Read kirikeni Izikịẹl 38 Bible Online

Izikịẹl 38 - kirikeni bible

Izikịẹl 38

¹Nyanaḅọ Ḅe ori ọkwẹịn ị̀ pịrịmẹ.

²“Tomoniḅọ tọkụ,” ọ̀ nwọ ḅẹmẹ, “Megọg ama mị ḅie, Mẹshẹk na, Tubal na sẹma ḅie ḅẹrẹtọn apụma ḅụ tịḅịnịḅọ Gọg ḅe ḍukosima. Kụrọma ò ḍukosima,

³se ḍuko ọ̀ pịrị na Ị̀rị̀ Kụrọmamgba Nyanaḅọ Ḅe anị ori na tarakaḅọ-ẹ.

⁴Àrị ò se vinvinma kelemaḅịa se inji-kun-arị à nwọse oria amgba ḅie chu se ori na oria owuni mamgba na fọnọ pakụma sinḅịa. Oria owunima na asụnma na pịkị gbọrị-ḅụchụaye-tọrụ chụa àrị dọkụ owu sọarị owunima, ini opuma ḅakamẹ, inia ḅie owuniḅọ goyegoye agbọ ọlọ pịkị okola-agiji se ọ̀ ḅụ amụmẹ.

⁵Pesia na Itiopia na pịkị Libya na owunima ọ̀ ḅụ ini omi-ẹ se inimgba ini agbọ ọlọ pịkị ikulele okpochu chira waraḅẹ.

⁶Goma na Bẹt na pịkị ọgọnọ daọrụ ḅụ sime Togama owuni mamgba ọ̀ ḅụ ini omi-ẹ, pịkị jịn sẹ ḅie ḅaka owuni mamgba na.

⁷Ḍuko ọ̀ pịrị na ori ọ̀ ḅụ karakarama, ọ̀ pịkị oria owuni mamgba karakarama se ori kụlọda ini pịrị.

⁸Tọntọn-a kụra ḅọrọḅịa sịkị à tọn ọ̀ pịrịḅịa ò mun owu se gbọrị sẹ pakaḅịa, anị tọn-a sẹ ḅie ini tomonima pịkịmaḅo gboloma se ini ḅarị owu sọ ḅe ḅalafa kọnka se deinma anga ama mị. Ori owu se kpọngọlọma papa sime Izrẹl tụndụma pakaḅịa, anị ḅọlọ sịkị ngịsị tomoni kan se papa ḅụsin sime ayema, ọkụma mịọkụ anị tomoni mamgba deinma ḅụ anga nyọ mị.

⁹Ori na oria owunima na, pịkị ọ̀ ḅụ sọ sẹma na, irisi ḅara se owu mị pakaḅịa se soḅuno nyọ gbẹịn ọkụ ini nwọse ama mị gbẹịnḅịa.”

¹⁰Mịn anị Kụrọmamgba Nyanaḅọ Ḅe ḍuko Gọg ḅe pịrịarịye-ẹ: “Anị sịkị mị ḅo laḅịa sịkị, ị́ sakị siaye tọnḅịa.

¹¹Ị́ tọn pẹlẹ se owu se ḅarachụa pịrị apụ oforika sẹ pakaḅịa, anị tomonima deinma owu oforika ḅaraḅụ anga pịkị ḅalafamaye oforika ama mị, onu pịkị anị kelemakẹ, ḅarachụa owusọ ini pịrịḅịaḅọ pịkị ofori-ẹ.

¹²Gbọrị sịkị ḅụ kangulugulu opuamama ḅie anga apụma, ị́ mun pịkị tomonima kan se ini ọfọịnḅịa. Sẹsẹ ma ḅie ini ini kolokolo ḅosam, mịọkụ ini nama nyana pịkị ngọ nyanasam se tomonikiri mị ḅe tẹrẹ-a ichira ma ḅie ini anga waraḅẹ.

¹³Shiba apụma na, Didan apụma na, pịkị Spen ama mị ḅie tuḅonima na, ini ị́ gbelaḅịa, ‘Ị́ya owunima ị́ kpaịnma ini koḅiri gbolomasa, mịẹso sịkị ini mun owupaka se ye ọfọịnḅịa ḅara? Ị́ kuḅie koroma-ao na ị́ seleḅa na, goli na, nama na pịkị ngọ na nyanaḅịa se ị́ ọfọịn ayema se nwẹngị soḅịa nọ?’”

¹⁴Anịẹrẹchị Kụrọmamgba Nyanaḅọ Ḅe ị̀ fịrịmamẹ, ò ḍuko Gọg ḅe pịrịarịye mị, à nwọ ḍuko ọ̀ pịrị: “Mịọkụ ị̀ya tomoni Izrẹlapụma nwọ ḅẹrẹ-oforika-ḅaraḅụ deinma angarị sịkị, ị́ dapakaḅịa

¹⁵ị́ya pẹkẹrẹ anị ḅọlọ ọgọnọju mị ḅụ anị ị́ wẹrị ḅoḅịaye-ẹ, ị́ kụlọda sẹsẹ ma ḅieḅo kụrọ owuni pịrịmẹ, inimgba asụn ọgọnọ owuni-ẹ.

¹⁶Irisi gbilama ḅo ama gbẹịn se saḅa ọkụ ị́ nwọse ḅo owu se ị̀ya tomoni Izrẹlapụma pakaḅịa. Sịkị mị ḅo lasịkị, àrị ị́ se sẹịnḅịa ị́ mun owu se ị̀ya ama mị pakaḅịa, mịẹso sịkị sẹsẹ ma à sime ọkụ nemiḅịa ḅara, ị́ ḅụ ḅụ à ḅọrọ mịẹḅịaye mị, ị̀ya fịafịa mị ḍiepakụmaḅịa.

¹⁷Ḅọlọ sịkị ngịsị àrị ị́ya ḅẹrẹ ḍukoḍukomẹ, à ḍuko se ị̀ya fịrịnwẹngị apụ, Izrẹl ḅie ịkịankoroapụma ḅụ à ḅọrọ ḍukopakụmamẹ na, tọrọkọju ḅoḅịa ḍin ma ḅie, owu se Izrẹl mị pakaḅịa gbọrịḅọ à nwọ ọkịḅoḅịa.” Kụrọmamgba Nyanaḅọ Ḅe ò ḍukosam.

¹⁸Kụrọmamgba Nyanaḅọ Ḅe nwọ ḅẹmẹ, “Gọg ḅe owu se Izrẹl mị pakaḅịa ene mị ḅụ, àrị opu ịganị kọnḅịa.

¹⁹Ị̀ya ọfịrị ịganị mị ḅie ḅụ à tọnpẹlẹsam na Izrẹl amakiri mị opuma jikeḅịa.

²⁰Inji na feni na goyegoye, nama goyegoye, opuaye na kalaye na pịkị sẹkiri mị ḅie sime mbuḅọ goyegoye ḅụgeregere ḅụ ị̀ ḍikiḅalafaḅịa. Tụndụ ma àrị sokoro saraḅịa, tọrụ aka ḅụ sime ịkụma àrị sokoro kọsịḅịa, warị agbagba goyegoye pịkị ḅịkịḅịa.

²¹Sifụḅara na ḅalafamaye na goyegoye à nwọse Gọg ḅe ḅalafamaḅịa. Ị̀rị̀ Kụrọmamgba Nyanaḅọ Ḅe à ḍukosam. Oria owunima inia okola-agiji ma ini se jụmḅọ jụmḅọ ḅaaḅịa.

²²Obi na pulo ọsụn na, à nwọse fomuḅara se ọ̀ pịrịḅịa. Opu ene na kpokoro-kpokoro ene mgbọlụ na, fịnị na sọlfọ na gboloma ori na, oria owunima na pịkị ọ̀ ḅụ sime sẹma na ọgọnọ saraḅịa.

²³Mị ḅara mị ḅụ mị à se sẹ mamgba ḍieḅịaye-ẹ na, ị̀rị̀ à ḍụḅamẹ, à pịkị fịafịamẹ. Ini nemiḅịa na Ị̀rị̀ anị Nyanaḅọ Ḅe-ẹ.”