Read kirikeni Emọs 3 Bible Online

Emọs 3 - kirikeni bible

Emọs 3

¹Izrẹlapụ, Nyanaḅọ Ḅe ọ́mịna ḅụ ḍukoye mị ọ́ nwọ poki, anị ómine Ijipt ḅie ori ọkịpakụmaḅo bebe sẹ mị:

²“Mị tomonikiri sime sẹ mamgba ḅie ómine kẹngẹ anị à nemi pịkị abalasaye-ẹ. Anị ọ́mịna sima mịẹse àrị ḅalafamaye sọsaye-ẹ, pịkị anị à gose, arịa tịḅị ḅụ, fomuḅara se ọ́ pịrịḅịaye-ẹ.”

³Mama owuapụ ineda sakị nwẹngị gbolomaḅe, ini ḅịpịse-ogbosọka simeogbo?

⁴Chịrịḅa ḅe piriḅie ò kun pẹịḅịa ye ọrịka se ekereaḅe? Kala-chịrịḅa ḅe, oria pokolo ḅie ò ye kun pụnụka simeogbo ò ḅie ḍarịḍarị?

⁵Feni-ḍẹịn ineda feni kunḅe, feni fịfịye ini nwọse ḍẹịn mị tuka ọkụma? Ḍẹịn mị fukuḅe, ye anịa ḅie koroka ọkụma?

⁶Opuama ḅie owuni oḍu mị, papa fie se tomonima ḅalafa ẹka? Ḅụfụka opuama gbolo-gbolo, Nyanaḅọ Ḅe anị fịrịmaka simeogbo?

⁷Kụrọmamgba Nyanaḅọ Ḅe, ọ̀ gbọrịye sọ mịẹmịẹkẹ, ọ̀ mịẹḅịaye ọ̀ nwọ mịẹḅelema oria fịrịnwẹngịapụ, ịkịankoroapụma pịrịka simeogbo.

⁸Chịrịḅa ḅe ekerearị sịkị, tụḅọ ḅalafa ẹka? Kụrọmamgba Nyanaḅọ Ḅe ọkwẹịn sịkị tụḅọ ineda oria oku mị ọlọchịẹma ḅe anị ḍukoka ḅụ?

⁹Ḍukofinjima Ijipt na Ashdọd na amanyanapụ odo ma ḅie angapụma pịrị: “Ó koḅiria, Sameria kelema tụndụma nyọ, se paka opu galagala mị ḍiki pịkị tomonima anịnyọ mịẹmịẹ siamịẹmịẹaye ma na.”

¹⁰Nyanaḅọ Ḅe ọkọ ḅẹmẹ, “Mịnapụ ma, simịẹmịẹye ḅụ na kụrọ ḅaraḅụ na nyanaḅo aye ọkịḅo inia opu-awarị ma ḅeinmamẹ. Furuka ḅara se anga mị ngịsị ini nemikẹ.

¹¹Anịgose tarakaḅọ inia ama jụkelemaḅịa, kikichụaye ma kanḅịa, pịkị inia opu-awarị ma kanguluguluma se arịa ḅie yema ọfọịnḅịa.”

¹²Nyanaḅọ Ḅe ọkọ ḅẹmẹ, “Anana ḍikiḍikiḅọ ḅe, chịrịḅa ḅe pẹị se kọnḅịa nama ḅụọ anịkanịka gbọrị ḅeri kẹngẹ ọrị se anị sime ọkụ, anị Sameria apụma ḅụ kalapụ kẹngẹ ḍumoḅịa ọkụ-ẹ, anị mịọkụ lọkọlọkọ ḅie seletiarịapụ ma.

¹³Mịọkụ poki, pịkị Jekọb ḅe ḅụ koroḅo apụma ḅerijine,” Kụrọmamgba Nyana Opuḅọ Ḅe ọkọ ḅẹmẹ.

¹⁴“À fomuḅara se Izrẹlapụma pịrịḅịa ene inia sima gose à Bẹtẹl Agbamịẹ ẹbẹ ma kansinḅịa. Agbamịẹ ẹbẹ ma ịkọlị mamgba anyị kirikoroḅịa.

¹⁵Oḅoku sịkị na ọfịrị sịkị na warịma à kansinḅịa. Oḍu-se-ḅirima warịma kankoro kọsịḅịa; opu warị goyegoye à kansinḅịa.”