Read kirikeni Joẹl 2 Bible Online

Joẹl 2 - kirikeni bible

Joẹl 2

¹Epelepe mị ofuro, Zaịyọn Tamụnọ Ḅe oria osiḅụ sime chịngị mị ọgọnọ ḅoarị ḅalafamaye mị oloku pakụma. Judapụ, ọ́ ḅụgeregere nyana! Nyanaḅọ Ḅe ene mị ḅoaḅẹ ḅọlọka sịkị ḅụ.

²Anị ene mị kanakana kpo ḅalafama ene sọḅịa, kurukuru pịkị soḅuno ḅeinḅịa ene-ẹ. Igurube ogboma ḅoarị ḅara anị kanakana tụndụma gbẹịn gbitipuma ọkụ simemẹ. Ọkọsimeye jenejene ma pakakẹ, anị pịkị ḅarị ngịsị paka ẹkẹ.

³Fịnị yesima ọkụ, ịnyanya na chịn na àrị fị famamẹ. Kiri mị arịa tọrọkọḅụ Idẹn Ozu mị kịkẹmẹ, ọkụma arịa ọḅụju ye oforika papa onwun ele-ẹ. Arịa ḅara gbarịye ngịsị ofori-ẹ.

⁴Asụn sime ọkụ anị àrị sime ọkụ-ẹ; owuni asụn mangị ọkụ àrị nwọse mangịmẹ.

⁵Àrị ḍosi ḍosi tụndụma kpọlịarị sịkị, owuni kporokporo nyọ fiemarị ọkụ simemẹ; samịna osuein fịnị ḅie kpapoloarị ọkụ simemẹ. Owusọḅịa owuni kpo sụngụma ḅụkarakarama owu pịrị ọkụ, anị àrị sime ọkụ-ẹ.

⁶Àrị ḅoarị sịkị, tomoniḅọ goyegoye ḅalafamẹ; tomoni tọrụ goyegoye mụọma ḅịamẹ.

⁷Àrị owuni owupaka-ọkụ se owu pakamẹ; owuni warị agbagba kpọlị ọkụ anị àrị kpọlị ọkụ-ẹ. Arịmgba àrị gbụsụnụma nwẹngịma mun aḅẹ, àrị pịkị ḍinma jịn anga dakẹ àrị mun-arị nyọ sikima

⁸àrị pịkị irima irima nwẹngị jịnye jịnye ateli ḅie sọkẹ. Àrị kpo ḅụ kikichụa àrị pịrị aye ḅie toluḅọrọmẹ ineda kikichụa àrị pịrịḅịaye pịkị ofori-ẹ.

⁹Àrị mangị opuama mị damẹ; àrị mangị onu ma saḅa ḅọrọmẹ; àrị warịma tanjịmẹ se furu apụ ḅara àrị nwọse pẹlẹ ḅọkọ ma ḅie toluḅọrọmẹ.

¹⁰Àrị mun-arị sịkị sẹkiri mị jikemẹ; so mị geregeremẹ. Ịrụa mị na akalụ mị na kanakanamẹ, lolia ma sọnị ḅarị ḅịakẹ.

¹¹Nyanaḅọ Ḅe ori ekerea ḅẹrẹtọn oria owunima pịrịmẹ. Ọ̀ ḅịpị poki poki owunima ini ḅaka se pịkị ịnyọ nyanamẹ. Nyanaḅọ Ḅe ene mị nde anị ḅalafamaḅịa ọkụ! Tụḅọ anịa ḅie ḍumoḅe?

¹²“Ọkụma mịọkụ sọnị,” Nyanaḅọ Ḅe nwọ ḅẹmẹ, “ọ́ karakara ḅara se si ḅụ vinpịkị se ị̀ damaḅo, ḅurukụnma ḅụ na owu ḅụ na pịkị ngịrị ḅụ na.

¹³Ye ọ́mịna kansa kuḅie ma ọ́mịna ngịrị mị ḍiepakụma; ọ́mịna ḅụchụayema ọ́ nwọ kan arịye mị anị yemịẹkẹ.” Ó vinpịkị Nyanaḅọ ọ́mịna Tamụnọ Ḅe damaḅo. Ori iḅi mịẹmịẹmẹ ḍikiḅụgerere pịkị ọ̀ ḅụ ḅeinmẹ; ori inema nyanamẹ, ọ̀ pịkị ò ḅereniye mịẹmịẹmẹ; sịkịmamgba ọ̀ ḅụ karakaramamẹ si ḅụ ḅarasin fomuḅara pịrịkaḅụ.

¹⁴Sosi Nyanaḅọ ọ́mịna Tamụnọ Ḅe ori ò kuḅie ḍinma se ḅakama fịaye ḅụ ọ́ ḅẹlẹmaḅịa. Anịsịkị ómine ineda ịpịamgba na iru na nwọse ḍiepịrịaye agba mịẹ ọ̀ pịrịḅịa.

¹⁵Zaịyọn Tụndụ ọgọnọ epelepe mị ofuro; ekere gbolo tomonima koḅiri se ó ḅurukụnma!

¹⁶Tomonima koḅiri gboloma; olomu apụma chịnḅo; awọmẹnịma koḅiri pịkị ḅara ḅie sime awọmẹnị na. Ama na ere na anị ịwọma sime deḅọ na ịrọḅọ na sọnị ini inia warịma wẹrịso se ḅo, ini karakarama se ini osi nyana koḅiria sọ.

¹⁷Agbamịẹ ẹbẹ mị na, ḅọrọ Oputẹkẹwarị sọḅịa ḅọkọ mị na ogboku agbamịẹ fịrịnwẹngị Nyanaḅọ Ḅe pịrịarị apụma gbarịmaka ḅaraḅụ ini owu se tẹkẹ: “Nyanaḅọ, ḍikitịḅịfoin nyana ị́ya tomonima pịrị. Ḅerenima jịn sẹ wa ḍikisima se wa kombo se nwọ ḅe na ‘Nde ọ́mịna Tamụnọ Ḅe?’”

¹⁸Anịeso Nyanaḅọ Ḅe ò ḍiepakụmamẹ na ama mị oriaye-ẹ; ò ḍikiḅụgerere nyana oria tomonima pịrịmẹ.

¹⁹Ori inia ḅịpị pẹkẹrẹmẹ: “Mịọkụ àrị ịpịamgba na iru na oliv pulo na se ọ́ pịrị-ẹmun-aḅẹ, pịkị ómine na deinḅịa. Jịn sẹ ḅarị ngịsị ómine ḍikisima ẹkẹ.

²⁰Ọgọnọju ḅụ ḅo igurube ogboma à àrị sinḅịa se arịa ḅie da aye à nwọ de onwun ele ḅie chuḅịa. Arịa ḅie tọrọkọ da ayema à àrị de Fị Tọrụ mị ḅie chuḅịa, se ọḅụ da ayema Mẹditirenia Tọrụ ḅie sọḅịa. Arịa fịsa ojuma fụrụḅịa. Àrị se ọ́ mịẹaye mamgba gose à àrị famaḅịa.

²¹“Ozu, ọ́ ḅalafa nyana ma, ọkụma ó ḅieḅẹlẹ ḍoroku Nyanaḅọ Ḅe mịẹ ọ́ pịrịsa aye mamgba gose.

²²Nama, ọ́ ḅalafa nyana ma. Osuein ma àrị wiliwilisam; chịnma arịa chịnmgbọlụma àrị nwọ chụaḅịa, irumịẹ chịnmgbọlụ na tụmgbakị elelenda na pịkị ḅakaḅịa.

²³“Zaịyọn apụ, ó ḅieḅẹlẹ, ó ḍoroku Nyanaḅọ ọ́mịna Tamụnọ Ḅe mịẹ ọ́ pịrị ayema gose. Oḅoku sịkị ḅụ ene mengi koro gbẹịn ḅara ọ̀ nwọ seni ómine pịrịsam; fọngụ sịkị ene ọ̀ nwọ ọsụn sara ọ́ pịrịsam, ịrụa kpoin sịkị na fọngụ sịkị na ogboku tatarị sịkị ḅụ korokoro gbọrị ene ḅara mị ọ̀ nwọse ọ́ pịrịmẹ.

²⁴Ịpịamgba pịsịrị nyọma ḅie ịpịamgba ḅeinḅịa; ye pọnjị pọnjị pakụma nyọma anga ḅụ sime olulu ma ḅie iru na oliv pulo na ḅein wa ḅịa.

²⁵Ọ́ fama ayema à se pịkị ọ́ pịrịḅịa anị igurube ogboma ọ́mịna fịayema fị-a kụra ma ḅie. Ị̀rị̀ anị ma igurube ogboma se ọ́ fịrịmaye-ẹ na àrị ómine dapaka.

²⁶Mịọkụ ọ́ fị se ómine tanḅịa fịaye ọ́ ḅakama nwọ nyanaḅịa. Nyanaḅọ ọ́mịna Tamụnọ Ḅe ómine ó tokoniḅịa, anị ḅụgbiripumaye mịẹ ọ́ pịrịpịrịḅọ ḅe. Ị̀ya tomonima nweni ḅarị ngịsị ini ḍikisima ẹkẹ.

²⁷Anịsịkị, Izrẹl, ó nemiḅịa na ọ́mịna ogboku àrị omi-ẹ, na Ị̀rị̀, Nyanaḅọ Ḅe anị ọ́mịna Tamụnọ Ḅe-ẹ jụmḅọ ngịsị ofori-ẹ. Ị̀ya tomonima nweni ḅarị ngịsị ini ḍikisima ẹkẹ.”

²⁸Nyanaḅọ Ḅe nwọ ḅẹmẹ, “Sịkị mị anị ḅoaḅẹ àrị ị̀ya tomonima na simeḅịa pịkị sosikima kụrọ se ḅọḅọ pịrịḅịa: ọ́mịna owuapụ awọma na eremeni awọma na ini ị̀ya fịrịma ḍukopakụmaḅịa; ọ́mịna ḅie olomu apụma ini ḍawọḅịa, anịsịkị ọ́mịna ayamburama awọma ini tẹmẹ-ḅie-aye-ọrịḅịa.

²⁹Anịsịkị à pịkị sosikima kụrọ se ọ́mịna fịrịnwẹngị apụ ama na ere na pịrịḅịa.

³⁰“Anị ene mị ḅụ, ḅeri nụnụ elekima à nwọse so mị na sẹkiri mị na pịrịḅịa; pulo ọsụn na, fịnị na pịkị soḅuno onwoin na pakaḅịa.

³¹Ịrụa mị kanakana kpeḅịa, akalụ mị pịkịḅo tomoni-oju-pulo ḅara kịkẹḅịa, ma ayema ḅọrọ tẹrẹrẹ, anị Nyanaḅọ Ḅe oria ḅalafama ene mị ḅoḅịaye-ẹ.

³²Ọkụma Nyanaḅọ Ḅe ḅara ḅarachụa ḅi apụ mamgba ini ḍụaḅọrọma nyanaḅịa. Nyanaḅọ Ḅe ḍuko ḅaraḅụ, ‘Jerusalẹm ḅie dapụ pịọrụ soḅịa; à sẹlẹ ọkịsapụ ma ini ḍumoḅịa.’ ”