Read kirikeni Izikịẹl 41 Bible Online

Izikịẹl 41 - kirikeni bible

Izikịẹl 41

¹Tomoniḅọ ḅe ọ̀ pịkị ị̀ se ogboku jukuru mị ḅie mun mẹ, Fịafịa Nyọ mị. Ḅọrọ mun anịa ḅie sọ nyọ mị, ọ̀ nwọ tọnmẹ, anịa gbun mị oyi-a ḅụọ-ẹ,

²finji mị mama ḅụọ fa si-ẹ, anịsịkị kiki ma ḅe kpokoro nine-a ḅụọ angana angana ḅụ. Ò jukuru mị na-mịnaḅụ-na nwọ tọnmẹ, anịa ịsụn, mama ḅụọ fa ḅụọ-a tesi oyi fịnjị-ẹ, se finji mị ḅụọ-a soi inein-a ḅụọ fịnjị-ẹ.

³Anịsịkị ò gbuntẹịn jukuru ḅie mị sọmẹ. Mun anịa ḅie sọḅịa ḅọrọ nyọ mị ọ̀ nwọ tọnmẹ, anịa gbun mị tẹrẹ-a ḅụọ-ẹ, finji mị oyi-a ḅụọ-ẹ, anịsịkị angana angana ḅụ kiki ma ḅe kpokoro oyi mama ḅụọ fịnjị fịnjị-ẹ.

⁴Ò jukuru mị na-mịnaḅụ-na tọnmẹ, anịa ịsụn na finji na karama karamamẹ, soi inein-a ḅụọ fịnjị fịnjị-ẹ. Mị jukuru mị, ogboku jukuru mị ọḅụju anị omi-ẹ. Se ọ̀ nwọse ị̀ ḅẹmẹ, “Mị anị Fịafịatẹịn Nyọ mị-ẹ.”

⁵Tomoniḅọ ḅe, Oputẹkẹwarị mị ḅieju kiki ma ḅe kpokoro mị ọ̀ nwọ tọnmẹ, àrị laye oyi-a ḅụọ-ẹ. Mị Oputẹkẹwarị agbagba ma kelema koro, kala jukuru kala jukuru kpo ḅeinmẹ, arịa finji sọnọma ḅụọ sọnọma ḅụọ-ẹ.

⁶Ma jukuru ma tẹrẹ-a deki ọgọnọ warị ḅụ àrị omi-ẹ, gbọrị deki, jukuru-a soi jukuru-a soi mị àrị dekiye-ẹ. Oputẹkẹwarị mị ḅụ nụngọ da deki warị agbagba ma pẹmpẹmtẹịn chukuju deki agbagba ma nẹngịmẹ mịẹso sịkị jukuru ma ineda warị agbagba ma ọgọnọ chịẹḅịa, se àrị jukuru ma ḅie kiki ma opuma nwọ pụnụma ẹka ọkụ.

⁷Anịẹrẹchị ị́ nemikase nụngọ ḅụ wẹrị Oputẹkẹwarị mị ḍiki ọkụma ị́ nwọ chịnḅịa na chuku ḅụ ọkịmun ọgọnọla arịmgba gbọrị kpokoro ḅara mị-ẹ. Oputẹkẹwarị agbagba mị ḅụ, nụngọ da nyọ mị ḅụ, jukuru ma ḅe nụngọ mị ḅụ, mama ḅele ịkpịkpa ini nwọ namamẹ, mịẹso sịkị chuku deki mị ḅụ, mun ogboku deki mị na, ọgọnọ deki mị na la mị sarasaramẹ.

⁸Ma jukuru ma ḅụ nụngọ da agbagba ma arịa kpokoro nine-a ḅụọ nine-a ḅụọ-ẹ; Oputẹkẹwarị mị ḅụ ọgọnọ daọrụ ḅụ, mun jukuru ma ḅie sọḅịa gbọrị ḅọkọ omi-ẹ, gbọrịye pịkị mun chuku daọrụ ayema ḅie sọmẹ. À ḍọkịḅo ọrịmẹ na finji ḅụ nine-a ḅụọ laḅịa ḅe kpụlụkụ kpụlụkụ gele kiri Oputẹkẹwarị mị kelemamẹ, oyi-a ḅụọ anị nwọse gele kiri mị nẹngịmẹ, Oputẹkẹwarị mị ḅụ sime jukuru ma, ini se arịa chuku ḅụ sakị warịma nama ḍụparịma ini àrị mịẹ gelemaḅo anị kiri mị na gbasịmamẹ. Kpụlụkụ kpụlụkụ gele kiri mị na, agbamịẹapụma se mịẹmịẹye ḅụ chuarị warịma na ogboku ḅụ, gbọrị ḅele nyọ omi-ẹ, saḅakoro ḅụ anị laye ḅụọ-a soi inein-a ḅụọ fịnjị-ẹ, Oputẹkẹwarị anga mị ḅụ.

¹²Anị sasa nyọ mị ḅe kuluma nyọ ḅụ Oputẹkẹwarị mị ḅụ ịrụasọsọ nyọ daọrụ mị ḅụ gbọrị warị omi-ẹ, anịa ịsụn ḅụọ-a sọnọmasi oyi fịnjị-ẹ, finji mị ineinfa ḅụọ-a sonioasi-ẹ, anịa agbagba ma ḅe kpokoro anịmgba kelema mị esenia-a ḅụọ-ẹ.

¹³Tomoniḅọ ḅe ori Oputẹkẹwarị nụngọ mị tọnmẹ, anịa ịsụn mị mama ḅụọ-fa ḅụọ-a nineasi oyi fịnjị-ẹ. Oputẹkẹwarị mị ọḅụju, ḅele nyọ mị saḅa mun ịrụasọsọ nyọ ḅụ sime sasa warị mị la, anị laye pịkị mama ḅụọ-fa ḅụọ-a nineasi oyi fịnjị-ẹ.

¹⁴Oputẹkẹwarị mị tọrọkọ saḅa, pịkị angana angana ḅụ ḅele nyọ mị se chụa, àrị se jịnye jịnye ḅụ sikimaye pịkị maịnfa ḅụọ-a nineasi oyi fịnjị-ẹ.

¹⁵Warị mị anịa ịsụn ọ̀ nwọ tọn ịrụasọsọ nyọ damẹ, anịa ḅie gbamụ ḅọrọ-anyọ ma se chụa, anị sọnị maịnfa ḅụọ-a nineasi oyi fịnjị-ẹ. Oputẹkẹwarị mị ḅie sọḅịa jukuru ḅọkọ mị Fịafịa Nyọ mị na pịkị Fịafịatẹịn Nyọ mị na

¹⁶arịmgba kiri mị ḅụ sakị mun pẹlẹ ḅọkọ ma la, ḍụpọ ini nwọse àrị oḅolomẹ. Ma pẹlẹ ḅọkọ ma ini ineda àrị gbẹịnḅịa.

¹⁷Oputẹkẹwarị mị ḅie kiki ma ḅụ ini gbọtụma yekarakara àrị gbẹịn iwo ḅọrọ mun ḅọkọ ma ọgọnọju lamẹ,

¹⁸enemi kọrọ na pamba chụaye na anị ini karaye-ẹ. Enemi kọrọ na pamba chụaye na, ini gwagwa karamẹ. Enemi kọrọ ḅọrọso pamba chụaye, anịọkụma enemi kọrọ ogboku goyegoye pamba chụaye omi-ẹ ọkịmun jukuru mị mgba kelemamẹ. Gbọrị pamba chụaye mama tọrụ mama tọrụ nyanamẹ,

¹⁹tomoniḅọ tọrụkuḅu enemi kọrọ mị damẹ, gbọrị pẹkẹrẹ ḅụ, pịkị chịrịḅa tọrụkuḅu tọrụ ísí pẹkẹrẹ sime kọrọ mị damẹ. Mị ḅara mị anị sime bebe kiki ma mgba kelema ọkụ-ẹ,

²⁰kiri mị ḅụ sakị mun ḅọkọ ma ọgọnọju lamẹ.

²¹Fịafịa Nyọ mị ḅie ḅụ ḅọkọ-a chịnma arịa inein-a ịkọlị ma gbasịa-gbasịamẹ. Fịafịatẹịn Nyọ Mị sọḅịa ḅọkọ mị tọrọkọ ḅụ

²²chịn agbamịẹ ẹbẹ sime ọkụ sime gbọrịye omi-ẹ. Anịa gele mị sọnọ-a ḅụọ-ẹ, se finji mị inein-a ḅụọ-ẹ. Anịa ḅụọma anga anga ḅụ, anịa kuḅu mị na; pịkị anịa anga ma ḅụ na, arịmgba chịn ini nwọse mịẹmịẹ. Tomoniḅọ ḅe nwọse ị̀ ḅẹmẹ, “Mịn mị anị Nyanaḅọ Ḅe tọrụkuḅu ḅụ chịẹarị dẹbụl mị-ẹ.”

²³Mun Fịafịa Nyọ mị laḅịa ḅọrọ nyọ mị ḅụ, gbọrị ḅọkọ omi-ẹ, jịn gbọrị ḅọkọ pịkị ḅọrọ nyọ mị ḅụ kuluma mị ḅụ omi-ẹ, anị mun Fịafịatẹịn Nyọ mị la ḅọrọ nyọ mị-ẹ.

²⁴Àrị ma mama pẹkẹrẹ ḅọkọ-ẹ ogboku ḅụ mị àrị finji finjiye-ẹ.

²⁵Fịafịa Nyọ mị ḅụ sime ḅọkọ mị ḅụ, enemi kọrọ na, pamba chụaye na ini nwọ karamẹ, anị anị pa kiki maḅụ sime ọkụ mị. Se ḅọkọ mị ḅie nụngọ daọrụ mị ḅụ ini ḍụpọ se gbẹịn gbọrịye omi-ẹ, anịa ọgọnọju ḅụ anị ḅọrọ mun jukuru mị ḅie sọḅịa ḅọkọ mị omi-ẹ.

²⁶Jukuru mị ḅe anga ma ḅụ pẹlẹ ḅọkọ omi-ẹ, anịsịkị enemi kọrọ ini nwọse kiki ma ḅirimamẹ.