Read kirikeni Izikịẹl 43 Bible Online

Izikịẹl 43 - kirikeni bible

Izikịẹl 43

¹Tomoniḅọ ḅe ori ị̀ se ịrụapakapaka nyọ da onu ḅọkọ mị mun mẹ,

²anịnyọ ịrụapakapaka nyọ daọrụ ḅụ Izrẹl Tamụnọ Ḅe oria tọrụ da enekuḅu mị ḅoarị ọkụ à nwọ ọrịmẹ. Tamụnọ Ḅe ọ̀ pụkọ ḅie fiearị ḅara, ekerearị opu tọrụ ḅie fie ọkụ simemẹ, kiri mị sọ anị tọrụ da enekuḅu ḅara mị ḅịamẹ.

³Mị ịkịan mị, Tamụnọ Ḅe ḅo Jerusalẹm fama-ẹ ḅo sịkị àrị ọrị ịkịan mị ọkụ simemẹ, pịkị Kẹba Tọrụ mị aka ḅụ na. Se àrị ị̀ ḅụ se chama gbin se ị̀ tọrụ se kiri iḅomẹ.

⁴Tọrụ da enekuḅu mị, ịrụapakapaka nyọ da onu ḅọkọ mị ḅie ḅụ mị anị toluḅọrọ Oputẹkẹwarị mị ḅie sọmunye-ẹ.

⁵Tamụnọ Ḅe kụrọ mị ị̀ deki se ị̀ se odo mị ḅie sọmẹ, anịnyọ àrị ọrịmẹ na Nyanaḅọ Ḅe oria boma mị anị Oputẹkẹwarị mị ḅie ḅeinmẹ.

⁶Tomoniḅọ ḅe ori anịnyọ ḅụ ị̀ya anga sịkị ḅụ chịẹmẹ, se Nyanaḅọ Ḅe ori Oputẹkẹwarị mị ḅie ḅụ ọkwẹịn ị̀ pịrị sịkị à naamẹ.

⁷“Tomoniḅọ tọkụ, mị ị̀ya emine mị-ẹ. Mị nyọ àrị Izrẹlapụma ogboku angaḅịa, se ḅẹrẹtọn ini pịrị gbasoḅịa. Ḅọrọ Izrẹlapụ ma-o anịkanịka inia amanyanapụma sọnị, ini ḅarị jịn sịkị ị̀ya fịafịa ẹrẹ mị se mun ḅụgerere ḅụ chu ẹkẹ, anị mun jịn-a oru tẹkẹma ḅọrọ ḅụ na pịkị mịanga opuma inia fịsa amanyanapụ ojuma na kpeki pịkị ḍipi ḅụ na.

⁸Amanyanapụ ma inia warị ḅọkọ ma na warị agbagba ma na ini se gbọtụma ị̀ya fịafịa Oputẹkẹwarị mị ḅọkọ ma na warị agbagba ma na kpatụ ma namamẹ, anịḅụ gbọrị warị agbagba anị kikichụa wa pịrịye-ẹ mịna ogboku ḅụ. Ma ḅụnjịnjịmaye ma mịẹmịẹ mị ḅụ ini ị̀ya fịafịa ẹrẹ mị se ḅụgerere ḅụ chuchumẹ, anịgose ị̀ya ịganị ḅụ àrị ini ḅaaḅaamẹ.

⁹Mịọkụ jịn-a oru tẹkẹ mị ḅụ ini ḅarasin, ini pịkị inia fịsa amanyanapụ ojuma dekisin. Ini anị ḅara mị mịẹmẹ ḅẹḅẹ àrị inia ogboku anga gbasoḅịa.”

¹⁰Nyanaḅọ Ḅe pa ḅẹaḅẹ, “Tomoniḅọ tọkụ, Oputẹkẹwarị mị ḅụ ḅẹrẹ nwọ ḍuko Izrẹlapụma pịrị, se mịẹse ini anị sime ọkụ mị ḍawọ. Mịẹ inia si-a mịẹmịẹaye ma gose ḅụgerere inia tọrụ sọ.

¹¹Se ini mịẹaye ma gose ḅụgerere inia tọrụ sọmẹ ḅẹḅẹ, anịsịkị Oputẹkẹwarị mị ḅe sime ḅara mị ḍuko ḅelema ini pịrị. Ini anị ḅirima ḅara na, anịa sọ nyọ na ḅọrọ paka nyọ na, anịa oju mị sime ḅara na, ini yegoyegoye se ọrụtọn wẹrịḅara na, olokoma na yema ọrụrụ ḅụ kpaịnma sime ọkụ na. Maye mamgba àrị gịẹịn koroma ini pịrị, ini ineda yegoyegoye nwọ ọrị se ineda olokoma fiearịye ma ḍukonwẹngịḅịa ḅara.

¹²Mị anị Oputẹkẹwarị oloko mị-ẹ: Tụndụ mị ọgọnọ na anị kelema okpokiriḅa mị mgba na osi nyana pịkị fịafịamẹ.”

¹³Mị anị agbamịẹ ẹbẹ mị ini anị tọn sịkị ḅụ anị sime ḅara-ẹ, ini se Oputẹkẹwarị mị tọn gbọrịye mị anị ini pịkị se anị tọnye-ẹ. Ogororo Oputẹkẹwarị okpokiriḅa mị mgba kelemamẹ, anịa gbun mị gbọrị ḅụọ na opu ikiḅa na-ẹ, finji mị sọ pịkị gbọrị ḅụọ na opu ikiḅa na-ẹ, kalaye fa gbọrị ḅụọ la gbọrịye ini nwọse anịa aka ḅụ mangị ḅọrọmẹ.

¹⁴Agbamịẹ ẹbẹ mị ḅụ kiridatẹịn pẹkẹrẹ mị, anịa ọgọnọju tọn iderima mị laye gele ḅụ inein-a ḅụọ-ẹ. Ísí pẹkẹrẹ mị aka ḅụ gbọrị ḅụọ na opu ikiḅa na anị nwọse ọḅụ da nyọ mị mgba kelemamẹ. Se anịa gele mị sọnọma ḅụọ-ẹ, anị da ísí pẹkẹrẹ mị sọ, gbọrị ḅụọ na opu ikiḅa anị nwọse ọḅụ da nyọ mị mgba kelemamẹ.

¹⁵Mị ọgọnọju pẹkẹrẹ mị, anị ini agbamịẹaye mamgba dọkịma-dọkịma nyọ mị sọ gele ḅụ anị sọnọma ḅụọ lamẹ. Inein-a ịkọlị ma ḅụ ini se chụa pakụmaye ma, àrị geletẹịn ọgọnọ mị nẹngịmẹ.

¹⁶Agbamịẹ ẹbẹ ọgọnọ anị ini fịnị tọnọ àrị nyọ mị anịa inein-a ịkọlị ma gbasịa gbasịamẹ, si ḅụọ gbọrị ịkọlị, gbọrị ịkọlị-ẹ.

¹⁷Anịa ḅirima ḅiri mị sọ finji na ịsụn na gbasịmẹ, si inein-a ḅụọ fịnjị ịkọlị ịkọlị ḅụ-ẹ, gele ḅụ kalaye fa gbọrị ḅụọ laye ini nwọse anịa aka mangị ḅọrọmẹ. (Ogororo mị ḅe finji gbọrị ḅụọ na opu ikiḅa na-ẹ.) Tanjị iwo mun agbamịẹ ẹbẹ mị laḅịa ịkpịkpa ma ịrụapakapaka nyọ daọrụ ḅụ àrị omi-ẹ.

¹⁸Kụrọmamgba Nyanaḅọ Ḅe nwọse ị̀ ḅẹmẹ, “Tomoniḅọ tọkụ, à ḍuko ị́ pịrịḅịaye mị poki. Agbamịẹ ẹbẹ mị namasosa ḅẹḅẹ, anịa ọgọnọ ị́ agbamịẹaye dọkịmaḅịa, anị se osiḅụ wẹrị ḅụ, ị́ pịkị ị́ se agbamịẹ namama pulo nwọse anịa ọgọnọ sanaḅịa.

¹⁹Livaị sẹ ḅie, Zadọk furo ḅie pakaḅo agbamịẹapụma anị sọḅo ị̀ tọrụkuḅu fịrịnwẹngị ị̀ pịrịḅịaye-ẹ. Ị̀rị̀ Kụrọmamgba Nyanaḅọ Ḅe anị mịn mị tọnye-ẹ. Si gose gbọrị ayamburama owoi nambulo ị́ nwọse ini pịrịḅịa ini se agba mị mịẹ.

²⁰Ị́ kele oria pulo mị ḅụaye ọkịḅịa, anịse agbamịẹ ẹbẹ mị anịa inein-a ịkọlị ma ọgọnọ ini mịẹ koromaye ma ḅie chụaḅịa pịkị agbamịẹ ẹbẹ mị ḅirima ḅiri mị ḅụ inein-a ịkọlị ma sọnị pịkị anga mamgba kelema. Mị ḅara mị ḅụ anị ị́ agbamịẹ ẹbẹ mị mịẹfịafịama pịkị anị se osiḅụ wẹrịḅịa ọkụ-ẹ.

²¹Ini ọkịḅo simịẹ agba mị mịẹḅịa nambulo ḅe ị́ nwọ ọkịḅịa se ò se Oputẹkẹwarị mị ḅụ, sikima mun ini tọn koromasa gbọrị nyọ ḅụ ọ̀ dọkịmaḅịa.

²²Jịn eneḅa, ị́ ẹkpẹịn ọkịḅịa, gbọrị ịlọlị sọ ḅụ oforika wu, se ị́ ò se simịẹ agba mịẹḅịa. Oria pulo mị se agbamịẹ ẹbẹ mị mịẹfịafịama anị owoi nambulo ḅe pulo mị ị́ nwọse mịẹ ọkụ mị.

²³Ị́ anị mị mịẹsosa ḅẹḅẹ, gbọrị ayamburama owoi nambulo na, ayamburama ajirima na nwọ ọkị mamaye mamgba ịlọlị ḅụ oforikaye,

²⁴anịsịkị àrị se ḅo ị̀ pịrị. Agbamịẹapụma ini fụn se àrị tan se àrị se dọkịma agbamịẹ ị̀ pịrịḅịa.

²⁵Sọnọma ḍin ḅụ gbọrị ene gbọrị oḅori, gbọrị nambulo pịkị gbọrị ajirima na ị́ nwọse simịẹ agbamịẹ ị̀ pịrịpịrịḅịa. Arịmgba gbọrị ịlọlị sọ arịa ḅụ oforiḅịa.

²⁶Agbamịẹapụma, ini agbamịẹ ẹbẹ mị se osiḅụ wẹrịḅịa, eneḅeneḅene sọnọma ḍin ḅụ, anị karakarama fịrịnwẹngịḅịa ḅara ḅụ.

²⁷Fẹnị anga mị ḅọrọsa ḅẹḅẹ, agbamịẹapụma ini sakị agbamịẹ ẹbẹ mị ọgọnọ tomonima inia ḍiepịrịaye agbama na nwẹngịgboloma agbama na dọkịmaḅịa. Anịsịkị anị àrị ómine mgba ḍikiḅieḅẹlẹḅịaye-ẹ. Ị̀rị̀ Kụrọmamgba Nyanaḅọ Ḅe à ḍukosam.”