Read kirikeni Hosia 8 Bible Online

Hosia 8 - kirikeni bible

Hosia 8

¹Nyanaḅọ Ḅe nwọ ḅẹmẹ, “Ḅerijine ḅalafama oloku mị kọn! Tarakapụ igo tu-koro-ọkụ tu ị̀ya ama koro aḅẹ! Àrị ị̀ya tomonima na fị ọḅọkụ mị, ini kansam, se ini ininachịn à se ini ḍieaye ma pịrịsam.

²Ị̀rị̀ inia Tamụnọ-ẹ ini nwọ ḅẹmẹ, ini ḅerenimẹ na ini ma ị̀ya tomoni-ẹ, ini pịkị ị̀ nemimẹ nwọḅẹ sọ,

³ini iḅiye mị sịkịsam. Mịn mị gose inina-tarakapụma ini ini ḍukoḅịa.

⁴“Ị̀ya tomonima ini amanyanapụ sẹlẹmẹ, ọkụma ini ngẹrị inia ḅarakuḅuye mịẹmẹ. Ini tịḅịnị tọnmẹ, ọkụma ị̀ya kụrọ ḅụkẹ. Ini inia goli ma na seleḅa ma na ọkị se oru tẹmẹmẹ anị inia fị dekiḅoḅịaye ma-ẹ.

⁵Sameria opuama mị ḅie sime-a tomonima tẹkẹarị goli-goli nambulo ḅe, à taraka se ọ̀ wẹrịmamẹ. Àrị opuma ini ḍiki-kuḅie-simẹ. Anị ḅọlọ mun che sịkị la se ini inia oru ma ḅụ ḅarasinḅe?

⁶Izrẹl gbọrị tẹmẹnịḅọ anị oru mị tẹmẹye-ẹ, anị mị pịkị tamụnọkẹ ngịsị! Sameria ḅie ini tẹkẹarị goli-goli nambulo ḅe pẹkẹrẹ-pẹkẹrẹ ḅụ ọ̀ kọsịḅịa!

⁷Ini nwọ fọrụ mị ḍipi sịkị, irisi mị ini sokuḅịaye-ẹ! Ḅịaka ịpịamgba ozu ineda fịfịye chụa ẹkẹ. Ọkụma anị fịaye chụasọ, igoniapụ mị anị fị sinḅịaye-ẹ.

⁸Izrẹl mị anị ḅo jịn ama kịkẹsam, se ḅo yeḅụsọka fị ḅẹlẹ pẹkẹrẹ sime ọkụ simesam.

⁹Piriḅie-owoi-yepụra asụn ininachịn ọkụ, Izrẹlapụma inia ḅụḅẹlẹ nyọ nwọ dasam. Ini so Asiria ḍọkịmamunsam ḅarachụa gose, se pịkị jịn sẹ ọkọsam na ini ḅo ini ḍikiḍiki.

¹⁰Ọkụma mịọkụ àrị ini koḅiri gboloma se fomuḅara se ini pịrịḅịa. Ḅọlọ ẹkẹ ini oju akụ nyanaḅịa Asiria sẹdaḅọ ḅe ori ini pụndaḅịa sịkị.

¹¹“Izrẹlapụma ini si-de-sinḅịa agbamịẹ ẹbẹ ma ini nwọ namarị sịkị re, ini si mịẹ-anyọ nyanatẹịnmẹ!

¹²À ḅakama ḍawọaye gịẹịn pakụma tomonima pịrịmẹ, ọkụma ini àrị sịkịmẹ se kịrị ḅara na jịn ama aye na ḅarase àrị ọkịmẹ.

¹³Ini agba mịẹ ị̀ pịrịmẹ se pịkị agbamịẹ namama ọkị pẹịmẹ. Ọkụma, Ị̀rị̀, Nyanaḅọ Ḅe, ị̀ kuḅie ḅẹlẹ ini pịrịkẹ, se mịọkụ àrị inia sima se ḅiekoroma se fomuḅara se ini pịrịḅịa àrị ini pịkịma Ijipt fịrịmaḅịa!

¹⁴“Izrẹlapụma ini amanyanaḅọ odo nama sarasam, ọkụma ini ini Tẹmẹḅọ Ḅe se ḅieḅaramasam. Judapụma, owuni ineda tolu sọẹka kụrọ opuama ini nwọ namasarasam. Ọkụma à fịnị fịrịma inia amanyanaḅọ odo ma na opuamama na ḍọkịma kiri saraḅịa.”