Read kirikeni Jona 3 Bible Online

Jona 3 - kirikeni bible

Jona 3

¹Nyanaḅọ Ḅe pịkị gbọrị sịkị se ọkwẹịn Jona ḅe pịrịmẹ.

²Ori ọkọ ḅẹmẹ, “Ninivẹ mun, anị ḍụḅa opuama mị, se ḍuko wasama tomonima pịrị, à ḍuko ị́ pịrị oku mị.”

³Anịḅụ Jona ḅe Nyanaḅọ Ḅe ḅịpị poki se Ninivẹ mun mẹ, ama mị ḍụḅa la ọkụ gose, tẹrẹ-a ene anị nwọ ọkịmẹ se nwẹngị mun ama mị ḅe kuluma la.

⁴Jona ḅe opuama mị ḅie ọ̀ sakịmẹ, se bebe gbọrị ene ọ̀ nwọse nwẹngị ḅọrọso sịkị, ò ḍukopakụmamẹ, “Ḍin-a mesi laḅịa sịkị Ninivẹ mị faḅịa!”

⁵Ninivẹ-a tomonima Tamụnọ Ḅe oku mị ḅerenimẹ. Mịn gose ini tọnpẹlẹmẹ na nwenimgba ḅuruseḅụḅaama, opu apụ ọkịmun bokatẹịn apụ la, okuru ḅiriaye nwọ ḅiri, se ḍiepakụma na, inia sima ḅụ ini pịkịsam.

⁶Ninivẹ amanyanaḅọ ḅe anị naa sịkị, ori oria emine mị ọgọnọ sịsẹ mun oria amanyanaḅọ ḅụchụaye mị sinkoroma, se okuru ḅiriaye ḅirimẹ, pịkị fọn ḅie kpọnjị simemẹ.

⁷Ori oku se Ninivẹ-a tomonima sẹịnma kelema se nwọ ḅẹmẹ: “Mịn anị amanyanaḅọ ḅe na oria fịrịtịḅịnị ma na ḅara ḅo kụrọ oku-ẹ. Gbọrịḅọ sọ yefịma, tomonima na, nambuloma na, ananama na àrị yefị ẹkẹ, pịkị mengi ḅu ẹkẹ.

⁸Tomoni mamgba na namama na, okuru ḅiriaye ḅiri. Tomoniḅọ goyegoye kụrọma Tamụnọ Ḅe tẹkẹ pịkị nụḅọ sitịḅị na siamịẹmịẹye ma ḅụ ḅarasin.

⁹Ḅụtimaka Tamụnọ Ḅe ori ò kuḅie ḍinmaḅịa; ọ̀ pịkị ine oria ịganị ḅụ dachịẹḅịa, se wa fị ẹkẹ!”

¹⁰Tamụnọ Ḅe ori ini mịẹye mị ọrịmẹ, ori ọrịmẹ na inia sitịḅị-a mịẹmịẹayema ḅụ ini ḅarasinsam. Anịḅụ ori ò kuḅie ḍinmamẹ se ḅarị fomuḅara se ini pịrịkẹ ọ̀ tọnse ọ̀ mịẹḅịa nwọḅẹ ḅaraḅụ.