Read kirikeni Hosia 5 Bible Online

Hosia 5 - kirikeni bible

Hosia 5

¹“Ọ́ mịn mị poki, ómine agbamịẹapụ! Ọ́ tọrụ gbẹlẹma, Izrẹlapụ! Ó poki ómine amanyanaḅọ furo awọ! Ọ́ tọrụkụnka ḅara se ḅẹrẹkọn gbẹịnmẹ—anịẹrẹchị ḅẹrẹkọn mị ọ́ tịḅị ọgọnọ anị gbanaḅịa! Ọ́ ḍẹịn sọsam Mizpa mị ḅie, anịsịkị ómine inji kun ịgbọ sọsam Tebọ Tụndụ mị ọgọnọ,

²anịsịkị gbun olulu ọ́ nwọsọ mẹ Akasia Opuama ḅie; anị gose à fomuḅara se ómine mgba pịrịḅịa.

³Izrẹl mị sime ọkụ à nemimẹ—anị ineda ị̀ tọrụkuḅu ḅọị ẹkẹ. Anị ḅarị kuḅie-se-ị̀-ḅụgbanakẹ, anịatịḅị ị̀ tọrụkuḅu ọ́ fịafịakẹ.”

⁴Tomonima mịẹ siaye ma ini kikisam vinpịkị inia Tamụnọ Ḅe damamun ḅụ. Oru tẹkẹ mị kụrọ ḅara se ini ọlọsam, ini ḅarị ineda Nyanaḅọ Ḅe ḅereni ọkịkẹ.

⁵Izrẹlapụma inia ḅụdekichịẹma mị, anị inia ọgọnọ oloku owumẹ. Inia sima mịẹse inia ḅụọma tọmbụlọmẹ se ini ḅịkịmẹ, Juda apụma sọ, ini ini ḍuko ḅịkịmẹ.

⁶Ini inia ananama na nambuloma na se agbamịẹ Nyanaḅọ Ḅe pịrịmẹ; ọkụma anị se ini mịẹ iḅi ofori-ẹ. Ini ineda ọ̀ ḍọkịḅo ẹkẹ anịatịḅị ori ini wẹrịsosam.

⁷Ini Kuḅie-se-Nyanaḅọ Ḅe ḅụgbanakẹ; inia awọma, ini sime ọ̀ pịrịkẹ. Anịẹrẹchị, mịọkụ ini na inia amama na ḅọlọka sịkị ḅụ kanḅịa.

⁸Ó Gibia ḅie owuni-epelepe ma ofuro! Rema ḅie ḅalafa-ḅerijine ḅara ọ́ nwọse nyọ fiema! Bẹt-Avẹn ḅie ómine owuni-paịn ma kọn! Ómine owu ḅie sọ Bẹnjamin owuapụ!

⁹Fomuḅara ene mị anị ḅoaḅẹ, se Izrẹl mị anị kanḅịa. Izrẹlapụ mịn mị kọkọma pakaḅịa!

¹⁰Nyanaḅọ Ḅe nwọ ḅẹmẹ, “Àrị ịganịmẹ, anịatịḅị Juda tịḅịnịma inia eke mị ḅọrọ se mun Izrẹl ama mị ọkịmẹ. Anịẹrẹchị àrị opu ḅụfụka se ini pịrịḅịa.

¹¹Izrẹl mị anị pụnụma tọrụsiọrị anị nwọ ọrịaḅẹ; jokoma sime anị pịrị kiri anị nwọ famasam, anịatịḅị anị mun ye nyanakapụ ḅara ḅarachụa ḍọkịmẹ.

¹²À fa se ḅo Izrẹl mị pịrịḅịa se pịkị Juda apụma kanḅịa.

¹³“Izrẹl mị ḅo anị obi-arị-ọkụ ọrị sịkị, se Juda mị pịkị ḅo anịaḅụ ịnọ ma ọrị sịkị, anị Izrẹl mị so Asiria-sẹda opuḅọ ḅe damamunye ḅarachụa ḍọkịḅụ, ọkụma ori ineda ini gwọ kẹ anịkanịka inia ịnọ ma ḅịamakẹ.

¹⁴Àrị owu se Izrẹl na Juda na pakaḅịa, chịrịḅa ḅe ḅara mị. Ị̀rị̀ na mịnaḅụ na ḅarana ini kankọsịmaḅịa se àrị ini wẹrịsoḅịa. Àrị ini fọnọsoḅịa sịkị gbọrịḅọ sọ ineda ḅo ini ḍụa ẹkẹ.

¹⁵“Àrị ị̀ya tomonima sarakoromaḅịa ọkịmun ini iḅiọkụma tọrụsiọrị sịkị laḅịa inia íría nwẹngị ma gose, se ini ị̀ ḍọkịmaḅoḅịa. Ḅụtimaka, inia tọrụsiọrị ma ḅie, ini ḅụkụrọma ị̀ ḍọkịḅoḅịa.”