Read kirikeni Kịẹnḅịpị Ma 14 Bible Online

Kịẹnḅịpị Ma 14 - kirikeni bible

Kịẹnḅịpị Ma 14

¹Bebe ḍin mị mgba tomonima inia ḅụḅalaḅala ḅụ sime oloku owumẹ.

²Ini Moziz ḅe na Erọn ḅe na se mbụrụmbụrụ se nwọ ḅẹmẹ. “Ijipt mị ḅie sime fị anịkanịka mịanga piri ele mị ḅie sime fị mị iḅitẹịnmẹ!

³Cheye gose Nyanaḅọ Ḅe ọ̀ wa ọkị se anị ama mị mun-ao? Ọmụ ḅie ini wa ḅaaḅịa, ini pịkị mịna erema na awọma na kun soḅịa. Vinpịkị so Ijipt mun mị iḅitẹịn ẹka?”

⁴Anịẹrẹchị ini nwọse jụmḅọ jụmḅọ ḅẹmẹ. “Ó ye wa mịna tịḅịdaḅịa gbọrịḅọ sẹlẹọkị, se vinpịkị so Ijipt mị mun!”

⁵Anị Moziz ḅe na Erọn ḅe na tomonima mgba tọrọkọ ḅụ inia tịḅịtuye-ẹ.

⁶Se Jọsụwa Nọn yaḅe na Kelẹb Jẹfunẹ yaḅe na, anị ama ẹnyẹapụ ma ḅie ḅụ mama apụma, kururu ḅụ inia ḅụchụayema kanye-ẹ

⁷se nwọse tomonima ḅẹmẹ, “Wa mun ḍikikelema ama mị karakara ma iḅi ama-ẹ.

⁸Wa nemikase Nyanaḅọ Ḅe ḅụḅẹlẹye mịẹ ọkụma, ọ̀ wa se anị lọkọlọkọ pịkị fịye pakụma ama mị mun, se anịse wa pịrịḅịa.

⁹Ómine ininachịn Nyanaḅọ Ḅe pịrịma, ọ́ pịkị anị anga sime apụma ḍikiḅalafama. Ini nẹngịma mị sarasaramẹ mịnaḅụ. Nyanaḅọ Ḅe ómine na omi-ẹ, ọ̀ pịkị ini ḍikiḍikiarị oru ma nẹngịmasam; anịẹrẹchị ọ́ ḅalafama.”

¹⁰Bebe sẹ mị mgba imgbele deki se ini gbinḅa ḅimẹ, ọkụma bẹkẹma ḅaraḅụ tomonima Nyanaḅọ Ḅe oria ḅoma mị ọrịmẹ Ikowarị mị ọgọnọ ḅụ anị ḅịa pakamẹ.

¹¹Nyanaḅọ Ḅe nwọse Moziz ḅe ḅẹmẹ, “Mịna apụma ini ị̀ sịkị mun che sịkị laḅe? Ini kuḅie se ị̀ ḅụgbanaka mun che sịkị laḅe, à tọn-a ḅụgbiripumaye inia ogboku nwọ mịẹsam ḅẹ sọnị?

¹²Àrị amanwẹngị obi seni ini fịrịma se ini ḅaasinḅịa, ọkụma àrị ị́ seni ḍaḅọ mịẹ opu sọ pịkị kụrọ ini nẹngị sẹ mịẹḅịa.”

¹³Ọkụma Moziz ḅe nwọse Nyanaḅọ Ḅe ḅẹmẹ, “Ị́rị́ Ijipt mị ḅie mịna apụma ọkị pakụmaḅomẹ ị́ya kụrọ ḅụ. Ijipt apụma ị́ se ị́ya tomonima mịẹye naaḅịa sịkị,

¹⁴ini anị ḍuko mị ama mị ḅie anga apụma pịrịḅịa. Mịna apụma ini naa ḅọrọsam na Ị́rị́, Nyanaḅọ Ḅe, ị́ mine na omi-ẹ, na ị́ya soḅuno mị mịna ọgọnọ ḅụ dachịẹ sịkị wa tọrụ se ị́ ọrịmẹ, ị́ pịkị tọrọkọ ịsụn wa pịrịpịrịmẹ soḅuno mị ḅie enekaka ḅụ, ị́ pịkịna fịnị ḅẹlẹ mị ḅie ḍin ḅụ, tọrọkọ ịsụn wa pịrịpịrịmẹ.

¹⁵Mịọkụ ị́ nemikase ị́ya tomonima mgba ḅaasin ọkụma, ị́ya ẹrẹso mị naasa sẹma ini ḅẹḅịa

¹⁶na ị́ya tomonima piri ele mị ḅụ ị́ nwọ ḅaasinmẹ anịatịḅị ị́ ḅereni ini pịrị na ị́ se ini pịrịḅịa nwọḅẹ ama mị ị́ ḅarị ineda ini se mun lakẹ.

¹⁷Anịẹrẹchị mịọkụ, Nyanaḅọ, àrị ị́ tẹkẹmẹ, ị́ya kụrọ mị se wa ḍie, pịkị ị́ ḅereni yemị mịẹ wa pịrị ị́ nwọ ḅẹmẹ,

¹⁸‘Ị̀rị̀, Nyanaḅọ Ḅe, à fịkịrị ịganị-ganịkẹ, à pịkị opu ḅẹlẹma nyana pịkị kuḅie se ḅụgbana gbẹịn ḍumo kọnkọnmẹ pịkị, si ḅụ ḅarasin pịkị ininachịn na wẹrịsosomẹ. Anịẹḅẹ sọnị à gbakịka ḅaraḅụ ḍapụma mịẹ sima gose à ḅụfụka se inia awọma na inia awọma yi awọma na pịrịpịrịmẹ ọkịmun tẹrẹ-a ḅụọ na inein-a ḅụọ na lalamẹ.’

¹⁹Mịọkụ, Nyanaḅọ àrị ị́ tẹkẹmẹ, sisi, siḅụ-ḅarasin mịna apụma pịrị, ị́ya opu ḍinmaḍinmaka ḅẹlẹma mị sime ḅaraḅụ, anị ini Ijipt mị ḅie pakaso sịkị ngịsị ị́ siḅụ-ḅarasin ini pịrịsa ḅaraḅụ.”

²⁰Nyanaḅọ Ḅe nwọse Moziz ḅe pẹkẹrẹmẹ, “À siḅụ-ḅarasin ini pịrịḅịa ị́ ḅisa ḅaraḅụ.

²¹Ọkụma à yeḅerenimẹ na pikipikiye ofori-ẹ à nwọ ḍumo warasịkị, ị̀ tọrụkuḅu mị pịkị nwọ sẹkiri mị ḅie ḅein warasịkị,

²²mịna apụma ḅụ gbọrịḅọ sọnị ḍumo mun anị ama mị ḅie sọẹkẹ. Anị nwọ ị̀ya opu mị ọrị, pịkị Ijipt mị ḅie na piri ele mị ḅie ḅụ na à mịẹ ḅụgbiripumaye ma ọrị sose oyi-asịkị na gbasịye nwọse ị̀ ḍaḍiki pịkị ị̀ ḅịpịpoki ḍụkụka apụma.

²³À ḅereni inia opu-aḍapụma pịrị ama mị ḅie ngịsị ini sọẹkẹ. Nwọ ị̀ sịkị apụma ḅụ gbọrịḅọ sọnị anịa ḅie sọẹkẹ.

²⁴Ọkụma ị̀ya fịrịnwẹngịḅọ Kelẹb ḅe iniaḅụ ọ̀ kịrị kuḅie nyanamẹ pịkị nyana ḅereni ị̀ pịrịmẹ nwọḅẹ ye gose, àrị ó se mun ó ḍikikelema ama mị lamaḅịa, se ò furo apụma pịkị ama mị ọkị nyanaḅịa

²⁵anị mịọkụ Amalẹk apụma na Kenan apụma na anị pẹsịkiri ma ḅụ anga nyọ mị. Ḅa ó vinpịkị piri-ele mị ḅie ḅụ Awụ Tọrụ mị ḅe ateli mị ḅie sọmun.”

²⁶Nyanaḅọ Ḅe nwọse Moziz ḅe na Erọn ḅe na ḅẹmẹ,

²⁷“Mịna sitịḅịnyana apụma ini ị̀ se mbụrụmbụrụ mun nde sịkị laḅe? Ini ị̀ se mbụrụmbụrụ ayema à naa ḅara ḅakasam!

²⁸Mịọkụ, mị ị́ se ini pẹkẹrẹḅịa ọkụ-ẹ; ‘Àye karịfịmẹ na pikipikiye ofori-ẹ na, à nwọ ḍumo warasịkị, ó ḅi yemị, anị à pịkị mịẹ ọ́ pịrịḅịaye-ẹ. Ị̀rị̀, Nyanaḅọ Ḅe, ọkọ ḅẹmẹ.

²⁹Ọ́ kọkọma fịḅịa mị piri ele mị ḅie se ọ́mịna ḍụẹịnma pịkị papa sara simeḅịa. Anịatịḅị ómine ị̀ se mbụrụmbụrụmẹ, ọ́mịna ḅụ si kụra ḅụ sakị iwoma lasa ḅọ ḅụ anị ama mị ḅie sọḅịa ḅọ ofori-ẹ.

³⁰À ḅereni ọ́ pịrịmẹ na àrị anị ama mị se ọ́ pịrịḅịa ómine anịa ḅie anga, ọkụma ọ́mịna ḅie mun anị laḅịa ḅọ ofori-ẹ, Kelẹb ḅe na Jọsụwa ḅe na sikima ọkụma.

³¹Ọ́ nwọ ḅẹmẹ na ọ́mịna awọma ini ini kun soḅịa, ọkụma àrị ini ọkịmun ọ́ sịkị ama mị lamaḅịa, se anị inia ama sọḅịa.

³²Mịn piri ele mị ḅie anị ó sime fịḅịaye-ẹ.

³³Ọ́mịna awọma kụra mesi ini nwọse piri ele mị ḅie nwẹngịma ḅọrọḅịa, ọ́mịna ḅereni nyanaka mị ḅe tọrụsiọrị mị ọ́ nwọ ọrị nweni ọ́mịna ḅụ kuluma ḅọḅe fị sịkị laḅịa.

³⁴Kụra mesi ọ́ nwọse ọ́mịna si mị ḅe tọrụsiọrị nwọ daḅịa, ó se mun ama mị ḍikikelema ḍin-a mesi ma ḅụ gbọrị ene anị pịkị gbọrị kụra-ẹ. Ị̀rị̀ na taraka mị fieye ọ́ nwọ nemiḅịa!

³⁵Àye karịfịmẹ na mị à mịẹḅịa ómine nwọ koḅiri gboloma se ị̀rị̀ na tụḅụrụ sitịḅịnyanapụma mị piri ele mị ḅụ ómine mgba ọ́ fịḅịa. Ị̀rị̀, Nyanaḅọ Ḅe ọkọ ḅẹmẹ.’”

³⁶Moziz ḅe fịrịma pakụma mun ama mị ḍikikelema nwọḅẹ apụma vinpịkịḅo iruo ḅẹrẹ ḍuko tomonima pịrịmẹ, anị mị mịẹse ini Nyanaḅọ Ḅe se mbụrụmbụrụ mẹ. Anịẹrẹchị Nyanaḅọ Ḅe obi se ini gbin, se ini fịmẹ.

³⁷

³⁸Ama ẹnyẹ oyimaịn apụ fịnjịma ḅụ Jọsụwa ḅe na Kelẹb ḅe na kẹngẹ mị ḍumoye-ẹ.

³⁹Moziz ḅe Nyanaḅọ Ḅe ḍuko yemị ḍuko se Izrẹlapụma pịrị sịkị, ini ḅụakụ ḅara se kururumẹ.

⁴⁰Anịḅe eneḅa dede funfun ḅụ ini mun owu se chịngị-ọgọnọ sime sẹ mị paka-ẹmunmẹ, ini nwọ ḅẹmẹ, “Mịọkụ wa ḅụkarakaramasam Nyanaḅọ Ḅe wa ḅẹ nyọ mị munḅịa ẹrẹchị. Wa ḅerenimẹ na wa si mịẹsam.”

⁴¹Ọkụma Moziz ḅe nwọ ḅẹmẹ, “Nde mịọkụ ó gose Nyanaḅọ Ḅe ḅịpị kan àrị ye? Ọmụ ọ́ ḅara iḅi-ẹkẹ!

⁴²Ó munma. Nyanaḅọ Ḅe ori ọ́ ḅụ ofori-ẹ, ómine na tarakapụma ini ọ́ nẹngịmaḅịa.

⁴³Ó mun Amalẹkapụ ma na Kenan apụma na bịamaḅịa sịkị, ọmụ mị ḅie ini ọ́ ḅaasinḅịa; Nyanaḅọ Ḅe ori ọ́ ḅụ sime ẹkẹ, anịatịḅị ómine ò ḍukonwẹngị ḍụkụkẹ.”

⁴⁴Anịẹḅẹ sọnị ini pa dadama chịngị mị ọgọnọ sime sẹ mị mun mẹ, Nyanaḅọ Ḅe Ọḅọkụ Igbe mị na Moziz ḅe na ini na munkẹ nwọḅẹ sọnị.

⁴⁵Anịẹrẹchị anịanga anga Amalẹkapụ ma na Kenan apụma na mun ini na bịama se ini nẹngịmamẹ, ini ini ḍuko nweni mun Họma mị lamẹ.