Read kirikeni Hosia 10 Bible Online

Hosia 10 - kirikeni bible

Hosia 10

¹Izrẹlapụma, opuma chụa tụmgbakị elelenda ozu ini nwọ kịkẹmẹ. Mịẹmịẹye ini na iḅila ọkụ anị ini oru-agbamịẹ ẹbẹ ma nama la-ọkụ-ẹ. Inia kiri yepakụma la-ọkụ, anị ini osi se pịrị tẹkẹtẹkẹ ḍụparị ịbama ini nwọ mịẹiḅima la-ọkụ-ẹ.

²Oḅori se jịn-apụ-chịn kuḅie nyana tomonima, mịọkụ inia sima gose, ini tọrụsiọrịḅịa. Tamụnọ Ḅe ori inia oru-a ẹbẹ ma kan se ini osi se pịrị tẹkẹtẹkẹ ḍụparị ịbama kọsịmaḅịa.

³Mịnapụ ma ḅọlọka sịkị ḅụ ini ḅẹḅịa, “Wa amanyanaḅọ nyanakẹ, anịatịḅị wa Nyanaḅọ Ḅe ḍikiḅalafakẹ. Ọkụma anịsọ amanyanaḅọ che mịẹ wa pịrịḅe?”

⁴Papa ọkwẹịn anị inia ḅịpị pakaḅoarịye, pịkị iruo-a ḅereniaye na tịḅị ofori ḅịpịogbosọ na mị ini tọn-arịye-ẹ. Ini karakaraye mị pịkị iḅomẹ se siyemịẹ mị ini sokusosa ozu ḅie nweni ḅaaḅaa ịnyanya sẹnị ọkụ sẹnị aḅẹ.

⁵Sameria opuama mị ḅie anga tomonima, ini ḅalafa nyanaḅịa se pịkị kururuḅịa Bẹt-Avẹn ḅie fa goli goli nambulo ḅe gose. Ini na oru agbamịẹapụma na, anị oru mị tẹkẹ apụma, anịa tịḅị gose owuḅịa. Ini owuḅịa anịa goli-goli opu mị ini nwọ kọrọrọsinḅịa sịkị.

⁶Ini oru mị deki Asiria munḅịa, gbẹịnye ḅaraḅụ anịse sẹ da opuḅọ ḅe pịrịḅịa. Izrẹlapụma ini opu ḅụgerere nyanaḅịa ini ḍukonwẹngịarị tetema mị gose.

⁷Inia amanyanaḅọ ḅe ini ò dekisoḅịa, mengi ọgọnọ tẹịn àrị chịn pẹkẹrẹ ḅara.

⁸Evẹn chịngịma ọgọnọ sime oru-a warịma, anị Izrẹlapụma mun oru ma tẹkẹtẹkẹ nyọma, ini àrị kansaraḅịa. Ịga na ịnyanya na inia ẹbẹ ma ọgọnọ sẹnịḅịa. Tomonima ini tụndụma chịn olokuḅịa, “Wa ḅọị-o!” ini pịkị chịngịma ḅẹḅịa, “Wa gbẹịn kikima-o!”

⁹Nyanaḅọ Ḅe nwọ ḅẹmẹ, “Izrẹlapụma, ini pa si se ị̀ mịẹ ḅụ ḅarasinkẹ ini Gibia ḅie simịẹ sịkị ngịsị. Anịgose Gibia ḅie owu ini na bịamaḅịa.

¹⁰À mịna si mịẹapụma gbẹịnmachịẹ se fomuḅara se ini pịrịḅịa. Sẹsẹ gboloma ini dapakaḅịa se ini fomuḅara nyanaḅịa inia ḅaka sima gose.

¹¹“Izrẹl mị gbọrị sịkị anị sime ḅara, anị ini iḅiọkụma ye se telimasa ayamburama nambulo, se ịpịamgba ozu ḅie kụrọma fịrịnwẹngịḅịa wu sime ọkụ ini nwọ simemẹ. Ọkụma à tọnsam, à chịn se árịa iḅi kọngọ ḅụ kpọ se árị ọkị kụrọtẹịn fịrị ḅụ chuḅịa. Ị̀rị̀ Juda mịẹmẹ ini kiri mị soku, se Izrẹl mịẹse ini kiri mị mịẹ karakaramamẹ.

¹²À nwọ ḅẹmẹ, ‘Ómine ịwọ kiri soku ọ́mịna ḅụ pịrị; ọ́ karakara mịẹmịẹye mị ḍipi se tịḅịtu ị̀ pịrị mị, dekiḅo ọ́ pịrịḅịa ḅẹlẹma mị ọ́ nwọ soku. Ọ́ tọrụ pịkị ị̀ daḅịa sịkị mị lasam, Ị̀rị̀ ọ́ Nyanaḅọ Ḅe, se à pakaḅo ḅẹlẹma ọsụn ọ́mịna ọgọnọ saraḅịa.’

¹³Ọkụma anịnakaraka simịẹmịẹye anị ó ḍipiye se anịa ḅụ ḅoaye ọ́ nwọ sokumẹ. Ọ́mịna iruo ma pakụmaḅo chịnmgbọlụma ọ́ nwọ fịsam. “Anịatịḅị ó kuḅie se ọ́mịna owuni-a kporokporoma na ḅaka owunima na ḅụgbana ẹrẹchị,

¹⁴owu ọ́mịna tomonima dapakaḅịa, se ọ́mịna owuni-a kụrọ warị mamgba kankọsịḅịa. Anị owu ḅie Amanyanaḅọ Shalman ḅe Bẹt-Abẹl opuama mị kankọsịma ene mị kịkẹḅịa, nyengi apụma inia awọ na, ini ini ḅaa kọsịmamẹ.

¹⁵Anị ọ́mịna ḅụ pakaḅịaye-ẹ, ómine Bẹtẹl-a tomonima, ọ́ mịẹsa ḅalafama simịẹmịẹye mị gose. Owu mị sakị kirikiri, Izrẹl amanyanaḅọ ḅe ọ̀ fịḅịa.”