijipt apụma na opuaye mịẹmịẹ owunima, ini ini kọsịmaḅịa. Ị̀rị̀ Kụrọmamgba Nyanaḅọ Ḅe àrị ọkwẹịn sam.

⁷Ama mị anị tomonikiri mị ḅie tomoni simekatẹịn ama nwọ sọḅịa anịsịkị anị nyana opuamama àrị gbọtụma kangulugulu ḅụ simeḅịa.

⁸À fịnị se Ijipt ḅụ chụa se owusọ anị pịrịarịapụ mamgba ini nwọ ḅaso sịkị, anịsịkị mị ini nemiḅịaye-ẹ na Ị̀rị̀ anị Nyanaḅọ Ḅe-ẹ.

⁹“Anị ene mị ḅo la se Ijipt mị kan ḅọrọsa ḅẹḅẹ, àrị onwoin arụ ḅie ḅụ, okunwẹngịapụ nwọse pakarịaye ma, nwọ nemika Itiopia apụma fịrịma se ini jike sịsẹmaḅịa. Inia ḅalafaḅịa. Anị ene mị anị ḅoaḅẹ!”

¹⁰Kụrọmamgba Nyanaḅọ Ḅe nwọ ḅẹmẹ, “Babilọn amanyanaḅọ Nebukadneza ḅe à nwọ ḅẹḅịa se ori Ijipt apụma inia ngọ nyana mị famaḅịa.

¹¹Ori na oria ḍikitịḅịfoin nyanaka owunima na ini ḅo ama mị kansinḅịa. Okola agiji ini nwọse owu se Ijipt mị pakaḅịa, se ama mị ḅie fị ḍụẹịn ḅeinḅịa.

¹²À Naịl mị mịẹse anị samịnaḅịa se àrị Ijipt mị se siaye mịẹ apụ chuku ḅie koromaḅịa. Bebe sẹ mị mgba jịn sẹ apụ anị simaḅịa. Ị̀rị̀ Nyanaḅọ Ḅe à ḍukosam.”

¹³Kụrọmamgba Nyanaḅọ Ḅe nwọ ḅẹmẹ, “Àrị ini kara oru ma na, iruo-a oru ma na kọsịmaḅịa Mẹmfịs ḅie. Ijipt mị anịa tịḅịdaḅịa gbọrịḅọ sọ ofori-ẹ, à pịkị nweni mamgba ḅalafamaḅịa.

¹⁴Ijipt ḅụ chuku daọrụ mị, à mịẹḅịa anị kansara ḅụ simeḅịa, se à fịnị se ọgọnọju Zoan opuama mị ḅụ chụaḅịa. À ḅụfụka se tịḅịnị opuama Tebẹs mị pịrịḅịa.

¹⁵À mịẹḅịa Pelusiọm opuama, Ijipt apụma inia opu owuni ayema se koroma ama mị, ị̀ya ọfịrị ịganị iniaḅụ ọyịḅịa, à Tebẹs apụ ngọma kọsịmaḅịa.

¹⁶À fịnị se Ijipt mị ḅụ chụaḅịa anịsịkị Pelusiọm mị anị opu ḅụakụ ḅie simeḅịa. Tebẹs onu ma ini àrị kan koromaḅịa, se opuama mị, opu mengi anị ḅilemaḅịa.

¹⁷Heliopolịs na Bubastis na opuamama ḅie asẹmẹnị ma, ọmụ ḅie ini fịḅịa, se ísíapụma ini ikoliapụ ḅaraḅụ ini sẹịnsoḅịa.

¹⁸Ijipt apụ kụrọ mị à nwọ anyịma se inia tịḅị furamarị kụrọ mị ḅo kulumaḅịa sịkị, Tapanhiz mị kanakana anị gbẹịnḅịa. Soḅuno Ijipt mị gbẹịnḅịa se anịa opuamama ḅie apụ mamgba ini ikoliapụ ḅaraḅụ ini kunsoḅịa.

¹⁹À mị ḅara mị se fomuḅara se Ijipt mị pịrị sịkị, ini nemiḅịa na Ị̀rị̀ anị Nyanaḅọ Ḅe-ẹ.”

²⁰Ini kụrọḅara se wa desin oyigbọrịye fịnjị karama kụra mị ḅie, tatarị akalụ mị ḅie sọnọma ḍin ene ḅụ Nyanaḅọ Ḅe ori ọkwẹịn ị̀ pịrịmẹ.

²¹“Tomoniḅọ tọkụ,” ọ̀ nwọ ḅẹmẹ, “Ijipt amanyanaḅọ ḅe, ọ̀ ḅara àrị anyịmasam. Ḅịtẹ se anị fịna anịkanịka ḍiki sọnị se anị ọlọchịẹma mịẹso sịkị ọ̀ ḅụ iḅi se, ọ̀ ḅara mị kụrọ se ò se ineda okola-agiji ọlọ se, ò se owu munḅịa gbọrịḅọ sọ ofori-ẹ.

²²Mịọkụ mị Ị̀rị̀, Kụrọmamgba Nyanaḅọ Ḅe ḍukoye-ẹ, Ị̀rị̀ anị Ijipt amanyanaḅọ ḅe ori na tarakaḅọ-ẹ. Oria mama ḅarama à mun àrị anyịmaḅịa—iḅiye mị na pịkị anyị ḅọrọsaye mị na—anịsịkị okola-agiji mị, ọ̀ ḅara ḅie anị sokoroḅịa.

²³À mun Ijipt apụma galagalama tomonikiri ḅie mgba sẹịn-ẹmun-aḅẹ.

²⁴Anịsịkị à Babilọn amanyanaḅọ ḅe ḅarama mịẹse àrị kụrọḅịa, se àrị ị̀ya okola-agiji mị se ọ̀ ḅara ḅie chụaḅịa. Ọkụma Ijipt amanyanaḅọ ḅe, ọ̀ ḅarama àrị àrị anyịmaḅịa se, ori-na-tarakapụ ma tọrụkuḅu, ḅiefie ḅụ ò sime fịḅịa.

²⁵Iin àrị ọ̀ mịẹ lọkọmaḅịa se à Babilọn amanyanaḅọ ḅe mịẹ kụrọmaḅịa. Àrị ị̀ya okola-agiji mị se ọ̀ pịrị se ori anị se Ijipt mị daḅịa sịkị, ọrụḅọ ọrụḅọ nemiḅịa na Ị̀rị̀ anị Nyanaḅọ Ḅe-ẹ.

²⁶Ijipt apụma àrị ini galagalama tomonikiri mị ḅie nyọnyọ ḅụ sẹịnḅịa. Anịsịkị ini nemiḅịa na Ị̀rị̀ anị Nyanaḅọ Ḅe-ẹ.”