Read kirikeni Izikịẹl 46 Bible Online

Izikịẹl 46 - kirikeni bible

Izikịẹl 46

¹Kụrọmamgba Nyanaḅọ Ḅe nwọ ḅẹmẹ, “Ḅọrọ mun ḅieju ḅẹrẹkọn warị odo mị ḅie sọḅịa, ịrụapakapaka nyọ da onu ḅọkọ mị, anị palị ḅụ simeḅịa fịrịnwẹngị sonio-a ḍin ma ḅie, ọkụma Ịnyọ Sara Ene ma ḅie na pịkị Ịwọ Akalụ Alalị enema ḅie na ini anị finjiḅịa.

²Ḅẹrẹtọn àrị amanyanaḅọ ḅe, nụngọ da odo mị ḅie ọ̀ ḅọrọ mun onu ḅọkọ mị anga sime jukuru mị ḅie sọmun ḅọkọ chịnma angasịkị ḅụ chịẹḅịa, anịsịkị mị ḅụ, agbamịẹḅọ ḅe ori oria bebema dọkịma agbama na pịkị nwẹngịgboloma ḍiepịrịaye agbama na ọ̀ nwọ mịẹ aḅẹ. Anịnyọ onu ḅọkọ mị anga ọ̀ tẹkẹ so sịkị ọ̀ pakasoḅịa. Onu ḅọkọ mị gbẹịnka mun saso laḅịa.

³Ịnyọ Sara Ene goyegoye na pịkị Ịwọ Akalụ Alalị ene goyegoye na, tomoni mamgba ini onu ḅọkọ mị tọrọkọ ḅụ tịḅịtu Nyanaḅọ Ḅe tẹkẹtẹkẹḅịa.

⁴Ịnyọ Sara Ene mị ḅie, amanyanaḅọ ḅe, sonio anana awọ na, gbọrị ajirima na, arịmgba ịlọlị ḅụ oforikaye-ẹ, ọ̀ nwọse bebema dọkịma agba mịẹ Nyanaḅọ Ḅe pịrịḅịa.

⁵Gbọrị ajirima goyegoye ḅụ, warawara fịayemgbọlụ ḅụ tẹrẹfasi na pẹkẹrẹ pẹkẹrẹ lita ọ̀ nwọse ḅoḅịa ḍiepịrịaye agbamịẹye ḅaraḅụ, ori ineda ọ̀ ḅụḅẹlẹye nwọse gbọrị anana tọkụ, gbọrị anana tọkụ ḅụ chụa se ḅo ḍiepịrịye pịrịḅịa. Ò se ḍiepịrịye agba mịẹḅịa warawara fịayemgbọlụ goyegoye ḅụ, oliv pulo tẹrẹ-a lita tẹrẹ-a lita ọ̀ nwọse chụaḅịa.

⁶Ịwọ Akalụ Alalị sịkị ḅụ, gbọrị ayamburama owoi nambulo ọ̀ nwọ pịrị pakụmaḅịa, pịkị sonio anana awọ na, gbọrị ajirima na, arịmgba ịlọlị ḅụ oforikayeḅịa.

⁷Gbọrị ayamburama owoi nambulo goyegoye ḅụ na pịkị gbọrị ajirima goyegoye ḅụ na sọḅịa ḍiepịrịaye anị warawara fịayemgbọlụ ḅụ tẹrẹfasi na pẹkẹrẹ pẹkẹrẹ ḅarasịkịrị panị anịsịkị gbọrị anana tọkụ goyegoye ḅụ, ori amanyanaḅọ ḅe, ọ̀ ḅụḅẹlẹye ḅụḅẹlẹye ọ̀ nwọ pịrịḅịa. Oliv pulo tẹrẹ-a kongo tẹrẹ-a lita ọ̀ nwọse warawara fịayemgbọlụ ma ḅụ chụaḅịa ḍiepịrịaye ḅaraḅụ.

⁸Amanyanaḅọ ḅe, onu ḅọkọ mị ḅụ tolu mun jukuru mị sọsọ ḅọrọ nyọ mị ḅie mị ọ̀ sọ pịkị ḅọrọ pakaḅịaye-ẹ.

⁹“Alalị sịkị goyegoye ḅie, tomonima ḅo Nyanaḅọ Ḅe tẹkẹḅịa sịkị, ọgọnọ ọrụda onu ḅọkọ mị ḅie wẹrị sọ apụma, ini tẹkẹ so sa ḅẹḅẹ, chuku ọrụda onu ḅọkọ mị ḅie ini ḅọrọ soḅịa, anịsịkị chuku ọrụda onu ḅọkọ mị ḅie wẹrị sọ apụma, ọgọnọ ọrụda onu ḅọkọ mị ḅie, ini paka soḅịa. Gbọrịḅọ sọ nụḅọ sọ ḅọkọ mị ḅie pakaso ẹkẹ ọkụma anị na ḍikia-ḍikia onu ḅọkọ mị ḅie nụḅọ paka soḅịa.

¹⁰Amanyanaḅọ ḅe, tomonima sọ sịkị, ọ̀ sọḅịa ini paka sịkị, ọ̀ pịkị pakaḅịa.

¹¹Alalị enema ḅie ḍiepịrịaye agba mịẹḅịaye ma, anị warawara fịayemgbọlụ ḅụ, tẹrẹfasi lita na pẹkẹrẹ pẹkẹrẹ pịkị anịaḅụ sọḅịa gbọrị ayamburama owoi nambulo, gbọrị ayamburama nambulo, anịkanịka gbọrị ajirima, gbọrị ajirima-ẹ, ini ḅo alalị mị fịḅịa apụma, ini se ḅoḅịa gbọrị anana tọkụ, gbọrị anana tọkụ ḅe ḅụ chụa alalị mị fị ḅiye goyegoye ini ineda se ḅoḅịa. Oliv pulo tẹrẹ-a lita ma sọ, àrị ḍiepịrịayema ḅụ warawara fịayemgbọlụ ma ḅụ sọḅịa.

¹²“Ḅẹrẹkọn àrị amanyanaḅọ tọkụ ḅe, ò ḅielokoloko ḍiepịrịaye agba mịẹ Nyanaḅọ Ḅe pịrịḅịa sịkị, anịkanịka bebema dọkịma ḍiepịrịaye agba, anịkanịka nwẹngịgboloma ḍiepịrịaye agba ọ̀ nwọ mịẹḅịa sịkị, ịrụapakapaka nyọ da ḅọrọ ḅẹrẹkọn warị odo ḅie sọsọ onu ḅọkọ mị ini finji ọ̀ pịrịḅịa. Ịnyọ Sara Ene ḅie, ọ̀ mịẹmịẹ gbọrị ḍiepịrịaye agba mịẹ ḅara mị, ọ̀ nwọ mịẹḅịa anịsịkị ọ̀ paka so sịkị onu ḅọkọ mị ini palịḅịa.”

¹³Nyanaḅọ Ḅe nwọ ḅẹmẹ, “Dede goyegoye ḅụ, ịlọlị ḅụ ofori, gbọrị kụra lasa gbọrị anana tọkụ, ọ̀ nwọse bebema dọkịma ḍiepịrịaye agba mịẹ Nyanaḅọ Ḅe pịrịḅịa. Mị ḍiepịrịye agba mị, eneḅeneḅene ómine anị mịẹḅịa.

¹⁴Fịturu mịẹ fịlawa ḅụ mama loko ọ́ pịkị nwọse dede goyegoye ḅie ḍiepịrịye agba mịẹḅịa, pịkị se fịlawa mị gwaḅịa oliv pulo gbọrị lita na. Mị ọ́ mịẹ Nyanaḅọ Ḅe pịrịḅịa ḍiepịrịaye agba olokoma, ómine àrị ọlọ kụrọma gbasoḅịa.

¹⁵Anana tọkụ ḅe na, fịlawa mị na, pịkị oliv pulo mị na, ómine àrị se dede goyegoye ḅie ḅụ, ḍiepịrịaye agba mịẹ Nyanaḅọ Ḅe pịrị gbasoḅịa.”

¹⁶Kụrọmamgba Nyanaḅọ Ḅe, kụrọ pịrịmẹ na: “Ḅẹrẹtọn àrị amanyanaḅọ ḅe, nemikase ori nyana kirima ḅụ gbọrịye nwọse ḍiepịrịye ḅaraḅụ oria owuapụ awọma ḅie gbọrịḅọ pịrịmẹ ḅẹḅẹ, anị sime ori owutọkụ ḅe na, ò furo ḅie pakaḅoḅịa apụma na pịrị gbasoḅịa.

¹⁷Ọkụma ḅẹrẹtọn àrị amanyanaḅọ ḅe nemikase ọ̀ nyana kirima ḅụ gbọrịye nwọse oria fịrịnwẹngịapụma ḅie gbọrịḅọ pịrịmẹ ḅẹḅẹ, anị ọkịḅo fịrịnwẹngịapụ ini nyana apụma ḅaraḅụ soḅịa kụra ma lasa ḅẹḅẹ, anị kiri mị anị pịkịḅo amanyanaḅọ ḅe oriaye sọḅịa se ori-na-oria owuapụ awọma na kẹngẹ mị anị nyana gbasoḅịaye-ẹ.

¹⁸Ḅẹrẹtọn àrị amanyanaḅọ ḅe, ngịsị tomonima ini nyana ngọ inia ḅara ọ̀ nwọ pọkọ ọkịma. Ò se oria owuapụ awọma pịrị kiri goyegoye, anị ọkọ paka na ini se ọ̀ pịrị kiri ḅụ, ò pu ini pịrịmẹ. Mịẹso sịkị ori ị̀ya tomonima ḅie gbọrịḅọ sọ inuma se ini nyana kiri nwọ ọkị ẹka ọkụ.”

¹⁹Ọḅụkọ, tomoniḅọ ḅe, ori ị̀ se, tọrụse ọgọnọjuda jukuru ma ḅie sọsọ ḅọrọ nyọ mị na kpeki ḅẹrẹkọn warị odo mị ḅụ chuku-ọrụ-da nyọ mị mun mẹ. Ma anị agbamịẹapụma inia fịafịa jukuru ma-ẹ. Jukuru ma ḅụ, ịrụasọsọ nyọ daọrụ ḅụ, ọ̀ ḅara se gbọrị nyọ tọn pakụma

²⁰se nwọ ḅẹmẹ, “Mịnyọ anị agbamịẹapụma ini se simịẹ agba anịkanịka kpoto gbẹịn ḍiepịrịye agba mịẹḅịa namama chụọchụọ pịkị fịlawa ma na gbẹkẹnị gbẹkẹnịḅịaye-ẹ, mịẹso sịkị ini ḅẹrẹkọn warị odo mị ḅie osiḅụ-simeye deki paka mun ḅụfụka se tomonima pịrị-ẹka-ọkụ.”

²¹Se ọ̀ pịkị ị̀ se ḅẹrẹkọn warị odo mị ḅieḅụ nụngọ pakamẹ, ọ̀ pịkị se ị̀ ḍiemẹ na anịa inein-a ịkọlị ma ḅie, kala ḅẹrẹkọn warị odo, kala ḅẹrẹkọn warị odo omi-ẹ, gbọrịye ịsụn ḅụ mama ḅụọ fa ḅụọ-a tesi oyi fịnjị fịnjị, pịkị finji ḅụ mama ḅụọ fa ḅụọ-a mesi oyi fịnjị fịnjị nwọ lamẹ.

²³Ḍụparị warị agbagba ini nwọ nama gbọrịye gbọrịye kelemamẹ, ini pịkị fịnị-tọnọ-nyọ nama warị agbagba ma ḅụ kpechimẹ.

²⁴Tomoniḅọ ḅe nwọ ḍuko ị̀ pịrịmẹ na, “Ma yechụọ-a warịma ḅie anị, Oputẹkẹwarị ḅie fịrịnwẹngịapụma, ini tomonima ọkịḅo se ḍiepịrịaye agbamịẹḅịa namama chụọchụọḅịaye-ẹ.”