Read kirikeni Izikịẹl 33 Bible Online

Izikịẹl 33 - kirikeni bible

Izikịẹl 33

¹Nyanaḅọ Ḅe ori ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “ḍuko ị́ya tomonima pịrị, àrị owu se ama paka sịkị pakaḅịaye. Anị sẹ mị ḅie apụma ini inia ḅie gbọrịḅọ sẹlẹ pakụmaḅomẹ nyọ koruḅịaḅọ.

³Tarakaḅọ ḅe ḅoarị ọkụ ọ̀ nwọ ọrị sịkị, ori oḍu ofuro se ọrụḅọḅọ ḅeri jinemẹ.

⁴Tomoniḅọ ḅọrọ oḍu mị naamẹ, se anị se yechịnka se tarakaḅọ ḅe ḅo ọ̀ ḅaamẹ ḅẹḅẹ, oria fị mị ori mị anị gbolomaye-ẹ.

⁵Oria fị mị oria mịẹirima ḅụ ḅomẹ, anịatịḅị ḅeri jine oḍu mị ò se yechịnkẹ, ọ̀ ḅọrọ oḍu mị se yechịn ọkụma mgbọkụ ọ̀ mangị soḅịa.

⁶Nyọ koruḅọ ḅe tarakaḅọ ḅe ḅoarị-ọkụ ọrị se ḅeri jine oḍu mị ofurokẹ ḅẹḅẹ, tarakaḅọ ḅe ò ḅo ini siapụma ḅaaḅịa, ọkụma inia fị mị gose à nyọ koruḅọ ḅe ọlọḅịa.

⁷“Mịọkụ, tomoniḅọ tọkụ, àrị ị́ se nyọ koruḅọ mịẹ Izrẹl sẹ mị pịrị-ẹmun-aḅẹ. À se ị́ pịrị ḅeri jine ọkwẹịn mị, gbarịmaka ḅaraḅụ anị daḅọrọma ini pịrị.

⁸À nemikase ḍukopakụmamẹ na siye mịẹḅọ fị-ẹmuaḅẹ, se ị́ ò ḅeri jinekẹ se ori oria si mịẹmịẹaye ma ḅụ pịkị se ọ̀ ḅụ ḍụakẹ ḅẹḅẹ si mị ḅie ò sime fịḅịa, anịsịkị ị́rị́ mị àrị ọlọḅịaye-ẹ oria fị ḅụ.

⁹Ị́ siye mịẹḅọ ḅe ḅeri jinemẹ se ori oria siye mịẹḅụ dachịẹkẹ ḅẹḅẹ, si mị ḅie ò sime fịḅịa, se ị́ ḍumo mị ye anị la-ẹkẹ.”

¹⁰Nyanaḅọ Ḅe ori ọkwẹịn ị̀ pịrịmẹ. “Tomoniḅọ tọkụ,” ọ̀ nwọ ḅẹmẹ, “Izrẹlapụma ini ḍukoarịye mị pịkị nwọ ḍukopakụma ini pịrị: ‘Mịna sima na wa mịẹirimasaye ma na, àrị iku wa pụnụmamẹ. Wa fịfa aḅẹ. Nde wa ḍumoḅịa ọkụ?’

¹¹Ḍuko ini pịrị na pikipikiye ofori-ẹ na Ị̀rị̀ Kụrọmamgba Nyanaḅọ Ḅe anị ḍumo Tamụnọ Ḅe-ẹ ḅẹ sịkị goyegoye, si ḅọ ḅe oria si ḅụ sime fị mị, anị ị̀ ḅieḅẹlẹmakẹ. Anịnakaraka ori oria si ḅụ ḅarasin se ò ḍumo mị anị iḅiye-ẹ. Izrẹl, ị́ mịẹarị siye mị ḅụ ḅarasin. Cheye gose fị mị re ị́ nwọ ḅi-ao?

¹²“Mịọkụ, tomoniḅọ tọkụ, ḍuko Izrẹlapụma pịrị na iḅiḅọ ḅe ḅo simịẹ ọkụma, ọ̀ mịẹ ḅọrọsa iḅiaye ma àrị ngịsị ọ̀ ḍụakẹ. Siaye mịẹmịẹḅọ ḅe ọ̀ mịẹmịẹsiaye ma ḅụ ḅarasinmẹ ḅẹḅẹ, ò fomuḅara da-ẹkẹ, se iḅiye mịẹmịẹḅọ ḅe sakị siaye nwọ mịẹ-aḅẹ ḅẹḅẹ, oria ḍumo mị ḅụ ini ḅarasin ọ̀ pịrị ẹkẹ.

¹³Àrị ineda iḅiḅọ ḅe karịḅịa na ò ḍumoḅịa, ọkụma ò ḅo koromamẹ na ọ̀ tatarị sime iḅi ḅara mị ori na deinmẹ se ò ḅo sakị siaye mịẹmẹ ḅẹḅẹ, ọ̀ mịẹḅọrọsa iḅiaye mamgba à ḅarị se ḅiekoroma ẹkẹ. Ọ̀ mịẹsiaye ma gose ọ̀ fịḅịa.

¹⁴Àrị ineda siye mịẹmịẹḅọ ḅe ḅeri jineḅịa na ọ̀ fịḅịa-ẹ, ọkụma ò nemikase si mịẹmịẹye ḅụ ḅarasin se karakaraye na iḅi na nwọ mịẹ ọkụma—

¹⁵se otoma ḅụ, ini se ọ̀ ḅarachụa se ọ̀ ḅara igbiki ḅọlọye mị anịkanịka ò furuye mị ọ̀ nwọ pịkịmaḅo ye mị nyanaḅọ ḅe pịrịmẹ, ọ̀ pịkị si mịẹmịẹye ḅụ dachịẹmẹ se ḍumo pịrị olokoma ḍuko nwẹngị ọkụma ọ̀ fị ẹkẹ, ọkụma ò ḍumoḅịa.

¹⁶Ọ̀ mịẹsa sima ḅụ à ḅarasin ọ̀ pịrịḅịa se ò ḍumoḅịa, anịatịḅị ọ̀ karakaraye mị na iḅiye mị na nwọ mịẹsam.

¹⁷“Anịsịkị ị́ya tomonima nwọ ḅẹmẹ ị̀rị̀ à mịẹye mị karakaraka-ẹ! Ẹn-ẹn, ini mịẹayema re anị karakarakaye-ẹ.

¹⁸Karakaraye mịẹmịẹḅọ ḅe ḅarị iḅiaye mịẹkẹ se sakị siaye mịẹ ọkụma ọ̀ fịḅịa.

¹⁹Si ḅọ ḅe oria si mịẹmịẹaye ḅụ ḅarasin se iḅiaye mịẹ ọkụma, ori oria ḍumo mị ḍụasam.

²⁰Ọkụma Izrẹl ị́ nwọ ḅẹmẹ na ị̀rị̀ à mịẹye mị karakaraka-ẹ. Ị́ mịẹye ḅụ mị à ḅẹrẹkọn ị́ pịrị-ẹ mun-arịye-ẹ.”

²¹Ini kụrọḅara se wa desin oyimaịn fịnjị karama kụra mị ḅie, oyi-a akalụ mị ḅe sọnọ-a ḍin ene ḅụ, Jerusalẹm mị ḅie mangịso gbọrị owuḅọ, ḅo ḍuko ị̀ pịrịmẹ na opuama mị anị ḅịkịsam.

²²Ma ò ḅoka ene mị ḅe saso ḅiriḅụ ị̀ ḅụnemimẹ na Nyanaḅọ Ḅe oria kụrọ ḅo ị̀ lasam. Nweniḅọ ḅe ene ḅa dede ḅie ḅo sịkị, Nyanaḅọ Ḅe ḅarachụa ị̀ pịrị se àrị ọkwẹịnmẹ.

²³Nyanaḅọ Ḅe ori ọkwẹịn ị̀ pịrịmẹ.

²⁴“Tomoniḅọ tọkụ,” ọ̀ nwọ ḅẹmẹ, “kangulugulusa Izrẹl opuamama ḅie angarị apụma nwọ ḍukoaḅẹ na: ‘Ebraham ḅe ori gbọrịḅọ kẹngẹ-ẹ, se bebe ama mị mgba ini se ọ̀ pịrịmẹ. Mine wa ḅakamẹ anịẹrẹchị, mịọkụ ama mị mịnaye-ẹ.’

²⁵“Ị̀rị̀, Kụrọmamgba Nyanaḅọ Ḅe ḍukoarịye mị ḍuko ini pịrị: Pulo ḅụ sime nama ọ́ nwọ pẹịpẹịmẹ. Ómine oru tẹkẹtẹkẹmẹ. Ó nini kọnkọn mẹ. Nde ó gose koromarịye na ama mị anị sime ómine pịrịmẹ?

²⁶Ó kuḅie se ọ́mịna okola-agiji ma ḅụgbanamẹ. Ọ́mịna yemịẹḅara ḅụnjịnjịmamẹ. Ọrụḅọḅọ sẹfịfịmẹ. Nde ó gose koromarịye na ama mị ọ́mịnaye-ẹ?

²⁷“Ḍuko ini pịrị na Ị̀rị̀ Kụrọmamgba Nyanaḅọ Ḅe inia ḅeri jineaḅẹ na, pikipikiye ofori-ẹ na ị̀rị̀ anị ḍumo Tamụnọ Ḅe-ẹ nwọḅẹ sịkị, kangulugulusa opuamama ḅie anga apụma, ini ini ḅaaḅịa. Ini nwọ sẹ mị ḅie anga apụma owoi-a nama ini pẹịḅịa. Ini nwọ tụndụma ọgọnọ ma ḅụ na pokolo ma ḅie ḅọị-arị-apụ ma obi ḅụ ini fịḅịa.

²⁸Sẹ mị à se kpọngọlọma koroma nweni oforika nyọ mịẹḅịa, anịsịkị ini se opuaye mịẹarị kụrọ mị anịḅo kulumaḅịa. Izrẹl tụndụma àrị owoi so ọkụma gbọrịḅọ sọ ineda arịa ḅie nwẹngị ḅọrọ ẹkẹ.

²⁹À fomuḅara se tomonima inia sima gose ini pịrịḅịa, se sẹ mị se kpọngọlọma koroma sịkị, anị ini nemiḅịaye-ẹ na Ị̀rị̀ anị Nyanaḅọ Ḅe-ẹ.”

³⁰Nyanaḅọ Ḅe nwọ ḅẹmẹ, “Tomoniḅọ tọkụ, ị́ya tomonima ini ị́ ḅụ ḅẹrẹ ḍukoaḅẹ ini ama mị onu ma ḅụ ịrịa sịkị pịkị inia warị-a ḅọkọ ma ḅụ na. Ini nwọse jụmḅọ jụmḅọ ḅẹmẹ, ‘Ó ye wa mun Nyanaḅọ Ḅe ḅịpị mịọkụ ḅo oku nwọ naa.’

³¹Anịẹrẹchị ị̀ya tomonima iniḅo kpokponimamẹ ị́ ḍukoḅịaye nwọ naaḅịa ẹrẹchị, ọkụma ị́ ḍuko ini mịẹ nwọḅẹye mị ini mịẹkẹ. Inia ḅịpịḅọkọ ma ḅụ ḅịpịḅẹlẹ omi-ẹ, ọkụma inia ịmụkụ-a mịẹmịẹaye ma ini pa nwọ mịẹ-aḅẹ.

³²Iniaḅụ ị́ jịnye kịkẹkẹ, ḅịpịḅẹlẹ se ḅẹlẹ-a nime chu na ọbọ na farịarịḅọ ḅara anị ị́ sime ọkụ-ẹ. Ini ị́ ḍukoaye mamgba pokimẹ, ọkụma ọkwẹịn ma ḅụ gbọrịye kẹngẹ sọ ini kokokẹ.

³³Ọkụma ị́ya ọkwẹịn mamgba ḅo kọkọmaye sọ sịkị—àrị pịkị kọkọmaye sọḅịa—anịsịkị anị ini nemiḅịaye-ẹ na ịkịankoroḅọ iniaḅie simemẹ.”