Read kirikeni Hosia 4 Bible Online

Hosia 4 - kirikeni bible

Hosia 4

¹Nyanaḅọ Ḅe ò ḍuko mị ama ḅie anga apụma tịḅị gbanaḅịa gbọrịye ọ̀ nwọ nyanamẹ. Izrẹl, ò ḍukoye mị poki: “Kuḅie-se-ḅụgbana anịkanịka ḅẹlẹma ofori-ẹ ama mị ḅie, pịkị tomonima ini Tamụnọ ḅara se ị̀ ḅerenikẹ.

²Ini yeḅereniḅịa pịkị àrị kansinḅịa; ini iruo kọnkọnmẹ pịkị nweni ḅaaḅaamẹ pịkị furufurumẹ, pịkị sẹfịfịmẹ. Siamịẹye ma àrị sẹnịmẹ se nini ḅụ nweni ḅaa mị ḅo mịẹmịẹye nwọ sọsam.

³Anịẹrẹchị, ama mị anị samịnaḅịa, se anịa ḅie angaye layelaye fịḅịa. Anịa ḅie sime namama na feni mamgba na, injima na fịḅịa.”

⁴Nyanaḅọ Ḅe nwọ ḅẹmẹ, “Gbọrịḅọ sọ ye se tomonima tịḅị gbanama, anịkanịka ini ḍiki ịganịma—ị̀ya ḅẹrẹ mị ómine agbamịẹapụma ọgọnọ anị omi-ẹ.

⁵Ḍin na enekaka na ómine iriaḅẹ, pịkị ịkịankoroapụma iḅi ọ́ nẹngịkẹ. Àrị Izrẹl, ọ́mịna nyengima kankọsịma-ẹmuaḅẹ.

⁶Ị̀ya tomonima ini fasam anịatịḅị ini ị̀ ḅerenikẹ. Ómine agbamịẹapụma ómine ị̀ ḅereni ḍụkụkẹ, se à se ó ḍieaye ma ọ́ sịkịmẹ, anịẹrẹchị àrị ómine sịkịmẹ, à pịkị ḅarị agbamịẹapụ ḅara nwọse ọ́mịna awọma ọkị ẹkẹ.

⁷“Ómine agbamịẹapụma, ọ́ ḅaka la-ọkụ anị ọ́ pịkị ḅakama ị̀ mịẹirima la-ọkụ-ẹ, anịẹrẹchị, àrị ọ́ nyana osi ma pịkị ḅụgerere ḅụ chuḅịa.

⁸Ị̀ya tomonima mịẹ sima ḅụ ọ́ ḅọrọ ala kọnmẹ, anịẹrẹchị ó ḅimẹ ini si-nwẹngị kọnma mun.

⁹Ómine sọ, tomonima la gbọrị fomuḅara ọ́ laḅịa! À fomuḅara se ọ́ pịrịḅịa se àrị ọ́ mịẹḅịa, ọ́ mịẹirimaye ma ọ́ nwọ gbẹịn.

¹⁰Ọ́mịna agbama ḍiekiri ọ́ nwọ fịḅịa, ọkụma, fịye pa ọ́ tarịḅịa. Awọ pịrịpịrị oru ma ọ́ nwọ tẹkẹḅịa, ọkụma ọ́ pa awọ nyana ẹkẹ, anịatịḅị ómine ị̀ ḅụ ḍarịma se oru ma ḍukosam.”

¹¹Nyanaḅọ Ḅe nwọ ḅẹmẹ, “Olomu iru na ịwọ iru na, ị̀ya tomonima tịḅịḅie-ḅẹlẹkị ma furu ọkịaḅẹ!

¹²Chịn pẹkẹrẹ ḅara anị ini yegbelarịye-ẹ na anị yepufinji ini pịrị-ẹ. Chịn pẹkẹrẹ anị ini nemi ḍọkịarịye ḍuko ini pịrịḅịaye-ẹ! Ini ị̀ wẹrịsosam. Ama nwẹngị eremeniḅọ sime ọkụ ini inia ḅụ ma se oru ma pịrịsam.

¹³Osiḅụ sime-a nyọma ḅụ, gele tụndụma ọgọnọ ini agba mịẹmịẹmẹ, pịkị chịngịma ọgọnọ sime nangwọ ejema chuku ini insẹnsị dọkịma dọkịmamẹ, anịatịḅị arịa chuku ḅie ma opuma deinmẹ! “Anị ḅo paka ḅaraḅụ, ọ́mịna eremeni awọma ini amanwẹngịapụ sọsam, se ọ́mịna owuapụ awọma na sime eremeni ma ini sẹfịsam.

¹⁴Anịsọ mịn mị gose à fomuḅara se ini pịrị-ẹkẹ, anịatịḅị ómine sọ ómine Oputẹkẹwarị ḅie amanwẹngịapụ ma na nwẹngị nwẹngịmẹ, se pịkị ini na gboloma oru tẹkẹ apụ agbama mịẹmịẹmẹ. Kaḅo mị ḍuko ḅaraḅụ, ‘Nemi-tịḅị-ḅie nyanakapụma ini faḅie sọḅịa.’

¹⁵“Ómine Izrẹlapụ, ó kuḅie-se-ị̀-ḅụgbanaka-sọ, ye Juda sọ anị ḅẹrẹsi mị nyanama. Gilgalị anịkanịka Bẹt-Avẹn nyọ ḅụ, ọ́ tẹkẹma, anịkanịka ḍumogbaso Nyanaḅọ Ḅe ẹrẹ se anị nyọ yeḅerenima.

¹⁶Izrẹlapụma, ini yepụra asụn ḅe ininachịn ọkụ se ininachịn ḍinmẹ. Nde à wẹrị opu eleogbo osueinma ọgọnọ fịye se anana awọ koko ọkụ se ini kokoḅịa ọkụ?

¹⁷Izrẹlapụma ini oru-kụrọ-chuku-ḅie omi-ẹ. Ye ini inia ateli da.

¹⁸Ini ḅakama iru ḅusosịkị, ini inia amanwẹngị mị ḅụ ḅieḅẹlẹmẹ se ḅụgerere nemika mị ḅẹlẹmatẹịn osi nẹngịmẹ.

¹⁹Fọrụ ini deki soḅịa, se ini mịẹmịẹ oru agbama inia ḅụgereremaḅịa.