Read kirikeni Kịẹnḅịpị Ma 21 Bible Online

Kịẹnḅịpị Ma 21 - kirikeni bible

Kịẹnḅịpị Ma 21

¹Kenan ḅie Erad apụ amanyanaḅọ ḅe anị, Kenan mị ḅie chuku daọrụ mị ḅụ simeḅọḅe, naamẹ na Izrẹlapụma Atarim mị ḅụ ini ḅọrọ ḅoaḅẹ nwọḅẹ sịkị, ori owu se ini paka se dapụ kunsomẹ.

²Anị Izrẹlapụma yeḅereni Nyanaḅọ Ḅe pịrịye-ẹ: “Nemikase ị́ mịẹse wa mịnapụma nẹngịmamẹ ḅẹḅẹ, ini na inia opuamama na yekịẹnka ḅaraḅụ wa ini kansin se ị́ pịrịḅịa.”

³Nyanaḅọ Ḅe ori ini naamẹ ọ̀ pịkị ḅarachụa ini pịrị se ini Kenan apụma nẹngịmamẹ. Anịẹrẹchị Izrẹlapụma ini ḅaasin pịkị inia opuamama kansinmẹ. Ini nwọse nyọ mị chịnmẹ Họma.

⁴Izrẹlapụ Họ Tụndụ mị ḅụ so Awụ Tọrụ ateli mị mun mẹ, Idọm pẹkẹrẹ mị nwọ kanaḅọrọḅịa ẹrẹchị. Ọkụma ateli mị ḅie tomonima ḅarị ineda ye-inemakẹ,

⁵se ini Tamụnọ Ḅe na Moziz ḅe na ḅụ si-ọkwẹịn kọnmẹ. Ini Ịmbụrụmbụrụ se nwọ ḅẹmẹ, “Nde ị́ gose Ijipt mị ḅie wa ọkịpakụmaḅo se wa ḅo mị onwun ele ḅie fịḅịaye, fịye na mengi na ofori anga mị? Mịn yeḅụsọka si fịye mị wa ḅarị ineda inema anị fịẹkẹ!”

⁶Anị Nyanaḅọ Ḅe si oruwu ma fịrịma ini sẹịnmaye-ẹ, se Izrẹlapụma ḅụ tọn apụ àrị nwọ gbọḅamẹ.

⁷Tomonima Moziz ḅe ḍọkịmaḅo se nwọ ḅẹmẹ “Wa simịẹmẹ Nyanaḅọ Ḅe na ị́rị́ na ḅu wa kọn si ọkwẹịn mị ḅụ. Mịọkụ Nyanaḅọ Ḅe tẹkẹ se ọ̀ ma oruwu ma chịn àrị so.” Anị Moziz ḅe tẹkẹ tomonima pịrịmẹ.

⁸Anịẹrẹchị Nyanaḅọ Ḅe ḍuko Moziz ḅe pịrịmẹ na ori alapẹlẹka oruwu mịẹse gele chịn ḅụ sụka, mịẹse oruwu gbọ ḅọ goyegoye ineda anị ḍiki se ḍumoḅịa ọkụ.

⁹Anị Moziz ḅe alapẹlẹka oruwu mịẹ se anị seni gele chịn ḅụ sụkaye-ẹ. Oruwu gbọ ḅọ goyegoye ineda anị ḍiki se ḍumoḅịa.

¹⁰Izrẹlapụma somun Obot ḅụ pike simemẹ.

¹¹Ini anịanga so sịkị ini mun Abaịrim ḅụ kansara nyọma ḅụ pikemẹ, anị Moab apụ pẹkẹrẹ sime piri ele mị ḅie, ịrụapakapaka nyọ daọrụ ḅụ.

¹²Anịsịkị ini so mun Zirẹd Pẹsịkiri mị ḅie ḅụ pikemẹ.

¹³Ini anịanga wẹrịso se pịkị Anọn Tọrụ ọgọnọju mun Amọraị pẹkẹrẹ sọ piri ele mị ḅie pikemẹ. (Anọn Tọrụ mị anị eke pu Amọraị apụma na Moab apụma na pịrịye-ẹ.)

¹⁴Anị Nyanaḅọ Ḅe gbin Ọmụ mị ḅe Ḍiri mị ḍukopakụmaye na “Wahẹb ama Sufa ḅụ simeye mị na, Pẹsịkiri ma na, pịkị Anọn Tọrụ mị na,

¹⁵pịkị ọkị mun Ar ama mị la pẹsị-a kiri akasịkị ma na, mun Moab eke la na, ḅe ḅẹrẹ nwọ ḍukoye-ẹ.”

¹⁶Anị ju ḅụ ini so gbọrị anga mun mẹ ini nwọse anị chịnmẹ Tiḅe, anịanga ḅụ Nyanaḅọ Ḅe nwọse Moziz ḅe ḅẹmẹ, “Tomonima koḅiri koroma, à mengi se ini pịrịḅịa.”

¹⁷Anịsịkị mị ḅụ Izrẹlapụma mịn nime mị chumẹ: “Tiḅe ma, ọ́mịna mengi ọ́ nwọ pakụmaḅo; Se wa nime se anị kereniḅịa—

¹⁸Amanyanapụ awọma soku tiḅe mị Pịkị tomonima ḅe tịḅịdapụ ma na, Amanyanaḅọ amgbara se sokuye mị Pịkị inia amgbara ma na.” Ini pịrị ele mị ḅie so Matana mun mẹ,

¹⁹se anịju ḅụ so Nahaliẹl mị mun mẹ, se ini Nahaliẹl ḅụ so Bemọt mị mun mẹ,

²⁰se ini Bemọt ḅụ so Moab-apụ pẹsịkiri mị ḅe pẹkẹrẹ mị mun mẹ, Pisga Tụndụ mị ọgọnọju mị ḅu chuku ọrụ mị, anị tọrụ seni onwun ele mị damẹ.

²¹Anịsịkị Izrẹlapụma okunwẹngịapụ se Amọraị amanyanaḅọ Saịhọn ḅe fịrịma se nwọ ḅẹmẹ:

²²“Ḅereni wa pịrị wa ị́ya ama mị ḅie toluḅọrọ. Mine na mịna namama na wa ateli ogboku wẹrịso mun ọ́mịna ozu ḅie anịkanịka irumịẹ chịnmgbọlụ ozuma ḅie sọẹkẹ, wa pịkị ọ́mịna tiḅe ma ḅie mengi ḍu ḅuẹkẹ; ateli ogbo ḅụ mị wa sime nweni wa ọ́mịna eke mị ḅụ so sịkị laḅịaye-ẹ.”

²³Ọkụma Saịhọn ḅe ò ḅereni Izrẹlapụma pịrịkẹ ini oria ama mị ḅie toluḅọrọ. Ori oria ọmụogbo mị koḅiri se mun piri ele mị ḅie Jehaz ḅụ owu seni Izrẹlapụma pakamẹ.

²⁴Ọkụma Izrẹlapụ ini na tarakapụma ḅụ tọn apụ ọmụ mị ḅie nwọ ḅaamẹ, se pịkị inia ama mị ọkịmẹ Anọn Tọrụ mị ḅe ọgọnọju ḅụ sakị mun Jabọk mị la, anị Amọn apụma nyọ mị, anịatịḅị Amọn apụma ini kụrọma inia eke mị ḍụamẹ.

²⁵Izrẹlapụma Amọraị apụ opuama mamgba ini ọkị famamẹ, Hẹshbọn mị na pịkị àrị kelema ama mamgba na, se anịa ḅie angamẹ.

²⁶Hẹshbọn mị anị Amọraị amanyanaḅọ Saịhọn ḅe oria tịḅịda ama mị-ẹ, ori anị Moab amanyanaḅọ ḅe na ọmụ gbin se oria ama mamgba ọkị famaḅọḅe-ẹ, ọkịmun Anọn Tọrụ mị sọnị nwọ lamẹ.

²⁷Anịẹrẹchị nime chuapụ ma nwọ chumẹ, “Hẹshbọn mị ḅo, Amanyanaḅọ Saịhọn opuama mị! Wa ḅimẹ wa ọrị ini kpoto anị nama se anị pịkị ḅo chịẹḅịa ọkụ mị.

²⁸Gbọrị sịkị mị Hẹshbọn opuama mị ḅie Saịhọn ḅe oria ọmụogbo mị fịnị kọrị ọkụ se kọrị pakamẹ; Ar opuama mị anị nwọ kanmẹ Moab mị ḅie ḅụ, Pịkị Anọn mị ọgọnọju chịngịma ḅaakọsịmamẹ.

²⁹Moab apụ, anị ḅalafamaye sọ ọ́ pịrị ọkụ ḍiki! Ómine Kimọsh mị tẹkẹarị apụma ó ḅo faḅie sọsam! Ọ́mịna oru mị owuapụma se mun jịn sẹ ḅie saramẹ, Pịkị eremeni na sọ ọmụḅie Amọraị amanyanaḅọ ḅe kunsoapụ nwọ mịẹsam.

³⁰Ọkụma mịọkụ inia furo ḅieapụ ma ini ini ḅaafamasam, Hẹshbọn mị ḅie ḅụ ọkịmun Dibọn mị la, Nashim mị ḅie ḅụ ọkịmun Nofa mị la, Mẹdiba mị na kpeki ama mị.”

³¹Anịẹrẹchị Izrẹlapụma Amọraị apụ eke mị ḅụ ini simemẹ,

³²se Moziz ḅe ama ẹnyẹ apụ se sẹịnmẹ mun iḅiọkụ owuse Jiza opuama mị pakaḅịa ọkụ ḍọkịḅoḅịa ẹrẹchị. Izrẹlapụma anị ọkịmẹ pịkị anị kelema amama na, se Amọraị apụma desinmẹ anị anịanga angapụma.

³³Se Izrẹlapụma ini vinpịkị mun Bashan la ateli mị ḅie sọmẹ anị Bashan Amanyanaḅọ Ọg ḅe oria ọmụogbo mị na mun owuse ini pakaye-ẹ Edreị mị ḅụ.

³⁴Nyanaḅọ Ḅe nwọse Moziz ḅe ḅẹmẹ. “Ò ḍikiḅalafama. Àrị ị́ mịẹse ị́ ọ̀ nẹngịmaḅịa, oria tomonima na, pịkị ama mị na. Ị́ se Saịhọn, Amọraị apụ amanyanaḅọ ḅe mịẹ ọkụ se ọ̀ mịẹ, anị Hẹshbọn ḅie sime ḅẹrẹtọnḅọ ḅe.”

³⁵Anịẹrẹchị Izrẹlapụma ini Ọg be na, oria owuapụ awọma na, pịkị oria tomoni mamgba na ḅaafamamẹ, gbọrịḅọ sọnị kọn se ọ̀ tọrụḍinmakẹ, anịsịkị ini ḅo oria ama mị ọkị angamẹ.