Read kirikeni Izikịẹl 9 Bible Online

Izikịẹl 9 - kirikeni bible

Izikịẹl 9

¹Anịsịkị Tamụnọ Ḅe oloku se à naamẹ, “Ọ́ mịanga ḅo, ómine mun ḅụfụka se opuama mị pịrị-ẹmun owuapụma. Ọ́mịna owuniayema ó se chụa ḅo.”

²Anịgbọrị kirikiri sonio-a owuapụ Oputẹkẹwarị mị ḅụ ọgọnọju daọrụ, onu ḅọkọ mị ḅụ wẹrịḅomẹ, inia ḅie gbọrịḅọ gbọrịḅọ owuniaye dekimẹ. Inia ḅie gbọrịḅọ sịnịnị lọkọ ḅịtẹ ḅiriaye nwọ ḅirimẹ, ò se ye gịẹịnḅịaye ọ̀ nwọ dekimẹ. Inimgba alapẹlẹka ikulele agbamịẹ ẹbẹ mị angasịkị iniḅo chịẹmẹ.

³Anịsịkị Izrẹl Tamụnọ Ḅe oria boma mị ini tẹmẹ koroma enjẹlapụma ḅụ wẹrịso se iwo Oputẹkẹwarị mị ḅọkọ mun mẹ. Nyanaḅọ Ḅe nwọse sịnịnị lọkọ-ḅịtẹ ọḍọ kọnḅọ ḅe ḅẹmẹ,

⁴“Nwẹngị bebe Jerusalẹm opuama mị kelema, se opuama mị ḅie ini mịẹarị ḅụgbẹịnka ayema ḅụḅẹlẹkaḅọ pịkị ngịrị arịḅọ goyegoye iniḅọ fụḅara ogbo elekima chụa.”

⁵À naamẹ Tamụnọ Ḅe nwọse ísíapụ ma ḅẹmẹ, “Ómine ò ḍukonwẹngị opuama mị kelema se sakị nweni ma ḅaa. Gbọrịḅọ sọ ọ́ kọnmama; ọ́ pịkị ḍikiḅụgerere nyana gbọrịḅọ sọ pịrịma.

⁶Olomuapụ sọ ọ́ ḅaa, asẹmẹnị sọ ọ́ ḅaa, iremeni sọ ọ́ ḅaa, nyengiapụ sọ ọ́ ḅaa, pịkị awọmẹnị na. Ọkụma elekima fụḅara ogbo ḅụ simeḅọ goyegoye ọ́ ḅara se iniḅọ lamama. Mịanga ị̀ya Oputẹkẹwarị mị ḅie ọ́ sakị.” Anị ini Oputẹkẹwarị mị angasịkị chịẹsime tịḅịnịma ḅụ sakịye-ẹ.

⁷Tamụnọ Ḅe nwọse ini ḅẹmẹ, “Ómine Oputẹkẹwarị mị pụlama. Fịsa apụ oju ọ́ nwọse odo mị ḅeinma. Ọ́ fịrị sakị!” Anị ini sakị opuama mị ḅie nweni ma ḅaaye-ẹ.

⁸Ini nweni ma ḅaama mun-arị sịkị, ị̀rị̀ ma ngẹrị anị anịanga omiye-ẹ. Àrị ị̀ tọrụ se kiri iḅo se olokumẹ, “Yei Kụrọmamgba Nyana Tamụnọ, Jerusalẹm mị ị́ ịganịmaye gose ị́ Izrẹl ḅie simeḅọ goyegoye ḅaafama ḅe?”

⁹Tamụnọ Ḅe ị̀ pẹkẹrẹmẹ, “Izrẹlapụma na Juda apụma na, ḅẹrẹkọn inia ḅarasimaḅịa opuma ḅaka siaye ini nwọ mịẹmẹ. Ama mị ḅie ini opuma pulo ọsụn sam, si mịẹmịẹye pịkị sẹ mị ḅie ḅeinmẹ. Anịsịkị ini nwọ ḅẹmẹ, na Ị̀rị̀, Nyanaḅọ Ḅe àrị inia sẹ mị se sarakoromasam, à pịkị ini mịẹarịye ma ọrịkẹ.

¹⁰Anịẹrẹchị à ḍikitịḅịfoin nyana ini pịrị ẹkẹ; ini mịẹaye ma ḅe gbẹịnye à nwọse ini pịrịḅịa.”

¹¹Anịeso, sịnịnị lọkọ ḅịtẹ ḅiriaye ma ḅiriḅọ ḅe pịkịmaso Nyanaḅọ Ḅe damamun se nwọse ọ̀ ḅẹmẹ, “Ị́ se ị̀ fịrịma na nwẹngị-ẹ nwọḅẹ fịrị mị à nwẹngịsosam.”