Read kirikeni Danịẹl 8 Bible Online

Danịẹl 8 - kirikeni bible

Danịẹl 8

¹Bẹlshaza ḅe amanyana tẹrẹ karama kụra mị ḅie àrị maịn karama tẹmẹ ḅụ ye ọrịmẹ.

²Tẹmẹ ḅụ Ilam ẹkẹpụ mị ḅie ini onuma-nama-kelema Susa opuama mị ḅie mị àrị ị́ ḅụ ọrịye-ẹ. Yulaị tọrụ aka ḅụ à chịẹ wara aḅẹ,

³se anị nyọ tọrụ aka ḅụ à gbọrị ajirima ọrịmẹ, mama nangwọ ịvalị ọ̀ nwọ chụamẹ gbọrịye nangwọ tẹịnmẹ pịkị ịwọtẹịn ísíye mị nẹngịmẹ.

⁴Àrị ajirima ḅe ọrịmẹ ori ọ̀ tịḅị ịvalị ma se ịrụa mị sọsọ pẹkẹrẹ na ọgọnọju na chukuju na nwọ chira aḅẹ. Ineda ọ̀ dachịẹma anịkanịka oria kụrọ ḅụ pọkọso gbọrị nama sọ ofori-ẹ. Ori ọ̀ ḅụḅẹlẹ-ọkụ-ḅẹlẹ-ọkụ mịẹmẹ, se pịkị opuaye mịẹmẹ.

⁵À mịn mị fiearịye nwọ koromarị sịkị gbọrị oḅori ịrụa mị sọsọ pẹkẹrẹ ḅụ kanpakaḅomẹ, oria nwẹngị ḅụọma owoi so ọkụma ọ̀ ḅụọma kiri lakẹ. Ọ̀ tọrụmgbọlụ ogboku gbọrị kịrị ịvalị ọ̀ nwọ chụamẹ.

⁶Tọrụ aka ḅụ chịẹsime àrị ọrị ajirima ḅe ọ̀ nwọ damaḅo aḅẹ se oria ịnyọ mgba se ò chiramẹ.

⁷Ori owuse ajirima ḅe paka ọkụ à nwọ ọrịmẹ. Ịganị ò ḅie ḅein so ọkụma ori ajirima ḅe chira gbin se ọ̀ tịḅị sime mama ịvalị ma anyịmamẹ. Ajirima ḅe se ọ̀ daḅịa ịnyọ ọ̀ ḅarị nyanakẹ. Oḅori ḅe ò suma kiri gbin se ọ̀ nanga kọsịmamẹ, se ineda ḅo ọ̀ ḍụa gbọrịḅọ sọ ofori-ẹ.

⁸Oḅori ḅe ori opuma ọ̀ ḅụbomamẹ, ọkụma oria kụrọ mị ḅo kuluma mẹ, oria ịvalị mị anyịmẹ. Anịa kiri ḅụ jịn inein-a kịrị ịvalị pakaḅomẹ, àrị tọrụ se kịrịkịrị nyọ damẹ.

⁹Ma inein-a ịvalị ma ḅụ gbọrịye ḅụ, gbọrị kala ịvalị sẹnị pakaḅomẹ; anịa kụrọ mị kun chukuju na, ịrụapakapaka nyọ na pịkị ò Ḅereni ini pịrị Ama mị na lamẹ.

¹⁰Anị opuma kụrọ nyanamẹ, se mun owuse soḅie owunima pakamẹ, lolia-ma-na-mịnaḅu-na, anị da aye suma kiri gbin se àrị nangamẹ.

¹¹Anị pịkị soḅie Amanyanaḅọ Tọkụ Ḅe oria owunima na tụḅụrụmẹ, ini eneḅeneḅene mịẹ ọ̀ pịrịarị agbama kịkẹmẹ, pịkị Oputẹkẹwarị mị kansaramẹ.

¹²Tomonima ini simịẹmẹ anịnyọ, ene ene ḅe jokoma agbamịẹ mị na, kọkọma Tamụnọ tẹkẹ mị na re nwọ suma kiri gbinmẹ. Ịvalị mị deki mịẹye mamgba ḅịrị anị pịrịmẹ.

¹³Anịsịkị, à gbọrị enjẹlḅọ pụkọ naamẹ, ò jịn enjẹlḅọ gbelaḅẹ, “Ma tẹmẹḅụ-ọrị-a-ḅọị-aye ma, sime mun che sịkị laḅe? Ḅalafama siamịẹye ma eneḅeneḅene mịẹmịẹ agbama kiri ọkị mun che sịkị laḅe? So owunima na Oputẹkẹwarị mị na, ini àrị nanga kiri pịrị mun che sịkị laḅe?”

¹⁴Àrị ísí enjẹlḅọ ḅe pẹkẹrẹ ḅịpị mị nwọ naamẹ, “Anị sime mun ḍin-a mesi-oyi-fịnjị-ofori-ḍin-a tẹrẹ-ẹndẹ laḅịa, ma sịkị ma ḅie ini dede na saso na agbamịẹ ẹkẹ. Anịsịkị mị Oputẹkẹwarị mị pịkịma ḅo anị tatarị sime ọkụ simeḅịa.”

¹⁵À ḅụkụrọma tẹmẹḅụ-ọrịye mị kaịnḅoḅịa ọkụ ḍọkịarịogbo anị gbọrị tomoniḅọ ḅụnemika ḅaraḅụ ị̀ tọrọkọ chịẹye-ẹ.

¹⁶Yulaị Tọrụ mị saḅama anga ḅụ à gbọrị pụkọ naamẹ, nwọ ḅe aḅẹ, “Gabrịẹl, pufinji ọ̀ pịrị ori ọrịye mị fiearịye.”

¹⁷Gabrịẹl ḅe ḅo ị̀ya angasịkị chịẹmẹ, se ị̀ ḅalafaso ọkụma à ḅịkị koromẹ. Ọ̀ nwọse ị̀ ḅẹmẹ, “Tomoniḅọ tọkụ, anị fieye mị kaịnḅo. Tẹmẹḅụ-ọrịye mị anị sime sẹkiri mị ḅe kuluma nwọ pịrịmẹ.”

¹⁸Ori ọkwẹịn-àrị-ogbo àrị ị̀ ḅụnemika ḅaraḅụ ḅịkị kiri koromẹ se à ḅarị ị̀ ḅụ mịẹarịye nemikẹ. Ọkụma ori ị̀ ọlọchịẹmamẹ,

¹⁹se nwọ ḅẹmẹ, “Tamụnọ Ḅe ịganị mị simeḅịa ọkụ à nwọse ị́ ḍieaḅẹ. Tẹmẹ ḅụ ọrịye mị anị sẹkiri mị kulumaḅịa sịkị ḅẹrẹ ḍuko aḅẹ.

²⁰“Ị́ ọrị mama ịvalị nyana ajirima ḅe, anị Midia na Pesia na amanyanakiri ma-ẹ.

²¹Oḅori ḅe anị Gris amanyanakiri mị-ẹ, oria mama tọrụmgbọlụ ogboku paka kịrị ịvalị mị anị tatarị amanyanaḅọ ḅe-ẹ.

²²Tatarị ịvalị mị anyị sịkị pakaḅo inein ịvalị ma anị sẹ mị ḅie pupakaḅịa inein amanyanakiri ma-ẹ, anị tatarị amanyanakiri mị kụrọ ọkụ kụrọ ẹkẹ.

²³“Àrị sẹma ḅe kuluma mị ḅo kpeki sịkị, àrị opuma sitịḅị nyana-so-ọkụma àrị fomuḅara daḅịa pikipikiye ofori-ẹ, gbọrị ininachịn, simịẹmịẹye nyana epele amanyanaḅọ pakaḅoḅịa.

²⁴Ori opuma ịnyọ nyanaḅịa ọkụma oria kụrọḅụkẹ. Ò siḅara se ye simaḅịa se mịẹyeḅarasọ nwọ nyanaḅịa, ọ̀ ḅara se chuye goyegoye ḅụ. Ọ̀ fa ọkịḅo kụrọ apụ na, pịkị Tamụnọ-a tomoni na pịrịḅịa.

²⁵Ori epeleniḅọ ẹrẹchị epele-a mịẹmịẹaye ma àrị ori na loloḅịa. Ori ọ̀ ḅụ bomaḅịa pịkị tọn-apụ ḅaasinḅịa inia ḅụnemika ḅụ. Ori Amanyanapụ mamgba ḅụ geletẹịnḅọ ḅe na tụḅụrụḅịa, ọkụma tomoniḅọ kụrọ oforiḅụ ọ̀ kọsịḅịa.

²⁶Mị saso-na-dede-na agba mị ḅe tẹmẹḅụ-ọrịye mị, ini pufinji ị́ pịrịsaye mị ḅo kọkọmaye sọḅịa, ọkụma anị ḅọị mịọkụ, anịatịḅị anị ḅọlọ sịkị ọkịḅịa tẹrẹrẹ anị ḅo karakaraye sọḅịa.”

²⁷À tọn-a ene se kuḅie lọkọ nyanamẹ, à pịkị obimẹ. Anịeso à sịsẹ se mun amanyanaḅọ ḅe tọn ị̀ pịrị fịrị mị nwẹngịmẹ, ọkụma àrị ọrịye mị anị opuma ị̀ ḅụ ḅalaḅalamamẹ à pịkị ineda anị kaịnḅokẹ.