Read kirikeni Izikịẹl 48 Bible Online

Izikịẹl 48 - kirikeni bible

Izikịẹl 48

¹Kiri mị ḅụ ọgọnọ-ọrụ-da eke mị anị Mẹditirenia Ala mengi Tọrụ mị ḅụ, ịrụapakapaka nyọ daọrụ mị ḅụ, mun Hẹtlọn opuama mị na, Hamat Ḅọrọnyọ mị na, Inọn opuama mị na eke mị ḅụ ḅọrọ mun Damaskọs amanyanakiri na Hamat amanyanakiri mị na eke ma na lamẹ. Amakiri mị ḅụ, gbọrị sẹ gbọrị pẹkẹrẹ, gbọrị pẹkẹrẹ nwọ ọkịḅịa, anị pẹkẹrẹ mị, ịrụapakapaka nyọ daọrụ eke mị ḅụ wasama mun Mẹditirenia Ala mengi Tọrụ mị ḅụ ịrụasọsọ nyọ daọrụ eke mị laḅịa, mị ini ọrụtọnma àrị ḍiaḅịa ọkụ-ẹ, ọgọnọju ọkị iderimaḅo chukuju la: Danị Asha Naftalaị Manasẹ Ifrem Rubẹnị Juda

⁸Kiri mị ḅụ ísí pẹkẹrẹ mị ó sin sikimaḅịa anị nyana kịrị fịrị omi-ẹ. Finji ḅụ, anị oyi-a sonju laḅịa, ọgọnọju ọkịḅo chukuju la, pịkị anị gbọrị ḅara mị laḅịa, ịrụapakapaka nyọ ọkịḅo ịrụasọsọ la, ịsụn ḅụ, ini se sẹsẹ ma pịrị nyọma ḅara mị. Oputẹkẹwarị mị ma pẹkẹrẹ ma ogboku anị simeḅịa.

⁹Ma pẹkẹrẹ ma ogboku, ịsụn mị oyi-a sonju, finji mị nine-a sonju laḅịa kiri ini nwọ sikima osiḅụ-wẹrị Nyanaḅọ Ḅe pịrịḅịa.

¹⁰Agbamịẹapụma, mị osi-nyana-nyọ mị ḅụ, ini gbọrị nyọ nyanaḅịa. Ịrụapakapaka nyọ daọrụ ọkịmun ịrụasọsọ nyọ daọrụ la, inia nyọ mị tọnḅụ anị oyi-a sonju laḅịa pịkị ọgọnọ ọrụ da nyọ ọkịḅo chuku daọrụ la inein-a sonju laḅịa. Nyanaḅọ Ḅe oria Oputẹkẹwarị mị, mị okpokiriḅa mị ogboku anị simeḅịa.

¹¹Osiḅụ-simeḅịa okpokiriḅa mị, anị sime Zadọk furo ḅie ḅo agbamịẹapụma pịrịḅịa. Ini kuḅie-se-ḅụgbana gbẹịn apụ ḅara nwọse fịrịnwẹngị ị̀ pịrịmẹ, ini ísí Izrẹlapụma ḅụ sọ simịẹkẹ, ísí Livaị sẹ ḅie apụma mịẹọkụ mị.

¹²Anịẹrẹchị ini sosikima inia nyọ nyanaḅịa, anị sime Livaị apụma pịrị okpokiriḅa mị ḍukoma nyọ mị, anị osiḅụ-simetẹịnḅịa nyọ mamgba ḅụ.

¹³Livaị apụma sọ inia okpokiriḅa ini sosikima nwọ nyanaḅịa, anị agbamịẹapụma nyọ mị ḅụ chuku daọrụ mị. Anị sọnị ịrụapakapaka nyọ daọrụ ḅụ ọkịḅo ịrụasọsọ nyọ daọrụ la, oyi-a sonju laḅịa, pịkị ọgọnọju ọkịḅo chukuju la inein-a sonju laḅịa.

¹⁴Ini se osiḅụ-wẹrị Nyanaḅọ Ḅe pịrị okpokiriḅa mị, anị nyọ mị mgba ḅụ iḅitẹịn kiri mị-ẹ, ini pịkị anị se gbọrịḅọ sọ dẹrị ẹkẹ anịkanịka ini anị se jịnye na ḍinma ẹkẹ ini pịkị anị saḅaḅọrọma jụmḅọ pịrị ẹkẹ. Anị osiḅụ omi-ẹ, anị sime Nyanaḅọ Ḅe pịrịmẹ.

¹⁵Ini sosikima sin sikima okpokiriḅa mị ḅụ kọn nyọ mị, ịsụn ḅụ oyi-a sonju, finji mị mama sonju lamẹ, anị osiḅụ-ofori-ẹ, ọkụma anị sime tomoni mamgba pịrịḅịa. Ini ine anịnyọ angaḅịa, se kiri mị se fịrị ḅụ chuḅịa. Opuama mị ogboku anị simeḅịa,

¹⁶gbasịa-gbasịa ḅe inein-a ịkọlị anị nwọ nyanaḅịa, anịa ịsụn na finji na, ịkọlị ịkọlị ma ḅụ, gbọrị ịkọlị kuḅu-a sonio ẹndẹ sọnọasi fịnjị na si kuḅu, gbọrị ịkọlị kuḅu-a sonio ẹndẹ sọnọasi fịnjị na si kuḅu anị nwọ laḅịa.

¹⁷Opuama mị mgba kanakoro ịkọlị ḅụ, kuḅu-a sọnọmasi, kuḅu-a sọnọmasi ḅe ḅele nyọ simeḅịa.

¹⁸Opuama mị ini nwọ nama chịẹma sosịkị, osiḅụ sime nyọ mị ḅụ chuku daọrụ mị na kpekitẹịn kọn kiri mị—ịrụapakapaka nyọ daọrụ ḅụ ịsụn mị inein-a sonju, finji mị mama sonju, pịkị ịrụasọsọ nyọ daọrụ ḅụ ịsụn mị inein-a sonju, finji mị mama sonju, anị ozu ḍipi kiri sọ opuama mị ḅie angaḅịa apụma pịrịḅịa.

¹⁹Opuama mị ḅie angaḅọ goyegoye, ò ḅo sẹ, ḅo sẹ abalaka, ori ine anị kiri mị ḅie yeḍipiḅịa.

²⁰Anịọkụma ini sin sikima okpokiriḅa mị ogboku mị mgba gbasịḅịa anga anga ḅụ, gbọrị anga oyi-a sonju oyi-a sonju anị tọnḅụ anị laḅịaye-ẹ. Opuama mị simeḅịa kiri mị sọnị anịa ḅie omi-ẹ.

²¹Oputẹkẹwarị mị sime kiri mị na, agbamịẹapụ kiri mị na, pịkị Livaị apụ kiri mị na pịkị opuama mị na ḅụ ịrụapakapaka nyọ daọrụ na ịrụasọsọ nyọ daọrụ na ḅụ kọn kiri mị, anị sime ḅẹrẹtọn àrị amanyanaḅọ ḅe pịrịmẹ. Ịrụapakapaka nyọ daọrụ ḅụ anị sakị mun ịrụapakapaka nyọ daọrụ eke mị lamẹ, anị pịkị ịrụasọsọ nyọ daọrụ ḅụ mun Mẹditirenia Ala mengi Tọrụ mị lamẹ, anịsịkị ọgọnọ da nyọ ọrụ mị ḅụ, sime Juda mị pịrị nyọ mị anị na eke nyanamẹ. Chuku ọrụ da nyọ mị ḅụ, sime Bẹnjamin ḅe pịrị nyọ mị pịkị anị na eke nyanamẹ.

²³Mị kiri ḅụ, chuku ọrụ da kirima, kirikọn sẹma, gbọrị sẹ, gbọrị sẹ, kiri mị ḅụ gbọrị pẹkẹrẹ, gbọrị pẹkẹrẹ nwọ ọkịḅịa. Kiri mị, ịrụapakapaka nyọ daọrụ mị ḅụ anị sakị mun Mẹditirenia Ala mengi Tọrụ mị ḅụ ịrụasọsọ nyọ daọrụ eke mị laḅịa. Ọgọnọju ọkịḅo chukuju la, mị ini ọrụtọnma sẹsẹ ḅụ kiri mị ḍieḅịa ọkụ-ẹ: Bẹnjamin Simiọnị Ịsaka Zẹbụlọnị Gadị

²⁸Ini se Gadị sẹ mị pịrị pẹkẹrẹ mị ḅụ chuku ọrụ da nyọ mị; eke mị, Tema ḅụ chuku daọrụ na ịrụasọsọ nyọ daọrụ mị na ḅụ, anị sakị Kedẹsh piri ele ḅie mengi na piri na sime nyọ mị lamẹ, anị pịkị Ijipt eke mị ḅụ ọgọnọ daọrụ na ịrụasọsọ nyọ daọrụ na ḅụ mun Mẹditirenia Ala mengi Tọrụ mị lamẹ.

²⁹Kụrọmamgba Nyanaḅọ Ḅe nwọ ḅẹmẹ, “Anị ḅara mị ḅụ anị ini kiri mị ḍie se Izrẹl sẹ mị ḅie ịkpangị ịkpangị ma pịrị se ini ama mị nyanaḅịa ọkụ-ẹ.”

³⁰Mun Jerusalẹm ḅie sọḅịa oyimaịn ḅọkọ fịnjị omi-ẹ, ma inein-a onu ma, gbọrịye gbọrịye tọnḅụ laye, kuḅu-a sonio ẹndẹ sọnọasi fịnjị na si kuḅu, si kuḅu-ẹ, àrị pịkị tẹrẹ-a onu ḅọkọ, tẹrẹ-a onu ḅọkọ nwọ nyanamẹ, gbọrị onu ḅọkọ, gbọrị sẹ ẹrẹ, gbọrị onu ḅọkọ gbọrị sẹ ẹrẹ ini nwọse onu ḅọkọ ma chịnmẹ. Ọgọnọju da onu mị ḅe tẹrẹ-a ḅọkọ ma ini nwọse àrị chịnmẹ, Rubẹnị, Juda pịkị Livaị na; ịrụapakapaka nyọ da onu mị ḅe ḅọkọ ma Josẹf, Bẹnjamin pịkị Danị na; chukuju da onu mị ḅe onu ḅọkọ ma, Simiọnị, Ịsaka pịkị Zẹbụlọnị na; anịsịkị ịrụasọsọ nyọ da onu mị ḅe ḅọkọ ma, Gadị, Asha pịkị Naftalaị na.

³⁵Opuama mị kelema onu mị, anịa inein agbagba mamgba tọnḅụ, ịsụn ḅụ kuḅu gbọrị poku sọnọ ẹndẹ fịnjị na kuḅu iniasi, anị nwọ lamẹ. Mịọkụ ḅụ sakị mun, opuama mị anị ẹrẹ “Nyanaḅọ Ḅe Mịnyọ Ori Omi-ẹ!”