Read kirikeni Izikịẹl 44 Bible Online

Izikịẹl 44 - kirikeni bible

Izikịẹl 44

¹Tomoniḅọ Ḅe, ori ị̀ se nụngọ onu ḅọkọ mị da mun mẹ, Oputẹkẹwarị mị ḅụ ịrụapakapaka nyọ da agbagba mị. Onu ḅọkọ mị palịmẹ,

²se Nyanaḅọ Ḅe nwọse ị̀ ḅẹmẹ, “Mị onu ḅọkọ mị palị gbasoḅịa, anị pịkị ngịsị finji ẹkẹ. Oju-mịnị-chụa gbọrịḅọ sọ ini ḅereni pịrị ẹkẹ sọmun anịa ḅie fịrịnwẹngị, anịatịḅị Ị̀rị̀ Nyanaḅọ Izrẹl Tamụnọ Ḅe anịa ḅie à sọtoluḅọrọsam. Anị palị ḅụ simeḅịa.

³Anịẹḅẹsọ, ḅẹrẹtọn àrị amanyanaḅọ ḅe, ori ine anịa ḅie sọmun ị̀ tọrọkọ ḅụ fịafịa fịye fịḅịa. Ọ̀ ḅọrọ ḅieju kuluma jukuru mị ḅie sọ ḅọrọ mun onu ḅọkọ mị ḅie mị ọ̀ pịkị ḅọrọpakaḅịaye-ẹ.”

⁴Ọḅụkọ tomoniḅọ ḅe ọ̀ pịkị ị̀ se ọgọnọju da onu ḅọkọ mị ḅie toluḅọrọ mun Oputẹkẹwarị mị tọrọkọ lamẹ. À ḍiki ọkụma àrị ọrịmẹ, Nyanaḅọ Ḅe oria Oputẹkẹwarị ḅie oria tọrụda enekuḅu ḅie ḅeinmẹ, ò sime nyọ. Àrị ị̀ ḅụ se chama gbin se ị̀ tọrụse kiri iḅomẹ,

⁵se Nyanaḅọ Ḅe nwọse ị̀ ḅẹmẹ, “Tomoniḅọ tọkụ, tọrụ kweinma mịanga ị́ ọrịye goyegoye na ị́ naa aye goyegoye na nwọ pịrị. Àrị Oputẹkẹwarị mị ḅie olokoma na ọrụrụ ḅụ yema sime ḅara na nwọ ḍuko ị́ pịrị-ẹmun-aḅẹ. Oputẹkẹwarị mị ḅie ini ḅereni pịrị se sọ-na-paka-na ḅịa apụma ḅụ elekima chụa, ini pịkị ḅereni pịrị ẹka apụma na.

⁶“Ḍuko ini Izrẹlapụ oloko kan tịḅịḅie kụrọ apụma pịrị na, Ị̀rị̀ Kụrọmamgba Nyanaḅọ Ḅe nwọ ḅẹmẹ na à ḅarị ineda tọrụ se ini mịẹmịẹ ḅụnjịnjịmaye ọrị ḅikẹ.

⁷Ini Ị̀ya Oputẹkẹwarị mị pụlamasam anị ini nwọ ḅereni ḅụpẹlẹka jịn sẹ apụma, ị̀ ḅịpị pokipokikapụ ma pịrị se ini Oputẹkẹwarị mị ḅie sọmẹ, ini ḅẹlẹkị na pulo na nwọse Oputẹkẹwarị ḅie agbamịẹ ị̀ pịrịarị sịkị ḅụ. Anị ḅụ ị̀ya tomonima ini ị̀ya ọḅọkụ mị kansam, ini ma ḅụnjịnjịmaye mamgba mịẹsaye gose.

⁸Ini ḅarị ị̀ya Oputẹkẹwarị ḅie tọrụ se osi-nyana-tẹmẹ anga mịẹmịẹaye ma ḅụ wẹrịkẹ, ọkụma anịnakaraka jịn sẹ apụ re anị ini ọkị koroma se yema ḍikiḍikiarịye-ẹ.

⁹“Ị̀rị̀ Kụrọmamgba Nyanaḅọ Ḅe, ḅelema ḍuko aḅẹ na, ḅụpẹlẹka gbọrị jịn sẹ ḅọ sọ, ị̀ ḅịpị pokipokika gbọrịḅọ sọ, ḅarị ngịsị ị̀ya Oputẹkẹwarị ḅie sọ ẹkẹ, pịkị Izrẹlapụma ḅie anga jịn sẹ ḅọ sọnị.

¹⁰Nyanaḅọ Ḅe nwọse ị̀ ḅẹmẹ, “À fomuḅara se ini pịrịḅịa, ini nwọ ị̀ ḅụ sikima se mun Izrẹlapụma ḅụ sọ oru tẹkẹ Livaị apụma.

¹¹Ini pa ine fịrịnwẹngị ị̀ pịrịḅịa Oputẹkẹwarị ḅie, anị onu ḅọkọ ma ḍikiḍiki ḅụ, pịkị Oputẹkẹwarị ḅie fịrịnwẹngị ḅụ na. Tomonima se ḍiepịrịaye agba na dọkịma agba na mịẹḅịa namama ini ine ḅaaḅịa, ini pịkị fịrị ḅie sime fịrịnwẹngị tomonima pịrịpịrịḅịa.

¹²Ọkụma, ini ma anị mị oru tẹkẹ ḅụ Izrẹlapụma datekeremaye-ẹ, se mị ḅara ḅụ ini tomonima da mun si ḅie chumẹ, Ị̀rị̀ Kụrọmamgba Nyanaḅọ Ḅe kụrọma yekarịfịmẹ na gbarịmaka ḅaraḅụ ini fomuḅara daḅịa.

¹³Agbamịẹapụ ḅaraḅụ ini ḅarị fịrịnwẹngị ị̀ pịrị ẹkẹ ini pịkị ḅarị osiḅụ-sime ị̀ pịrịye goyegoye kpekima ẹkẹ, Fịafịatẹịn Nyọ mị sọ ini sọ ẹkẹ. Mịn mị anị ini mịẹsa ḅụnjịnjịmaye ma gose sime ini pịrị fomuḅara-ẹ.

¹⁴Oputẹkẹwarị ḅie yeḅụsọkatẹịn fịrị anị à se ini pịrị ini nwẹngị-nwẹngịḅịaye-ẹ.”

¹⁵Kụrọmamgba Nyanaḅọ Ḅe nwọ ḅẹmẹ, “Ini Livaị sẹ ḅie, Zadọk furo ḅie pakaḅo agbamịẹapụma, anị simeḅara simeḅara sọnị ini pa kuḅie se ḅụgbanagbẹịn ḅara nwọse Oputẹkẹwarị ḅie fịrịnwẹngị ị̀ pịrịaḅẹ, ísí kirikọn Izrẹlapụ mamgba ị̀ ḅụ pịkịma so sịkị. Anịẹrẹchị mịọkụ ini anị fịrịnwẹngị ị̀ pịrịpịrịḅịaye-ẹ, pịkị à sime nyọ sọsọ ḅo, ḅẹlẹkị na pulo na agba mị mịẹ ị̀ pịrịḅịaye-ẹ.

¹⁶Ini ngẹrị ngẹrị anị ị̀ya Oputẹkẹwarị ḅie sọ se agbamịẹ ẹbẹ mị ḅụ fịrịnwẹngị-nwẹngị pịkị tịḅịda Oputẹkẹwarị ḅie tẹkẹ mị ḅe fịrịma nwẹngị ị̀ pịrịpịrịḅịaye-ẹ.

¹⁷Ini onu ḅọkọ mị ḅe ḅọrọ nyọ mị ḅụ sọ ḅieju Oputẹkẹwarị ḅẹrẹkọn odo mị ḅie mun-arị sịkị, ini lọkọ ḅịtẹ ḅụchụaye nwọ chụaḅịa. Ngịsị ini nama-oju-ichuka se mịẹ ḅịtẹ ḅiriaye ḅiri ẹkẹ, ini Oputẹkẹwarị ḅie ḅieju ḅẹrẹkọn odo mị ḅie anịkanịka Oputẹkẹwarị fịrị ḅụ sọsa ḅẹḅẹ.

¹⁸Ini imo-sara-ẹkaye gose, nangwọ lọkọ ḅịtẹ tịḅịfịnaye ini nwọse inia tịḅị ma fịna kelemaḅịa, ini pịkị koro-lọkọ-ḅịtẹ-tumochụaye na nwọ chụaḅịa, ọkụma ḅirikunye ofori-ẹ.

¹⁹Tẹrẹrẹ ini so nụngọ ḅẹrẹkọn warị odo ḅie tomonima sime nyọ mun, ini tatarị mịẹkamịẹka ḅaraḅụ ini se Oputẹkẹwarị ḅie fịrịnwẹngị sime ḅụchụayema sin osi-nyana jukuru ma ḅie koromaḅịa. Ini jịn-a ḅụchụaye chụaḅịa, mịẹso sịkị inia osiḅụ-sime-a ḅụchụayema ye se tomonima lama ẹka ḅara.

²⁰“Agbamịẹapụma inia tịḅị inime ngịsị ini sẹịnma, ini inime wẹrị nangwọmama. Ini anị la gbẹịn ḅara se anị wẹrị.

²¹Agbamịẹapụ ngịsị ọfịrị iruḅu so se ḅieju odo ḅie sọ mun ma.

²²Gbọrị agbamịẹḅọ sọnị deḅọ na sosa eremeniḅọ na simema, Izrẹl ḅie ma owuḅọ nemika eremeni awọ kẹngẹ anị ò simeḅịaye-ẹ anịkanịka fịsa jịn agbamịẹḅọ ta.

²³“Agbamịẹapụma ini fịafịaye na fịafịakaye na ḅụ kịrịye se ị̀ya tomonima telimaḅịa pịkị tẹmẹ anga ḅe fịafịaye na fịafịakaye na.

²⁴Ịgbanịaye pakasa ḅẹḅẹ, agbamịẹapụma, ini ị̀ya olokoma sime ḅara ḍiki ḅẹrẹ mị kọn. Ị̀ya olokoma sime ḅara ini nwọ ḍiki tẹmẹ anga ḅe alalị ma fị, ini pịkị Ịnyọ Sara Ene mị se osiḅụ wẹrị.

²⁵“Agbamịẹḅọ ḅe, ḅara se fịsaḅọ oju lama mị, ọ̀ mịẹse ò ḅo tẹmẹ ḅụ fịafịakaḅọ sọḅịa. Ori ḅara se lamaḅịapụ anị oyi ḍaḅọ na nyengiḅọ na, oria awọma ḅụ gbọrịḅọ anịkanịka oria mịnaḅọ gbọrị owuḅọ anịkanịka oria mịnapụ eremeni ma ḅụ ma owuḅọ simeka gbọrịḅọ na.

²⁶Ò ḅo pịkị fịafịasa ḅẹḅẹ, sọnọma ḍin ọ̀ nwọse koruḅịa

²⁷anịsịkị mị ọ̀ sọ ḅieju Oputẹkẹwarị ḅẹrẹkọn odo mị ḅie mun oria ḅụ mịẹfịafịama agba mị mịẹḅịaye-ẹ. Mịẹso sịkị ọ̀ pịkị ineda Oputẹkẹwarị ḅie fịrịnwẹngịḅịa ọkụ. Ị̀rị̀ Kụrọmamgba Nyanaḅọ Ḅe à ḍukosam.

²⁸“Agbamịẹapụma agbamịẹ fịrị mị anị inia ḍiekiri-ẹ, àrị anị ḍiama Izrẹl mị pịrịmẹ na ini daḅọrọma ḅụọ ḅụọ pịrị. Ini ngọ nyana ẹkẹ Izrẹl ḅie, Ị̀rị̀ kẹngẹ anị ini ḅiye-ẹ.

²⁹Fịayemgbọlụ ḍiepịrịaye agba mịẹaye na, simịẹ ḍiepịrịaye agba mịẹaye na, pịkị kpoto gbẹịn ḍiepịrịaye agba mịẹaye na anị agbamịẹapụma inia fịaye-ẹ, pịkị Izrẹl mị sin sikima ị̀ pịrịye goyegoye, ini ma anị ọkịḅịa.

³⁰Ozu ḅie ini tatarị sokuḅo iḅiye goyegoye, ini ma anị ọkịḅịa, ini pịkị se ḍie ị̀ pịrị jịn aye na. Nweni ma ini fịturu fọị sịkị fọị sịkị, tatarị okpokpo mị agbamịẹ ḍiepịrịaye ḅara ini nwọse anị se agbamịẹapụma pịrị anịsịkị ị̀ya ḅẹlẹma inia warịma ḅie simeḅịa.

³¹Agbamịẹapụma, ngẹrị fịsa feni anịkanịka ngẹrị fịsa nama pịkị jịn nama ḅaa koromasa nama sọ ini pẹịma.”