Read kirikeni Danịẹl 9 Bible Online

Danịẹl 9 - kirikeni bible

Danịẹl 9

¹Darịọs Midi ḅọ ḅe, anị Zọkzis tọkụ ḅe ḅo Babilọn amanyanakiri mị damẹ.

²Ọ̀ tatarị amada kụra mị ḅie, à fịafịa ḍiri ma ḍawọ aḅẹ pịkị kụra tesi oyi fịnjịma ḅe koroma nwọ kọn aḅẹ anị Jerusalẹm mị kanḅụ simeḅịa kụra ma, Nyanaḅọ Ḅe ḍuko ịkịankoro Jerimaya ḅe pịrị ḅaraḅụ.

³Se àrị iḅiọkụma Tamụnọ Nyanaḅọ Ḅe tẹkẹmẹ ọ̀ ḅara ḅi aḅẹ yefịka ḅụ na, okuru-ḅiri-aye-ḅiri ḅụ na, fọn ḅie kpeleki ḅụ na.

⁴Àrị ị̀ Nyana Tamụnọ Ḅe tẹkẹmẹ se ị̀ya tomonima mịẹ-a sima à nwọ ḍukopakụmamẹ. À nwọ ḅẹmẹ, “Nyanaḅọ Tamụnọ, ị́ ḍụḅamẹ, wa pịkị ị́ osimẹ. Ị́rị́ anị kuḅie se ḅụgbana gbẹịnḅọ-ẹ, ị́ya ọḅọkụ mị ḅụ kuluma nyanaka ḅẹlẹma se ị́ ḅẹlẹma pịkị ị́ tọn ayema mịẹapụ ma pịrịḅọ.

⁵“Wa si mịẹsam, wa si ḅie omi-ẹ, wa mịẹirimasam. Ị́ tọn wa pịrị na wa mịẹ nwọ ḅẹye ma wa sịkịmẹ, pịkị ị́ se wa ḍie karakara ayema ḅụ mịnaḅụ ma sikimamẹ.

⁶Wa ị́ya ịkịankoro fịrịnwẹngịapụma ḅịpị pokikẹ, anị ị́ ẹrẹ ḅụ ọkwẹịn mịna amanyanapụma na ḅẹrẹtọn apụma na ḅieju-aḍapụma na pịkị mịna sẹ mị mgba na pịrị apụma.

⁷Ị́rị́ Nyanaḅọ Ḅe, sịkịmamgba karakaraye anị ị́ mịẹmịẹye-ẹ, ọkụma wa sịkịmamgba ḅụgerere ọkịḅo mịnaḅụ pịrịpịrịmẹ. Mịn mị mine mgba ḅụ kọkọmaye-ẹ, mine Judia ḅie na, Jerusalẹm ḅie na angapụma, pịkị Izrẹlapụ mamgba anị ị́ galagalama sẹma ḅie chuapụ ma, ini kuḅie se ị́ ḅụgbanakaye gose.

⁸Mịna amanyanapụma na ḅẹrẹtọn apụma na pịkị mịna ḅieju-aḍapụma na, ini ḅụgereremaye mịẹsam, pịkị ị́ mịẹsimasam, Nyanaḅọ.

⁹Ị́ ḍikiḅụgerere nyanamẹ, pịkị siḅụ-ḅarasin pịrị na, wa kọngọ kụrọma ị́ pịrịmẹ nwọḅẹsọ.

¹⁰Wa ị́ ḅịpịpokikẹ, yei Nyanaḅọ, mịna Tamụnọ, ị́ nwọ ḅẹmẹ na ị́ya ịkịankoro fịrịnwẹngịapụma ḅụ ị́ ḅọrọ chụa wa pịrị olokoma wa àrị ḍuko nwẹngị.

¹¹Izrẹl mị mgba ị́ya olokoma kanmẹ pịkị ị́ ḍuko ayema poki ḍụkụkẹ. Wa ị́ mịẹsimamẹ, anịgose Moziz, ị́ya fịrịnwẹngịḅọ ḅe, Olokoma ḅie gịẹịn worianime ma ị́ nwọ ọkịḅo mịna ọgọnọ gbanamẹ.

¹²Ị́ ḅẹmẹ na ị́ se mine na, mịna ḅẹrẹtọn apụma na mịẹḅịaye mị ị́ mịẹmẹ, ị́ kụrọ fomuḅara nwọse Jerusalẹm mị pịrịtẹịn sẹkiri ḅie sime ísí opuamama nẹngịmẹ,

¹³Moziz Olokoma ḅie sime fomuḅara mamgba ị́ nwọse wa pịrị. Ọkụma mịọkụ sọ, yei Nyanaḅọ, mịna Tamụnọ, ma wa pa ḅụkụrọma ị́ ḅụḅẹlẹḅịaye mịẹkẹ, anị, mịna sima ḅụ vinpịkị se ị́ya karakara mị ḍukonwẹngịkẹ.

¹⁴Ị́rị́, Yei Nyanaḅọ, mịna Tamụnọ, ị́ ḅụkarakaramamẹ fomuḅara se wa pịrị, ị́ pịkị ọkọ mịẹmẹ; anịatịḅị karakaraye anị ị́ mịẹmịẹye-ẹ, wa ị́ ḅịpị pokikẹ nwọḅẹsọ.

¹⁵“Yei Nyanaḅọ, mịna Tamụnọ, ị́ ị́ya kụrọ ḍiepakụmamẹ, ị́ya tomonima ọkịpakụmaḅomẹ Ijipt ḅie, se ị́ya kụrọ mị ini pa anị se ḅiekoroma aḅẹ. Wa si mịẹsam, wa mịẹirimasam.

¹⁶Ḅọrọsa sịkị ị́ wa ḍụasam, anịgose ḅarị Jerusalẹm ḍikiḅieḅuma. Anị ị́ya opuama-ẹ, ị́ya osiḅụ sime chịngị-ẹ. Kpeki-a sẹma ḅie sime apụ mamgba, Jerusalẹm na ị́ya tomonima na ḍiki iderimamẹ, mịna sima na mịna ḅieju-aḍapụma siamịẹmịẹaye ma na gose.

¹⁷Yei Tamụnọ, ị̀ya tẹkẹ naa pịkị à ḅiarịaye ma na. Tẹlịma ị́ya Oputẹkẹwarị mị nama anị kansaye mị, tẹlịma anị nama mịẹso sịkị nwenimgba nemiḅịa ọkụ na Ị́rị́ anị Tamụnọ Ḅe-ẹ.

¹⁸Wa poki, Yei Tamụnọ; wa ḍiki se mịna ḅụfụka mị ọrị, pịkị ị́ya ẹrẹ mị fị opuama mị na ḍiki. Wa ị́ tẹkẹ aḅẹ ị́ya ḍikiḅụgerere ḅụ, mịna karakaraye mịẹ ḅụ kẹ.

¹⁹Nyanaḅọ, wa naa. Nyanaḅọ, siḅụ ḅarasin wa pịrị. Nyanaḅọ, wa poki se mịẹpakụma. Mịẹso sịkị nwenimgba nemiḅịa na Ị́rị́ Tamụnọ-ẹ, ye se ọḅụdama! Mị opuama mị na mịna tomonima na ị́yaye-ẹ.”

²⁰À tẹkẹma mun aḅẹ, à pa ị̀ya sima na ị̀ya tomoni Izrẹlapụma mịẹ-a sima na go pakụmaḅẹ, pịkị Nyanaḅọ Tamụnọ Ḅe ḅara ḅi aḅẹ na ori oria fịafịa Oputẹkẹwarị mị tẹlịma naamẹ.

²¹À tẹkẹ àrịogbo, Gabrịẹl ḅe ḅọrọsa tẹmẹ anga ḅụ àrị ọrị ḅọḅe, finma ḅo à sime nyọ lamẹ. Anị saso agbamịẹ sịkị mịẹ.

²²Ò pufinjimẹ, “Danịẹl, à mịanga ḅomẹ ḅarachụa ị́ pịrị se ị́ ịkịan mị kaịnḅo.

²³Ị́ sakị Tamụnọ Ḅe ḅara ye ḅi sịkị, ori ị́ pẹkẹrẹmẹ. Ori ị́ ḅẹlẹmamẹ, anịgose à ḅo pẹkẹrẹ ḅịpị mị ḍuko ị́ pịrị-ẹḅomẹ. Mịọkụ, ḅeri tokoloma poki à tẹmẹḅụ-ọrịye mị pufinji àrị sịkị.

²⁴“Kụra tesioyifịnjị ḅe sọnọma kiri anị Tamụnọ Ḅe tọn koromaye-ẹ se ị́ya tomonima na, ọ́mịna fịafịa opuama mị na ḍụaḅọrọmaḅịaye-ẹ, sima na, siamịẹmịẹye ma na ḅụ. Si mị anị siḅụ ḅarasin nyanaḅịa pịkị kuluma nyanaka karakara ḅẹrẹkọn ḅo kiri ọkịḅịa, mịẹso ọkụma tẹmẹḅụ-ọrịye mị na ịkịan mị na ḅo kọkọmaye sọḅịa, pịkị fịafịa Oputẹkẹwarị mị ini kpoto anị se osiḅụ wẹrịḅịa ḅara.

²⁵Mị ḅụ elekima chụa se anị kaịnḅo: Ini kpoto Jerusalẹm mị namaḅịa kụrọ pịrị ọkịmun Tamụnọ Ḅe sẹlẹ tịḅịnịḅọ ḅe ḅoḅịa sịkị la, sọnọma kụra ḅe sọnọma kiri ḅọrọḅịa. Jerusalẹm mị ini kpoto anị namaḅịa, ateli anịa ḅie simeḅịa, pịkị kụrọ onu anị gbori kelemaḅịa, se kụra tesi mama kụra fịnjị ḅe sọnọma kiri anị nwọse chịẹsimeḅịa, ọkụma mịn sịkị mị anị ḅụfụka sịkị sọḅịa.

²⁶Anịsịkị mị ḅo kuluma sịkị ini Tamụnọ Ḅe sẹlẹ ọkị tịḅịnịḅọ ḅe ḅaaḅịa ḅẹrẹḅarasika ḅụ. Opuama mị na Oputẹkẹwarị mị na, gbọrị opu kụrọ ḅẹrẹtọnḅọ ọmụogbo anị kansinḅịa. Kuluma mị opu mengi ḅara se ḅoḅịa, ọmụ na fa na se ama mị kanḅịa anị Tamụnọ Ḅe tọnkoromasa ḅaraḅụ.

²⁷Ori ḅẹrẹtọnḅọ ḅe, ọ̀ tọn apụ na ḅịpịogbosọ nyanaḅịa sọnọma kụra ḅụ, se mị sịkị mị ḅo mamaju gbasị ḅọrọḅịa sịkị, ọ̀ mịẹḅịa agbamịẹ na ḍiepịrịaye na ḅo kulumamẹ. Ḅalafama siye mị ini anị se Oputẹkẹwarị mị ọgọnọ geletẹịn nyọ ḅụ koromaḅịa, se anị anịanga simeḅịa ọkịmun anị se anịanga koromaḅọ ḅe mun Tamụnọ Ḅe karakarama ọ̀ pịrị kuluma mị laḅịa.”