Read kirikeni Izikịẹl 37 Bible Online

Izikịẹl 37 - kirikeni bible

Izikịẹl 37

¹Gbọrị ene, Tamụnọ Ḅe kụrọ mị ḅo ị̀ lamẹ, se ị̀ deki samịna imgbema sime pẹsịkiri mị mun mẹ.

²Ori ị̀ se nwẹngị pẹsịkiri mị ḅie mgba kelemamẹ, se à ḍọkịḅo ọrịmẹ na imgbe opuma ḅakamẹ, àrị pịkị opuma samịnasam.

³Ọ̀ nwọse ị̀ ḅẹmẹ, “Tomoniḅọ tọkụ, ma ịmgbema àrị pịkị ineda ḍumoḅịa nọ?” À pẹkẹrẹmẹ, “Kụrọmamgba Nyanaḅọ, ị́rị́ ngẹrị anị ineda anị mị pẹkẹrẹḅịaye-ẹ!”

⁴Ọ̀ nwọ ḅẹmẹ, “Ịkịankoro ịmgbema pịrị. Ḍuko ma samịna ịmgbema pịrị na àrị Nyanaḅọ Ḅe ọkwẹịn ma nwọ poki.

⁵Ḍuko àrị pịrị na Ị̀rị̀ Kụrọmamgba Nyanaḅọ Ḅe nwọse àrị ḅẹ aḅẹ na: Àrị ọwụ se ọ́mịna ḅie chụa-ẹmuaḅẹ se ọ́ pịkịḅo ḍumoḅịa.

⁶Ịsịan na ịnyọ na à nwọse ọ́ pịrịḅịa, se à pịkị tomoni oju se ómine gbẹịnḅịa. Àrị ọwụ se ọ́mịna ḅie chụa se ọ́ pịkịḅo ḍumoḅịa. Anịsịkị mị ó nemiḅịaye-ẹ na Ị̀rị̀ anị Nyanaḅọ Ḅe-ẹ.”

⁷Anịẹrẹchị àrị ịkịankoromẹ, ò ḍuko ị̀ pịrịsa ḅaraḅụ. Àrị ọkwẹịn àrịogbo, nyọ fie à nwọ naa aḅẹ, se ịmgbema àrị sakị jịnye jịnye na gbolomamẹ.

⁸À kweinma àrị ḍikiarịogbo àrị ọrịmẹ, ịmgbema ịsịan na oju na àrị gbẹịnsam. Ọkụma ojuma ḅie ọwụ ofori-ẹ.

⁹Tamụnọ Ḅe nwọse ị̀ ḅẹmẹ, “Tomoniḅọ tọkụ, ịkịankoro fọrụ mị pịrị. Ḍuko fọrụ mị pịrị na, Kụrọmamgba Nyanaḅọ Ḅe tọn anị pịrịaḅẹ na anị nyọnyọ ḅụ ḅo se ọwụ se ma fịsa ojuma ḅie chụa se àrị pịkịḅo ḍumo.”

¹⁰Anịẹrẹchị àrị ịkịankoromẹ ò ḍuko ị̀ pịrịsa ḅaraḅụ. Ọwụ ḅo ojuma ḅie sọmẹ se iniḅo ḍumo se sịsẹ chịẹmẹ. Ini ḅaka laḅara mị ini owuni ogbo lamẹ.

¹¹Tamụnọ Ḅe nwọse ị̀ ḅẹmẹ, “Tomoniḅọ tọkụ, Izrẹlapụma, ma ịmgbema sime ọkụ anị ini sime ọkụ-ẹ. Ini nwọ ḅẹmẹ na ini samịnasam ini pịkị ḅarị tọrọkọju pakaḅịaye nemi-ẹkẹ.

¹²Anịẹrẹchị ịkịankoro ị̀ya tomoni Izrẹlapụma pịrị se ḍuko ini pịrị na, Ị̀rị̀ Kụrọmamgba Nyanaḅọ Ḅe àrị inia iḍupuma finji-ẹmuaḅẹ. À mun ini ọkịpakụmaḅo se ini ọkịḅo Izrẹl ama mị laḅịa.

¹³Ị̀ya tomonima ini nwọ ḍipi iḍupuma, à nwọ finji se ini ọkị pakụmaḅoḅịa sịkị, ini nemiḅịa na Ị̀rị̀ anị Nyanaḅọ Ḅe-ẹ.

¹⁴Ị̀ya ọwụ mị à nwọse inia ḅie chụaḅịa, se àrị ini ọkịḅo se iniḅo ḍumoḅịa, à mịẹḅịa ini inia ama ḅie angaḅịa. Anịsịkị anị ini nemiḅịaye-ẹ na Ị̀rị̀ anị Nyanaḅọ Ḅe-ẹ. À yeḅerenisam na mịn mị à mịẹḅịa—à pịkị mịẹḅịa, Ị̀rị̀ Kụrọmamgba Nyanaḅọ Ḅe àrị ọkwẹịnsam.”

¹⁵Nyanaḅọ Ḅe ọ̀ pịkị ọkwẹịn ị̀ pịrịmẹ.

¹⁶“Tomoniḅọ tọkụ,” ọ̀ nwọ ḅẹmẹ, “gbọrị chịn nwọ ọkị, se anịaḅụ ma ọkwẹịn mgbọlụma gịẹịn, ‘Juda amanyanakiri mị.’ Anịsịkị pịkị jịn chịn ọkị se pịkị anịaḅụ ma ọkwẹịn mgbọlụma gịẹịn, ‘Izrẹl amanyanakiri mị.’

¹⁷Anịsịkị tịḅị ma ḅụ mama chịnma ọlọ ị́ ḅara ḅie mịẹso sịkị maịn ma gbọrịye-ẹ nwọḅẹ ḅara.

¹⁸Ị́ya tomonima, ị́ gbela na mịn mị anị che fie nọ ḅẹḅẹ,

¹⁹ḍuko ini pịrị na Ị̀rị̀ Kụrọmamgba Nyanaḅọ Ḅe, à se Izrẹl mị otoma chịn mị, à nwọ ọkị se à se Juda mị otoma chịn mị na gbọrị nyọ ḅụ koromaḅịa. Mama chịnma à nwọse gbọrị chịn mịẹse ị̀ ḅara ḅie anị ọlọḅịa.”

²⁰“Ị́ ḅara ḅie mama chịnma ọlọ se mịẹ tomoni àrị ọrị.

²¹Anịsịkị ḍuko ini pịrị na Ị̀rị̀ Kụrọmamgba Nyanaḅọ Ḅe, ị̀ya tomoni mamgba mun sẹ goyegoye ḅie ḅụ, àrị ini ọkịpakụmaḅo se ini koḅiri gbolomaḅịa se ini ọkị pịkịmaḅo inia jokoma ama mị ḅụoju nwọ laḅịa.

²²Izrẹl tụndụ-tụndụ-tụndụ ama mị ḅieḅụ, àrị ini ọkịḅo gboloma gbọrị amanyanakiri nwọ mịẹḅịa. Ḅẹrẹtọn ini pịrịḅịa gbọrị amanyanaḅọ anị ini nyanaḅịaye-ẹ. Ini ḅarị pịkị pua mama sẹ anịkanịka mama amanyanakiri mịẹ ẹkẹ.

²³Ini ḅarị ngịsị ḅụnjịnjịma oru ma se iniaḅụ pụlama ẹkẹ, ini pịkị ḅarị iniaḅụ se siamịẹmịẹye ḅụ chu ẹkẹ. Ḅọkọḅọkọ ḅụ ini mịẹ si mamgba ḅụ na ini nyana ḅereni ị̀ pịrịkaye mamgba ḅụ na àrị ini pọkọḅịa, àrị ini mịẹ fịafịamaḅịa, ini ị̀ya tomoni sọḅịa, se ị̀rị̀ pịkị inia Tamụnọ sọḅịa.

²⁴Ị̀ya fịrịnwẹngịḅọ Devid ḅe sime ọkụ sime amanyanaḅọ anị inia amanyanaḅọ sọḅịaye-ẹ. Gbọrị ḅẹrẹtọnḅọ chuku ḅie ini gboloma simeḅịa, se ini tụkụma ḅara se ị̀ya olokoma kokoḅịa.

²⁵À se ị̀ya fịrịnwẹngịḅọ Jekọb ḅe pịrị ama mị ḅie ini angaḅịa, anị inia ḅieju-aḍapụma anga ama mị. Anịnyọ ini anga gbasoḅịa, anị anị sime inia awọma na, pịkị inia ọḅụju ḅoḅịa apụ mamgba na pịrịḅịa ọkụ-ẹ. Ị̀ya fịrịnwẹngịḅọ, Devid ḅe sime ọkụ sime amanyanaḅọ ḅẹrẹtọn ini pịrị gbasoḅịa.

²⁶Ngịsị ye inia ḅụfụkama ẹka gbaso ọḅọkụ àrị ini na nwọ fịḅịa. Àrị ini mịẹse ini tọrụ nyanaḅịa, à pịkị inia mbo mị mịẹ sumaḅịa, à pịkị ḍọkị ọrịḅịa na ị̀ya Oputẹkẹwarị mị inia ama ḅie anị chịẹ gbasomẹ.

²⁷Anịnyọ àrị inia ḅie angaḅịa; àrị inia Tamụnọ sọḅịa ini pịkị ị̀ya tomoni sọḅịa.

²⁸Ị̀ya Oputẹkẹwarị mị à se anịnyọ inia ogboku koroma gbasoḅịa sịkị, anịsịkị mị sẹsẹ ma nemiḅịaye-ẹ na Ị̀rị̀ Nyanaḅọ Ḅe àrị Izrẹl mị sẹlẹ ọkịsam ị̀ya tomoni ḅaraḅụ.