Read kirikeni Kịẹnḅịpị Ma 11 Bible Online

Kịẹnḅịpị Ma 11 - kirikeni bible

Kịẹnḅịpị Ma 11

¹Gbọrị ene tomonima sakị inia ḅụfụka ma na gbolomaye se Nyanaḅọ Ḅe suamẹ. Nyanaḅọ Ḅe àrị naa sịkị, anị ori ịganịmamẹ, se ọ̀ fịnị seni tomonima ḅụ saramẹ. Se ini pike koḅirima sime anga mị ḅụ gbọrị agbagba sime apụma ḍọkịma famamẹ.

²Tomonima owu Moziz ḅe pịrịmẹ na ọ̀ ḅarachụa ini pịrịye-ẹ; ọ̀ Nyanaḅọ Ḅe tẹkẹmẹ, se fịnị mị binmẹ.

³Anịẹrẹchị ini nwọse nyọ mị chịnmẹ Tabẹra,[1] anịatịḅị anịanga mị Nyanaḅọ Ḅe fịnị inia ogboku kọrị pakaye-ẹ.

⁴Izrẹlapụma na mun-arị igoniapụ omi-ẹ. Ini opuma nama gose kpalakpalamẹ, se Izrẹlapụma sọnị pịkị sakị inia ḅụḅẹlẹkaye nwọ ḍukomẹ: “Wa ḅọrọ nemikase nama nyanaḅịa ọkụma!

⁵Ijipt ḅie wa ḅi inji la-ọkụ-la-ọkụ mị wa pẹịpẹịye-ẹ, pịkị yelakẹ. Wa fịfịyema ó se ḅiekoroma, kukumba na, mengi mengi egusi na, achara na, ayo ma na, pịkị galik ma na?

⁶Ọkụma mịọkụ ịnyọ ḅarị mịnaḅụ ofori-ẹ. Wa fịḅịaye ngịsị ḅarị ofori-ẹ—eneḅeneḅene mịn gbọrị mana mị sikima jịnye ofori-ẹ!”

⁷(Mana mị ḍọkọḍọkọ chịnmgbọlụ sime ọkụ simemẹ, ḅịaḅịa pịkị odo tọrụ mị anị nyanaye-ẹ.

⁸Ḍin ḅụ anị ijiriji mị na korokoromẹ ini pike koḅirima sime anga mị ḅụ. Eneḅasa ḅẹḅẹ ini pakamun anị gbalagbala mẹ, ini ineda anị gbẹịn anịkanịka temi se fịlawa mịẹḅịa, se ini anị chụọ se anị se patala patala keki mịẹmịẹmẹ. Ini oliv pulo se mịẹ fịturu pụkọ anị nwọ nyanamẹ.)

¹⁰Moziz ḅe tomonima mgba kpo kpo ḅụ inia ikowarịma ḅọkọ ma ḅụ chịẹ sime se ini mbụrụmbụrụ àrị ọkụ mị nwọ naamẹ. Anị opu ḅụḅalaḅala seni ọ̀ pịrịmẹ anịatịḅị Nyanaḅọ Ḅe iniaḅụ ori ịganị nyanamẹ,

¹¹ọ̀ nwọse Nyanaḅọ Ḅe ḅẹmẹ, “Cheye gose ị́ nwọ sime si se ị̀ mịẹ? Cheye gose ị́ ị̀ ḅụ ḅụosọ nyana? Cheye gose ị́ nwọ sime ḅaka tomoni se ị̀ ḅara sịsịma na ị̀rị̀ ngẹrị ini ḍikiḍiki-ẹ?

¹²Ị̀rị̀ ini tẹmẹkẹ ị̀rị̀ pịkị ini yikẹ! Cheye gose ị́ ị̀ ḅẹ na à tọkụ ḍẹkịḅọ ḅarase ndondo àrị awọ ḍẹkị ọkụ se ini ḍẹkị mun ị́ ḅereni inia ḅieju-aḍapụma pịrị ama mị la-ẹ?

¹³Nde anga àrị ineda mịna tomonima mgba karaḅịa nama nyanaḅo ḅe? Ini owuaḅẹ, pịkị ị̀ ḅara nama ḅiaḅẹ.

¹⁴Ị̀rị̀ ngẹrị ineda mịna tomonima mgba ḍikiḍiki-ẹkẹ; ini ḅaka ị̀ nẹngịmamẹ!

¹⁵Mịn ị́ seni ị̀ mịẹḅịa ọkụ-ẹ ḅẹḅẹ, pa ị̀ ḍikitịḅịfoin se ị̀ ḅaasin, mịẹse à ḅarị ị́ se ị̀rị̀ na kọn àrị si anga mị inemama mun-ẹka ḅara.”

¹⁶Nyanaḅọ Ḅe nwọse Moziz ḅe ḅẹmẹ, “Osi nyana owuapụ ḅụ kịnị-a tesioyifịnjị nwọ koḅirima koroma anị tịḅịnị sọ tomonima pịrị ḅịa-apụ, ini se à pakaḅoḅo Ikowarị mị ḅụ ḅo, se ini ḅẹ ini anịanga ị́ anga sịkị chịẹ sime.

¹⁷À koroḅo ị́rị́ na ọkwẹịnḅịa anịanga ḅụ, se à se ị́ pịrị sosikima kụrọ mị ḅụ ye ọkị se ini pịrịḅịa. Anịsịkị ini ineda ḅarachụa ị́ pịrị se ị́ tomonima ḍikiḍikiḅịa, ị́rị́ ngẹrị ḅarị anị deki-ẹkẹ.

¹⁸Mịọkụ nwọse tomonima ḅẹ, ‘Ómine ọ́ ḅụ se osiḅụ wẹrị ọkịmun ḅa la; ọ́ pẹịḅịa nama ọ́ nyanaḅịa. Nyanaḅọ Ḅe ọ́ kọn owu mị ọ̀ naasam na ọ́ pẹịḅịa nama ọ́ nwọ ḅimẹ, na Ijipt mị ḅie ye ómine na iḅitẹịnmẹ. Mịọkụ Nyanaḅọ Ḅe ọ̀ nama se ọ́ pịrị se ọ́ pẹịḅịa.

¹⁹Gbọrị ene na mama ene na ḅe pẹịyekẹ, anịkanịka sọnọ-a ḍin, anịkanịka oyi-a ḍin, anịkanịka si ḍin ḅe yekẹ,

²⁰ọkụma bebe gbọrị akalụ laḅịaye-ẹ, ọkịmun anị ó ḅerima ḅie pakaḅo sịkị laḅịa, ọkịmun ómine anịḅe obi kọn sịkị laḅịa. Anị ọkọ mịẹḅịa anịatịḅị mịanga ọ́mịna ogboku sime Nyanaḅọ Ḅe ómine ọ́ sịkịsam se ḅẹmẹ na mgbọkụ ngịsị Ijipt mị ḅie ọ́ pakaḅo-ẹkẹ.’”

²¹Moziz ḅe nwọse Nyanaḅọ Ḅe ḅẹmẹ, “Mịanga sọnọfa poku iniasi la apụ à nwọ datekeremaḅẹ, se ị́ nwọ ḅẹ-ao na bebe gbọrị akalụ ḅụ ini pẹị se ini karaḅịa nama ị́ nwọse ini pịrịḅe?

²²Nde nde sime nambulo na anana na nụḅọ nwọ ḅaa se àrị ini karaḅe? Opu tọrụ mị ḅie sime injima mgba ọkụma ini karasa?”

²³Nyanaḅọ Ḅe nwọse ọ̀ pẹkẹrẹmẹ, “Ị̀ya kụrọ mị anị dachịẹ anga omi?” “Ḅọlọka sịkị ḅụ ị́ ọrịḅịa nwọfa à ḍuko yemị mịẹḅịa na mịẹ-ẹka na!”

²⁴Anị Moziz ḅe pakaso Nyanaḅọ Ḅe ḍuko yemị ḍuko ini pịrịye-ẹ. Tịḅịnị-a tesi oyi fịnjị ọ̀ nwọ koḅirima Ikowarị sime nyọ ḅụ koromamẹ.

²⁵Anịsịkị Nyanaḅọ Ḅe soḅuno mị ḅie koroḅo se ọkwẹịn ọ̀ pịrịmẹ. Ò se Moziz ḅe pịrị sosikima kụrọ mị ḅụ ò kele ye ọkị se tịḅịnị kịnị-a tesi oyi fịnjịma pịrịmẹ. Sosikima kụrọ mị ḅo inia ḅie sọ sịkị ini ịkịankoro apụ ḅara se olokumẹ, ọkụma ḅọlọ sịkị lakẹ.

²⁶Tịḅịnị kịnị-a tesi oyi fịnjịma ḅie mama apụ, anị Eldad ḅe na, Medad ḅe na, ini pike sime nyọ mị ḅụ ini simemẹ se Ikowarị ḅie ini sọkẹ. Anịanga ḅụ sosikima kụrọ mị mun inia ḅie sọmẹ, se ini sọnị ịkịankoroapụ ḅara nwọse olokumẹ.

²⁷Gbọrị asẹmẹnịḅọ mangị pakamun Eldad ḅe na Medad ḅe na mịẹarịye ḍuko Moziz ḅe pịrịmẹ.

²⁸Anị Jọsụwa Nọn yaḅe, anị ma ò boka sịkị ngịsị ḅarachụa Moziz ḅe pịrị sime ḅọḅe nwọse Moziz ḅe ḅẹye-ẹ, “Ini kiki, sẹnịḅọ!”

²⁹Moziz ḅe nwọse ọ̀ pẹkẹrẹmẹ, “Ị́ kpaịnma ị̀ ḅụ iḅi ḍọkị? À ḅimẹ Nyanaḅọ Ḅe ọ̀ sosikima kụrọ mị se tomonima mgba pịrị se ini mgba ịkịankoroapụ ḅara se oloku.!”

³⁰Anị Moziz ḅe na Izrẹl mị ḅe tịḅịnị kịnị-a tesioyifịnjịma na vinpịkị so ikowarị mị sime nyọ mun ye-ẹ.

³¹Bẹkẹma ḅaraḅụ Nyanaḅọ Ḅe fọrụ fịrịma se, anị oputọrụ mị ḅụ kwẹl ọkịḅomẹ, kiri ḅụ arịa fin ḅe gele tẹrẹ-a ḅụọ nẹngịkẹ. Ini pike sime nyọ mị ḅụ àrị dẹ simemẹ pịkị anị kelema koro nyọ mị mgba ḅụ na; ọkịmun tọn-a tombi lamẹ anga anga ḅụ.

³²Anịẹrẹchị anị bebe ene mị mgba na, bebe ḍin mị mgba na, pịkị anịkanakoro bebe ene mị mgba na; kwẹl kun fịrị ḅụ kẹngẹ mị ini simeye-ẹ; iniaḅụ pakamun mẹndẹ oyiasi fịnjị lakaye tanḅọ ofori-ẹ. Ini àrị seni ini pike sime nyọ mị mgba ḅụ wasama koroma se àrị ịrụọmẹ.

³³Ini pẹịḅịa ye pa pịkị ḅakama nyọma ḅu sarasimemẹ, anịgose, Nyanaḅọ Ḅe ori ịganị ini pịrịmẹ, anịẹrẹchị ọ̀ mịẹmẹ amanwẹngị obi inia ogboku sakịmẹ.

³⁴Anị nyọ mị ini nwọse anị chịnmẹ Kibrọt Hatava (anị nwọ fiemẹ “Opu tọrụmgbọlụ nyana-apụ Iḍupuma,”) anịatịḅị anịanga mị ini nama pẹịye gose opu tọrụmgbọlụ nyana-apụma ḍipiye-ẹ.

³⁵Ini anịju ḅụ so Hazerọt mị mun, se anị nyọ ḅụ pike ịnyọsara simemẹ.