Read kirikeni Danịẹl 3 Bible Online

Danịẹl 3 - kirikeni bible

Danịẹl 3

¹Amanyanaḅọ Nebukadneza ḅe ini tẹmẹ gbọrị goli-goli agbambuḅọ nyanamẹ, anịa gele, ḅụọ-a iniasi-oyi-fịnjị lamẹ, anịa finji esenie-a ḅụọ nwọ lamẹ; se ori anị se chịẹma koroma nyọ anị, Babilọn sẹ ḅie Dura sẹrẹrẹ kiri ọgọnọ.

²Anịsịkị amanyanaḅọ ḅe kụrọ pịrịmẹ na oria fịrịkiri-tịḅịnị mamgba ḅo koḅiria, amanyanapụ awọma na, gọvịna apụma na, gọvịna palị apụma na, sẹ mị ḅie opu apụma na, ḅẹrẹkọnkọn apụma na, igbiki koko apụma na, pịkị sẹ mị ḅie kirikọn se fịrịnwẹngịarị apụ mamgba na. Ini gose chịnḅịpị mị ḅoḅịaye anị, Amanyanaḅọ Nebukadneza ḅe, ọ̀ tẹmẹ chịẹma opu agbambuḅọ mị ọ̀ nwọse tọnḅụ wẹrị ini pịrịḅịa.

³Mịna fịrịnwẹngịapụ mamgba ọ̀ tẹmẹ chịẹma koroma agbambuḅọ mị se tọnḅụ wẹrịḅịaye gose ḅo koḅiria se anịa tọrọkọ chịẹmẹ,

⁴fịrịfịrịma pụkọ mị oloku se nwọḅẹmẹ na, “Sẹsẹ ma ḅie tomoni mamgba, kịrịkịrị apụ na, pịkị ọkwẹịn ḅẹlẹ kịrịkịrịapụ mamgba na!

⁵Oḍu ma fieḅịa sịkị ọ́ naaḅịa, ọbọ ma na, lubu ọbọ ma na, ẹbẹrẹ ma na, àrị ḍukomaḅịa, anịsịkị ísí farịaye mamgba arịa ḅụ sọ ḅịa. Farịaye ma sakị kirikiri, ọ́ tịḅịtu kiri pịrị se Amanyanaḅọ Nebukadneza ḅe tẹmẹ chịẹma goli goli agbambuḅọ mị tẹkẹḅịa.

⁶Tịḅịtu kiri pịrịka, pịkị tẹkẹkaḅọ goyegoye ini kirikiri iniḅọ se opu-kọrị-fịnị ḅie gbinḅịa.”

⁷Anịẹrẹchị farịaye ma fie se ini naa kirikiri, sẹma ḅie tomoni mamgba, tomoni kịrịkịrị pịkị ọkwẹịn ḅẹlẹ kịrịkịrịapụ mamgba, tịḅịtu kiri pịrị se Amanyanaḅọ Nebukadneza ḅe tẹmẹ chịẹma goli goli agbambuḅọ mị tẹkẹmẹ.

⁸Anịsịkị anị da Babilọn apụ ẹmbẹ nyana ḅụọ se Juapụma chụaye-ẹ.

⁹Ini nwọse Amanyanaḅọ Nebukadneza ḅe ḅẹmẹ, “Ye Amanyanaḅọ ḅe ḍumo gbaso!

¹⁰Ị́rị́ Amanyanaḅọ ḅe kụrọ pịrịmẹ na farịaye ma sakị fiesa ḅẹḅẹ, ọrụḅọḅọ tịḅịtu se goli goli agbambuḅọ mị tẹkẹ,

¹¹na tịḅịtu se anị tẹkẹkaḅọ goyegoye, ini anịḅọ mị ọkị se opu kọrị fịnị ḅie gbin.

¹²Da Juapụ mịanga omi-ẹ ị́ se Babilọn ẹkẹpụ ḅie fịrịtịḅịda apụ—Shedrak ḅe na, Mishak ḅe na, pịkị Abẹdnego ḅe na—ini Ị́rị́ Amanyanaḅọ ḅe ḅịpị mị kan-aḅẹ. Ini ị́ya oru ḅe tẹkẹ ḍụkụkẹ pịkịna tịḅịtu ị́rị́ tẹmẹ chịẹma agbambuḅọ mị pịrịkẹ.”

¹³Anịẹrẹchị, amanyanaḅọ ḅe tọrụfụrụma se opu ịganị ḅụ nweni fịrịmamẹ ini mun mịna tẹrẹ apụma ọkị ọ̀ tọrọkọ ḅo.

¹⁴Ori ini gbelamẹ, “Shedrak, Mishak na Abẹdnego, kọkọmaye nọ na ómine ị̀ya oru ḅe tẹkẹ ḍụkụkẹ pịkị tịḅịtu à chịẹma koroma goli goli agbambuḅọ mị pịrị ḍụkụkẹ?

¹⁵Mịọkụ, ómine oḍu ma na, ọbọ ma na, lubu ọbọ ma na, ẹbẹrẹ ma na farịaye mamgba naa kirikiri, ọ́ tịḅịtu se agbambuḅọ mị tẹkẹ, ó nemikase ọkọ mịẹkẹ nwọ ḅẹḅẹ, anị gbọrị kirikiri ini ó se opu kọrịarị fịnị mị ḅie gbinḅịa. Ọ́ chịn ḅara ineda ómine ḍụaḅịa jịn oru omi?”

¹⁶Shedrak ḅe na, Mishak ḅe na pịkị Abẹdnego ḅe na nwọ pẹkẹrẹmẹ, “Amanyanaḅọ, mịnaḅụ ḍụa gose wa ḅụḅalaḅala se mịnaḅụ pịrị ẹkẹ.

¹⁷Nemikase wa tẹkẹarị Tamụnọ Ḅe opu kọrịarị fịnị mị ḅie na, pịkị ị́ya kụrọ mị ḅie na ineda wa ḍụapakụmaḅoḅịa ḅẹḅẹ, ori ineda ọkọse anị mịẹḅịa.

¹⁸Ọkụma ọ̀ mịẹka sọ, Amanyanaḅọ ị́ iḅiọkụma nemimẹ na wa ị́ya oru ḅe tẹkẹ ẹkẹ, wa pịkị tịḅịtu ị́ tẹmẹ chịẹma goli goli agbambuḅọ mị pịrị ẹkẹ.”

¹⁹Anịsịkị Nebukadneza ḅe ò kuḅie, opuma sime, ọ̀ nyana Shedrak ḅe na, Mishak ḅe na, Abẹdnego ḅe na pịrị ḅụosọ mị ḅụ ọ̀ tọrụ ḍinma ḅo pulo pulo pulomẹ. Ọ̀ kụrọ se oria tomonima pịrịmẹ na ini sọnọma sịkị se kọrị fịnị mị mịẹ owoimatẹịn.

²⁰Anị ọ̀ kụrọ pịrịye na, oria owunima ḅie kụrọtẹịn apụma mịna tẹrẹ apụma fịna se ini se opuma kọrịarị fịnị mị ḅie gbin chu.

²¹Mịn, ini ḅiriaye mamgba na, ḅụchụayema na opu koro ḅụchụayema na, pịkị chu ma na, iniaḅụ simearịogbo ini ini fịna se ini se opuma kọrịarị fịnị mị ḅie gbin chumẹ.

²²Mịọkụ amanyanaḅọ ḅe tọrụfụrụma kụrọ pịrịmẹ, na ini fịnị mị owoimatẹịn nwọ ḅe ẹrẹchị, fịnị ḅẹlẹ mị, tomonima deki mun fịnị mị ḅie gbin chu owunima dọkịma ḅaamẹ.

²³Se Shedrak ḅe na, Mishak ḅe na, Abẹdnego ḅe na, pa ini nwọ ini fịna ọkụ mị ḅụ, ini ini se fịnị mị ḅie gbin chu se ini fịnị mị ogboku koromẹ.

²⁴Ḅụnemika ḅaraḅụ Nebukadneza ḅe sịsẹ chịẹmẹ ḅụgbiripu ḅụ. Ori oria fịrịnwẹngịapụma gbelamẹ, “Wa tẹrẹ apụ nwọ kpọ se kọrịarị fịnị mị ḅie gbinka?” Ini pẹkẹrẹmẹ, “Iin anị wa mịẹ ọkụ-ẹ, Amanyanaḅọ.”

²⁵“Anịsịkị nde à ḅo mịọkụ inein apụ nwọ ọrị àrị ọkụ, fịnị mị ḅie nwẹngị ma ḅọrọ aḅẹ?” ọ̀ nwọ gbelamẹ. “Ini ini fịnakẹ, ngịsị gbọrị elekima sọ pịkị inia ḅụ ofori-ẹ se ḍiepakụma na ye ini lamẹ—pịkị inein karamaḅọ ḅe, ori enjẹlḅọ kịkẹmẹ.”

²⁶Anị Nebukadneza ḅe nwẹngị kọrị fịnị mị ḅọkọ mun se ini chịn olokuye-ẹ, “Shedrak! Mishak! Abẹdnego! Geletẹịn Tamụnọ Ḅe fịrịnwẹngịapụ! Ọ́ pakaḅo!” Anị ini pakaḅoye-ẹ anị gbọrị kirikiri.

²⁷Amanyanapụ owuapụ awọ mamgba, gọvịnapụ, gọvịnapụ palị apụ pịkị amanyanaḅọ ḅe oria fịrịnwẹngị jịn apụ mamgba na ḅo koḅiria se mịna tẹrẹ apụma ḍikimẹ, fịnị mị gbọrịye sọ se lamaka apụma. Inia tịḅị inime sọ dọkịkẹ, inia ḅụchụayema sọ dọkịkẹ, onwoin onu sọ inia ḅụ fụrụkẹ.

²⁸Amanyanaḅọ ḅe nwọ ḅẹmẹ, “Shedrak ḅe na, Mishak ḅe na, Abẹdnego ḅe na Tamụnọ Ḅe ọ́ nwọ boma! Ori oria enjẹlḅọ ḅe fịrịmamẹ ḅo mịna fịrịnwẹngị ọ̀ pịrị, pịkị kuḅie se ọ̀ ḅụgbanapụ ma ḍụamẹ. Ini à pịrị kụrọ ma ḍukoaye mịẹkẹ se inia ḍumo mị pikima fị mị pịrịmẹ, se tịḅịtu jịn oru tẹkẹ ḍụkụkẹ, inia Tamụnọ Ḅe sikima.

²⁹“Mịọkụ à kụrọ pịrịaḅẹ na, nemikase gbọrịḅọ pakaḅomẹ, anị ḅọrọ sẹ ḅụ-o anịkanịka ọkwẹịn ḅẹlẹ ḅụ sọnị, Shedrak ḅe na, Mishak ḅe na, Abẹdnego ḅe na Tamụnọ Ḅe osika ḅaraḅụ, ò fiesimamẹ nwọ ḅẹḅẹ, ini ọ̀ ḅụọma na, ọ̀ ḅarama na ḅụ ọ̀ kanị se oria warị mị kan sara tunduruma koroma. Ineda mị ḅara mị se nweni ḍụaḅịa jịn oru ofori-ẹ.”

³⁰Anị amanyanaḅọ ḅe, Shedrak ḅe na, Mishak ḅe na, Abẹdnego ḅe na iwoma geletẹịn kiri ḅụ koromaye-ẹ Babilọn gbọrị sẹ ḅie.