Read kirikeni Izikịẹl 47 Bible Online

Izikịẹl 47 - kirikeni bible

Izikịẹl 47

¹Tomoniḅọ ḅe ori ị̀ se pịkị Oputẹkẹwarị ḅọkọ mị damunmẹ. Ḅọkọ mị chuku ḅie mengi pakaḅo se ideri ịrụapakapaka nyọ da aḅẹ, Oputẹkẹwarị mị tọrụ se da nyọ mị. Anị Oputẹkẹwarị ḅụ chuku daọrụ ḅụ ideri mun agbamịẹ ẹbẹ mị ḅụ chuku daọrụ ḅụ ḅọrọmẹ.

²Tomoniḅọ ḅe ọ̀ pịkị ị̀ se ọgọnọju da onu ḅọkọ mị ḅụ wẹrị Oputẹkẹwarị nụngọ mị ḅie pakamẹ, se ori ị̀ se ịrụapakapaka nyọ da onu ḅọkọ mị kelema ḅọrọmẹ. Gbọrị kala ideri ḅu mengi onu ḅọkọ mị ḅụ chukuju da nyọ mị ḅụ pakaḅo aḅẹ.

³Ọ̀ ḅara sime yetọn chịn mị ọ̀ nwọse mengi mị ḅụ kuḅu-a mesi ofori kuḅu-a ẹndẹ oyiasi fịnjị nwọ tọn iderima ịrụapakapaka nyọ ọrụ mị damẹ se ori ị̀ ḅẹmẹ na à mun anịnyọ mengi mị ḅie nwẹngị-ẹ. Mengi mị, ị̀ ḅụọ-akpalakpala ma ḅụ mị anị laye-ẹ.

⁴Ọḅọkụ ọ̀ pịkị jịn kuḅu-a mesi ofori kuḅu-a ẹndẹ oyiasi fịnjị nwọ tọnmẹ, mengi mị, anị iwoḅo ị̀ ḅụọịkpụkụ ma lamẹ. Ọ̀ pịkị ideri mun jịn kuḅu-a mesi ofori kuḅu-a ẹndẹ oyiasi fịnjị nwọ tọnmẹ, mengi mị anị iwoḅo ị̀ konju ḅiri lamẹ.

⁵Ọ̀ pịkị jịn kuḅu-a mesi ofori kuḅu-a ẹndẹ oyiasi fịnjị nwọ tọnmẹ, anịnyọ ḅụ ideri mengi mị opuma gbunmẹ se àrị ine anịa ḅie nwẹngị ḅọrọkẹ. Anị opuma gbunmẹ, anịa ḅie nwẹngị saḅaḅọrọḅịa ọkụ ofori-ẹ oki ḅụ sakị sikima.

⁶Ọ̀ nwọse ị̀ ḅẹmẹ, “Tomoniḅọ tọkụ, iḅiọkụma ma ayema ḅụ elekima chụa.” Tomoniḅọ ḅe ọ̀ pịkị ị̀ se pịkịma tọrụ mị aka mun mẹ,

⁷se àrị anịnyọ lasịkị, àrị ọrịmẹ na tọrụ mị mama aka ma ḅụ eje ḅakamẹ.

⁸Ọ̀ nwọse ị̀ ḅẹmẹ, “Mị mengi mị, ịrụapakapaka nyọ da ama mị ḅie anị ideri ḅọrọ mun Jọdan Pẹsịkiri mị ḅie ḅọrọ mun Fị Oputọrụ Mengi mị lamẹ. Anị seri mun Fị Oputọrụ Mengi mị lasịkị, anị anị tọrụ mị ḅe ala-mengi mị ḍinma ḅu-mengi mịẹmẹ.

⁹Ḅu-mengi tọrụ mị seri mun lanyọ lanyọ ḅụ kịrịkịrị nama na kịrịkịrị inji na simeḅịa. Ḅu-mengi-tọrụ mị anị Fị Oputọrụ Mengi mị mịẹse anịḅo ḅu-mengi tọrụ sọḅịa, se anị seri mun lanyọ lanyọ ḅụ ḍumo simeḅịa.

¹⁰Ẹngẹdaị kiri ḅie pakaḅoarị mengi ma ḅụ ọkịmun Ẹneglaịm kiri ḅie pakaḅoarị mengi ma la, inji ḅaapụ tọrụ ma aka ḅụ simeḅịa, se ini pịkị anịnyọ inia ịgbọ ma finjima ịrụọ ịrụọḅịa. Anịnyọ tọrụ kịrịkịrị inji ḅakama simeḅịa, Mẹditirenia Ala-mengi Tọrụ mị ḅie tọrụ kịrịkịrị inji ḅakama sime ọkụ mị.

¹¹Ọkụma tọrụ mị aka ḅụ iboma na ḍapama na ḅie sime-a mengi ma re àrị ḅu-mengi sọ ẹkẹ. Àrị anịnyọ sime fụn mịẹ nyọ sọḅịa.

¹²Kiri ḅie pakaḅoarị mengi mị mama aka ma ḅụ chịn tọrụ kịrịkịrị sẹnị paka fịfịaye pakụmaḅịa. Arịa ịnyanya ma ngịsị àrị samịna fị ẹkẹ chịnmgbọlụ chụa ḅụ, ngịsị àrị pịkị kuluma ẹkẹ. Akalụ goyegoye àrị ịwọ chịnmgbọlụ chụaḅịa. Anịatịḅị Oputẹkẹwarị mị ḅie mengi ḅoḅo àrị lala aḅẹ. Chịn ma àrị fịfịaye chụaḅịa anịsịkị arịa ịnyanya ma ini se tomoni gwọgwọḅịa.”

¹³Kụrọmamgba Nyanaḅọ Ḅe nwọ ḅẹmẹ, “Ma anị ini ḍie oyimaịn furo fịnjịma pịrịḅịa kirima ḅe eke ma-ẹ. Josẹf furo mị anị mama nyọ ọkịḅịa.

¹⁴À kụrọma yeḅereni ọ́mịna ḅieju-aḍapụma pịrịmẹ na mị ama mị ḅie ini ọkị nyanaḅịa kiri à nwọse ini pịrịḅịa; mịọkụ, ọ́ gbasịma ọ́mịna ogboku àrị ḍia ọkị.

¹⁵“Ọgọnọ-ọrụ-da eke mị, anị ịrụapakapaka-nyọ-daọrụ ḅụ mun Mẹditirenia Ala-mengi tọrụ mị ḅọrọ mun Hẹtlọn opuama mị ḅọrọ mun Hamat Ḅọrọnyọ mị ḅụ mun Zedad opuama mị la,

¹⁶ḅọrọ mun Bẹrota na Sibraịm na la (àrị ma, Damaskọs amanyanakiri mị eke mị na Hamat amanyanakiri mị eke mị na ogboku àrị omi-ẹ,) ḅọrọ mun Tikọn opuama, (Hauran pẹkẹrẹ mị ḅu eke ma lamẹ.)

¹⁷Anịọkụma ọgọnọ-ọrụ-da eke mị, Mẹditirenia ḅụ ịrụapakapaka nyọ daọrụ ḅụ anị mun Inọn opuama mị lamẹ anị Damaskọs na Hamat na eke ma ọgọnọju daọrụ ḅụ.

¹⁸“Ịrụapakapaka nyọ daọrụ eke mị, Damaskọs na Hauran eke mị na ogboku ḅụ chuku daọrụ ḅụ, anị Jọdan Ideri mengi mị na, Izrẹl ama ḅụ ịrụasọsọ nyọ daọrụ mị na eke mịẹmẹ, Giledị ḅụ ịrụapakapaka nyọ daọrụ ḅụ ọkịmun Fị Oputọrụ Mengi mị ḅụ Tema mị lamẹ.

¹⁹“Chuku daọrụ eke mị, Tema ḅụ chuku daọrụ ḅụ anị mun Kedẹsh Mẹriba onwun ele mị ḅie piri na mengi na sime nyọ mị ḅụ mun Ijipt eke mị ḅọrọ mun Mẹditirenia Ala mengi tọrụ mị lamẹ.

²⁰“Ịrụasọsọ nyọ daọrụ eke mị, Mẹditirenia ḅụ anị sakị iwo ọgọnọ ọrụ da mun Hamat Ḅọrọ nyọ mị ḅụ ịrụasọsọ nyọ daọrụ ḅụ gbọrị pẹkẹrẹ lamẹ.

²¹“Ọ́ mị amakiri mị ḍia ọ́mịna furoma pịrị,

²²anị ọ́ mịnaye sọgbasoḅịa. Ọ́mịna ḅie anga jịn sẹ apụ, mịnyọ ḅụ awọmẹnị yisa apụma sọnị ini ḍiekiri nyanaḅịa, ó kiri mị ḍieḅịa sịkị. Jokoma Izrẹl ḅie apụ ḅara ọ́ nwọse ini na angaḅịa, ini sọnị ini Izrẹl furoma ḅụsọ kirima ḍieḅịa ịkịan wakịḅịa.

²³Jịn sẹḅọ goyegoye, ori angarị furo mị nyana ḍiekiri ḅụ mị ori oria ḍiekiri mị nyanaḅịaye-ẹ. Ị̀rị̀ Kụrọmamgba Nyanaḅọ Ḅe à ḍukosam.”