Read kirikeni Joẹl 3 Bible Online

Joẹl 3 - kirikeni bible

Joẹl 3

¹Nyanaḅọ Ḅe nwọ ḅẹmẹ, “Judapụma na Jerusalẹm apụma na ye ini na tọrọkọ tọrọkọ mun à nwọse ini pịrịḅịa sịkị.

²À sẹsẹ mamgba chịnḅo Ḅẹrẹkọn Pẹsịkiri mị ḅie koḅirimaḅịa. Anịnyọ à ḅẹrẹkọn ini pịrịḅịa ini seni ị̀ya tomonima mịẹaye ma gose. Ini Izrẹlapụma galagalama jịn-a sẹma ḅie sẹịnmẹ, se ini ị̀ya ama Izrẹl mị ḍia ọkịmẹ.

³Ini ịkịan wakị se owu ḅie ini kun apụ ma ọkịḅịa apụ nwọ gbela nemimẹ. Owuapụ awọma na eremeni awọma na omoniapụ ḅara ini nwọse ini dẹrịmẹ, igbiki mị seni sẹfị ere na iru na gbẹịnḅịa gose.

⁴“Taya na Saịdọn na pịkị Filistia nyọma ḅụ sime sẹ mamgba, cheye ọ́ nwọse ị̀ mịẹ ḍọkị-ao? Ó ye seni pịkịma ị̀ gbẹịn ḍọkị-ao? Ómine ọkọ mịẹ ḍọkịmẹ ḅẹḅẹ, à giririma anị pịkịma ọ́ gbẹịnḅịa!

⁵Ị̀ya seleḅa ma na goli ma na ó dekisam, ị̀ya yela ngọma sọ ọ́ pịkị nwọ dekimun ọ́mịna oru-a warịma ḅie chusam.

⁶Judapụma na Jerusalẹm apụma na, ómine ini kun so mẹ inia sẹma na mun opuma ḅọlọ nyọ ḅụ Grik apụ dẹrịmẹ.

⁷Mịọkụ ómine ini dẹrị-a nyọma ḅie à mun ini ọkịpakụmaḅo-ẹ mun aḅẹ. À se ọ́ mịẹḅịa, ó seni ini mịẹaye ma.

⁸À mịẹḅịa ọ́mịna owuapụ awọma na eremeni awọma na ini nwọse Judapụma dẹrịḅịa; ini ini se jokoma opuma ḅọlọ nyọ ḅụ Sabịapụ ma dẹrịḅịa. Ị̀rị̀, Nyanaḅọ Ḅe, à ḍukosam.

⁹“Mị ḅẹrẹ mị sẹsẹ ma ḅie ó ḍukopakụma: ‘Ọ́ ḅụkarakarama owu pịrị; ọ́mịna owunima ọ́ nwọ chịn koḅirima se ọ́ nwẹngị tọrọkọ mun!

¹⁰Ọ́mịna kiri soku ayema ḅịpị okolo ma ọ́ ḅakụ pẹmpẹm ma àrị se okola-agiji mịẹ, ọ́ pịkị ó se nyọ pẹlẹpẹlẹ agiji ma nwọse angwa mịẹ. Gbarịmaka ḅaraḅụ, ịnyọ nyanaka apụma sọnị ini owu sọḅịa.

¹¹Sarama ḅo, ómine kelema koro sẹ mamgba, se ó ḅo pẹsịkiri mị ḅie koḅiria.’ ” Yei Nyanaḅọ, ị́ya owunima fịrịma ḅo ini owu se ini paka!

¹²“Sẹsẹ ma àrị ḅụkarakaramaḅịa gbarịmaka ḅaraḅụ, se Ḅẹrẹkọn Pẹsịkiri mị ḅie ḅoḅịa. Anịnyọ anị Ị̀rị̀, Nyanaḅọ Ḅe kpọnjị sime se ḅẹrẹkọn anịnyọ kelema sẹ mamgba pịrịḅịaye-ẹ.

¹³Inia tịḅịḅie opuma kụrọmẹ; fịaye soku sịkị ịpịamgba pẹlẹ ḅara nwọse ini pẹlẹ sara; se iru mịẹḅịa tụmgbakị elelenda pọnjị nweni iru anịa ḅie paka ḅoḅo ḅara nwọse ini pọnjị.”

¹⁴Mẹndẹ oyiasi fịnjị fịnjị Ḅẹrẹkọn Pẹsịkiri mị ḅie omi-ẹ. Anịnyọ ḅụ anị Nyanaḅọ Ḅe ene mị ḅọlọka sịkị ḅoḅịaye-ẹ.

¹⁵Ịrụa mị na akalụ mị na àrị kanakanamẹ, lolia ma sọnị ḅarị pịkị ḅịakẹ.

¹⁶Nyanaḅọ Ḅe Zaịyọn Tụndụ ọgọnọ ḅụ ori ekereamẹ; ọ̀ pụkọ Jerusalẹm ḅie ḅụ soalagba ḅara nwọse fiemẹ; sẹkiri na so na geregeremẹ. Ọkụma ori owu sọ oria tomonima pịrịḅịa.

¹⁷“Anịsịkị, Izrẹl, ị́ nemiḅịa na Ị̀rị̀ anị Nyanaḅọ ị́ Tamụnọ Ḅe-ẹ. Ị̀ya osi nyana chịngị, Zaịyọn ọgọnọ àrị angamẹ. Jerusalẹm mị anị osi nyana opuama sọḅịa; igoniapụ ngịsị ḅarị ineda anị inuma ẹkẹ.

¹⁸Anịsịkị ḅụ, tụndụma, iru mịẹ-a chịnmgbọlụ ozu àrị gbẹịnḅịa, tomoni pịkị chịngị goyegoye ọgọnọ nambulo na nwọ ọrịḅịa; Juda ḅie ideri mengi mamgba ḅakama mengi nyanaḅịa. Gbọrị ideri mengi Nyanaḅọ Ḅe oria Oputẹkẹwarị ḅie ideri paka mun Ọjị ejema sime Pẹsịkiri mị ḅie saraḅịa.

¹⁹“Ijipt mị anị pịkịḅo onwun ele sọḅịa, Idọm mị pịkị kansarasa papa nyọ sọḅịa, anịatịḅị ini owu seni Juda ama mị paka se anịa ḅie ḅẹrẹnemikapụ ḅaamẹ.

²⁰Ini ḅaa apụma tịḅị so owu à nwọ ḅiḅịa; ḅẹrẹḅarasiapụma àrị ini wẹrịso-ẹkẹ. Ọkụma Juda na Jerusalẹm na tomoni arịa ḅie anga gbamasoḅịa, Ị̀rị̀, Nyanaḅọ Ḅe, à pịkị Zaịyọn Tụndụ ọgọnọ angaḅịa.”