Read kirikeni Kịẹnḅịpị Ma 12 Bible Online

Kịẹnḅịpị Ma 12 - kirikeni bible

Kịẹnḅịpị Ma 12

¹Moziz ḅe Kọsh eremeniḅọ ọ̀ nwọ simemẹ, se Miriam ma na Erọn ḅe na ò se fiemẹ.

²Ini nwọ ḅẹmẹ, “Nyanaḅọ Ḅe Moziz ḅe ḅụ kẹngẹ ọ̀ ḅọrọ ọkwẹịnmẹ anịka? Mịna ḅụ ọ̀ ḅọrọ ọkwẹịnka?” Nyanaḅọ Ḅe ini ḍuko yemị naamẹ.

³(Moziz ḅe ḅụiderimaḅọ-ẹ, ọ̀ ḅụiderima tẹịn bebe sẹkiri mị ḅie sime apụ mamgba nẹngịmẹ.)

⁴Bẹkẹma ḅaraḅụ Nyanaḅọ Ḅe nwọse Moziz ḅẹmẹ, Erọn ḅe na, pịkị Miriam ma na, “À ḅimẹ ómine tẹrẹ apụma pakaso à pakaḅoḅo Ikowarị mị nyọ ḅo.” Ini mun mẹ,

⁵se Nyanaḅọ Ḅe soḅuno mị ḅie koroḅomẹ, ori Ikowarị mị ḅọkọ ḅụ chịẹ, se ini chịnmẹ, “Erọn! Miriam!” Ini mama apụma nwẹngị tọrọkọ mun mẹ,

⁶anị Nyanaḅọ Ḅe nwọse ini ḅẹye-ẹ, “Mịọkụ à ḍukoḅịa yemị ọ́ nwọ poki! Ọ́mịna ogboku sime ịkịankoroapụma tẹmẹ ḅie finjiye ḅụ anị àrị ị̀ ḅụ se ini ḍieḍieye-ẹ, à pịkị ḍawọ ḅụ wẹrị ọkwẹịn ini pịrịpịrịmẹ.

⁷Àrị ị̀ya fịrịnwẹngịḅọ Moziz ḅe na ọkwẹịn ọkwẹịn ḅara mị kịrịmẹ; àrị ò se ị̀ya tomoni Izrẹlapụma mgba ḍikiḍiki ḅọ nwọ mịẹmẹ.

⁸Anịẹrẹchị à tọrụ na tọrụ na ọkwẹịn ọ̀ pịrịpịrịmẹ, ḅelema, kaḅo ḅaraḅụkẹ; dada à sime ọkụ mị sọnị ori ọrịsam! Nde ó gose dadama ị̀ya fịrịnwẹngịḅọ Moziz ḅe ḍukosimaye?”

⁹Nyanaḅọ Ḅe iniaḅụ ori ịganị nyanamẹ; anịẹrẹchị ori iniaḅụ ḅụ sikima sịkị

¹⁰soḅuno mị sọ Ikowarị mị ḅụ kanso mẹ se ḅụkan obi anị kirikiri Miriam ma ojukiri ḅụ saramẹ se á ḅo jaịnma ḅịamẹ. Erọn ḅe á ḍiki se obi mị arịmgba gbẹịn ọkụ mị nwọ ọrị sịkị,

¹¹ọ̀ nwọse Moziz ḅe ḅẹmẹ, “Sisi, sẹnịḅọ, ḅerenima se wa mị mịna yenemika si mị ḅe fomuḅara da.

¹²Á wẹrịsoma se á ḅo fị pịkị ḅụrụ se ini yi oju pẹkẹrẹ á nwọ kịkẹ.”

¹³Anị Moziz ḅe oloku owu Nyanaḅọ Ḅe pịrịye-ẹ; “Yei Tamụnọ, á gwọ!”

¹⁴Nyanaḅọ Ḅe nwọse Moziz ḅe pẹkẹrẹmẹ, “Nemikase ḍawu ḅe fụla se á tọrụ sara ọkụma á sọnọma ḍin se ḅụgerere ḅụ sime ẹka? Ye ini sọnọma ḍin se á depakụma ikowarị odo mị ḅie, anị ḅọrọso sịkị ini pịkị á daḅo chuḅịa.”

¹⁵Sọnọma ḍin ḅụ Miriam ma ikowarị mị odo mị ḅie ini á depakụmamẹ, se tomonima ḅarị ḅụọpọkọka mun ini á daḅo chu sịkị lamẹ.

¹⁶Anịeso tomonima Hazerọt mị wẹrịso se mun Peran piri ele mị ḅụ pike simemẹ.