Read kirikeni Izikịẹl 35 Bible Online

Izikịẹl 35 - kirikeni bible

Izikịẹl 35

¹Nyanaḅọ Ḅe ori ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “Idọm sẹ ḍukosima.

³Ị̀rị̀ Kụrọmamgba Nyanaḅọ Ḅe ḍukoarịye mị ḍuko tomonima pịrị: “Ị̀rị̀ ị́rị́ na tarakaḅọ-ẹ, Idọm apụ tụndụ! Àrị ị́ se nweni angaka ama mịẹḅịa.

⁴Ọ́mịna opuamama kangulugulu ḅụ àrị wẹrịsoḅịa Se ọ́mịna amama àrị kpọngọlọma simeḅịa; Anịsịkị mị ó nemiḅịaye-ẹ na Ị̀rị̀ anị Nyanaḅọ Ḅe-ẹ.

⁵“Ómine anị sịkịmamgba Izrẹl mị na taraka pịkị kụrọsiaye iniaḅụ paka sịkị goyegoye ini ḅaa sarasara apụ ma-ẹ, anị ini mịẹ sima ḅe kuluma fomuḅara ini nwọ da àrị sịkị ḅụ.

⁶Anịẹrẹchị pikipikiye ofori-ẹ na Ị̀rị̀ anị Kụrọmamgba Nyanaḅọ Ḅe, ị̀rị̀ anị ḍumoarị Tamụnọ Ḅe-ẹ nwọḅẹ sịkị fị sime ọ́ pịrịmẹ, ómine ineda anịa ḅie pọkọ ẹkẹ. Nini kọn ḅẹrẹḅarasi ọ́ nwọ nyanamẹ, nini kọn pịkị ó ḍukoḅịa.

⁷Idọm apụ chịngị chịngị chịngị sẹ mị, àrị anị se nweni oforika ama mịẹḅịa, se anịaḅụ nwẹngị ḅọrọḅọ goyegoye à ḅaaḅịa.

⁸Ini ḅaa apụma ojuma à nwọse tụndụma gbẹịnḅịa, se ọmụ ḅie ini ḅaa apụma ojuma, chịngịma na pẹsịkiri ma na gbẹịnḅịa.

⁹Àrị ị́ se nweni angaka papa kpọngọlọ kiri mịẹ gbasoḅịa, gbọrịḅọ sọ ḅarị pịkị ọ́mịna opuamama ḅie anga ẹkẹ. Anịsịkị mị ó nemiḅịaye-ẹ na Ị̀rị̀ anị Kụrọmamgba Nyanaḅọ Ḅe-ẹ.

¹⁰“Ọ́ nwọ ḅẹmẹ na mama sẹma, Juda na Izrẹl na, inia amama na se chụa ọ́mịnaye-ẹ na ọ́ pịkị àrị nyana ọkịḅịa, Ị̀rị̀ Nyanaḅọ Ḅe inia Tamụnọ-ẹ nwọḅẹ sọnị.

¹¹Anị ọkụma, pikipikiye ofori-ẹ na Ị̀rị̀ Kụrọmamgba Nyanaḅọ Ḅe, anị ḍumo Tamụnọ Ḅe-ẹ nwọḅẹ sịkị, ọ́mịna ịganị mị à nwọ pịkị se ọ́ gbẹịnḅịa anị ị̀ya tomonima ọ́ nwọ sọlịarịye mị na, ọ́ nyana ini pịrị taraka mị na gose. Ini nemiḅịa na, ó se ini mịẹye mị gose, à fomuḅara se ọ́ pịrịḅịa.

¹²Anịsịkị ó nemiḅịa na Ị̀rị̀ Nyanaḅọ Ḅe ó ḍukoye mị à naamẹ, ḍikisima ḅaraḅụ ọ́ nwọ ḅẹmẹ na, Izrẹl tụndụma àrị kpọngọlọma sime waraḅẹ, na àrị kan pẹị mị sime ómine pịrịmẹ.

¹³Ọ́mịna owoi ḅụboma ḅụ, ị̀ ḅụ ó ḍukoaye ma à naasam.”

¹⁴Kụrọmamgba Nyanaḅọ Ḅe nwọ ḅẹmẹ na, nweni angaka nyọ ḅụ àrị ó se kpọngọlọma koromaḅịa ḅara mị, bebe tomonikiri mị mgba, ọ́mịna ḅịkị mị gose ḅieḅẹlẹḅịa,

¹⁵anị ị̀rị̀ ḅarana nyana Izrẹlapụma kan sịkị ḅụ ọ́mịna ḅieḅẹlẹ ọkụ mị. Seia tụndụma, iin, Idọm ama mamgba nweni angaka ḅaraḅụ àrị kpọngọlọma simeḅịa. Anịsịkị tomoniḅọ goyegoye nemiḅịa na Ị̀rị̀ anị Nyanaḅọ Ḅe-ẹ.