Read kirikeni Hosia 12 Bible Online

Hosia 12 - kirikeni bible

Hosia 12

¹“Izrẹlapụma dede ḅụ sakị mun ḍin la ḅụ mịẹye layelaye papaye-ẹ, pịkị yesimaye-ẹ. Ḅụọchụa na kụrọ-amịẹmịẹye na iniaḅụ ḅakama mịẹ-aḅẹ. Ini Asiria na ḅịpịogbosọ nyanamẹ pịkị Ijipt na tuḅokọn gbolomamẹ.”

²Nyanaḅọ Ḅe se Juda apụma tịḅị gbanaḅịaye omi-ẹ; ọ̀ pịkị fomuḅara se Izrẹlapụma pịrịḅịa anị anịa tomonima ḅe yemịẹmịẹḅara gose. Ọ̀ gbẹịnye se ini gbẹịnḅịa ini mịẹsaye ma gose.

³Inia ḅieju-ḍaḅọ, Jekọb ḅe na mama-ịkpatụ mịnaḅọ Isọ ḅe na, yejineamẹ ini mamapụ ma inia nyengima furo ḅie sime sịkị; Jekọb ḅe ḅo sẹnị sịkị, ọ̀ Tamụnọ Ḅe na owusọmẹ—

⁴ọ̀ gbọrị enjẹlḅọ na owusọ se ò inumamẹ. Ori owumẹ se ḅẹlẹma ḅimẹ. Pịkị Bẹtẹl ḅie, Tamụnọ Ḅe mịna ḅieju-ḍaḅọ Jekọb ḅe damaḅo se ori na ọkwẹịnmẹ.

⁵Ḅe anị Kụrọmamgba Nyana Tamụnọ Ḅe-ẹ, Nyanaḅọ anị ini se ọ̀ tẹkẹḅịa ẹrẹ mị-ẹ.

⁶Anịgose mịọkụ, Jekọb ḅe furoḅie-pakaḅo-apụ, ó kuḅie-se-ọ́mịna Tamụnọ Ḅe ḅụgbana se pịkịma ọ̀ damaḅo. Ọ́ ḅụiderima ọ́ pịkị iḅiapụ-sọ se inema ḅụ, ọ́mịna Tamụnọ Ḅe koru se ọ̀ mịẹḅịaye ḍiki.

⁷Nyanaḅọ Ḅe nwọ ḅẹmẹ, “Izrẹlapụma, Kenan apụma iḅi-atomonika ọkụ anị ini sọ sime ọkụ-ẹ; ini inia tuḅonima inuma ḅẹlẹmamẹ, iruoaye se ye tọn-aye dẹrị ḅụ.

⁸Ini nwọ ḅẹmẹ, ‘Wa alakọnmẹ. Wa iḅifụḅara ḅụ ngọ kọnsam. Karakaraka ḅọkọ ḅụ wa ngọ kọnmẹ nwọse wa ḍuko simaḅịa gbọrịḅọ sọ ofori-ẹ.’

⁹Ọkụma Ị̀rị̀, Nyanaḅọ ọ́mịna Tamụnọ Ḅe, Ijipt ḅie ómine ḅọrọma pakụmaḅoḅọ ḅe, àrị ọ́ mịẹse ọ́ pịkị ikowarịma ḅie angaḅịa, tatarị ó sime ḅara anị àrị onwun ele ḅie ọ́ damaḅo sịkị mị ḅụ.

¹⁰“Àrị ọkwẹịn ịkịankoroapụma pịrịmẹ se tọn-a ḅọịaye se ini pịrịmẹ, se ịkịankoroapụma ḅụ à ḅọrọ ḅerijine ọkwẹịn kọn ị̀ya tomonima pịrịmẹ.

¹¹Anịsọ Giledị ḅie ini oru tẹkẹtẹkẹaḅẹ, se nwọ àrị tẹkẹarịapụ ma ini fịḅịa. Ini nambulo se agba mịẹmịẹ aḅẹ Gilgalị ḅie, àrị ẹbẹ mamgba àrị ḅo ḍụparị okpokpo sọḅịa eleogbo.”

¹²Mịna ḅieju-ḍaḅọ Jekọb ḅe ọ̀ mangị Mẹsopotemịa mun mẹ, anịnyọ eremeniḅọ simeḅịa ẹrẹchị, se ọ̀ fịrịnwẹngị jụmḅọ pịrịmẹ se oria ananama kokomẹ.

¹³Nyanaḅọ Ḅe ori ịkịankoroḅọ se Ijipt ḅie Izrẹlapụma fịrịmamẹ, omoni ḅara ḅie ini ọkịpakụmaḅo pịkị ini kokoḅịa ẹrẹchị.

¹⁴Izrẹlapụma, ini opuma Nyanaḅọ Ḅe ịganịmasam; inia siamịẹmịẹye ma gose ini fị gbẹịnmẹ. Nyanaḅọ Ḅe ò fomuḅara se ini pịrịḅịa ini ọkịḅo ọ̀ tọrụ chụa ḅụgerere mị gose.