Read kirikeni Izikịẹl 34 Bible Online

Izikịẹl 34 - kirikeni bible

Izikịẹl 34

¹Nyanaḅọ Ḅe ori ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “Izrẹl tịḅịnịma ḍukosima. Ịkịankoro ini pịrị, se Ị̀rị̀, Kụrọmamgba Nyana Tamụnọ Ḅe ḍuko ini pịrịye mị nwọ ḍuko ini pịrị: Ọ́ fasam, ómine Izrẹl ḅie anana ḍikiḍiki apụ. Ómine ọ́mịna ḅụ abalamẹ, ọkụma ó ḅifie ananama pịrịkẹ.

³Ómine arịaḅụ pakaḅo ndo mengi ma ḅumẹ, se ọ́ pịkị arịa ichuka se mịẹ ḅụchụaye nwọ chụamẹ, ọ́ pịkị arịa ḅie iḅitẹịn ananama ḅaa pẹịmẹ. Ọkụma, ananama ó ḅifie àrị pịrịkẹ.

⁴Ịnyọ nyanakaye ma ómine àrị abalakẹ, obiaye ma ómine àrị gwọkẹ, ịnọ ma ọ́ ḅịtẹ-pẹkẹrẹ se fịnakẹ, írí-fa-anịkanịka-fa-ẹmun-arịye ma ọ́ ḍọkịḅokẹ anịnakaraka kụrọkụrọ ḅara ọ́ nwọse àrị mịẹmẹ.

⁵Anana ma àrị ḍikiḍikiḅọ oforikaye gose àrị galagalamẹ, se piri ḅie owoi-a nama àrị ḅaa pẹịmẹ.

⁶Anịẹrẹchị ị̀ya ananama àrị nwẹngị gele-a chịngịma na tụndụma na ọgọnọ nwọ mun mẹ. Àrị galagala sẹkiri ḅie mgba sọmẹ se àrị ḍọkị gbọrịḅọ sọ pịkị ofori-ẹ.

⁷“Mịọkụ, ómine anana ḍikiḍiki apụ, Ị̀rị̀ Nyanaḅọ Ḅe ḍuko ọ́ pịrịarịye mị ọ́ nwọ poki.

⁸Pikipikiye ofori-ẹ na, Ị̀rị̀ anị ḍumo Tamụnọ Ḅe-ẹ nwọḅẹ sịkị, ómine ị̀ poki gbẹịnmẹ. Ị̀ya ananama piri ḅie owoi-a nama owu se àrị paka se àrị ḅaa pẹịsam, anịatịḅị gbọrị anana ḍikiḍikiḅọ sọ ofori-ẹ. Ị̀ya anana ḍikiḍiki apụma ini ḅụkụrọma kele anana ḍọkịkẹ. Iniaḅụ ma re mị ini abalarịye-ẹ, ọkụma ini sịkị nyana ananama pịrịkẹ.

⁹Anịẹrẹchị ómine ị̀ poki ómine anana ḍikiḍiki apụ.

¹⁰Ị̀rị̀ Kụrọmamgba Nyana Tamụnọ Ḅe, à ḅelema ḍuko aḅẹ na, Ị̀rị̀ ómine na tarakaḅọ-ẹ. Àrị ọ́mịna ḅara ị̀ya ananama ọkị soḅịa, se à ḅarị ḅereni ọ́ pịrị-ẹkẹ ọ́ pịkị àrị ḍikiḍiki; à ḅarị ngịsị ḅereni ẹkẹ ọ́ papa ọ́mịnaḅụ kẹngẹ nwọ abala. Àrị ọ́mịna ḅara ị̀ya ananama ḍụaḅịa, se à pịkị ḅereni ọ́ pịrị ẹkẹ ómine àrị pẹị.

¹¹“Ị̀rị̀ Kụrọmamgba Nyana Tamụnọ Ḅe ḍuko ọ́ pịrị aḅẹ na, à ḅarana ị̀ya ananama ḍọkịpakụmaḅoḅịa, se à tọrụ se arịaḅụ wẹrịḅịa,

¹²anị anana ḍikiḍikiḅọ oria galagala ananama ḍọkịḅo se pịkị àrị kpokponima ọkụ mị. Anị ḅalafama kanakana si ene mị ḅie, àrị galagala da-pẹkẹrẹ da-pẹkẹrẹ àrị àrị ọkịḅo ḅịa.

¹³Jịn-a sẹma ḅie àrị àrị sinpakụmaḅịa, se àrị àrị kpokponimaḅịa, se àrị àrị ọkị pịkịma arịa ama ḅoḅịa. À tọrọkọda àrị pịrị se àrị se tụndụma na pịkị Izrẹl ideri mengi ma nyọma munḅịa se iḅi wiliwili osuein se àrị pịrị fịḅịa.

¹⁴À mịẹḅịa arịa ḅalafamaye oforika ḅaraḅụ, tụndụ ọgọnọ osueinma na pẹsịkiri ḅie osueinma na pịkị Izrẹl mị nyana nama fịfị osueinma na ḅie yefịḅịa.

¹⁵Ị̀rị̀ ḅarana ị̀ya ananama ḍikiḍikiḅịa, à pịkị àrị ịnyọsaraḅịa nyọ ḍọkị àrị pịrịḅịa. Ị̀rị̀ Kụrọmamgba Nyana Tamụnọ Ḅe à ḍukosam.

¹⁶“À fa ayema ḍọkịḅịa, àrị íríaye ma ọkịḅoḅịa, à ḅịtẹ-pẹkẹrẹ se arịaḅụ pẹlẹ ayema fịnaḅịa, à pịkị arịa ḅie obi ayema gwọḅịa, ọkụma ḍụḅa ayema na kụrọ ayema na àrị àrị ḅaaḅịa, anịatịḅị ị̀rị̀ anị karakaraye mịẹmịẹ anana ḍikiḍikiḅọ-ẹ.

¹⁷“Mịọkụ, ị̀ya nama ogbo, Ị̀rị̀, Kụrọmamgba Nyana Tamụnọ Ḅe ḍuko ọ́ pịrịaḅẹ na, à ḅẹrẹkọn ọ́ pịrịḅịa, se àrị ọ́mịna ḅie siaye ma ḅụ iḅiaye ma sikimaḅịa à pịkị ananama ḅie oḅorima sikimaḅịa.

¹⁸Ọ́mịna ḅie da apụ ọ́ fị àrị iḅi osuein mị ómine na deinkẹ; ọ́ fịka ayema ómine àrị nanga ḅaamẹ! Ọ́ fịafịa mengi mị ḅu so se ó ḅuka mengi mị ọ́ pikiri wọlọma okputuku mengi mịẹmẹ!

¹⁹Ị̀ya ísí-a ananama, àrị ọ́ nanga ḅaa osueinma fịḅịa se ó pikiri wọlọma okputuku mengi mị ḅuḅịa.

²⁰“Anịẹrẹchị mịọkụ Ị̀rị̀ Kụrọmamgba Nyana Tamụnọ Ḅe ḍuko ọ́ pịrịaḅẹ na à ḅẹrẹkọn ómine kụrọ ananama na pịkị ịnyọ nyanaka ananama na pịrịḅịa.

²¹Ómine obiayema suma sikima anga pịrị àrị chira sinme ananama ḅie.

²²Ọkụma àrị ị̀ya ananama ḍụaḅịa se à ḅarị ngịsị ḅereni ẹkẹ ini pịkị siḅara se àrị mịẹ. À ḅẹrẹkọn ị̀ya ananama ḅie gbọrịye gbọrịye pịrịḅịa se àrị iḅiaye ma sikimaḅịa siaye ma ḅụ.

²³Àrị amanyanaḅọ se àrị pịrịḅịa, ị̀ya fịrịnwẹngịḅọ Devid ḅe sime ọkụ simeḅọ ori ngẹrị anị ananama ḍikiḍikiḅịaye-ẹ, ọ̀ pịkị tọrụ se arịaḅụ wẹrịḅịa.

²⁴Ị̀rị̀ Nyanaḅọ Ḅe àrị arịa Tamụnọ sọḅịa, ị̀ya fịrịnwẹngịḅọ Devid ḅe sime ọkụ sime amanyanaḅọ arịa ḅẹrẹtọnḅọ nwọ sọḅịa. À ḍukosam.

²⁵Àrị deinma simeḅịa ọḅọkụ àrị na nwọ fịḅịa. Àrị ama mị ḅie sime ḅalafama nama mamgba sinḅịa, mịẹso sịkị ị̀ya ananama àrị deinma ozuma ḅie angaḅịa, àrị pịkị piri ma ḅie mọnọḅịa.

²⁶“À ḅẹlẹma se àrị pịrịḅịa, se à mịẹḅịa àrị ị̀ya osiḅụ sime chịngị mị nyọ ḅụ angaḅịa. Anị nyọ àrị ene chita se àrị ḅẹlẹmaḅịa àrị anị ḅi sịkị ḅụ.

²⁷Eje ma àrị chịnmgbọlụ chụaḅịa, ozuma àrị fịaye pakụmaḅịa, se arịa ḅụ gbọrịye gbọrịye arịa kirima ḅụ angaḅịa dein ḅaraḅụ. Àrị ị̀ya tomonima ḅụ ikoli ma anyịma se ini se omoniapụ mịẹ apụma ḅara ḅie ini pọkọ pakụmaḅoḅịa sịkị, anịsịkị anị ini nemiḅịaye-ẹ na Ị̀rị̀ anị Nyanaḅọ Ḅe-ẹ.

²⁸Oru nemi-a sẹma, ḅarị ini kan ẹkẹ ngịsị, piri ḅie owoi-a namama sọ àrị ḅarị ini ḅaa pẹị ẹkẹ, ini ḅalafamaye oforika ḅaraḅụ deinma angaḅịa, pịkị inia ḅalafamaḅịa gbọrịye sọ ofori-ẹ.

²⁹Lọkọlọkọ fịaye pakụma kiri à nwọse ini pịrịḅịa, se ama mị ḅie ḅuruḅaa mị kulumaḅịa. Ísí sẹma àrị ḅarị pụa-ḍẹrị kọn ini da ẹkẹ ngịsị.

³⁰Tomoniḅọ goyegoye nemiḅịa na Izrẹlapụma ị̀ya tomoni-ẹ. Ị̀rị̀, Kụrọmamgba Nyana Tamụnọ Ḅe à ḍukosam.

³¹“Ómine ị̀ya anana, à fịaye se pịrịarị namama, ómine ị̀ya tomoni-ẹ, ị̀rị̀ pịkị ọ́mịna Tamụnọ-ẹ.” Kụrọmamgba Nyana Tamụnọ Ḅe ọkọ ḅẹmẹ.