Read kirikeni Izikịẹl 7 Bible Online

Izikịẹl 7 - kirikeni bible

Izikịẹl 7

¹Nyanaḅọ Ḅe nwọse ị̀ ḅẹmẹ.

²“Tomoniḅọ tọkụ,” ọ̀ nwọ ḅẹmẹ, “mịn anị Ị̀rị̀, Kụrọmamgba Nyana Tamụnọ Ḅe, ḍuko se Izrẹl sẹ mị pịrịarịye-ẹ: Mịn anị sẹ mị mgba ḅe kuluma mị-ẹ!

³“Izrẹl, kuluma mị lasam. Ị̀ya ịganị mị ọ́ ḅụ ọyịḅịa, anịatịḅị ọ́ mịẹarị siaye ma gose à ḅẹrẹpẹlẹ ọ́ pịrị-ẹmun-aḅẹ. Ọ́ mịẹ ḅụgbẹịnka ayema arịa gbẹịnye à nwọse ómine gbẹịnḅịa.

⁴Àrị ó ḍikitịḅịfoin ẹkẹ, à pịkị ó ḍikiḅụgerere ẹkẹ. Ọ́mịna ḅụgbẹịnka mịẹmịẹaye ma gose à fomuḅara se ọ́ pịrịḅịa, mịẹse ó nemi na Ị̀rị̀ anị Nyanaḅọ Ḅe-ẹ.”

⁵Mịn anị Kụrọmamgba Nyana Tamụnọ Ḅe ḍukoarịye-ẹ, “Gbọrị tọrụsiọrị ḅọrọ, jịnye ḅo ọ́ laḅịa.

⁶Ḍiki, anị ḅosam. Mịn anị kuluma mị-ẹ. Ọ́ fasam.

⁷Kuluma mị anị ḅo ómine ama mị ḅie anga apụma la-ẹḅoaḅẹ. Ọ́ ḅarị tụndụma ọgọnọ sime oru-a warịma ḅie ḅieḅẹlẹ alalịfị ẹka sịkị lasam, ḅịpịogbosọka kẹngẹ-ẹ.

⁸“Ḅọlọka sịkịḅụ ị̀ya ịganị mị anịa kụrọ ọ́mịna ḅụ ọyịḅịa. À ḅẹrẹkọn ọ́ pịrịḅịa ọ́ mịẹsa ḅụgbẹịnka ayema gose, à pịkị ọ́ mịẹ ḅụgbẹịnka ayema gose gbẹịnye se ọ́ pịrịḅịa.

⁹Àrị ó ḍikitịḅịfoin ẹkẹ, à pịkịna ḍikiḅụgerere nyana ọ́ pịrị ẹkẹ. Ọ́ mịẹsa ḅụgbẹịnka ayema ḅe fomuḅara à nwọse ọ́ pịrịḅịa, mịẹso sịkị ó nemiḅịa ọkụ na, Ị̀rị̀ anị Nyanaḅọ Ḅe-ẹ, na à fomuḅara seni nweni pịrịpịrịmẹ.”

¹⁰Ḍiki ḅụfụka ene ḅo Izrẹlapụma la-ẹḅoaḅẹ. Si ḅẹrẹkọn na opuayemịẹ na, opuma ḅakasam.

¹¹Kụrọḅara se yesima mị anị sẹnị ḅo ḅụọ kụrọ ikulele sọsam; iniaḅụ kọnḅịa gbọrịḅọ sọnị ofori-ẹ, inia ngọma na inia iḅi ma na, anịkanịka inia opuma ḅụ gbọrịye sọ kọn ẹkẹ.

¹²Sịkị mị ḅoaḅẹ, ene mị ḅo kpekisam. Ye fẹ apụ na ye dẹrị apụ na ḅo gbọrị ḅara simeḅịa. Anịatịḅị, Tamụnọ Ḅe oria fomuḅara nweni mamgba nwọ laḅịa.

¹³Anịatịḅị ye dẹrịḅọ ḅe ọ̀ ḅarị ineda ḍumo ḅụ mun ọ̀ dẹrịye mị nyanaḅo ḅịa nyọ nyana ẹkẹ. Anịatịḅị Tamụnọ Ḅe oria ịganị nweni mamgba ọgọnọ ḅụ gbanaḅịa, anị vinpịkị nyana ẹkẹ; simịẹmịẹye gose nweni mamgba fịfamaḅịa.

¹⁴Oḍu mị anị fiesam, seni nweni mamgba ḅụkarakaramasam; ọkụma gbọrịḅọ sọnị paka owu mị mun ẹkẹ, anịatịḅị Tamụnọ ịganị nweni mamgba ọgọnọ gbanaḅịa.

¹⁵Ateli ma ḅie ini owusọ aḅẹ, anịsịkị, warịma ḅie obi na ḅuruḅaa na omi-ẹ; ele ogbo simeḅọ goyegoye iniḅọ fịḅịa owu mị ḅie. Anịsịkị sẹ mị ḅie mangịsokase simeḅọ goyegoye obi na ḅuruḅaa na iniḅọ ḅaaḅịa.

¹⁶Tọn apụ mangị mun tụndụma ọgọnọ ḅọịḅịa, okuku pẹsị-a kirima ḍikiḅalafa se mangị mun ḅụkikima ọkụ mị. Inimgba inia siamịẹmịẹye ma gose kururuḅịa.

¹⁷Nweni mamgba ḅarama ḅarị ịnyọ nyana ẹkẹ. Inia ḅụọ ịkpụkụ sọnị geregereḅịa.

¹⁸Ini ḍụẹịn-ḍin-aye ḅiriḅịa, ḅụgeregere ini gbẹịnḅịa, ini inia tịḅị ma sẹịnḅịa se ḅụgerere inia tọrụ sọḅịa.

¹⁹Ini inia goli ma na seleḅa ma na nwọse ateli ogboku gbin wokumaḅịa, ọfịn aye wokuma ọkụ; anịatịḅị seleḅa anịkanịka goli ineda ini ḍụa ẹkẹ, Nyanaḅọ Ḅe oria ịganị ene mị ḅụ; àrị ine ini kara ẹkẹ pịkịna inia ḅụlọ ḅeinma ẹkẹ. Anịatịḅị goli na seleḅa na anị ini telima mun siamịẹmịẹye ma ḅie chuye-ẹ.

²⁰Gbọrị sịkị ḅụ ini ḅụdekichịẹmamẹ ini nyana iḅi yela ḍụparịma gose, ọkụma ini àrị se oru nwọ tẹmẹmẹ; anịgose Nyanaḅọ Ḅe inia ngọma se ḅụrụ aye mịẹ ini pịrịḅịa.

²¹“À mịẹḅịa jịn sẹ apụ kụrọ ḅara se ini nyana ayema ọkịsoḅịa,” Nyanaḅọ Ḅe nwọ ḅẹmẹ, “anịsịkị oloko kan apụ ḅo inia ngọma guluguluma pịkị àrị pụlamaḅịa.

²²À ḅifie ẹkẹ, ini kụrọḅụọ se ị̀ya yela Oputẹkẹwarị mị ḅie sọ se anị pụlamaḅịa sịkị; furu apụ anị kan se ḅie sọmun anị guluguluma pịkị anị pụlamaḅịa.

²³“Yemamgba gulugulumẹ, ama mị ḅie nweni ḅaapụ na kụrọḅara se ye simapụ na ḅeinmẹ.

²⁴Sitẹịn-a sẹ à nwọ ọkịḅo mịanga koromaḅịa se ini ọ́mịna warịma ḅie angaḅịa. Ọ́mịna ḅie kụrọtẹịn apụma ini ḅarị kụrọ ẹkẹ, à ḅereni arịa sẹma pịrị se iniḅo ọ́mịna tẹkẹ-a nyọma pụlamaḅịa sịkị.

²⁵Ḅụfụka ḅo ḅịa sịkị, ó deinma ḍọkịḅịa, ọkụma ómine ọrị ẹkẹ.

²⁶Gbọrị opu ḅụfụka jịn ḅụfụka ḍukomaḅoḅịa, anịsịkị si oku si oku ḍukomaḅoḅịa. Ómine ịkịankoroapụma ḅẹḅịa, na ini ọrịye ini nwọ ḍuko ọ́ pịrị. Agbamịẹ apụma sọnị ini se tomoni ḍieḅịa ye ofori-ẹ, sẹnịapụma sọnị pịrịḅịa tetema ọkwẹịn ḅarị sime ẹkẹ.

²⁷Amanyanaḅọ ḅe ò kururuḅịa, amanyanaḅọ tatarị tọkụ ḅe ọ̀ ḅarị tọrụseḍikiḅịaye nwọ nyana ẹkẹ, tomonima ḅarama geregereḅịa ḅalafa gose. À ḅụfụka se ọ́ pịrịḅịa, ọ́ mịẹsa aye mamgba gose, à pịkị ḅẹrẹkọn ọ́ pịrịḅịa, ọ́ wẹrị ḅẹrẹkọn jịn apụ pịrị ọkụ, mịẹse ó nemiḅịa ọkụ na Ị̀rị̀ anị Nyanaḅọ Ḅe-ẹ.”