Read kirikeni Hosia 11 Bible Online

Hosia 11 - kirikeni bible

Hosia 11

¹Nyanaḅọ Ḅe nwọ ḅẹmẹ, “Izrẹl ḅe kalatọkụ ḅụ sime sịkị, àrị ọ̀ ḅẹlẹmamẹ se Ijipt ḅie àrị ọ̀ chịn pakụmaḅomẹ ị̀ya tọkụ ḅaraḅụ.

²Ọkụma àrị ọ̀ chịntẹịn sịkị, mị ori ị̀ ḅụ ḍarịmatẹịnye Ị̀ya tomonima ini agba mịẹ Beal ḅe pịrịmẹ; ini insẹnsị dọkịma oru pịrịmẹ.

³Anịsọ, ị̀rị̀ anị nwẹngị ọkụ se Izrẹl ḅe ḍieye-ẹ. Àrị ị̀ya tomonima dekichịẹmamẹ ị̀ ḅara kọngọ ḅụ, ọkụma ini ḅerenikẹ na ị̀rị̀ ini ḍikiḍikimẹ.

⁴Àrị ini jine ị̀ ḅụ pịrịmẹ ḅẹlẹma ḅụ. Àrị ini deki sịsẹma ị̀ ḅapuko lamamẹ; à tu fịye se ini kokomẹ.

⁵“Ini pịkịma ị̀ damaḅo ḍụkụkẹ, anịẹrẹchị ini pịkịma so Ijipt munḅịa se Asiria mị ḅẹrẹtọn ini pịrịḅịa.

⁶Ọmụ inia opuamama ọfịn tolu mun inia opuamama onu opu-ḅọkọ ma kantoluḅịa. Anị ị̀ya tomonima ḅaasinḅịa anịatịḅị ini inia kuḅie tọn ini pịrị iḅitẹịn ayema nwọ mịẹmẹ.

⁷Ini anịkanịka ḅaraḅụ ị̀ ḅụ ḍarịma ḍọkịmẹ. Inia ọgọnọ gbana ikuye mị gose ini owuḅịa ọkụma gbọrịḅọ sọ inia ọgọnọ anị dekisin ẹkẹ.

⁸“Nde àrị ị́ ḅụ ḅarasinḅịa ọkụ, Izrẹl? Nde àrị ị́ sarakoromaḅịa ọkụ? Àrị ineda ị́ kansinḅe, àrị Adma ama mị mịẹ ọkụ, anịkanịka à Zẹboịm ama mị mịẹ ọkụ se ị́ mịẹ ḅe? Ị̀ kuḅiemgbọlụ ḅereni ẹkẹ àrị ọkọ mịẹ! À nyana ị́ pịrị ḅẹlẹma mị opuma kụrọmẹ.

⁹Ị̀ya ịganị ḅụ à fomuḅara se ị́ pịrị ẹkẹ; À ḅarị Izrẹl mị kankọsịma ẹkẹ. Anịatịḅị Ị̀rị̀ Tamụnọ-ẹ, tomoniḅọkẹ. Ị̀rị̀, Fịafịaḅọ Ḅe, àrị ị́rị́ na omi-ẹ. Àrị ịganị ḅụ ị́ damaḅo ẹkẹ.

¹⁰“Ị̀ya tomonima ini ị̀ ḍukoḅịa, à chịrịḅa ekerea ọkụ se ini na tarakapụma tịḅị ekereaḅịa sịkị. Ịrụasọsọ nyọ ḅụ ini jua ị̀ damaḅoḅịa.

¹¹Ijipt ḅie ini be feni fin ọkụ se fin soḅoḅịa, pịkị okuku ḅara nwọse Asiria ḅie soḅoḅịa. À pịkị ini se inia ama ḅoḅịa. Ị̀rị̀, Nyanaḅọ Ḅe à ḍukosam.”

¹²Nyanaḅọ Ḅe nwọ ḅẹmẹ, “Izrẹlapụma ini iruo na epele na se ị̀ kelemasam, pịkị Judapụma ini pa kọngọ kụrọma kuḅie-se-ḅụgbana-gbẹịn Ị̀rị̀ fịafịa Tamụnọ Ḅe pịrịaḅẹ.”