Read kirikeni Danịẹl 4 Bible Online

Danịẹl 4 - kirikeni bible

Danịẹl 4

¹Amanyanaḅọ Nebukadneza ḅe mị oku mị se sẹ mamgba na, ama ama na, pịkị ọkwẹịn ḅẹlẹ kịrịkịrị mamgba nwọ sẹịnmamẹ sẹkiri mị ḅie: “Àrị ó kerenimẹ!

²Ómine ị̀ poki, Geletẹịn Tamụnọ Ḅe se ị̀ ḍie sa ḅụgbiripuma pịkị ḅụbuanmaye ma ḅẹrẹ mị.

³“Tamụnọ Ḅe se wa ḍie ḅụgbiripumaye ma iku la-ọkụ ḍiki! Ọ̀ nwẹngị ḅụgbiripuma fịrịma kụrọ la-ọkụ ḍiki! Tamụnọ Ḅe anị simegbaso amanyanaḅọ-ẹ; ọ̀ sịkịmamgba ḅẹrẹtọnḅịa.

⁴“Dein na ḅieḅẹlẹ ḅụ àrị ị̀ya amanyanaḅọ odo mị ḅie anga mẹ, ḅụḅalaḅala nyanaka pịkị opu mịẹye ḅarasọ ḅụ.

⁵Ọkụma à mọnọ-àrị-ogbo à ḅalafama ḍawọ kọnmẹ, pịkị kuḅie dein pịrịka ḅọịye à nwọ ọrịmẹ.

⁶Babilọn ḅie sime amanyanaḅọ tetemapụ mamgba àrị ini fịrịma ḅomẹ, ini ḅo ḍawọ mị pufinji ị̀ pịrịḅịa ọkụ.

⁷Anịḅụ ịkịankoro apụ mamgba na, tọrụtoluapụma na, ḅịrị apụma na, pịkịna lolia-ḍawọ-apụ ma na—inimgba ḅomẹ, se àrị ị̀ya ḍawọ mị ḍuko ini pịrịmẹ, ọkụma ini ineda anị pufinji ị̀ pịrịkẹ.

⁸Anị Danịẹl ḅe sọḅoye-ẹ (ori anị ini pịkị Bẹltẹshaza nwọse chịnḅọ ḅe-ẹ, à se ị̀ya oru ḅe koruḅọ ḅe.) Anị sikima sime se tomoni na kpekika oru ma kịrị kụrọ se pịrịḅọ ḅe, anị ḅụ à kọn ḍawọ mị à nwọ ḍuko ọ̀ pịrịmẹ. À nwọse ọ̀ ḅẹmẹ:

⁹Bẹltẹshaza, ịkịankoroapụma ḅụ tịḅịnịḅọ, à nemimẹ na sikima sime se tomoni na kpekika oru ma kịrị kụrọ ị́ ḅie omi-ẹ, pịkị tomoni chukunemikaye mamgba ị́ àrị kaịnḅomẹ. Mị anị ị̀ya ḍawọ mị-ẹ. Anị fieye ḍuko ị̀ pịrị.

¹⁰“À mọnọ-àrị-ogbo tẹmẹ ḅụ à gbọrị ḅọịye ọrịmẹ; gbọrị opueje ama mị ogboku chịẹmẹ.

¹¹Anị sẹnị mun soḅiamẹ se sẹkiri mị ḅie sime apụ mamgba ineda anị ọrịḅịa.

¹²Anịa ịnyanya ma àrị iḅilamamẹ pịkị anịa chịnmgbọlụma ḅein anị pụnụmamẹ—bebe sẹkiri mị mgba na karaḅịa fịye ḅụ. Piri ḅie owoi-a nama anịa chuku ịnyọsaramẹ; fenima anịa ịkpangị ma ọgọnọ ḅụ warị namamẹ, pịkị ḍumo nyanaye mamgba anịa chịnmgbọlụma nwọ fịmẹ.

¹³“À tẹmẹ ḅụ ọrịye mị à nwọ koromarị sịkị à gbọrị enjẹlḅọ ọrịmẹ, soḅie koroḅo aḅẹ, ọbị-na-kịlẹ-na ḅụ.

¹⁴Ò gele pụkọ ḅụ oloku pakụmamẹ, ‘Eje mị pẹlẹgbin se anịa ịkpangị ma pẹlẹsin; anịa ịnyanya ma kparanị sin, se anịa chịnmgbọlụma galagalama. Anịa chuku sime namama desin, pịkị ịkpangị ma ḅụ sime fenima na desin.

¹⁵Ọkụma chịn chuku mị wẹrịso kiri ḅụ, se ikulele igbe-ḅiri na alapẹlẹka igbe-ḅiri na se anị fịna kelema. Anị wẹrịso eleogbo osueinma ḅie. “ ‘Mịọkụ ye ijiriji ḅẹḅọ ḅe ọgọnọ sara, se ọ̀ namama na kala chịnma na ḅie anga.

¹⁶Sọnọma kụra na gbasịye ḅụ ò tomoniḅọ kuḅiemgbọlụ nyana ẹkẹ, ọkụma nama kuḅiemgbọlụ ọ̀ nwọ nyanaḅịa.

¹⁷Mịn anị ọbị-na-kịla-na ḅụ koru àrị enjẹlapụma inia ḅẹrẹpẹlẹḅịpị-ẹ. Anịọkụma, ye nyọnyọ ḅụ sime apụ mamgba nemi na Geletẹịn Tamụnọ Ḅe ọ̀ kụrọ nyanamẹ, tomoni amanyanakiri ma ḅụ, ọ̀ pịkị anị ḅaraḅụ ineda àrị se ọ̀ ḅụḅẹlẹḅọ pịrịḅịa—ngịsị yeḅụsọkaḅọ sọnị.’

¹⁸“Mịn anị à kọn ḍawọ mị-ẹ,” Amanyanaḅọ Nebukadneza ḅe nwọ ḅẹmẹ. “Mịọkụ ị́rị́ Bẹltẹshaza anị fieye mị ḍuko ị̀ pịrị, anịatịḅị amanyanaḅọ ḅe tetema tetema apụma ḅie gbọrịḅọ sọ ineda anị pufinji ị̀ pịrịkẹ, ọkụma ị́rị́ ị́ inedaḅịa, anịatịḅị sikima sime se tomoni na kpekika oru ma kịrị kụrọ ị́ ḅie omi-ẹ.”

¹⁹Mịn ḅụ, Danịẹl, ini Bẹltẹshaza pịkị nwọse chịnḅọ ḅe, ḅalafa ọ̀ ḅụ sọmẹ, ọ̀ ḅarị ineda ọkwẹịnkẹ. Amanyanaḅọ ḅe nwọse ọ̀ ḅẹmẹ, “Bẹltẹshaza, ḅerenima ḍawọ mị na anị fiearịye mị na ị́ ḅalafama.” Bẹltẹshaza ḅe nwọ pẹkẹrẹmẹ, “Amanyanaḅọ, mgbọkụ à ḅiḅịa na ḍawọ mị na, anị fieye mị na sime ị́rị́na-tarakapụ ma pịrị, anị sime ị́ pịrịma.

²⁰Eje mị, anị gele so ọkụma, anị mun so mị lamẹ, sẹkiri mị ḅie sime apụ mamgba ineda anị ọrịḅịa.

²¹Anịa ịnyanya ma iḅilamamẹ, anị pịkị ḅakama chịnmgbọlụ chụamẹ se ineda sẹkiri mị mgba kokoḅịa, piri-a nama anịa chuku ịnyọ saramẹ, fenima pịkị anịa ịkpangị ma ọgọnọ arịa warịma namamẹ.

²²“Amanyanaḅọ, ị́rị́ anị gele pịkị kụrọ eje mị-ẹ. Ị́ opuma sẹnị so ọkụma ị́ mun so mị lamẹ, pịkị ị́ya kụrọ mị finjima bebe sẹkiri mị mgba kelemamẹ.

²³Ị́rị́ Amanyanaḅọ ḅe tọrụ kweinma anị ḍikiarịogbo, gbọrị enjẹlḅọ soḅie koroḅo se nwọ ḅẹmẹ, ‘Eje mị pẹlẹgbin se anị kọsịma, ọkụma anịa chuku mị wẹrịso kiri ḅie. Ikulele igbe-ḅiri na alapẹlẹka igbe-ḅiri na nwọ ọkị se anị fịna kelema, se eleogbo anị wẹrịso osueinma ḅie. Ye ijiriji ḅẹḅọ ḅe ọgọnọ sara se ori anịnyọ namama ḅie anga sọnọma kụra ḅụ.’

²⁴“Mịn anị fiearịye-ẹ, Amanyanaḅọ, mịn anị Geletẹịn Tamụnọ Ḅe ḍukopakụma se ị́ ḅụpakaḅịaye-ẹ.

²⁵Tomoni ogboku ḅụ ini ị́ deḅịa, se ị́ mun piriḅie namama na angaḅịa, sọnọma kụra ị́ nwọse owoi-nambulo osuein fị ọkụ se osuein fịḅịa se ị́ pịkị eleogbo mọnọḅịa, anịnyọ ḅụ anị ijiriji ị́ ọgọnọ saraḅịaye-ẹ. Anịsịkị ị́ ḅereniḅịa na Geletẹịn Tamụnọ Ḅe anị tomonikiri mị mgba ḅie ḅẹrẹtọn-arịye-ẹ, ọ̀ pịkị ineda anị se ọ̀ ḅụḅẹlẹḅọ pịrịḅịa.

²⁶Enjẹlḅọ kụrọ pịrịmẹ na chịn chuku mị anị kiri ḅie sime. Mịn mị fiemẹ na ị́ ḅo pịkị amanyanaḅịa anị ị́ ḅo ḅereni ọkịsam na Tamụnọ Ḅe anị ḅẹrẹtọn sẹkiri mgba pịrịarịye-ẹ.

²⁷Anịẹrẹchị, Amanyanaḅọ, ị̀ya tetema mị ḍukonwẹngị. Ḅarị siye mịẹma, karakaraye mị mị-ẹ, pịkị igwein apụma ḍikitịḅịfoin. Anịsịkị ye pa ị́rị́ na loloma munḅịa.”

²⁸Ma mamgba Amanyanaḅọ Nebukadneza ḅe ḅụ pakamẹ.

²⁹Oyimaịn akalụ fịnjị kẹngẹ ḅọrọ sịkị, ori oria amanyanaḅọ odo, Babilọn ḅie ḅụ, ochu ogbo nwẹngị ma ḅọrọarị sịkị,

³⁰mị ọ̀ ḅẹye-ẹ, “Babilọn mị ḍụḅa la-ọkụ ḍiki! Ị̀rị̀ anị anị namaye-ẹ, ị̀ya tịḅịnị opuama ḅaraḅụ, se ị̀ya kụrọ na ịnyọ na, boma na amanyana opu na ḍiepakụma gose.”

³¹Ọkwẹịnmgbọlụ má mà ọ̀ ḅịpị faka simeogbo, soḅie pụkọ ọkwẹịnmẹ, “Amanyanaḅọ Nebukadneza, à ḍukoarịye poki! Ị́ya amanyana kụrọ mị, mịọkụ ị́ ḅara anị pọkọsosam.

³²Tomoni ogbo ḅie ini ị́ desinḅịa, ị́ mun nama na anga se nambulo osuein fị ḅara se osuein fịḅịa sọnọma kụra ḅụ. Anịsịkị ị́ ḅereni ọkịḅịa na Geletẹịn Tamụnọ Ḅe ọ̀ kụrọ nyanamẹ tomonikiri mị ḅie sẹ sẹ mamgba ḅụ, se ọ̀ pịkị ineda anị se ọ̀ ḅụḅẹlẹḅọ ḅẹlẹḅọ pịrịḅịa.”

³³Anị gbọrị kirikiri ọkwẹịnmgbọlụ ma ḅo kọkọmaye sọmẹ. Nebukadneza ḅe ini ò demẹ tomoni ogbo ḅie, se ò mun nambulo osuein fị ḅara nwọse osuein fịmẹ. Ijiriji koro oria oju saramẹ, se oria oju ichuka ma sẹnị igo pịkọ nangwọ ọkụ nangwọmẹ, se ọ̀ ḅaratụmgbalị inime ma feni ḅụọtụmgbalị inime nangwọ ọkụ nangwọmẹ.

³⁴“Sọnọma kụra ma ḅo ḅọrọ sịkị,” amanyanaḅọ ḅe nwọḅẹmẹ, “Àrị ị̀ tọrụ deki so mị ḍikimẹ, se ị̀ tọrụ pịkị ḅo deinmẹ. À Geletẹịn Tamụnọ Ḅe tokonimẹ, se osi na boma na se ọ̀ pịrịmẹ, anị ḍumo gbamasoḅọ ḅe-ẹ. “Ọ̀ ḅẹrẹtọn gbasoḅịa, pịkị oria amanyanakiri mị anị sịkịmamgba simeḅịa.

³⁵Yeḅụoforikapụ ḅara ọ̀ nwọse sẹkiri ḅie sime apụma ḍikimẹ; soḅie sime enjẹlapụma na sẹkiri ḅie sime-a tomonima na oria ḅẹrẹtọn chuku ḅie ini omi-ẹ. Gbọrịḅọ sọ ofori-ẹ ineda ọ̀ tọnsaye na tụḅụrụḅịaḅọ anịkanịka ọ̀ mịẹsaye ḅụ cheye gose nwọse ò gbelaḅịaḅọ ofori-ẹ.

³⁶“Ị̀ tọrụ pịkịḅo dein sịkị, à nyana osi mị na, opu mị na, pịkị ị̀ya amanyanakiri mị ḅe boma mị na ini àrị se ị̀ pịrịmẹ. Ị̀ya fịrịnwẹngịapụma na ama mị ḅie tọrụ pakapụ ma na ḅo ị̀ kerenimẹ, se ini pịkị ị̀ya amanyanaḅọ kụrọ mị se ị̀ pịrịmẹ, mịọkụ à nyana osi mị ḅakatẹịn tatarị sịkịye mị nẹngịmẹ.

³⁷“Se mịọkụ, Ị̀rị̀, Nebukadneza ḅe tokoni na, osi na, pịkị boma na se Soḅie Amanyanaḅọ Ḅe pịrịmẹ. Ori mịẹye goyegoye gbụkụkụye-ẹ pịkị karakaraye-ẹ, ọ̀ pịkị ineda opu aye mịẹḅọ ḅe iderimaḅịa.”