Read kirikeni Izikịẹl 32 Bible Online

Izikịẹl 32 - kirikeni bible

Izikịẹl 32

¹Ini kụrọḅara se wa desin oyimaịn kụra fịnjị karama kụra mị ḅie, oyimaịn akalụ fịnjị mị ḅie, tatarị ene ḅụ, Nyanaḅọ Ḅe ori ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “kụrọma iḅiọkụma Ijipt amanyanaḅọ ḅe ḅeri nụnụ. Mị ị̀ ḅara ḅo yela oku mị se ọ̀ pịrị: Sẹsẹ ma ḅieḅụ ị́rị́ chịrịḅa-ẹ nwọḅẹ ḅara ị́ nwọse yemịẹmịẹmẹ, ọkụma tọrụḅie-mengi-fomu-nyọ ma ḅụ sara àrị seki ị́ nwọ kịkẹtẹịnmẹ. Ị́ ḅụọma ị́ nwọse ọpọtọkọ ma pikiri mengi mị wọlọmamẹ.

³Tọntọn a sẹ ḅo koḅiria sịkị, ị̀ya ịgbọ ḅie àrị ị́ kunḅịa se àrị ini mịẹḅịa ini ịgbọ mị fọnọ anga sọḅịa.

⁴Àrị ị́ jine pakụmaḅo kiri ọgọnọ laḅịa se tomonikiri ḅie sime fenima na nama mamgba na à nwọ ọkịḅo se àrị ị́ se fịfịye mịẹḅịa.

⁵Ị́ya ḅụrụarị oju mị à nwọse tụndụma ọgọnọ na pẹsịkiri ma ḅie na gbẹịnḅịa.

⁶Àrị ị́ya pulo mị ọsụn saraḅịa se anị wasama mun tụndụma ọgọnọ na ḅu mengi tọrụ ḅie ma na ḅeinmaḅịa.

⁷Àrị ị́ ḅaasa ḅẹḅẹ, à so mị kikimaḅịa, à pịkị lolia ma gurosinḅịa. Ịrụa mị soḅuno ma ọḅụju anị ḅọịḅịa, akalụ mị sọ pịkị ḅịa ẹkẹ.

⁸À sotọrụ tọnjie mamgba binmaḅịa se à kanakana se ị́ya tomonikiri mị gbẹịnḅịa. Ị̀rị̀ Kụrọmamgba Nyanaḅọ Ḅe, à ḍukosam.

⁹“Àrị ị́ famasinsam nwọḅẹye mị, ị́rị́ ma nemika sẹma ḅụ à ḅọrọ ḍuko finjimaḅịa sịkị, anị tọntọn-a sẹ ḅụḅalaḅalamaḅịa.

¹⁰À se ị́ mịẹḅịaye mị, anị tọn-a sẹ ḅụgbiripumaḅịa. Àrị ị̀ya okola-agiji mị se pekelepekelema ḅọrọḅịa sịkị, amanyanapụ, ḅalafa ḅụ ḅụgeregereḅịa. Ị́ ḅịkị ḅịa ene inimgba ḅalafa ḅụ ḅụgeregereḅịa inia ḍumo ma gose.”

¹¹Kụrọmamgba Nyanaḅọ Ḅe nwọse Ijipt amanyanaḅọ ḅe ḅẹmẹ, “Babilọn amanyanaḅọ ḅe, oria okola-agiji mị ị́ tọrụ se anị daḅịa.

¹²À mịẹḅịa siḅara se tomoni na anga-anga sẹ ḅie owuni ḅo inia okola-agiji ma wọrọ se ị́ya tomoni mamgba ḅaafamaḅịa. Ị́ya tomonima na pịkị ị́ se opuaye mịẹmịẹ jịn aye goyegoye ini simafamaḅịa.

¹³Ị́ya nambuloma, à àrị ḅaa saraḅịa, mengi pokolo sime nyọ goyegoye ḅụ. Tomoni anịkanịka nama sọnị ḅarị ngịsị mengi mị wọlọma ẹkẹ.

¹⁴À mịẹḅịa ị́ya mengi ma àrị ẹngẹma pịkị fịafịaḅịa, se ị́ya mengi tọrụ ma àrị deindeinma ideriḅịa. Ị̀rị̀ Kụrọmamgba Nyanaḅọ Ḅe àrị ọkwẹịnsam.

¹⁵Àrị Ijipt mị se nweni angaka nyọ mịẹ pịkị anịa ḅie angaye goyegoye nwọ ḅaafama se anị se kpọngọlọma koroma so sịkị, ini nemiḅịa na Ị̀rị̀ anị Nyanaḅọ Ḅe-ẹ.

¹⁶Mị kụrọ-yela-ḅeri-nụnụye mị anịḅo ḍụẹịn ḍipi nime sọḅịa. Sẹsẹ ma ḅie eremeni ma ini anị se kururu nime chu Ijipt mị na anịa tomoni mamgba na pịrịḅịa. Ị̀rị̀, Kụrọmamgba Nyanaḅọ Ḅe àrị ọkwẹịnsam.”

¹⁷Ini kụrọḅara se wa desin oyimaịn kụra fịnjị karama kụra mị ḅie tatarị akalụ mị ḅie jie-a ḍin ene ḅụ, Nyanaḅọ Ḅe ori ọkwẹịn ị̀ pịrịmẹ.

¹⁸“Tomoniḅọ tọkụ,” ọ̀ nwọ ḅẹmẹ, “Ijipt ḅie sime ḅaka apụma gose kururu. Ini se ísí kụrọ-a sẹma ḅụ chụa se ini se fịsapụ tomonikiri mị ḅie sẹịn.

¹⁹Ḍuko ini pịrị na: “Ó koromaḅara ómine iḅitẹịn tomoni goyegoye nẹngị nọ? Ó koro fịsapụ tomonikiri mị ḅie munḅịa se Tamụnọ nemikapụ ma ḅie ḅọlọlọ simeḅịa.

²⁰“Ijipt apụma owu ḅie ini ḅaa apụma na ini na ḅịkịḅịa. Gbọrị okola-agiji inimgba ḅaaḅịa ẹrẹchị ḅụkarakarama waraḅẹ.

²¹Ẹrẹso ḅọrọsa opuapụ ma pịkị Ijipt mị ḅụsọ owu sọsọ ḅọrọsa fịsapụ na, ó ḅosanọ-ẹ kereni ḅịpị nwọse ini ọkị fịsapụ tomonikiri mị ḅie chuḅịa. Ini olokumẹ: ‘Owu ḅie ini ḅaa Tamụnọ nemikapụ koro mịanga ḅosam, se mịanga ini ḅọlọlọ waraḅẹ!’

²²“Asiria mị anịnyọ anị omi-ẹ, anịa owuni iḍupuma nyọ mamgba kelema waraḅẹ. Inimgba owu ḅie ini ini ḅaamẹ,

²³se inia iḍupuma, fịsapụ tomonikiri ḅie gbuntẹịn pẹkẹrẹma ḅụ àrị omi-ẹ. Anịa owuni mamgba owuḅie ini ḅịkịmẹ, se inia iḍupuma nyọ mamgba kelema waraḅẹ. Ọkụma gbọrị sịkị ḅụ ini ḍumo apụ ama mị ḅalafamamẹ.

²⁴“Ilam mị anị nyọ anị omi-ẹ, anịa owuni iḍupu nyọ mamgba kelema waraḅẹ. Inimgba owuḅie ini ini ḅaamẹ, se inimgba ḅụpẹlẹkaḅụ ini koro fịsapụ tomonikiri mị ḅie mun mẹ. Inia ḍumo sịkị ḅụ ini opuma tomoni-a ḅalafamamẹ, ọkụma mịọkụ ḅụgererema ḅara ḅụ ini fị ḅọlọlọ waraḅẹ.

²⁵Ilam apụma, kiri ḅie ini ḅọlọlọ waraḅẹ, owu ḅie fịsapụma ḅie, se anịa owuni iḍupuma pịkị anị kelema waraḅẹ. Inimgba inia ḅụpẹlẹkẹ, inimgba owu ḅie ini ini ḅaamẹ. Inia ḍumo sịkị ḅụ ini opuma tomoni-a ḅalafamamẹ, ọkụma mịọkụ ḅụgererema ḅaraḅụ ini fị ḅọlọlọ waraḅẹ se ini mun owu ḅie ini ma ḅaa apụma ḅụsọmẹ.

²⁶“Mẹshẹk na Tubal na anịnyọ ini omi-ẹ, inia owunima iḍupuma nyọ mamgba kelema waraḅẹ. Inimgba inia ḅụpẹlẹkẹ, inimgba owu ḅie ini ini ḅaamẹ. Ọkụma gbọrị sịkị ḅụ ini ḍumo apụ ḅalafamamẹ.

²⁷Olomu sịkị ḅie ẹrẹso-opuapụ ma fị se ini opu osiḅụ ini ḍipi ḅara mị, mịnapụma ini ọkọ se osiḅụ ini ḍipikẹ, inia apụma anị inia fị iḅila ọgọnọ ḅụ inia okola agijima se inia tịḅị sẹkẹ pịkị inia agbọma se inia ọgọnọ gbana se ini àrị se so fịsapụ tomonikiri mun mẹ. Mịna ẹrẹsosapụma gbọrị sịkị ḅụ ini opuma kụrọmẹ, se ini ḍumo apụ ḅalafamafamamẹ.

²⁸“Anị ḅara anị Ijipt apụma ini fịkọsị ḅọlọlọḅịa ọkụ-ẹ owu ḅie ini ḅaa ḅụpẹlẹka apụma ḅieḅụ.

²⁹“Idọm mị anịa amanyanaḅọ ḅe na anịa ḅẹrẹtọn apụma na anịnyọ ini omi-ẹ. Ini ma kụrọ owuni-ẹ, ọkụma mịọkụ fịsapụ tomonikiri ḅie ini ḅụpẹlẹkapụ ma na fị ḅọlọlọ waraḅẹ, ini owuḅie ḅaa apụma.

³⁰“Ọgọnọ daọrụ ḅụ sime amanyanapụ owuapụ awọ mamgba anị nyọ ini omi-ẹ, Saịdọn apụma sọnị. Inia kụrọ mị gbọrị sịkị ḅụ opuma ḅalafamamẹ, ọkụma ini ḅụgererema ḅaraḅụ koro mun ini owu ḅie ḅaa ḅụpẹlẹka apụma na fị ḅọlọlọ waraḅẹ. Fịsapụ tomonikiri ḅie mun apụma la ḅụgerere mị ini sọ ini lamẹ.

³¹“Tọrụmgbọlụ se ini ḅaasapụ mamgba ọrị mị anị kuḅiekụrọmaye sọ Ijipt amanyanaḅọ ḅe na oria owunima na pịrịḅịa,” Kụrọmamgba Nyanaḅọ Ḅe ọkọ ḅẹmẹ.

³²“Ị̀rị̀ Ijipt amanyanaḅọ ḅe mịẹmẹ se ò ḍumo apụma ḅalafamamẹ, ọkụma ori na oria owunima na ini ini ḅaaḅịa se ini mun owu ḅie fị ḅụpẹlẹka apụma ḅụ sọ ịnyọsaraḅịa.” Kụrọmamgba Nyanaḅọ Ḅe ò ḍukosam.