Read kirikeni Hosia 2 Bible Online

Hosia 2 - kirikeni bible

Hosia 2

¹Anịẹrẹchị ómine ó juo Izrẹlapụma chịn “Tamụnọ-a Tomoni” pịkị “Nyanaḅọ Ḅe Ḅẹlẹmasa apụ.”

²Mịn Nyanaḅọ Ḅẹ ḍuko ọkụ-ẹ, “Ị̀ya awọ, ómine ọ́mịna nyengima na ọkwẹịn—á ḅarị ị̀ ta sọka sọ, ị̀rị̀ pịkị ḅarị dewu sọka sọ. Ómine ọkwẹịn á pịrị se árị árịa sẹfị na amanwẹngị na ḅụ ḅarasin.

³Á nemikase ḅarasinkẹ nwọ ḅẹḅẹ, àrị á se papaḅụ sinḅịa anị ini á yi ene á sime ḅara mị. Àrị á mịẹḅịa se á ḅo yeḅụsọkaḅọ nwọ sọ, samịna se yeḅarị-pakaka-kiri sime ọkụ simeḅịa.

⁴À ḍikiḅụgerere nyana arịa awọma pịrị-ẹkẹ; ini anị ḅụgerere-nemika-amanwẹngịḅọ-awọ-ẹ. Árị ḅarana nwọ ḅẹmẹ, ‘Àrị ị̀rị̀na-iḅiọkụma sime apụma damamunḅịa—ini fịye na mengi na, wulu na, lọkọ ḅịtẹ na, oliv pulo na iru na se ị̀ pịrịmẹ.’ ”

⁶Anịẹrẹchị àrị ịga piri se onu mịẹ á kelekelemaḅịa, pịkị onu nama se kikichụa á pịrịḅịa.

⁷Á mangị árị-na-iḅiọkụma sime apụma ḍukoḅịa ọkụma árị ineda ini la-ẹkẹ. Árị ini ḍọkịḅịa ọkụma árị ineda ini ọrịḅo-ẹkẹ. Anịsịkị á nwọ ḅẹḅịa, “À so ị̀ya tatarị deḅọ ḅe damamunḅịa—anịsịkị anị iḅi ị̀ pịrịtẹịn mịọkụ nẹngịmẹ.”

⁸Árị ineda ḅereni ọkịkẹ na, ị̀rị̀ anị fịayemgbọlụ na iru na oliv pulo na seleḅa mamgba na, goli ma na, se á pịrị se á se Beal ḅe tẹkẹtẹkẹye-ẹ.

⁹Anịẹrẹchị sokusịkị lasịkị, àrị ị̀ya ḍiepịrịayema ọkịḅịa anị, fịayemgbọlụ na iru na à pịkị á se ḅụchụaye mịẹ wulu ma na lọkọ-ḅịtẹ ma na ọkịḅịa.

¹⁰Árị-na-iḅiọkụma sime apụ tọrọkọ ḅụ àrị á se papaḅụ sinḅịa pịkị ineda ị̀ya kụrọ mị ḅụ á ḍụaḅịaḅọ ofori-ẹ.

¹¹À kikichụa arịa alalị mamgba pịrịḅịa—kụra-kụra na akalụ-akalụ alalị ma na, Ịnyọsara Ene mịẹmịẹaye ma na— koḅiria ma na.

¹²Arịa irumịẹ chịnmgbọlụ ozuma na figi chịnma na, anị á ḅẹ na árị-na-iḅiọkụma sime apụma se á pịrịayema á nwẹngị ini pịrị fịrịḅụ, àrị àrị kọsịmaḅịa. Arịa irumịẹ chịnmgbọlụ ozuma na chịnmgbọlụ ozuma na àrị àrị pịkị piri ele mịẹḅịa; se piri-a nama àrị kọsịmaḅịa.

¹³À fomuḅara se á pịrịḅịa, árị ị̀ se ḅieḅarama sịkị ma gose, anị árị insẹnsị dọkịma Beal ḅe pịrị sịkị, ye ḅiri, ịla sụka se árị-na-iḅiọkụma sime apụma ḍukomaḅọrọ-arị sịkị. Nyanaḅọ Ḅe Ò ḍikosam.

¹⁴Anịẹrẹchị à pịkị árị ọkị onwun ele ḅie mun aḅẹ; anịju à ḅẹlẹma ọkwẹịn se á ḍaḅoḅịa.

¹⁵Á tatarị nyana ḅọrọsa irumịẹ chịnmgbọlụ ozuma à nwọse á pịrịḅịa, se “Ḅụfụka Pẹsịkiri” mị à anị mịẹḅịa anị ḅo ḅọrọ nyọ sọ mun kụrọkuḅie nyọ laḅịa. Anịju, árị ire ḅụ sime se Ijipt ḅie ḅụ ḅo sịkị árị ị̀ ọkị ḅara, á nwọse ị̀ ọkịḅịa.

¹⁶Anịsịkị á pịkịḅo kpoto árịa deḅọ se ị̀ chịnḅịa—á ḅarị árịa Beal se ị̀ chịn ẹkẹ.

¹⁷À pịkị ḅarị jenejene ḅereni ẹkẹ á Beal ẹrẹ mị go.

¹⁸Anịsịkị ḅụ à piri ḅie owoi-a nama mamgba na fenima na ọḅọkụ fịḅịa, mịẹso sịkị àrị yese ị̀ya tomonima lama-ẹka-ọkụ. À pịkị ama mị ḅie owuniaye goyegoye sinḅịa, kongo na lubu na, se à ḍọkịḅo ọrịḅịa na ị̀ya tomonima, dein na kokoḅara ḅụ na ini angamẹ.

¹⁹Izrẹl, àrị ị́ se ị̀ ta mịẹḅịa; À karakaraye mịẹḅịa pịkị kuḅie-se-ḅụgbanaḅọ-nwọ sọḅịa; À binka-ḅẹlẹma na ḍikiḅụgerere na nwọse ị́ ḍieḅịa pịkị ị́ se ị̀yaye mịẹgbasoḅịa.

²⁰À ḅereniye à nwọ kokoḅịa se àrị ị́ se ị̀yaye mịẹḅịa, se ị́rị́ ị̀ ḅereni ọkịḅịa Nyanaḅọ ḅaraḅụ.

²¹Anịsịkị ḅụ àrị ị̀ya tomoni Izrẹlapụma tẹkẹma nwọ pẹkẹrẹḅịa. À mịẹse ene koroḅịa sẹkiri ḅie, se kiri mị fịayemgbọlụ na tụmgbakị elelenda na oliv na pakụmaḅịa.

²³Àrị ị̀ya tomonima mịẹchịẹmaḅịa ama mị ḅie se mịẹye-inia-ḅarasọḅịa. À ḅẹlẹma se “Ḅẹlẹmaka” nwọse chịn apụma ḍieḅịa, pịkị “Ị̀ya-Tomonikẹ” à nwọse chịn apụma na. À nwọ ḅẹḅịa, “Ómine ị̀ya tomoni-ẹ,” se ini pẹkẹrẹḅịa, “Ị́rị́ mịna Tamụnọ-ẹ.”