Read kirikeni Emọs 9 Bible Online

Emọs 9 - kirikeni bible

Emọs 9

¹À Nyanaḅọ Ḅe ọrịmẹ ẹbẹ mị angasịkị ọ̀ chịẹwaraḅẹ. Ọ̀ kụrọ pịrịmẹ: “Oputẹkẹwarị ogbo chịnma ọgọnọ ọ́ kụrọma ḅakụ mịẹso sịkị anịa chuku mị jikeḅịa ọkụ. Àrị kan se àrị tomonima tịḅị ọgọnọ sara. À kọn-a tomonima ḅaaḅịa owu ḅie. Gbọrịḅọ sọ so ẹkẹ; pịọrụḅịaḅọ ofori-ẹ.

²Ini inia ateli ma soku mun fịapụma sẹkiri la sọ, àrị ini kunḅịa, ini tanjị mun soḅie la sọ, àrị ini ọkị koromaḅịa.

³Ini nemikase Kamẹl Tụndụ mị ọgọnọ ḅọị sọ, àrị ini ḍọkị se ini kunḅịa. Ini ị̀ ḅụ ḍarịmamun tọrụ mị chuku ḅie ḅọị sọ, à kụrọ se tọrụ ḅie sime ojuju ḅe pịrịḅịa ori ini onwoin.

⁴Nemikase inina-tarakapụma ini kunsomẹ nwọ ḅẹḅẹ, à kụrọ se ini pịrịḅịa ini ini se fịḅie-chu. À kuḅie kụrọmasam àrị ini famaḅịa, à ḅarachụa ini pịrị ẹkẹ.”

⁵Kụrọmamgba Nyanaḅọ Ḅe ḅarase kiri mị lamamẹ, se anị gịẹịn pumẹ; anịnyọ angapụ mamgba kururumẹ. Bebe sẹkiri mgba sịsẹ se pịkị ḅịkịmẹ Naịl Tọrụ mị sịsẹ se pịkị iderima ọkụ.

⁶Nyanaḅọ Ḅe soḅie ori oria warị namamẹ, sẹkiri mị ọgọnọ ò so mị kpomgbo ochu mị gbanamẹ. Ọ̀ tọrụ ma ḅie mengi ma chịnḅo se àrị se sẹkiri ọgọnọ saramẹ. Oria ẹrẹ anị Nyanaḅọ!

⁷Nyanaḅọ Ḅe ọkọ ḅẹmẹ, “Izrẹlapụ à koroma nyana ọ́ pịrị ọkụ anị à pịkị nyana Sudan apụma pịrị ọkụ-ẹ. Ị̀rị̀ anị Krit ḅie Filistia apụma ọkịḅoye-ẹ, pịkị Kị ḅie Siriapụ ma ọkịḅoye-ẹ, anị àrị Ijipt ḅie ómine ọkịḅo ọkụ-ẹ.

⁸Ị̀rị̀, Kụrọmamgba Nyanaḅọ Ḅe, à mịn si ḅụḅein Izrẹl amanyanakiri mị ẹnyẹ-aḅẹ, à pịkịna anị famaḅịa tomonikiri mị tọrụkuḅu. Ọkụma à Jekọb ḅe ḅụ koroḅo apụ mamgba fama ẹkẹ.

⁹“À kụrọ mị pịrịḅịa se Izrẹlapụma jikeḅịa, fịayemgbọlụ jike ọkụ, fun sẹlẹye ḅie. Àrị ini jikeḅịa sẹma ḅie, se yesọkapụ ma sinḅịa.

¹⁰Ị̀ya tomonima ḅie simịẹye nyanapụ ma, owu ḅie ini ini ḅaaḅịa—anị ‘Tamụnọ Ḅe ò ḅereni ẹkẹ yese-nweni lamaḅịaye ḅo yese walama nwọḅẹ apụ mamgba.’”

¹¹Nyanaḅọ Ḅe nwọ ḅẹmẹ, “Gbọrị ene ḅoaḅẹ à Devid amanyanakiri mị pịkịmaḅoḅịa, anị kansarasa warị kịkẹ nyọ mị. Àrị anịa onu ma tẹlịmaḅịa. À kpoto anị namaḅịa se anị ḅo tatarị sịkị anị sime ọkụ simeḅịa.

¹²Anị ḅụ, Izrẹlapụma ini Idọm ḅụ kọn-a nyọma nẹngịmaḅịa, pịkịna gbọrị sịkị ḅụ sime ị̀ pịrị sẹ mamgba na,” Nyanaḅọ Ḅe ọkọ ḅẹmẹ, anị mịn mị mịẹse anị pịkị mịẹḅịa ḅẹḅọ ḅe-ẹ.

¹³“Ene ma àrị ḅoaḅẹ,” Nyanaḅọ Ḅe ọkọ ḅẹmẹ, “anị fịayemgbọlụ be sẹnị ini anị sokuḅịa sịkị ḅọrọḅịa, pịkị tụmgbakị elelenda be sẹnị irumịẹ sịkị mị nẹngịḅịa. Tụndụ ma ḅụ ḅẹlẹ iru saraḅịa, chịngịma pịkịna anị se ideriḅịa.

¹⁴Àrị ị̀ya tomonima pịkịma ama mị ḅoḅịa. Ini kpoto inia kan opuamama namaḅịa se anịnyọ angaḅịa; ini irumịẹ chịnmgbọlụ ozu ḍipiḅịa se iru mị ḅuḅịa; ini ozu ḍipiḅịa se ini ḍipi pakụmaye ma fịḅịa.

¹⁵Àrị ị̀ya tomonima ḍipi chịẹmaḅịa à se ini pịrị ama ḅie, ngịsị ini ḅarị ini jinesin ẹkẹ.” Nyanaḅọ ọ́mịna Tamụnọ Ḅe ori ọkwẹịnsam.