Read kirikeni Izikịẹl 6 Bible Online

Izikịẹl 6 - kirikeni bible

Izikịẹl 6

¹Nyanaḅọ Ḅe nwọse ị̀ ḅẹmẹ.

²“Tomoniḅọ tọkụ,” ọ̀ nwọ ḅẹmẹ, “tọrụ dekichịẹma Izrẹl tụndụma ḍiki, se ị̀ya oku mị ḍuko Izrẹlapụma pịrị.

³Ḍuko Izrẹl tụndụma pịrị na àrị Nyanaḅọ Ḅe ọkwẹịn ma naa! Ị̀rị̀ Kụrọmamgba Nyana Tamụnọ Ḅe ḍukoarịye ma poki. À ḍuko tụndụma na chịngịma na ideri mengi ma na, pịkị pẹsị-a kirima na pịrịaḅẹ, na àrị okola-agiji se ini ḅara se kara oru ma tẹkẹ àrị nyọ goyegoye nwọ sẹịn se àrị kanḅịa.

⁴Agbamịẹ ẹbẹ ma à àrị kangbinḅịa pịkịna insẹnsị ẹbẹ ma na. Tomoni mamgba fịḅịa, ọ́ ḅara se kara oru ma tọrọkọ.

⁵Izrẹlapụma inia fịsa ojuma à nwọ galagalamaḅịa; àrị inia ịmgbema galagalamaḅịa inia agbamịẹ ẹbẹ ma tọrọkọ.

⁶Izrẹlapụ opuama mamgba à àrị kangbinḅịa, à pịkịna ọ́mịna agbamịẹ ẹbẹ ma na ọ́ ḅarase kara oru ma na kankọsịmaḅịa, ọ́mịna insẹnsị ẹbẹ mamgba à kọsịḅịa, pịkị ọ́mịna ḅara fịrị goyegoye mamgba famaḅịa.

⁷Ini tomoni ḅaaḅịa nyọ mamgba ḅụ, anịsịkị fị kọnma apụma ḅereniḅịa na Ị̀rị̀ anị Nyanaḅọ Ḅe-ẹ.

⁸“À mịẹḅịa ọ́mịna ḅie dapụ fị ḅara ḅie pakaḅoḅịa, se jịn-a sẹma ḅie galagalaḅịa,

⁹se ini kụrọḅara se ini desin apụ amama ḅie angaḅịa. Anịsịkị anịanga ini ị̀ se ḅiekoromaḅịa se nemiḅịa na ị̀rị̀ anị fomuḅara se ini pịrị pịkị inia ḅụgereremaye anịatịḅị inia ḅereni nyanaka kuḅie ma ḅụ ini ị̀ wẹrịso se inia oru ma damamunsam. Anịsịkị ini inia ḅụ ma ḍikiḅụnwọnwọḅịa ini mịẹ siaye ma na ini iniaḅụ da iderima ayema na gose.

¹⁰Anịsịkị ini nemiḅịa na Ị̀rị̀ anị Nyanaḅọ Ḅe-ẹ, na ị̀ya ḅerijine ọkwẹịn ma papaye kẹ.”

¹¹Kụrọmamgba Nyana Tamụnọ Ḅe nwọ ḅẹmẹ, “Ị́ ḅarama farị, pịkị ị́ ḅụọma se kiri gbolo! Kururu ḅụ owu, Izrẹlapụma mịẹ ḅụgbẹịnka ayema gose, anịatịḅị ini mun fị-ẹmuaḅẹ ọmụ ḅie, na ḅuruḅaa ḅụ na, pịkịna obi ḅụ.

¹²Ḅọlọju ḅụ simeapụma obi ini la se ini fịḅịa; kpekima simeapụma ọmụ ḅie ini fịḅịa, ḍumo apụma ḅuruḅaa ḅie ḅọrọ fịḅịa, anị ị̀ya ịganị mị ḅe kụrọ inia oju ọyịmaḅịa ọkụ-ẹ.

¹³Fịapụ oju akpakpa nyọ mamgba ḅụ, oru ẹbẹ ma sime anga sime anga, na agbamịẹ ẹbẹ ma sime anga ma na, tụndụma ọgọnọ na, chịngịma ọgọnọ na, ḍumoḅụ sime eje-a chuku ma ḅụ na, kụrọ ejema chuku ḅụ na, ini insẹnsị agbamịẹ ini oru ma pịrịpịrị-a nyọ goyegoye mamgba ḅụ simeḅịa.

¹⁴Iin, àrị ị̀ ḅara sụma se inia sẹ mị kangbinḅịa. Àrị anị se papa ḅụ sinḅịa, pịkị yeḅụ oforika nyọ mịẹḅịa, chukuju onwun ele mị ḅụ ọkịmun ọgọnọju Ribla ama mị la, Izrẹlapụ anga nyọ goyegoye mamgba ḅụ à ḅara se lama ẹka nyọ ofori-ẹ. Anịsịkị, nweni mamgba nemiḅịa na Ị̀rị̀ anị Nyanaḅọ Ḅe-ẹ.”