Read kirikeni Kịẹnḅịpị Ma 20 Bible Online

Kịẹnḅịpị Ma 20 - kirikeni bible

Kịẹnḅịpị Ma 20

¹Tatarị akalụ mị ḅie bebe Izrẹl sẹ mị mgba ḅo Zin piri ele mị lase Kedẹsh ḅụ pike simemẹ. Anịanga Miriam ma fị se ini á ḍipimẹ.

²Ini pike sime nyọ mị ḅụ mengi ofori-ẹ, anị tomonima ḅo Moziz ḅe na Erọn ḅe na gbori kelema se

³ịmbụrụmbụrụ mẹ: “Mịna karaka wa mịna juo Izrẹlapụma na ḅụ sọ fị gboloma mị iḅitẹịnmẹ Nyanaḅọ Ḅe Ikowarị mị tọrọkọ ḅụ.

⁴Cheye ẹrẹchị ị́ wa ọkịḅo mị piri ele mị ḅie koroma? Mịẹse wa pa mịna namama na sọ fị gbolamaḅịa ọkụ mịanga?

⁵Nde ị́ gose Ijipt mị ḅie wa ọkị pakụma, mị si gbọrịye sọ ineda paka ẹka nyọ mị ḅoye? Ịpịamgba sọnị ofori-ẹ, figi sọnị ofori-ẹ, tụmgbakị elelenda sọnị ofori-ẹ, mgbafa sọnị ofori-ẹ, papa ḅuḅu mengi sọnị ofori-ẹ!”

⁶Moziz ḅe na Erọn ḅe na tomonima ḅụ sikima mun Ikowarị mị tọrọkọ chịẹmẹ. Ini inia tọrụma se kiri iḅomẹ se Nyanaḅọ Ḅe oria opu enekuḅu mị ḅịa ini damẹ.

⁷Nyanaḅọ Ḅe nwọse Moziz ḅe ḅẹmẹ,

⁸“Ọḅọkụ Igbe mị tọrọkọ sime chịn mị deki se ị́rị́ na Erọn ḅe na ó bebe Izrẹl sẹ mị koḅiri. Anịanga inimgba tọrọkọ ḅụ ọkwẹịn anịju sime ḍụparị mị pịrị, se mengi anịa ḅie sara pakaḅoḅịa. Mịn ḅara mị anị ị́ se ḍụparị mị ḅie mengi nyana ḅo tomonima pịrịḅịa ọkụ-ẹ, se ini na inia namama na anị ḅuḅịa.”

⁹Moziz ḅe ò mun chịn mị ọkịmẹ Nyanaḅọ Ḅe tọnsa ḅaraḅụ.

¹⁰Ori na Erọn ḅe na bebe sẹ mị koḅiri se ḍụparị mị tọrọkọ ḅomẹ, Moziz ḅe nwọse ini ḅẹmẹ, “Ó poki, ómine nyana ḅerenikapụ ma! Mịn ḍụparị mị ḅie wa mengi nyanaḅo ọ́ pịrị ḅe?”

¹¹Anị Moziz ḅe chịn mị dekichịẹma se anị se mama sịkị se ḍụparị mị fomuye-ẹ, se opu mengi anịa ḅie kan pakaḅomẹ, se tomonima na pịkị namama na anị ḅumẹ.

¹²Ọkụma Nyanaḅọ Ḅe ò Moziz ḅe na Erọn ḅe na ḍiki ịganịmẹ. Ọ̀ nwọse ini ḅẹmẹ, “Se Izrẹlapụma tọrọkọ ḅụ ị̀ya fịafịa kụrọ mị nemiḅịa ḅereni ọ́ nwọ nyanakaye ẹrẹchị, ọ́ ḅarị ini se mun à ḅereni ini pịrị ama mị la-ẹkẹ.”

¹³Mịn mị Mẹriba ḅụ anị pakamẹ, anị Izrẹlapụma Nyanaḅọ Ḅe se ịmbụrụmbụrụ nyọ mị, anị ọ̀ pịkị se ini ḍie nyọ mị-ẹ na ori anị fịafịaḅọ-ẹ.

¹⁴Moziz ḅe Kedẹsh mị ḅie ḅụ okunwẹngịapụ se Idọm amanyanaḅọ ḅe fịrịmamẹ. Ini nwọ ḅẹmẹ, “Mịn oku mị ọ́mịna mịnapụ Izrẹl sẹma se ọ́ sẹịnmamẹ. Wa ọrịsa tọrụsiọrị la-ọkụ ó nemimẹ,

¹⁵mịna olomu-a ḍapụma wẹrị so Ijipt mị mun ọkụ mị, anịanga wa anga mun tọn-a kụra nwọ lamẹ. Ijipt apụma si-anga ḅara se mịna olomu-a ḍapụma na kọnmẹ pịkị mine sọnị,

¹⁶wa anịẹrẹchị owu Nyanaḅọ Ḅe pịrịmẹ na ọ̀ ḅarachụa wa pịrị. Ọ̀ mịna owu mị naa se enjẹlḅọ seni wa sẹịnmamẹ, ori anị Ijipt mị ḅie wa ọkị pakụmaḅoye-ẹ. Mịọkụ Kedẹsh mị ḅie wa omi-ẹ, ị́ya sẹ mị eke mị ḅụ sime ama mị.

¹⁷Sisi ḅereni wa pịrị wa ị́ya ama mị ḅie tolu ḅọrọso mine na mịna namama na, ngịsị ateli mị wa anị kọkọrọḅọrọḅịa ọkụ ofori-ẹ, ọ́mịna ozuma ḅie wa sọẹkẹ, pịkị irumịẹ chịnmgbọlụ ozuma ḅie sọnị, ọ́mịna tiḅe ma ḅie wa pịkị mengi ḍuḅu-ẹkẹ. Ateli ogbo ḅụ mị wa sime mun wa ọ́mịna sẹ mị eke mị ḅọrọso sịkịlaḅịaye-ẹ.”

¹⁸Ọkụma Idọm apụma nwọse ini pẹkẹrẹmẹ, “Mịna sẹ mị ḅie ó tolu ḅọrọ mị wa ḅerenikẹ! Ó nemikase elekima ḍikimẹ ḅẹḅẹ, wa owu se ọ́ pakaḅịa.”

¹⁹Izrẹlapụma nwọ ḅẹmẹ, “Ateli ogbo ḅụ wa simeḅịa, se nemikase mịna ḅụ anịkanịka mịna namama ḅụ ọ́mịna mengi ḅu wu omi-ẹ ḅẹḅẹ wa gbẹịnḅịa—wa ọ́ ḅara ḅiye anị tolu ḅọrọ kẹngẹ-ẹ.”

²⁰Idọm apụma ḍukoḅarị se ḅẹmẹ, “Wa ḅerenikẹ!” se ini kụrọ ọmụogbo se mun owu seni Izrẹlapụma pakamẹ.

²¹Idọm apụma ini ḅereni Izrẹlapụma pịrị se ini inia nyọ ḅọrọka ẹrẹchị, Izrẹlapụma vinpịkị mun jịn ateli ọkịmẹ.

²²Bebe Izrẹl sẹ mị mgba Kedẹsh mị ḅụ ḅụọsin se mun Họ Tụndụ mị chuku simemẹ,

²³Idọm apụ eke mị ḅụ. Anịanga ḅụ Nyanaḅọ Ḅe nwọse Moziz ḅe na Erọn ḅe na ḅẹmẹ,

²⁴“Erọn ḅe à se Izrẹlapụma pịrịḅịa à nwọ ḅereni ama mị ḅie ọ̀ sọẹkẹ; ọ̀ fịḅịa, anịatịḅị ómine mama apụma ómine ị̀ya oloko mị na tụḅụrụmẹ Mẹriba mị ḅie.

²⁵Erọn ḅe na yayo Ẹleaza ḅe na ọkị iwo Họ Tụndụ mị tanjị,

²⁶se anịanga ḅụ Erọn ḅe oria agbamịẹ ḅụchụayema sin se àrị seni yayo Ẹleaza ḅe chụa. Erọn ḅe anịanga mị ọ̀ fịḅịaye-ẹ.”

²⁷Moziz ḅe Nyanaḅọ Ḅe tọn ḅara mị nwọ mịẹmẹ. Bebe sẹ mị mgba tọrụkuḅu ḅụ ini Họ Tụndụ mị tanjị iwo mun mẹ,

²⁸se Moziz ḅe Erọn ḅe ḅụ agbamịẹ ḅụchụayema sin, se àrị seni Ẹleaza ḅe chụamẹ. Erọn ḅe anịanga ọ̀ fịmẹ tụndụ mị ọgọnọ ḅụ, se Moziz ḅe na Ẹleaza ḅe na ideri koroḅomẹ.

²⁹Erọn ḅe ọ̀ fịsam nwọḅẹye mị, bebe Izrẹl sẹ mị mgba nwọ na sịkị, ḍin soi ini nwọse ḍụẹịn ḍin ọ̀ pịrịmẹ.