Read kirikeni Izikịẹl 40 Bible Online

Izikịẹl 40 - kirikeni bible

Izikịẹl 40

¹Ini kụrọḅara se wa desin sisọnọ fịnjị karama kụra mị ḅie, ịwọ kụra mị ḅie oyi-a ḍin ene anị ini Jerusalẹm mị kan oyi inein-a kụra fịnjị karama kụra mị ḅie ḅụ. Anị ene mị ḅụ, ị̀ ḅụ nemimẹ na Nyanaḅọ Ḅe oria kụrọ ị̀ ḅụ omi-ẹ, ori ị̀ pụra somẹ.

²Tẹmẹ ḅie ḅụ, Tamụnọ Ḅe ori ị̀ se so Izrẹl ama mị mun mẹ, se ị̀ se gbọrị gele tụndụ ọgọnọ koromamẹ. Ị̀ tọrọkọ ini namasa warị kpo à nwọ ọrịmẹ, anị opuama kịkẹmẹ.

³Ori ị̀ se anị kpekima mun mẹ, se alapẹlẹka jịanma ḅịa-ọkụ-ḅịa gbọrịḅọ à nwọ ọrịmẹ. Lọkọ-ḅịtẹ yetọnye ọ̀ nwọ ọlọmẹ pịkị yetọn-nangwọ-gbọrị-chịn na, se gbọrị onu ḅọkọ ḅụ ọ̀ chịẹ waraḅẹ.

⁴Ọ̀ nwọse ị̀ ḅẹmẹ, “Kweinma ḍiki, tomoniḅọ tọkụ. Ḅeri tokoloma poki, se à se ị́ ḍieye goyegoye ḅụ iḅiọkụma elekima chụa anịatịḅị mịn mị gose ini ị́ se mịanga ḅomẹ. Ị́ ọrịye goyegoye ị́ nwọ ḍuko Izrẹlapụma pịrịḅịa.”

⁵Oputẹkẹwarị mị anị àrị ọrịye-ẹ gbọrị onu anị kelema waraḅẹ. Tomoniḅọ ḅe ori oria nangwọ yetọn-chịn mị ọkịmẹ, anịa ịsụn oyi-a ḅụọ lamẹ, se ori anị se onu mị tọnmẹ. Anịa gele oyi-a ḅụọ-ẹ, anịa kpokoro pịkị oyi-a ḅụọ-ẹ.

⁶Anịsịkị ọ̀ pịkị onu mị ḅọkọ ḅụ tọrụse ịrụapakapaka nyọ daọrụ mị da mun mẹ. Ori ịkpịkpa ma tanjị iwomẹ, se ọgọnọju ḅụ, ọ̀ ḅọrọ nyọ mị tọnmẹ, anịa gbun mị oyi-a ḅụọ-ẹ.

⁷Anị-ḅọrọ-mun ḅụ, gbọrị ḅọrọ nyọ omi-ẹ, gbọrị agbagba gbọrị agbagba ḅụ tẹrẹ-a nyọkoruapụ-a jukuru omi-ẹ, jukuru ma àrị karama karamamẹ, finji na ịsụn na gbọrị agbagba oyi-a ḅụọ-ẹ, anịsịkị arịa ogboku kikima ḅe kpokoro nine-a ḅụọ, nine-a ḅụọ-ẹ. Nyọ koru apụ jukuru ma ḅọrọ mun ḅụ, ịsụn ḅụ oyi-a ḅụọ la gbọrị ḅọrọ nyọ omi-ẹ, anị mun tọrụ se Oputẹkẹwarị mị da gbọrị jukuru ḅọkọ nwọ lamẹ.

⁸Mị jukuru mị ori anị tọnmẹ, se ori ọrịmẹ na anịa gbun mị oyi inein-a ḅụọ fịnjị lamẹ. Anị ḅọrọ nyọ mị ḅe kuluma mị, mịẹse Oputẹkẹwarị mị ḅo kpekitẹịnmẹ, se arịaḅụ sasa nyọma ḅụ kuluma warị agbagba ma ḅe iku inein-a ḅụọ, inein-a ḅụọ-ẹ.

⁹

¹⁰(Ḅọrọ nyọ mị ḅụ anga-anga ḅụ sime nyọ koru apụ jukuru mamgba gbasịa gbasịamẹ, pịkị arịa ogboku sime warị agbagba mamgba gbọrị kpokoro ḅara-ẹ.)

¹¹Tomoniḅọ ḅe ọ̀ pịkị ḅọrọ nyọ mị anịa finji nwọ tọnmẹ. Anịmgba gboloma simaịn-ḅụọ fịnjị nwọ lamẹ, se onu ḅọkọ mị finji ọkụma, kuḅu ḅụ anị laye inein-a ḅụọ-fa-si-ẹ.

¹²Nyọ koru apụ-a warịma ḅụ, gbọrị warị tọrọkọ, gbọrị warị tọrọkọ ḅụ ikiḅa ikiḅa onu omi-ẹ, arịa gele gbọrị ḅụọ na opu ikiḅa na, gbọrị ḅụọ na opu ikiḅa na-ẹ, arịa kpokoro pịkị, gbọrị ḅụọ na opu ikiḅa ikiḅa na-ẹ. (Jukuru ma arịa finji oyi-a ḅụọ, ịsụn mị pịkị oyi-a ḅụọ-ẹ.)

¹³Anịsịkị ò ḅo gbọrị jukuru ọḅụju warị agbagba nwọ tọn mun ḅọrọ nyọ mị saḅakoro jukuru mị ḅe ọḅụju warị agbagba mị tọnmẹ, anị pakaḅoye ḅụọ-a mesi ma ḅụọ fịnjị-ẹ.

¹⁴Sasa nyọ ḅụ sime kuluma jukuru mị anị mun ḅẹrẹkọn warị odo mị lamẹ ori anị jukuru mị tọn sịkị ori ọrịmẹ na finji ḅụ anị ḅụọ-a soi inein-a ḅụọ fịnjị nwọ lamẹ.

¹⁵Onu ḅọkọ mị ḅụ, nụngọ da onu agbagba mị ḅụ wẹrị tọn ḅo onu mị ḅụ ḅọrọ nyọ mị la, tan gboloma ḅụ anị laye ḅụọ-a iniasi inein-a ḅụọ fịnjị-ẹ.

¹⁶Nụngọ da onu agbagba ma ḅụ sime-a jukuru ma ḅụ mgba kala-pẹlẹ-ḅọkọ omi-ẹ, pịkị ḅieju ḅụ sime-a jukuru ma ḅe-a kiki ma sọ. Tọrụ se onu mị ḅụ ḅọrọ nyọ mị da ḅieju warị agbagba ma ḅụ ini enemi kọrọ kara oḅolomẹ.

¹⁷Tomoniḅọ ḅe ori ị̀ se onu ḅọkọ mị ḅụ ḅọrọ nyọ mị ḅie toluḅọrọ mun ḅẹrẹkọn warị odo mị ḅie lamẹ. Jukuru-a soi ini nwọ namamẹ se àrị tọrụ se nụngọ da onu agbagba mị na ḍikia-ḍikia waraḅẹ, se arịa tọrọkọ gbọrị nyọ ḅụ ini ḍụparị se ọrụtọnma kiri mị ise mẹ,

¹⁸anị finjima ḅẹrẹkọn warị odo mị kelemamẹ. Mị, nụngọ da ḅẹrẹkọn warị odo mị, anị iderimatẹịn ḅieju ḅẹrẹkọn warị odo mị nẹngịmẹ.

¹⁹Geletẹịn gbọrị ḅọrọ nyọ omi-ẹ, anị mun ḅieju ḅẹrẹkọn warị odo mị lamẹ. Tomoniḅọ ḅe mama ḅọrọ nyọma jịnye jịnye ḅụ sikima la-ọkụ ọ̀ nwọ tọnmẹ, anị laye maịnfa ḅụọ-a nineasi oyi fịnjị-ẹ.

²⁰Tomoniḅọ ḅe, ọ̀ pịkị ọgọnọ ọrụ da ḅọrọ nyọ mị tọnmẹ, anị mun nụngọ ḅẹrẹkọn warị odo mị ḅie sọmẹ.

²¹Ḅọrọ nyọ mị ḅụ angana angana ḅụ sime tẹrẹ-a nyọ koru apụ jukuru ma na arịa ogboku sime kiki ma na pịkị ḅọrọ nyọ mị ḅụ sime jukuru mị na, tọn ḅaraḅụ, ịrụapakapaka nyọ daọrụ ḅụ jukuru mamgba na àrị na gbasịmẹ, ḅọrọ nyọ mị ḅe ịsụn laye anịmgba ḅụọ-a iniasi inein-a ḅụọ fịnjị-ẹ anịsịkị anịa finji ḅụọ-a mesi mama ḅụọ fịnjị-ẹ.

²²Ḅọrọ nyọ ḅụ jukuru mị na, pẹlẹ ḅọkọ ma na ini pịkị kara se arịa ḅụ chụa kọrọ ma na; ịrụapakapaka nyọ daọrụ ḅụ onu ḅọkọ mị ḅụ sime ayema sime ọkụ simemẹ, anịsịkị ḅọrọ nyọ mị ḅụ kuluma nyọ mị ḅe jukuru mị anị tọrụ se ḅẹrẹkọn warị odo mị damẹ.

²³Mị ọgọnọju daọrụ mị ḅụ ḅọrọ nyọ mị ḅụ wẹrị ḅẹrẹkọn warị odo mị saḅakoro ọkụma jịn ḅọrọ nyọ omi-ẹ, anị ọkịmun ḅieju ḅẹrẹkọn warị odo mị lamẹ. Anị pa ịrụapakapaka nyọ daọrụ ḅụ sime ọkụ mị-ẹ. Tomoniḅọ ḅe ọ̀ pịkị ma mama ḅọrọ nyọma jịnye jịnye ḅụ sikima ọkụ tọnmẹ anị laye maịn fa ḅụọ-a iniasi oyi fịnjị-ẹ.

²⁴Jịnye, tomoniḅọ ḅe ori ị̀ se chuku daọrụ mun mẹ, anịnyọ wa pịkị jịn ḅọrọ nyọ ọrịmẹ, ḅieju kiki ma na pịkị ḅọrọ nyọ mị ḅe jukuru mị na ọ̀ nwọ tọnmẹ, ísíaye ma sime ọkụ anị anị pịkị sime ọkụ-ẹ.

²⁵Mị ḅọrọ nyọ mị anịa jukuru ma ḅụ pẹlẹ ḅọkọ omi-ẹ, ísíaye ma sime ọkụ anị mị sọ sime ọkụ-ẹ. Ḅọrọ nyọ mị mgba anịa ịsụn ḅụọ-a iniasi inein-a ḅụọ fịnjị-ẹ, anịsịkị finji mị ḅụọ-a mesi mama ḅụọ fịnjị-ẹ.

²⁶Ịkpịkpa mị ḅụ sọnọma ḅụọ ị́ nwọ tanjị mun anị laḅịa, anịa ḅọrọ nyọ mị ḅụ kuluma jukuru mị sọnị anị tọrụ se ḅẹrẹkọn warị odo mị damẹ. Ḅieju kiki ma ḅụ tọrụ se ḅọrọ nyọ mị da agbagba ma ḅụ ini enemi kọrọ karamẹ.

²⁷Mịanga sọnị ḅọrọ nyọ omi-ẹ, anị ọkịmun ḅẹrẹkọn warị odo mị lamẹ. Tomoniḅọ ḅe ọ̀ pịkị mị maịn karama ḅọrọ nyọ mị, ísí nyọ mị ḅụ sikima ọkụ mị tọnmẹ anị sọnị maịnfa ḅụọ-a nine asi oyi fịnjị-ẹ.

²⁸Tomoniḅọ ḅe ori ị̀ se chuku daọrụ ḅọrọ nyọ mị ḅie toluḅọrọ mun ḅieju ḅẹrẹkọn warị odo mị lamẹ, ọ̀ ḅọrọ nyọ mị tọnmẹ, se nụngọ agbagba ḅọrọ nyọ mị na anị na gbasịmẹ.

²⁹Anịa nyọ koru apụ jukuru ma na, ḅọrọ nyọ mị ḅụ jukuru mị na, pịkị ḅieju kiki ma na, ísí-a ḅọrọ-a nyọma na anị na gbọrị ḅara-ẹ. Mị ḅọrọ nyọ mị ḅụ jukuru ma sọnị arịa ḅụ, pẹlẹ ḅọkọ omi-ẹ. Anịa ịsụn, ḅụọ-a iniasi inein-a ḅụọ fịnjị-ẹ, finji mị ḅụọ-a mesi mama ḅụọ fịnjị-ẹ.

³⁰

³¹Anịa ḅọrọ nyọ mị ḅụ jukuru mị anị tọrụ se ísí ḅẹrẹkọn warị odo mị damẹ, agbagba ma ḅụ ini pịkị enemi kọrọ kara oḅolomẹ. Ịkpịkpa mị ḅụ nine-a ḅụọ ị́ nwọ tanjị se ị́ mun onu ḅọkọ mị laḅịa.

³²Tomoniḅọ ḅe ori ị̀ se ịrụapakapaka nyọ da ḅọrọ nyọ mị ḅie toluḅọrọ mun ḅieju ḅẹrẹkọn warị odo mị ḅie lamẹ. Ọ̀ ḅọrọ nyọ mị tọnmẹ, anị pịkị ísíaye ma na gbasịmẹ.

³³Anịa nyọ koru apụ jukuru ma na, ḅọrọ nyọ mị ḅụ jukuru ma na, pịkị ḅieju-a kiki ma na; ísí-a ḅọrọ nyọma na gbasịmẹ tọnḅụ. Pẹlẹ ḅọkọ arịmgba kelemamẹ, pịkị ḅọrọ nyọ ḅụ sime-a jukuru ma ḅụ sọnị. Ịsụn mị mgba laye ḅụọ-a iniasi inein-a ḅụọ fịnjị-ẹ, finji mị ḅụọ-a mesi mama ḅụọ fịnjị-ẹ.

³⁴Ḅọrọ nyọ mị ḅụ jukuru mị anị tọrụ se nụngọ da ḅẹrẹkọn odo mị damẹ. Ḅọrọ nyọ mị ḅụ agbagba ma ḅụ ini enemi kọrọ kara oḅolomẹ. Ịkpịkpa mị ḅụ, nine-a ḅụọ mun onu ḅọkọ mị lamẹ.

³⁵Anịsịkị tomoniḅọ ḅe ori ị̀ ọkị ọgọnọ ọrụ da onu ḅọkọ mị mun mẹ. Ori anị tọnmẹ se ísíaye ma la-ọkụ anị anị la-ọkụ-ẹ.

³⁶Ísíaye ma sime ọkụ mị, anị sọ anị nyọ koru apụ jukuru nyanamẹ ḅieju kiki ma ini àrị ḅirimamẹ, ḅọrọ nyọ mị ḅụ jukuru omi-ẹ pẹlẹ ḅọkọ pịkị anị kelemamẹ. Anịa ịsụn mị mgba laye ḅụọ-a iniasi inein-a ḅụọ fịnjị-ẹ, se finji mị ḅụọ-a mesi mama ḅụọ fịnjị-ẹ.

³⁷Ḅọrọ nyọ mị ḅụ sime jukuru mị anị tọrụ se nụngọ ḅẹrẹkọn warị odo mị damẹ. Ḅọrọ nyọ mị ḅụ kiki ma ḅụ ini enemi kọrọ kara oḅolomẹ. Ịkpịkpa nine-a ḅụọ mị mun ọgọnọju onu ḅọkọ mị laye-ẹ.

³⁸Nụngọ da ḅẹrẹkọn warị odo mị ḅie gbọrị kala warị ini nwọ nama ḅieju ḅọrọ nyọ mị ḅụ ọgọnọju daọrụ ḅụ oḅolomẹ. Anị finji mun tọrụ se ḅẹrẹkọn warị odo mị da ḅọrọ nyọ mị ḅụ jukuru mị lamẹ, anịnyọ ḅụ anị ini ḅaa se bebema dọkịma agbamịẹḅịa namama sịkịrị-sịkịrịye-ẹ.

³⁹Mị ḅọrọ nyọ mị ḅụ jukuru mị ḅie, inein-a dẹbụl omi-ẹ, mama dẹbụl jukuru mị ḅụ gbọrị pẹkẹrẹ gbọrị pẹkẹrẹ ḅụ omi-ẹ. Ma dẹbụl ma ọgọnọ anị ini se agbamịẹḅịa namama ini nwọ ḅaaḅaaye-ẹ, ini ḅọrọ bebema dọkịmaḅịa nama-o anịkanịka simịẹḅụ ḍiepịrịaye mịẹḅịa agba-o anịkanịka se ye gbẹịn ḅe ḍiepịrịaye mịẹḅịa agba sọnị.

⁴⁰Jukuru mị anịa nụngọ ḅụ, gbọrịḅụ-ḅara sime inein-a dẹbụl omi-ẹ, ḅọrọ mun ọgọnọju onu ḅọkọ mị laḅịa nyọ mị ḅie mama dẹbụl gbọrị agbagba gbọrị agbagba ḅụ omi-ẹ.

⁴¹Arịmgba nine-a dẹbụl omi-ẹ arịa ọgọnọ ḅụ, anị ini se agbamịẹḅịa namama nwọ ḅaaḅaaye-ẹ. Inein-a jukuru mị ḅie omiye-ẹ, inein pịkị ḅẹrẹkọn warị odo nụngọ mị ḅie omi-ẹ.

⁴²Kala warị mị ḅie sime inein-a dẹbụl ma ọgọnọ anị ini bebema dọkịmaḅịa agbamịẹ namama karakarama-karakaramaye-ẹ, àrị dẹbụl ma, ḍụparị ḅụ ini àrị pu pakụmamẹ, arịa gele mị gbọrị ḅụọ na opu ikiḅa-ikiḅa na-ẹ, anịsịkị arịa tọrụ ma ḅe patala mị, nangwọ na finji na gbasịmẹ, anị mama ḅụọ na ikiḅa ikiḅa na-ẹ. Ini se agbamịẹḅịa nama ḅaaḅaa fịrịnwẹngị aye mamgba mama dẹbụl ma ọgọnọ mị àrị simesimeye-ẹ.

⁴³Finji ḅụ gbọrị ḅaratụmgbalị laḅịa ẹlẹjị anị ini se dẹbụl ma aka ma mangịḅọrọye-ẹ. Ini se agbamịẹḅịa nama mamgba ma dẹbụl ma ọgọnọ ini se gbana gbanamẹ.

⁴⁴Ọḅụkọ, ori ị̀ se ḅieju ḅẹrẹkọn warị mị ḅie ḅomẹ. Ḅieju ḅẹrẹkọn warị mị ḅie, finji sara mama jukuru omi-ẹ, gbọrịye tọrụ se chuku daọrụ mị damẹ, ọgọnọju ḅọrọ nyọ mị anga sịkị ḅụ, ísíye mị pịkị tọrụ se ọgọnọju damẹ chuku daọrụ ḅọrọ nyọ mị anga sịkị ḅụ.

⁴⁵Tomoniḅọ ḅe nwọ ḍuko ị̀ pịrịmẹ na, nwọ tọrụ se chuku ọrụ da jukuru mị, anị sime Oputẹkẹwarị ḅie fịrịnwẹngị-nwẹngị agbamịẹ apụma pịrịmẹ,

⁴⁶anịsịkị tọrụ se ọgọnọ ọrụ da jukuru mị, anị sime agbamịẹ ẹbẹ mị ḅụ fịrịnwẹngị-nwẹngị agbamịẹ apụma pịrịmẹ. Agbamịẹ apụ mamgba Zadọk furo ḅie koroḅo apụ-ẹ; ini ngẹrị ngẹrị anị Livaị sẹ ḅie ini ḅereni pịrị se sọ mun Nyanaḅọ Ḅe tọrụkuḅu fịrịnwẹngị ọ̀ pịrịpịrịḅịa apụ-ẹ.

⁴⁷Tomoniḅọ ḅe ḅieju ḅẹrẹkọn warị odo mị ọ̀ nwọ tọnmẹ, anị laye finji mị maịnfa ḅụọ-a nineasi oyi fịnjị-ẹ, ịsụn mị pịkị ọkọ lamẹ, anịọkụma finji na ịsụn na karamakaramamẹ. Oputẹkẹwarị mị, ịrụasọsọ nyọ daọrụ ḅụ mị anị simeye-ẹ, se anịa tọrọkọ ḅụ gbọrị agbamịẹ ẹbẹ omi-ẹ.

⁴⁸Anịsịkị ọ̀ pịkị ị̀ se Oputẹkẹwarị jukuru mị ḅie mun mẹ. Ọ̀ ḅọrọ nyọ mị tọnmẹ, anịa gbun esenie-a ḅụọ-ẹ se anịa finji mị si-inein-a ḅụọ fịnjị-ẹ anịsịkị onu mị agbagba ma ḅe pẹkẹrẹ pẹkẹrẹḅụ kpokoro sọnọ-a ḅụọ-ẹ.

⁴⁹Mun ḅọrọ nyọ mị ḅụ jukuru mị laḅịa ịkpịkpa omi-ẹ, jukuru mị anịa finji ḅụọ-a soi inein-a ḅụọ fịnjị-ẹ, se anịa gbun si ḅụọ-ẹ. Mama ogbo-a chịn omi-ẹ gbọrị anga gbọrị chịn, gbọrị anga gbọrị chịn ḅọkọ mị ḅụ omi-ẹ.