Read kirikeni Danịẹl 12 Bible Online

Danịẹl 12 - kirikeni bible

Danịẹl 12

¹Lọkọ ḅịtẹ ḅiriaye ma ḅiri enjẹlḅọ ḅe nwọ ḅẹmẹ, “Kuluma sịkị ḅụ opu enjẹlḅọ Maịkịẹl, ị́ya tomonima ḍikiḍikiarịḅọ ḅe, ọ̀ pakaḅoḅịa. Anịsịkị ḅụfụka simeḅịa, sitẹịn ḅụfụka, sẹsẹ ma paka sịkị ngịsị ma pakaka ḅụfụka. Anịsịkị mị ḅo laḅịa sịkị, ị́ya sẹ mị ḅie apụ mamgba ẹrẹ Tamụnọ ḍiri ḅie gịẹịn apụ ini ḍụaḅọrọma nyanaḅịa.

²Fị ḅọrọsa apụma ḅụ tọn apụ pịkị fị ḅụ sịsẹḅịa; dapụ ḅene-ḅene ḍumo nwọ nyanaḅịa, pịkị dapụ ḅene-ḅene ḅụgerere tọrụsiọrị nwọ nyanaḅịa.

³Yenemi tịḅịnịma, ini so mị ḅịa ọkụ ḅịa ḅịa. Se karakaraye se tomoni ḍie apụma ini lolia ma ḅịa ọkụ ḅịa gbasoḅịa.”

⁴Ọ̀ nwọse ị̀ ḅẹmẹ, “Mịọkụ, Danịẹl, ḍiri mị gbẹịn se ye oḅoloye se ḍiri mị oḅolo pịanị ọkịmun sẹkiri mị ḅe kuluma mị la. Tọn apụ nwẹngị na koronaḅịa anịsịkị nemi mị ḅakaḅịa.”

⁵Anịsịkị, gbọrị tọrụ aka ḅụ chịẹ mama owuapụ à nwọ ọrịmẹ, gbọrịḅọ gbọrị aka gbọrị aka ḅụ.

⁶Inia ḅie gbọrịḅọ nwọse tọrụ mị ọgọnọju chịẹ enjẹlḅọ ḅe gbelamẹ, “Anị ọkịmun nde sịkị lase, ma ḅalafamaye ma ḅo kulumaḅe?”

⁷Enjẹlḅọ ḅe oria mama ḅarama deki so da se, Ḍumogbaso Tamụnọ Ḅe ẹrẹ ḅụ kuḅie laḅaraḅụ yeḅerenimẹ. Àrị ọ̀ naamẹ, ọ̀ nwọ ḅẹmẹ na, “Anị tẹrẹ-a kụra na pẹkẹrẹ laḅịa. Ḅụọchụa Tamụnọ-a tomonima pịrịarịye ma kulumaḅịa sịkị maye mamgba pakaḅọrọsam.”

⁸Ò ḍuko ye mị à naamẹ, ọkụma, àrị ineda anị kaịnḅokẹ. Anị à ḅo gbelaye-ẹ, “Ọkụma, ị̀ nyanaḅọ, nde arịmgba ḅo kulumaḅịa ọkụ?”

⁹Ọ̀ nwọ pẹkẹrẹmẹ, “Mịọkụ ị́ soḅịa, Danịẹl, anịatịḅị ma ọkwẹịn ma ini àrị ḅọị koromaḅịa ọkịmun kuluma mị ḅoḅịa sịkị la.

¹⁰Tọn apụ ini nwọ mịẹfịafịamaḅịa, sitịḅịnyanapụma ini kaịnḅo ẹkẹ, ọkụma ini pa sitịḅị nyanama munḅịa; yenemi apụma kẹngẹ anị kaịnḅoḅịaye-ẹ.

¹¹“Ini ḅarị eneḅeneḅene agbama mịẹka sịkị, anị anị Ḅalafama Siye mị sịkị mị-ẹ, ḍin-a tẹrẹ ẹndẹ iniasi oyi fịnjị ḅọrọḅịa.

¹²Ḅieḅẹlẹ sime kụrọ ḅereni nyana ḅụ sime mun ḍin-a tẹrẹ ẹndẹ sonio asi fịnjị na sọnọ-a ḍin ḅọrọ apụma pịrịmẹ!

¹³“Se ị́rị́, Danịẹl ḅe, kụrọ ḅereni nyana ḅụ sime mun kuluma mị la. Anịsịkị ị́ fịḅịa se ị́ pịkị sịsẹ ị́ya gbẹịnye nwọ ọkịḅịa kuluma mị lasịkị.”