Read kirikeni Izikịẹl 5 Bible Online

Izikịẹl 5 - kirikeni bible

Izikịẹl 5

¹Nyanaḅọ Ḅe nwọse ị̀ ḅẹmẹ, “Tomoniḅọ tọkụ, iḅiọkụma oḅu okola-agiji nwọ ọkị se ị́ ḅapuko ọgụrẹ ma na ị́ tịḅị inime ma na sẹịn sin. Inime ma se yetọnye ọgọnọ tọn se anị se tẹrẹ-a kiri nwọ ḍie.

²Gbọrị kiri nwọ dọkịma ama mị ḅie owunima ama mị gbẹịnmachịẹḅịa enema kara sịkị. Nwẹngị ama mị kelema se ị́ya okola-agiji mị se gbọrị kiri nwọ kịrị sara kelema. Kọn gbọrị kiri mị anị galagalama fọrụ ḅie, anịsịkị àrị ị̀ya okola-agiji mị sin anị ḍukoḅịa.

³Inime ma ḅụ kalaye nwọ ọlọ ị́ ḅara ḅie se anị se ị́ya ḅịtẹ ḅịpịḅọkọ ḅụ kpọ.

⁴Pịkịna kalaye tọkụ nwọ ọkị se fịnị ḅie gbin, se anị wẹrịso anị dọkịfama. Anịa ḅụ fịnị wasama mun Izrẹl sẹ mị mgba laḅịa.”

⁵Mịn Kụrọmamgba Nyana Tamụnọ Ḅe ḍuko ọkụ-ẹ: “Jerusalẹm mị ḍiki; àrị anị se tomonikiri mị mgba ogboku ḅụ koromamẹ, se jịn-a sẹma se anị kelemamẹ.

⁶Ọkụma Jerusalẹm mị ị̀ ḅịpị poki ḍụkụkẹ, pịkịna ḍiepakụmamẹ na inia tịḅịḅie kụrọtẹịn ísí-a sẹ mamgba nẹngịmẹ, pịkị sitịḅị nyanatẹịn ísí-a sẹ mamgba nẹngịmẹ. Jerusalẹm mị ị̀ya olokoma sịkịmẹ, pịkịna àrị koko ḍụkụkẹ.

⁷Mịọkụ poki, Jerusalẹm, Ị̀rị̀, Kụrọmamgba Nyana Tamụnọ Ḅe ḍukoarịye ma. Ị̀ya olokoma kokoka mị ḅụ ị́ siye mịẹtẹịn ị́ kelema sẹ mamgba nwọ nẹngịsam. Jịn-a sẹ ama anganga ḅara ị́ nwọ ḍuko nwẹngịsam.

⁸Anịẹrẹchị Ị̀rị̀, Kụrọmamgba Nyana Tamụnọ Ḅe nwọse ị́ ḅe aḅẹ na ị̀rị̀ ị́rị́ na tarakaḅọ-ẹ. À ḅẹrẹkọn ị́ya ọgọnọ gbanaḅịa jịn-a sẹ mamgba ọrịḅịa ḅara.

⁹Ị́ mịẹsa ḅụgbẹịnka ayema gose, jịnsịkị ma à pịrịka ḅụfụka à nwọse ị́ pịrịḅịa, anịsịkị à ḅarị pịkị ọkọsime ḅụfụka pịrị ẹkẹ.

¹⁰Anịḅo mịẹḅịa, awọyiapụ inia awọma pẹịḅịa Jerusalẹm mị ḅie; awọmẹnị pịkịna ini yiapụ ma pẹịḅịa. À fomuḅara se ị́ pịrịḅịa, pịkịna ị́ ḅie fịka se kọnḅịa apụma kụrọ fọrụ se ini galagalamaḅịa.

¹¹“Anịẹrẹchị, à nwọ ḍumo gbamaso warasịkị, mịn anị Kụrọmamgba Nyana Tamụnọ Ḅe ọkwẹịn mịẹ, kọkọmaye ḍukoḅụ, ómine ị̀ya Oputẹkẹwarị mị pụlamasam, ọ́mịna si mịẹmịẹaye ḅụ na, kuraka mịẹmịẹaye nwọ mịẹḅụ. Àrị ọ́ pẹlẹgbinḅịa ḍikiḅụgerere nyanaka ḅaraḅụ.

¹²Ómine se tẹrẹ-a kiri ḍie ḅe gbọrị kiri obi ḅụ na ḅuruḅaa ḅụ na ḅọrọ fịḅịa, opuama mị ḅie; gbọrị kiri okola-agiji ḅụ ḅọrọ fịḅịa, ómine na kpeki nyọ ḅụ; kọn gbọrị kiri mị àrị anị galagalamaḅịa kụrọ fọrụ ḅie, à pịkịna okola-agiji se ini ḍukoḅịa.

¹³“Anịḅara anị ị̀ya kụrọ ịganị na yeḅụosọ na ọ́mịna ḅụ ọyịḅịa ọkụ-ẹ ọkịmun anị ị̀ tansịkị laḅịa. Ma aye mamgba ọ́mịna ḅụ paka sịkị, anị anị ọ́mịna ḅụokoroḅịaye-ẹ na Ị̀rị̀, Nyanaḅọ Ḅe, ọkwẹịn ọ́ pịrịsam ḍiki pụkọ soli ḅụ, àrị ị̀ya ịganị mị se ọ́mịna ọgọnọ sara so sịkị!

¹⁴Ómine kelema sẹma ḅie, ọ́mịna nyọ ḅụ ḅọrọḅọ goyegoye pụa ọkwẹịn kọn se ḅụ sikima ḅọrọḅịa.

¹⁵“Ị̀ya yeḅụosọ na ịganị na ḅụ à fomuḅara se ọ́ pịrịḅịa sịkị, ó kelema sẹ mamgba ḅalafa nyanaḅịa, anị ḅalafamaye na ḅerijineye na sọ ó kelema sẹ mamgba pịrịḅịa. Ini ó ḍikisimaḅịa, pịkịna ómine okomboḅịa.

¹⁶Ọ́mịna fịye nyanaḅo-a ḅọkọ mamgba à dachịẹma se ḅuru se ọ́ ḅaamaḅịa. Ḅuru pụkọtarị mị, lubu ḍẹịn tomoniḅọ oju ḅie ọyị ọkụ anị nwọ ọyịḅịa ọ́mịna ḅụ.

¹⁷Ḅuru pụkọtarị na si-a nama na à nwọ fịrịma se ọ́mịna awọma ḅaa famaḅịa, à pịkịna obi na, kụrọaye na, ọmụ na se ọ́ fịrịma se ọ́ ḅaasinḅịa. Ị̀rị̀, Nyanaḅọ Ḅe, anị mịn ọkwẹịn mị kọnye-ẹ.”